ابوجبيهه

حركات بعاعيت

استعرض الموضوع السابق استعرض الموضوع التالي اذهب الى الأسفل

حركات بعاعيت

مُساهمة من طرف osama osman في 7th مارس 2010, 16:42

*******************
بعد ان قرأت كتاب رحلة ابن بطوطة.. وقفت محتار ومتمحن.. عند الحتة بتاعت انو زار ارض السودان.. وزار مكان فيهو ناس بياكلو لحم الناس.. بعاعيت يعني.. سحاحير.. والبعاعيت ديل قال بيحبو ياكلو لحم النسوان.. وفي لحم النسوان اكتر حاجة بيحبوها هي الكفين والثديين.. ما عارف حكمتهم في كدي شنو؟



بعد قراءة الكتاب وتمعن فينا نحن معشر السودانيين.. قربت اصل الى انو نحن أحفاد هؤلاء البعاعيت ما فيها اتنين تلاتة.. لقيت اننا ربما نكون الشعب الأوحد على وجه الأرض بياكل لحم ني «المرارة» ـ الكبدة ـ ام فتفت ـ الكرشة».. وبعض البعاعيت مننا ياكلو سن البرك.. وهي منطقة تلاقي الضلوع عند الصدر.. الحقيقة الحتة دي مغرية للاكل نية.. وتستاهل مني كل ثناء واحترام.



الكرشة خلقها ربنا عشان تهرس الأكل وتهضمو نجي نحن ناكلها نية ونهضمها كمان.. اها في بعوتية اكتر من كدا؟!



تنتابني مشاعر بعوتية.. عندما اقف عند جزار وهو يقطع في اللحمة بدون ما اشعر ألاقي ريقي جرى وبطني كوركت.. ولولا الخوف من شيل الحال اشيل لي حتة لحمة نية واكلها..



اما حكاية اكل الكفين عند بعاعيت ابن بطوطة.. وجدت اننا استعضنا عنها باكل الكوارع.. فقلما نجد سوداني لا يحب الكوارع مما يثير لدينا رغبة قديمة وموروثة وهي اكل مزمزة الكفين.. خصوصا كوارع الضان.. وشوفو المتعة في وش اي زول بياكل في العضام الصغيرة الفي كوارع الضان.. متعة بعاتي ما فيها شك.. تلقاهو ياكل العضم ويمصو ويملصو من خشمو في الصينية او الطربيزة بكل متعة.. وينف.. ثم يتناول الذي بعده يسوي فيهو ما سواهو في اخوهو.. في اللحظة ديك لو سألتو من اسمو ما حيتذكرو ليك.

ا

كل الثدي يتضح جليا.. عند اطفالنا الرضع.. تلقى الشافع وهو يرضع وفجأة وبدون مقدمات يعضي امو.. وهو سلوك بعاتي موجود في اطفالنا.. يدحض فرضية نظرية فرويد.. الشافع يعضي امو.. والام عشان تكبح جماح هذه الرغبة البعاتية.. ترصع الشافع في ضهرو وتقول ليهو «احي.. الله يازاك» بالمناسبة.. كلمة احي دي.. هي كلمة بعاتية من صميم قاموس البعاعيت.. على حسب ما ورد في الاحاجي..



لكي اتأكد من ان كل رضع الدنيا بيعضو اثداء امهاتهم.. وهروبا م ن فكرة اننا بعاعيت.. سألت بعض الاخوة العرب.. ذكروا انه ليس لدى اطفالهم هذه الحركة البعاتية.. وحتى انو في واحد مصري قال لي.. وهو مطير عيونو: «ايه يا زول.. اوعى يكون اطفالكم بسووا كدي؟.. « نهرته وزجرته وانا استشيط غضبا وقلت ليهو «افو.... انت قايلنا نحن بعاعيت واللا شنو؟» وبيني وبين نفسي اتأكد انو نحن بعاعيت اولاد بعاعيت احفاد بعاعيت.. وقاعدين نلد بعاعيت.. الله يجازيك يا ابن بطوطة كان داير تشككني في نفسنا.. وتجنني وتركبني القصبة.



اما اكل البني آدم وعلاقتو بثقافتنا وسلوكنا.. البنحاول نهذبو.. خدو مثلا.. اتحدى اي واحد او واحدة.. يشوف ليهو واللا تشوف ليها شافع صغير وسمين ومبغبغ وعندو جضوم.. بطنو ما تفور عليهو؟.. ويكون عاوز يجضمو.. او يعضيهو في جضومو.. واعتقد ان اسلافنا البعاعيت كانوا بيستعملوا الجضيم في الجس.. ويعرفوا مدى سمن هذا الزول.. زي ما نحن حسي بنجس الخروف من ضهرو.. وما الجضيم للشفع الا هو جس مبطن.. واحيانا الواحد يلقى نفسو بطنو فارت على زول كبير وعاوز يجضمو علا خايف بس.. وخجلان..



اما في النضم تلقى جملة زي «اكل لحمي» او «اكلت لحمو».. و«ايدي اكلتني» و«قلبي اكلني» في الاغاني.. غ نية «يوم طلعت القمرا».. يتضح الاكل والبلع للزول جد جد.. في المقطع «يبلع جب وجب في خصيمو.. جيت ليا»..شفتو البلع دا؟!..



اما اغنية زيدان «لو الاماني بايدي كنت اهديك عيوني واسقيك من وريدي» .. انا لا اشك ان حبيبة الشاعر دا بعاتية.. ومتعودة على الاكل وشراب الدم.. اها لو ما كدي عاد البيخلي الشاعر يهدي ليها عيون ويسقيها دم شنو؟.. بعاتية وكمان بتحب راس النيفا بتاع الزول.. وفي النيفا بتحب العيون.. الغريبة انو انا لما اسمع المقطع دا في الغنية دي.. احس برومانسية شديدة.. اتاريها ما رومانسية.. اتاريها حركات بعاعيت ساكت..



لله الامر من قبل ومن بعد قفل الباب:- هواي يعجز فكرتك و جمالك يعجز فكرتي في الصد تزيد في خبرتك و في الحب ازيد في خبرتي



المصدر: غير معروف ولكن يبدو أنه أحد بعاعيتنا المقيمين فى الخليج

osama osman
نشط مميز
نشط مميز


الرجوع الى أعلى الصفحة اذهب الى الأسفل

رد: حركات بعاعيت

مُساهمة من طرف غريق كمبال في 7th مارس 2010, 17:01

والله لو مابعرفك كويس ياأبو احمد بقول بتل0000إنت بتجيب الكلام ده من وين

غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

رد: حركات بعاعيت

مُساهمة من طرف amin_manga في 10th مارس 2010, 08:47

(تنتابني مشاعر بعوتية)
اب احمد والله بصراحة شككتنا في قوّاك العقلية وتعليق غريق دا رايك فيهو شنو؟


تحيّاتي

amin_manga
نشط مميز
نشط مميز


الرجوع الى أعلى الصفحة اذهب الى الأسفل

رد: حركات بعاعيت

مُساهمة من طرف osama osman في 10th مارس 2010, 13:13

والله واخوتى منقه وغريق امكن اكون كدا لاكين والله الكلام دا رسلو لى زول فى الايميل بتاعى اعمل شنو قلت اخلى اخوانى يشفو معى الحاصل دا شنو ولا رايكم شنو .....!

osama osman
نشط مميز
نشط مميز


الرجوع الى أعلى الصفحة اذهب الى الأسفل

رد: حركات بعاعيت

مُساهمة من طرف amin_manga في 10th مارس 2010, 13:47

والزول دا يا أبّ أحمد انت بتعرفه كويس وتمااااام كدا !؟؟

amin_manga
نشط مميز
نشط مميز


الرجوع الى أعلى الصفحة اذهب الى الأسفل

رد: حركات بعاعيت

مُساهمة من طرف الفاتح محمد التوم في 10th مارس 2010, 14:30

حلوين ,, يا متداخلين بوست البعاعيت ,عشان كده مرات بخوفونا بــ"ود أم بعلو"أكيد ده البخوف البعاعيت.

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى