ابوجبيهه

آمنة الفي الضمير ازياني

استعرض الموضوع السابق استعرض الموضوع التالي اذهب الى الأسفل

آمنة الفي الضمير ازياني

مُساهمة من طرف Hassan Khalil في 1st نوفمبر 2009, 14:16

كده ياجماعه شوفو الكلام ده (تراث),حبيت هذه الاغنيه من زمان كان يغنيها اخونا عاطف في حفلات ابوجبيهه,ممكن تستمعو ليها من الفنان سيف الجامعه.

يا ريح الصباح الجيتينا من أبو سالف
كيف سبيلها خيولا سيدها عابد وكالف
الخلاني فوق نيران جهنم خالف
حار بالحيل فراق الزول بعدما يوالف
شبكتينا يا آمنة وشبكتي الناس معانا
في شباك شبك شبكت شبايكومعانا
لبست التوب شبك في شبايكا وشابكانا
والداير الشبك يجدع شبكتو معانا

في عينيها عالم تاني ما شفتوها ياخلاني
زي لون آمنة ما لاقاني ما ماشفتوها ياخلاني
يا خلاني.. .
في إيدي الحرير مساني
ومن يوم داك جاني الجاني
ما شفتوها يا خلاني

تعالو اسمعوني خبارا...المن النسيم تضارا
شالت من كبيدتي مراره ...امونه اخمجي الداره
خلت ناس فلانه حياري ماشفتوها ياخلاني

الدر في سنونها لالي ماشفتوها ياخلاني
والعناب لهيجها الحالي ماشفتوها ياخلاني
الكمل صبرنا الغالي...وودر عمرنا الغالي
شوف عينها كاوي وضاوي ماشفتوها

Hassan Khalil
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

عاطف ود الخليفة مصطفي الشفيع

مُساهمة من طرف أزهرى الحاج البشير في 1st نوفمبر 2009, 15:22

الكمل صبرنا الغالي...وودر عمرنا الغالي
شوف عينها كاوي وضاوي ماشفتوها

شكرا أمير الحسن

أستمتعت بها من سيف الجامعة والذي يحزنني إننا لم نسمع لعاطف ونحن فى المهجر البعيد ، لم أسمع لعاطف إلا أغنية ياريت لترباس وأجاد عاطف ... عاطف ورث الصوت الشجي من أسرته .. ليتكم سمعتم العم مصطفى يشدو مساء كل أثنين وخميس بأعذب الإنشاد الختمي الصوفي البديع

إله يا رافع الرتب .........
وألم ترى بأن الله قد أسرى بعبده .......

رحمك الله أبا الشفيع ... المفروض أبا خضر ولكن الوالد كان ينادي عم مصطفى هكذا .. وأنا صغير دون العاشرة أعرج على دكان عمنا العبيد الحاج وداعة الله وعم مصطفى جالسا فى كرسيه المعهود ( فى الخريف طبعا عم مصطفى فى المواسم مشغول جدا ) والمشغول بحبال السعف غير بعيد من عمنا أحمد أبوسكينة وأنا أناديه أبو الشفيع هكذا دون تحرج .. يضحك عم مصطفى بملء فيه قائلا : إنت جان مصّرم .

أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

رد: آمنة الفي الضمير ازياني

مُساهمة من طرف محمد قادم نوية في 1st نوفمبر 2009, 16:00

حلوة والله انا زاااااااتي اذتني آمني دي

محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

سبب الذي

مُساهمة من طرف Hassan Khalil في 1st نوفمبر 2009, 16:36

انت مافي حاجه ازتك غير ال ...... ديل لو خليتهم حتكون كويس Rolling Eyes تحياتي

Hassan Khalil
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

اغنيه من التراث(الهادي حامد ود الجبل)

مُساهمة من طرف Hassan Khalil في 2nd نوفمبر 2009, 15:10

ولد ابوي نويه كده شوف اغنية التراث دي اكيد حتعجبك.

ماشفنا الاسد بلاعب الجاموس
وماشفنا المرق بدخلو عرق السوس

حجبوني تيراني ياقاصدين لماي انا طرقوا لساني

مك ود مكوك من اربعين طاقيه
وابواتك قبيل جابوها بالزنديه

حجبوني تيراني ياقاصدين لماي انا طرقوا لساني

حلال المضيق وقت الخيول يتشبكن
رباي للضعيف قشاش دموع الببكن

حجبوني تيراني ياقاصدين لماي انا طرقوا لساني

تركب صافنات نجيبها ضرعانيه
اصلو الزول بموت والزكري تصبح حيه

http://www.sudani.ws/music/alhadihamidwadaljabal/alleel_maby_lay.html

Hassan Khalil
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

رد: آمنة الفي الضمير ازياني

مُساهمة من طرف nashi في 2nd نوفمبر 2009, 15:28

حلال المضيق وقت الخيول يتشبكن
رباي للضعيف قشاش دموع الببكن


ده كان زماااااااااااااااااااااااااااااااااااان ...ولا شنو؟ Very Happy Very Happy Very Happy

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: آمنة الفي الضمير ازياني

مُساهمة من طرف أزهرى الحاج البشير في 2nd نوفمبر 2009, 15:36

بُنيتي إحسان

لم أسمعها بعد ولكن أجزم بأنها بعض من رائعة العبّادي المك نمر ... والتي مطلعها

قال طه :
أخوك يا ريا وكت الخيول بدبكن
أخوك يا ريا وكت الرياح يتشبكن
أخوك جبل الثبات وكت القواسي بحبكن
كم بكيت وكم قشيت دموع الببكن
قالت ريا :
وراك اسود علي مانمت اسع طيب

قال طه :
بسم الله قولي اخوك طيب
نصيح وشديد حاضر قلبي ماهو مغيب
إلا الشفتو في النوم من هوايله يشيب
الزول في الصحي مخدوم عليه شقاهو
وإن غمض شوية تجي الهموم لاحقاهو
الصف ابلبوس أنا ما بخاف لقاهو
ياليت الحلم في صحايا كان بلقاهو
قالت ريا :
كعب نوم النهار أمس العصير كنت نايمة
رأيت قدام الفريقنا أشوف صقوراً حايمة
كبيرن غار علي من نومي تبيت قايمة
صحيت مهجومة لا مفصل ولا في القايمة

أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

رد: آمنة الفي الضمير ازياني

مُساهمة من طرف nashi في 2nd نوفمبر 2009, 15:41

واحفظ منها ..
سلام يا مك دار جعل سلام
نحنا رزينا
وبي موت ود دكين كل القبيلة حزينه
امُحمَد بقول بي نسبك اتعزينا
رسل لنا طه قبال تجي تعزينا

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: آمنة الفي الضمير ازياني

مُساهمة من طرف أزهرى الحاج البشير في 2nd نوفمبر 2009, 15:50

ولك بقية ما ألصقت أعلاه

قاليها طه :
إنتي كمان رأيتي صقور عبارة غريبة
علامتاً كافية ظنيت الحكاية قريبة
هاك مني الصحيح الما بتدخلو الريبة
هادي الحلة بي عيني أشوف تخريبة
قالت ريا :
تف الشينة ليه فاجعني ليه يا طه
أنت الدغري وأنت الكاشفه ياك غطاها
كان الدنيا هادي العقبة تتخطاها
ما بضلل سماها وما ابتشيلني وطاها
وقعدت تبكي
رد عليها طه وقال :
ما بفيد البكاء وكلامي أحسن تنسي
قالت ليه ريا :
كيف ما ابكي وكيف أفوت مراتع انسي
أفقد كل شيئ عزي ورجالي وانسي
تطلق فوقي نار عقبان تقول لي انسي

قال طه :
فال الخير أخير ماشفنا شيتا جدت
كل الشفنا أحلام في طريقة إتعدت
قبل الليلة إيد لحمان قط ما إتمدت
ما بنهد شرفنا لو السماء إنهدت

والفال السمح فالك يضوي مراحك
بالضيفان أشوفك عامر تملي مراحك
شينك ما أشوف أشوف هناك وافراحك

قال طه :
خير الزول يقول مهما الأمر يتهول
قالوا الناس علي فالوا الحلم يتأول
غاية الحي فناه كان قرب إن طول
يترك ذكري والناس الوري بتتقول
قالت ريا :
وريني الحلم التورك مذهول

قال طه :
اصبري لي أروق حبل الفكر مبهول
احكيلك شنو الشفتو والله مهول
شفت الوحدة شفت النار وشفت الهول
احكيلك تمام الشفتو ما بتغابة
جايين العصير أنا وإنتي من الغابة
سايقة ليك بهم قدامي بي رقابة
بينا والفريق إتولعت تقابة
قدر ما نشوف قدامنا نلقي حريق
وقت النار علت ما شفتا تاني فريق
باصرنا المروق ما لقينا لينا طريق
تشكي من عطش وأخوك ناشف ريق
فترتي قعدتي وانا محتار جلست وراكي
حاقبة الدرقة ختيت سيفي فوق أوراكي
وكت بعد البهم لي قسعتو قمتي براكي
قسعتي وجيتي ومعاك كور صقور تبراكي
تبيت بي عجل شافني جفلن وطارن
غابن من عيوني وفي اللعوت اتضارن
ما غابن كتير جن يقدلن يتبارن
قدامن كبيرن عاينني وغارن
سل السيف ولاقاهن أخوك يا الضامرة
تور عنز أم هشيم الفي المجامع دامرة
سيل تلوي اندفق فوقو السحائب هامرة
حجر الصاقعة أخوك فرتاق الصفوف العامرة
بادرني الكبير ديك إستعدن وقفن
ما مهلتو طار راسو وجناحي يرفن
طارن ديك وكت بي ريشو رقد إتكفن

أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

رد: آمنة الفي الضمير ازياني

مُساهمة من طرف nashi في 2nd نوفمبر 2009, 16:09

قرأت عن تاريخ الملحمة هذي ورغم قدمها الا انها كل ما تقرأها تحس انك تقرأها لاول مرة
الله يديك العافية عمي الغالي


عدل سابقا من قبل nashi في 2nd نوفمبر 2009, 16:09 عدل 1 مرات (السبب : خ.م)

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


صلاحيات هذا المنتدى:
لاتستطيع الرد على المواضيع في هذا المنتدى