ابوجبيهه

العمدة --جسدالثقافة

استعرض الموضوع السابق استعرض الموضوع التالي اذهب الى الأسفل

العمدة --جسدالثقافة

مُساهمة من طرف الحازمي في 7th مارس 2013, 15:34

العمدة


جلس ابو عرام متكأ على يده اليسرى ، في قهوة العمدة ، قابضا بيده اليمنى على لي الشيشة ، يسحب من خلاله أنفاس الجراك ، الذي يحترق في رأس الشيشة ، وبدت له فكرة غريبة !! ؟؟

" ماهي العلاقة بين رأسه ، ورأس الشيشة " ؟؟ مالفرق بينهما ؟؟
وبينما هو مستغرق في نظريته "الدياليكتية" ... هبط عليه فجأة العم حمزة ..

العم حمزة - السلام عليكم ..
ابو عرام - وعليكم السلام ، الله يحييك ، فينك ياشيخ من زمان ماشفناك ، وإلا القهوة ماعاد تناسبك ؟ وإلا إيه ؟ لا تكون لقيت لك قهوة تانية ، ولا خبرتنا ؟؟

العم حمزة - قهوة تانية ؟؟؟ ... ليه هو العمدة مات ؟ وإلا نقلوه ؟
ابو عرام - الله الله ؟ إيش دخل العمدة في حكاية القهاوي ؟
العم حمزة - ليه هو إنت ما تعرف إن القهوة هي قهوة العمدة حق وحقيق ؟ وإلا فاكر أخينا سماها قهوة العمدة بالبركة ؟ .. هوا لولا إنها قهوة العمدة .. كان صاحبنا يقدر يخليها في وسط الشارع ؟ ولا أحد يكلمه ، ليه هو إنت نسيت نظام العمدة ، وإلا إيه ؟ ... ممنوع يعني ممنوع .. وإللي يحب يستمتع بالجو الجميل والجلسة الهادية .. مافي غير قهوة العمدة .
ابو عرام - إنت باين عليك زعلان من العمدة . وإلا إيه ؟ لازم لك حاجة عنده .. وماسواها لك ؟
العم حمزة - لا .. الحمد لله مالي شي عنده ، ولا لو حاجة عندي ، الله يكفينا شر الحاجة .
ابو عرام - إنتو كدا طول عمركم : ماتشوفوا غير الحاجات السيئة في العمدة ، والحاجات إللي سواها للحارة كلها نسيتوها .
العم حمزة - يعني هو سواها بفلوسه ، وإلا من فلوس الحكومة ، الله يخليها الحكومة أعطت ، وهوا سوى ، وبعدين هذا شغله ، وإذا ما يبغى يشتغل يتوكل على الله ، على الأقل يمكن العمدة الجديد ، يفتح كازينو بدل القهوة البلدي هادي ، إللي ماتمشي مع التطور ..
ابو عرام - إنت خرفت ياعم حمزة ؟ يتوكل على الله ، يروح فين ؟ .. وبعدين مين ينتبه للحارة ؟
عم حمزة - ينتبه للحارة ؟ يعني الحارة مافيها أحد غيره ؟ ليه هماحريم البلد ماولدوا غيره ؟ وإلا إيه ؟ يخس على هادي الحارة ، إذا كان ماتقدرتجيب غيره .
ابو عرام - انا ماقلت لك ؟؟ لازم لك حاجة عنده وما سواها لك
طيب انا عندي حل .. روح لعم حسن وكلمه عنها .. ترى كلمته مسموعة عند العمدة ، خصوصا إنه من البشكة حقته طول الليل يدقوا بلوت .. وهات ياشيشة .
عم حمزة - عم حسن ؟؟؟ عم حسن مين ؟؟ لا يكون قصدك الواد إللي كان يشتغل فراش عنده.. في المكتب ، ورقاه وسواه " نقيب " . هوا لحق يسير عمنا كمان ؟ هوه دا يفلح في حاجة غير يعبي راس الجراك ، دا يمكن رأس الجراك أنظف من رأسه ! وإلا هو ماشي مع مبدأ : -
" الجراك المناسب في القهوة المناسبة ، في القعدة المناسبة" .
ابو عرام - والله جبتها
العم حمزة - هيه إيه إللي جبتها ؟ إنت شايفني جايب شيشة معايا ، وإلا إيه ؟ وإلا فاكرني زي العمدة ، طول الوقت واللي في فمه ، عشان يلاقي عذر وما يتكلم ، أصلو .. لما يفتح فمه .. ما يقول غير " حكم " أو " صن " أو " إكة " ..
ابو عرام - انا ماقصدي الشيشة .. انا قصدي حكاية رأس الإنسان ورأس الجراك ، إيش الفرق بينهم؟
عم حمزة - الفرق ، بين راس الجراك وراسك .. إثنين :-
اولا : راسك فاضي ، وهو مليان جراك
ثانيا : راسك عليه عمامة ، وهو عليه نار ، ومع ذلك يستحملك إنت وأشكالك ، تحرقوه عشان تملوا رووسكم دخان .
ابو عرام - إنت باين عليك قايم على يدك الشمال اليوم ؟؟ وإلا تلاقي أم البزورة منكدة عليك عيشتك من الصبح !
عم حمزة - طبعا منكدة علي عيشتي ، هما عندهم شغل غير التنكيد علينا ..؟؟ والعياذ بالله ، هي دي حياة ؟ الواحد يصبح من الصبح ، يقول يافتاح ياعليم ، وهي تجي تقوللي .. يبغا لك تشتري ثوب لونه ازرق ، انا البارح كنت سهرانة ، عند ستات ، وسمعتهم يقولو إن العمدة .. راح يطلب من الناس ، يلبسوا ثياب لونها أزرق ، لأنها تتحمل الوسخ ، أولا .. وبعدين اللون يمشي مع لون البحر ياخويا .
ابو عرام - ثياب لونها أزرق ؟؟ والله عشنا وشفنا ، يارجال يامخرف ، إنت تصدق كلام الحريم ؟
ما إنت عارف إنهن ناقصين عقل ودين ؟
عم حمزة - والله إنت اللي ماعندك عقل على طول ، قال كلام حريم قال .. بكرا تشوف و تعرف ان الحريم حقوننا اشطر من ال سي أي إيه حقت الأمريكان !
ابو عرام - هادا طق حنك وكلام حريم ، انا العمدة ماشفته من كام يوم ، يمكن مسافر .. بس هما مين فين جابوا هادا الكلام .. قال ثياب زرق قال ؟؟
عم حمزة - الكلام يجيهم بالتلفون العربي .. يعني فلانة قالت لفلانة .. وفلانة حلفت لفلانة إنها ماتقول لأحد .. إلين جات الولية ، ونكدت علي من الصبح ، قال أشتري ثوب أزرق ؟ طيب إللي مايشتري ثوب أزرق يسووا فيه إيه ؟ هو العمدة راح يرشوا بالبوية الزرقا غصب عنه ؟؟
وبعدين العمدة لا مسافر ولا حاجة .. تلاقيه زي العادة قاعد في البيت يخطط .. عشان السنة الجاية نلبس ثياب خضر ، تمشي مع لون الشجر في اسبوع الشجرة ، وجانا معاه الناموس والذبان ، عشان بيسقوه موية صحية .. وبعدين ياخويا انا سمعت إنه بيدرس .. وبيحضر هادي إللي إسمها .. ؟؟ زي الدكتورة
ابو عرام - يدرس ؟؟ يدرس إيه ؟؟ بعد ماشاب ودوو الكتاب !!
عم حمزة - بيقولوا بيدرس تاريخ القهاوي في الحارة ، عشان يرفع من مستوى القهاوي ، حقته .. انا عارف هو فين الوقت إللي عنده عشان يدرس فيه ؟؟ وإلا يمكن من الشهادات الجاهزة .. زي الحوت إللي من سوق الخواجات ( سوبرماركت ) ..إللي مكتوب عليه " مذبوح على الطريقة الإسلامية "
مادام الحوت بيدبحوه على الطريقة الإسلامية، كمان الشهادات الكبيرة ، يمكن الواحد ياخدها على الكطريقة البلوتية .. زكللو حكم وإلا صن ... وقيد في الورقة .
ابو عرام - هو أنتو كدا ، لا يعجبكم العجب ، ولا الصيام في رجب !
عم حمزة - اصله الناس ماصاروا يصومو في رجب ، صاروا يستنوا الميزانية ، يمكن فيها زيادة رواتب ، وإلا مشروع من هنا ، وإلا من هنا ... يترزقو ياكلو عيش ، ياعمي !!
ابو عرام - والله ياعم حمزة إذا كان كلام الحريم صحيح ، أنا في رأي نكلم عم حسن ، نخليه يكلم العمدة ، على الأقل يخللي لون الثياب اسود زي الزفت حق الشوارع ، ماهو حتى الشوارع صارت مزفتة .. والحمد لله
عم حمزة - وزفت إيه ، وكلام فاضي إيه ؟؟ هذا كللو موقت .. ولما تجي المطرة حقت ربنا ، تكشف المغطى والخربان . كلله موقت ، إلا العمدة والنقيب ، آخذين عندنا تأبيدة ، ما يحللوا عن سمانا .. يمكن ربنا يفرجها علينا .. حتى البرحة إللي كنا نلعب فيها ايام زمان ... شالوها ، وأعطوها ما أدري لمين ؟ سواها دكاكين ، كبيرة وصغيرة ، كأننا ناقصين دكاكين !! قال إيه الدراسات أثبتت إن البزورة يلعبوا فيها ويزعجوا الجيران ... طيب بزورتنا يلعبو فين ؟؟ لازم نوديهم الهايدبارك حق الإنجليز !! عشان يشمو شوية هوا ؟؟ طيب ماهي الدكاكين بتزعج الناس ، انا ماني لاقي مكان اربط الحمار فيه .. صار الواحد فينا يمشي ويترقص يمين وشمال ويمين ، حتى الواحد فينا ما صار يعرف يمشي مستقيم .. ولو مشي مستقيم ، الناس تضحك عليه ، ويفقولو عنه مغفل !! ما يعرف يمشي زي الناس .ابوعرام - ياشيخ سيبنا من هادي السيرة ، ترى راس الجراك انحرق وزأنا ماشميت ريحته (ياقهوجي .. عبي حجر ، واربعة اسود ونعنشو ) ، وإلا قوللي كيف حال البزورة ؟؟ إن شاء الله ماشين في المدرسة طيب ؟ أحسن الإمتحانات قربت ..
عم حمزة - بزورة إيه ؟؟ ومدارس إيه ؟؟ هم البزورة صارو بزورة ؟؟ ,أوا المدارس صارت مدارس؟
يابويا بزورتنا ، صارو محل تجارب ، كل يوم يجربوا عليهم حاجة جديدة .. يوم رياضيات حديثة ، ويوم مدرسة شاملة !! ويوم يعطوهم سليق سويسري ، ويوم يطلبوا منك صك إنك فقير ومحتاج ، ويوم يفكرو ينقصوا سنين الدراسة ، أهو الدنيا ماشية على ورا... .. زي شخاخ البعير...
ابو عرام - إللا فاكر كتاب خالة خديجة ، فاكر ايام زمان لما كنا ندرس عندها ؟؟ وفي الفسحة نقطف لها الملوخية ؟؟ والله كانت ايام حلوة ..
عم حمزو - ايام راحت وما راح ترجع خلاص .. كل يوم نسمع خطة القوى البشرية ، قوة الشفط والإمتصاص ... الخ قال قوة بشرية ناقصة ... ليه هما البشر راحوا فين .. شوف ماشا الله تبارك الله ، كم مدرس عندنا في الحارة ؟؟ وكم مدرسة من بنات الحارة ، يعني لو يخللو البزورة الصغار بنات وأولاد يدرسوا مع بعض في مدرسة واحدة ، وتدرسهم واحدة من بناتنا .. يزيد عندم مدرسين الإبتدائي... بس هما بصراحة حقون تعليم الأولاد خايفين يكون واحد من البزورة كبير شوية ... يعني مو حق مدرسة .. !! يا أخي يخرجوه بالقوة .. يا يشتغل ، يايروح تدريب مهني .. إللي دوبهم إفتكروه ، وصارو يسووا لو دعاية في التلفزيون .. وإذا كان خايفين على الأستاذة ... إحنا برضو نخاف عليها .. ماهي بنتنا أساسا .. ماهي بنت لوزارة .. ياعمي يخللوا الإبتدائي خمسة سنين ، وبدل البزورة مايدخلوا وعمرهم 7 سنين ، يدخلوها وهم اولاد 6 سنين .. يعني الولد يتخرج من الإبتدائي .. وعنده 11 سنة .. ماهو كبير .. وما يقدر يشتغل .. لازم يدخل متوسط ، وإلا مهنية .. لغاية ما يصير عمره 17 سنة .. طبعا بعد الإبتدائي .. يفصلو الأولاد عن البنات ... لكن والله اعلم حقون تعليم الأولاد ، ما يبغوا يخسرو المدارس الإبتدائية ... كفاية خسرو التليم العالي من فوق ... بعدين يعيشوا كيف ؟؟ بدون مشاريع إبتدائي ، ولا جامعي .. يعني يصبحو من ذوي الدخل المحدود
ابو عرام - عليك نور ... جيبتها ..
عم حمزة - إنت ياواد إيش بك قشعرتي لي جتتي .. شايفني شايل قفة وإلا زنبيل .. كل شوية ... جبتها .. جبتها ..
ابو عرام - قصدي ذوي الخل المحدود ، لا زم العمدة ما اعطاك ارض في مخطط الدخل المحدود ؟؟ وعشان كدا زعلان منو ، وشايل علبه شيله ؟؟
عم حمزة - هوا انا مجنون آخذ في مخطط الناس إللي دخلهم محدود ... وبس هما مو محدودين ؟؟
دي يابونا في آخر الدنيا ، وانا عمري خلاص محدود خلقة .. يعني عبال ماتطلع المنحة ، تكون روحي طلعت .. انا يكفيني متر في مترين ، والحمد لله بناءالقبورمن مسئولية الحكومة .. وإلا كان الدفن صار على الواقف .. يادوب نص متر للواحد الميت ..
ابو عرام - عمر إيه ياعم حمزة ؟؟ ماشاء الله صحتك زي البمب ، وإن شاء الله نفرح بيك من جديد ، وإلا ما عندك نية ؟؟
عم حمزة - نية ؟؟ نية إيه .. هو أنا في أمشي على رجولي ، علشان اتزوج ، وإلا فاكرني ساكن في شارع الأصباع ، تدليك بلاش .. ! على فكره .. هو أصباع مين فيهن ... أكيد ماهو أصباع ابو علي .. وإلا كان فضحهم بقصيدة .. يقول فيها ...

Read more: http://aljsad.com/forum36/thread152680/#ixzz2MrB1qpvy
avatar
الحازمي
نشط مميز
نشط مميز


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى