ابوجبيهه

معليش يا عيد...شوفو الظروف كيفن حرمتنا منكم...!

استعرض الموضوع السابق استعرض الموضوع التالي اذهب الى الأسفل

معليش يا عيد...شوفو الظروف كيفن حرمتنا منكم...!

مُساهمة من طرف علي احمد علي شرف الدين في 15th أكتوبر 2013, 22:13


نعم أيها الأحباب الحباكيين إنها الظروف ..فرقتنا زمانا ولكن  يظل القلب ينبض حبا وشوقا إليكم

والدليل ها نحن اليوم ورغم صعوبة التواصل معكم , نتسلل بأطراف الكي بورد والماوس كيما  نعانقكم بحروفنا

علنا نروي هلعنا الجامح لمعانقة منتداكم  العامر....

 وبرضو الظروف حرمتنا منكم ....!

 اهلي العزاز  نختلس هذه السانحة  و بكل الود والمحبة  ابارك لكم  العيد 

 ونسأل الله أن يعيده علينا وعلى الأمة الإسلامة قاطبة وعلى أهل السودان بالخير والسلام والنماء والتطور

 

وتحياتي لأسرة المنتدى : عم محمود منصور / الفاتح ود محمد توم / أبو الزهور / ياسر / ود حتيلة / ابو هريرة / وبت عبيد

ود كمبال الغريق / ود النو/ عم شاويش / الطيب كندة/خدورة أم بشق/ وابو سارة .......وبقية العقد الفريد من أعضاء المنتدى

مع خالص ودي.........

وأهديكم هذه القصيدة



 



 



 




يا عيد معليش

شعر : هاشم صديق














(1)
سبحان الله.
ناس يا عيد
بِتْضَحي خروف
وناس عدمانه
كفاها الشوف
وناس تعبانه
تفتش تيس
وناس يا عيد
بِتْضَحي ( رئيس ).
......
ناس ما عندها
غير سكين
الحال مسكين
فضيان الجيب
وخروف
في الغيب
وكيس حلمان
بي دستة عيش
.............
يا عيد معليش
الناس الرؤسا
الناس الوزرا
الناس الخُلفا
أي معالي
حاشية ووالي
الناس المارقه
الناس الخاشه
ولاد السُلطه
شمار البوسطه
الناس الحاشّه
قاشره وغاشّه.
جناب الأُمرا.
كبار الخطبا.
ملوك السف
وحتى العُوَرا
الكانو الرف .
قرود الشاشه.
الجَهَلا الباعو
عشان العيش .
ديل يا عيد
الصف الأول
ونحنا تملي
الصف الطيش
...........
يا عيد معليش
سبحان الله
ناس مزرورة
تَمِش شقيش؟!
لا كعكة طريّه
أو حتى حلاوه
في كيس وقوية
لا خروف مربوط
لا ربّه تجوط
لا ضلعه وشيّه
لا كبده بشطه
هشّه ونيّه
لا راس بقرون
مجدوع في خيش
لا كراع لا ( باع )
لا عتوت لا تيس.
.........
يا عيد معليش
ده قدَرْنا مسطر
وناس تتفنجر
للشعب العربي
تسدد خنجر
وتضحي رئيس
يا عيد معليش
..........
(2)
ياتو عيداً
جانا قادل
والحَلِق ما فيهو
غَصّه
وكلو دمعه
وكلو وحّه
وكلو قرصه
ليها قصه.
........
كم (خليفة)
دسّ من عينّا
الرغيفة ؟!
وكم إمام
باع وجعنا الغالي
في سوق الكلام ؟!
وكم (غُلام)
ساقنا زي زفّة هوام
وطاش وكضّب
في منصه ؟!
وكم (شريك)
باس جرحنا
في أي مِحْنه
وضاق عَرَقنا
وتفّ حسه.
... ... ...
كلو عيداً
زار ولفّ
والفرح مسكين
وهاجد في محّفه
السادة( سادرين )
في النعيم
والشعب دايخ
وراسو لفّ.
... ... ...
إلا عيدنا
أكيد وجاي
ماكان عذابنا
رخيص وساي.
الأمل زاد المسارب
الشمس ترجع
تبارز في المغارب
الجموع تصحا
وتْصارع
الوطن مربوع
وفارع .
الفعل ما بيبقى
ماضي
ديمه بتْنفّس
(مضارع)
راسو مرفوع
في المنصة.
(3)
ضحيتّ
وكان كبش الضحية
خروف وهم
جركانة زيت
من رف خَبَل
ورسمْت في ورقه
البصل
ودبّرت في الأحلام
فحم.
عيدين وانا ( الحاج)
المهرول
بين (صفا) الكعك
المحال
و(مروة) الشوق
للّحم.
كلو عيد وانا زفّه
في الغيظ والأذية
راجي عيداً
ألقى فيهو الفرحه
واقع
والمباهج أبجدية.
حُرية في شفق
الصباح
وسُترة في الأيام
هدية
...
كلو عام
وانتو (شاهد)
ما ضحية .


avatar
علي احمد علي شرف الدين
نشط مميز
نشط مميز


الرجوع الى أعلى الصفحة اذهب الى الأسفل

رد: معليش يا عيد...شوفو الظروف كيفن حرمتنا منكم...!

مُساهمة من طرف محمود منصور محمد علي في 16th أكتوبر 2013, 01:35


الاستاذ علي شرف الدين

كل عام وانت بالف خير وصحة وعافية وامن ورفاهية

وعذرك مقبول جدا وكما يقال ان للقدم رافع ايضا للقلم دافع المهم الف حمدا على سلامة الظهور بعد الغيبة ونسال الله ان يديم علينا نعمة التواصل والمحبة والاخاء الصادق

عاطر التحايا واصدق الامنيات


<br>
avatar
محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

رد: معليش يا عيد...شوفو الظروف كيفن حرمتنا منكم...!

مُساهمة من طرف ابوهريرة عثمان عبدالسلام في 16th أكتوبر 2013, 15:06

أخونا الأصغر على احمد على شرف الدين 
كل سنه وانت طيب 
ونتمنى ان تكمل مهمتك وتجد كل الاحوال أصبحت احسن 
بوطن ام ينعم بسلام وآمن ورفاهيه
ويتحقق كلام الأستاذ هاشم
avatar
ابوهريرة عثمان عبدالسلام
مشرف المنتدى الاسلامى
مشرف المنتدى الاسلامى


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى