ابوجبيهه

انا بكرهك للشاعرة نضال حسن الحاج

استعرض الموضوع السابق استعرض الموضوع التالي اذهب الى الأسفل

انا بكرهك للشاعرة نضال حسن الحاج

مُساهمة من طرف moneertom في 25th مايو 2010, 13:21

انا بكرهك
الشاعرة نضال حسن الحاج
انا بكرهك
بس بكرهك
انا بكره اليوم الصنع قلبا يكورك ويندهك
انا بكره الوطن البلم شرف الغرام المنتهك
من ياتو باب طليت علي ما كنت اصلا بشبهك
انا بكرهك
انا شلت ريدك في القليب وسقيتو من دم العروق
صنقعت دليت النجم دنقرت كبيت نور وشوق
وعصرت موية الانتظار ختيتا في وجع الحروق
وكان النتيجة تبيع هوي هو اريتو كان سويتلو سوق
انا بكرهك
من وين اجيب ليك الدموع
من وين اصنقر حيل كلام كان امنيات قلبو الرجوع
من وين اذا هتك الضلام حيل خيلي القالك شموع
لكني مجبور اطردك واقفل وراك باب الضلوع
شديت رحالاتي ومشيت وكتين هتك حيلك هواي
ارتحت في موجي ورسيت
لا حرك الموج البحر
لا صد فلبي ولا قسيت لكن طلعت خيال عشم
ضمخ رؤى الوجع المميت
انا بكرهك
قدر اشتهاي
انا بكرهك
قدر الغرام الكان زمان كابت مساماتي وهواي
انا بكرهك
قدر اني ما لودت بيك كريات شراييني ودماي
انا بكرهك
قدر اني غنيتك غناي
من وين دخلت علي مدن شاخت من الوجع الاليم
من وين طرقت جدار قلب لقح هوى العشق العقيم
من وين سخت شمسك علي
كانت سماي مليانة غيم
فتق جراحــاتي
فتق جراحاتي وامش
خليني في لهب الجحيم
انا قلت ليك..
انا بكرهك
قدر المواسم الشادة خيل الريد عليك
انا بكرهك
قدر المصائب الحارسة بوابات مجيك
انا بكرهك
نفس المساحة وحجم قلبي الكان تملي بيشتهيك
بقى بكرهك
واتوكل ارحل مني فوت
حرمان علي قلبي الكلام
كان غيرك اجتاحو السكوت
خليهو قلبي الاندفن
تنسج عليه العنكبوت
اوخلي.... من بعدك يموت
الموت اخير......
من اني افضل
في رحابك وفي رجاك
انا كنت لو غاب القمر دائما بضوي
ضلام دناك
وانا كنت لو غيمك رحل
بطلع عشان اسكن سماك
وانا كنت لو بردك نزل
بوقد صوابعي لهب حداك
لكن منو القدر كدا
والله لو انا في محلك
بنسج الشمس احترام
واهديها ليك متمددة
بفتح كراريس الكلام
اختار حروفي واجردا
بنبش قبور المستحيل
كلمات شكر متفردا
لكن خسارة على قلب
حباك بلا ما يعرفك
انعل ابو القلم العلي دفتر غناك دمو انسفك
انعل ابو الشعر الغشاني وغنى فيك والفك
منعول غناي
منعول غناي كان ما امتطيت خيلي وبقيت اتاسفك
بتاسفك وكتين عيوني بسوقن الشوق لي انتظارك
لما ليلي يسوق محاسنو وينهزم عندك نهارك
لما ابكي انهزامي عشان ابارك انتصارك
لما كوكبي ساب مدارو رحل عشان يسكن مدارك
كنت مالي زمان ومالك
لكن وحاتك بكرهك
ندمان
ندمان على عمرا معاك ضيعتو
ضيعتو في غفلة زمن
ندمان علي
دمعا سكبتو على رضاك بلا تمن
انا كنت بحلم في وجودك ينكسر خاطر الشجن
لكن رضاي عليك عشم ابليس قصاد جنة عدن
انا بكرهك
كلما يطول ليلي ويواتيه العذاب
انا بكرهك
كل ما القلم يركب مصاعب الدنيا
يمشي على الكتاب
انا بكرهك
كل ما الفراق كتل مضامين العشق سدالو باب
انا بكرهك
قدر العيون ما تلبس التوب الزراق
تتوضأ موية الانتحاب
انا بكرهك
من كل باب انا بكرهك
واتوكل ارحل من جواي
غلطان اذا قلبك هداك قال ليك حا تفضل غناي
غلطان اذا عقلك رضخ لي ظن يقول انك حداي
والله ما فارق معاي
انا كنت ناوي اجملك
بس كنت ناوي اجملك
وامسك مضامين اللغات
من فيض حروفي اكملك
ترحل علي درب العشم
بي زاد هواي احملك
وكتين اخش قلبك جرا
واقطع قليبي وادملك
ندمان منو
انا غايتو ما ندمان عليك
اتوكل ارحل من جواي عيش العذاب الباقي فيك
ولو قلبك اتجرأ رجع
حقك تلومو علي مجيك
شان قلبي انت مليتو دم
ياخ فلبي انت مليتو دم
ما عادلو باقي يسبو ليك
على كل حال
انا بكرهك
عدد الحصى وعدد الرمال
انا بكرهك
عدد الصواب والاحتمال
انا بكرهك
عدد الحقائق والخيال
انا بكرهك
عد الشنة وعدد الجمال
انا بكرهك
عدد الاجابات والسؤال
انا ابكرهك
عدد الشعر ماسنة سيف الارتجال
انا بكرهك
عدد اللي ممكن والمحال
انا بكرهك
عد ما زمان قت ليك تعال
انا بكرهك

مستورة حالي وراك وفوت
يا دابو ليلك همو طال
مستورة حالي وراك وفوت
يا دابو ليلك همو طال
عاى كل حال
انا بكرهك

moneertom
نشط مميز
نشط مميز


الرجوع الى أعلى الصفحة اذهب الى الأسفل

رد: انا بكرهك للشاعرة نضال حسن الحاج

مُساهمة من طرف moneertom في 25th مايو 2010, 13:39

انا بكرهك للشاعرة نضال حسن الحاج
رد علي القصيده راحيل عثمان

ليه تكرهي ؟ ليه تكرهي؟
ليه تكرهي ؟
ليه تكرهي القلب البنادي علي غريبا ماهو في؟
ليه تكرهي الوطن الجمع اشلاء غراما منتهي؟
ليه تكرهي القلب النبض بي حبو قلبك من سنين؟
ليه تفتحي الباب للدموع؟
ليه تزرعي الشوك في ارض كانت تضم الياسمين؟
شبهك قليل,,, ياشامخه زي قمم الجبال
ياحلوه زي زهر الربيع ،،،،،، ياساطعه زي شمس الضحى
يالوحه ضاجه حياه وشعور,,, ياحقيقه اروع من خيال
ياسامقه زي شجر النخيل
ليه تكرهي؟
مشكلتك الروح التفتش ديمه لي قلبا امين
لكن خساره بقي الامان حلما سراب مدسي مابين نور وطين
ليه تكرهي؟
كل الزهر حزنان عليك
حتي البحر لاقاني بي حزن السنين
فاضت دموعو عذاب وهم ,,,زعلان شديد معقوله انتي بتكرهي ؟
ماانتي جمعتي النجم اجمل عقود من الوفا
نورتي دربا بي شموع,,, قلبك وحاتك مابيعرف يوم جفا
بس اسمعي : الريده صبحت مستحيل
والعشقو من قدم السنين ياكان مصيرهم للجنون
او طعنه في جوه القلب جرحت فؤادم والحنين
ليه تكرهي؟
دمعك نشف من طول سهادك والنواح
نضمك كمل من شعرك المنسوج الم علي ماضي كان مليان جراح
شمعك طفا,,,نجمك افل ,,, نورك رحل
سجن الغرام مابشبهك
حتي الكره مابشبهك
ليه تكرهى؟
طردك مباح ,,, هجرك مباح
قفلك وراو باب الضلوع ,,, كان قلتي طفيت الشموع
كان قلتي خليت القصيد ,,, او قلتي من بعدو العشق حرمان اكيد
ليه تكرهي؟
كان اشتهاك شوق البلد للنسمه في عز الهجير
كان اشتهاك بسمة طفل بتبدد الليل الطويل
كان اشتهاك غنوة فرح بتودي للزمن الجميل
ليه تكرهي؟
كريات دماك ما اتلوثت بس زادت الحد في الغرام
عشقك جميل ,,, ماانتي علمتي الهيام
ليه تكرهي؟
زولك عرف انو القلب مفتاحو كلمه وكلمتين
خبط علي باب القلب وبدون اذن اتحكر العشق اللعين
غيمك شمس مليانه ضو,,, وشمسو من كتر الخداع دايما بتغرب مرتين
لازم جراحك تندمل ,,,لازم ضلامك يبقي ضو
لازم صحاريك تبقي نيل
ليه تكرهي؟
خيل ريدك اجتازت قصور ,,,دكت قلاع,,,دكت حصون
لكن اذا خيلك كبت ماتاسفي ,,,ماالكبوه من طبع الخيول
بس اوعي تلدغي مرتين
ليه تكرهي؟
لمن عشق قلبك سما,,,بقي طير يرفرف في السما
ليه تحبسي الطير في قفص مصنوع من الهم والانين
ليه تكرهي؟
ليه تحرمي القلم الكلام ؟
خليهو يكتب في الملام ,,,او مره يقريهو السلام
اوحتي يتزكر حنينك والهيام
بس ياملاك ماتكرهي
خلي الشمس تدخل تطل تطرد نسيج العنكبوت
خلي القمر يقعد حداك,,,خلي الحزن يرحل يفوت
ماتاسفي
لوكنتي في كونو القمر ,,ضوو انطفا
لوكنتي في دنياه غيم شمس الهجير حرقت دناو
لوكنتي في عز البرد نار اّنسك واوحشة الليل الطويل
علي زول وحيد ماليهو هم,, وفي ايدو قيد
ليه تكرهي؟
مسكين اذا ماقدرك,,,غبيان اذا ماقدرك
مابكفي لو شال الشمس واهداها ليك في يوم مطير
مابكفي لونسج الحروف بي رقه زي صوت الخرير
مابكفي لو شكرك الف,,,مابكفي لو صاد النجوم في كل ليل
مابكفي لو مسك السما ,,, اوحتي مسكك العبير
قلمك اسير في وقعة العشق المحال
شعرك جريح مابين حقيقه وبين خيال
وغناك اسير مابين مؤكد واحتمال
ليه تاسفي؟
ماتاسفي لو في عيونك شوقو بات لابد من يصبح صباح
ماتاسفي لوليلك المهموم وقف في بابو منتظر السماح
لابد من من فرحا يطل ويلبسك اجمل وشاح
لابد من زمنا يجي يسقيهو سم,,, يسقيك راح
لابد من حزنا يفتق في قليبو المات زمان كل الجراح
ليه تاسفي؟
ليه تكرهي؟
ماتندمي قدامك المشوار طويل
فيهو الكعب,,,فيهو العديل
فيهو الاجاج والسلسبيل
فيهو العشر,,,فيهو النخيل
ماتندمي لودمعك اتساقط مطر
او حلمك اتبدل شجن
او حبو من دنياك رحل
اوحتي فارقك السحاب خلاك في عز الهجير
لو طل ليلك بالعذاب قرب خلاص فجر الهنا
لو قلمك اتفجر الم ,,,اوحتي من دمعك اخد
اوحتي من دمك اخد,,,اوحتي من روحك اخد
قرب خلاص فرحك دنا
لو حتي طالت فرقتك كتلت معاني الريده فيك
روح خلاص زمن الانين ,,,ورجعتي لي زمن الغنا
ماتبكي ,,,يكفيكي الحداد,,,اتوضي بي موية الصبر
ماتبكي ,,,يكفيكي الحداد,,,قلبك كفاو اتملي فوق نار الجمر
ليه تكرهي؟
املي الصحاري ورود وحب ,,,ماتكرهي
رغم احتمالات العذاب ,,,ماتكرهي
رغم الحقايق المره في دنيا السراب,,,ماتكرهي
رغم الشنا ,,,رغم الكذب ,,رغم الضباب ,,,ماتكرهي
رغم الحنان الانفقد في دنيا مابتعرف إياب ,,,ماتكرهي
بالرغم من كل السؤالات البقت من غير جواب,,,ماتكرهي
بالرغم من انو العشق اصبح خراب ,,, ماتكرهي
بالرغم من صوتنا الصرخ يازول تعال,,,ارجع تعال ,,,لاجانا زولنا ولاصدي,,, ماتكرهى
حالك عديل بس همو دابو الليله طال
علي كل حال ما تكرهي

moneertom
نشط مميز
نشط مميز


الرجوع الى أعلى الصفحة اذهب الى الأسفل

رد: انا بكرهك للشاعرة نضال حسن الحاج

مُساهمة من طرف الفاتح محمد التوم في 25th مايو 2010, 14:10

منير " ألف حمد الله على السلامة اولاً " علمت أنك ألقيت بنفسك في غيابة العمل المضني , الشباب عباسي والفاضل ,, يطلّون علينا ببعض المداخلات والكتابات بأقلام سريعة وبمداد مستعجل فلا يطفأون الظمأ ومازلنا ننتظرهم,,, جميعكم تغيبون وتتركونا عطشى نتلهف " لجغمة موية من سعنكم الذي لا نرتوي منه " ,,,, وها أنت اليوم تعود ومعاك "كوريّه وغطايتها" .... أتحفتنا بكم هائل من التناسق و التماذج و الألق في القصيدتين , عندما قرات الأولى لـ"نضال حسن الحاج "كنت أفتش عن اسباب تانية أقوى فوجدتها في قصيدة " راحيل عثمان " وهي سبب كتابة نضال ....." كورية وغطايتها " ............ لك الشكر أخوي منير , بس أوعدك بعودةبعد أن أطبع و أتأمل مدينة الكراهية التي تتألف من برجين شامخين متناغمين..

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: انا بكرهك للشاعرة نضال حسن الحاج

مُساهمة من طرف moneertom في 25th مايو 2010, 14:34

الفاتح . . . .
انت جميل

moneertom
نشط مميز
نشط مميز


الرجوع الى أعلى الصفحة اذهب الى الأسفل

كلام فى الاصول.

مُساهمة من طرف فيصل خليل حتيلة في 25th مايو 2010, 14:59

شكرا منير و شكرا الفاتح.

جميعكم خلق من طينة الحب و الجمال

انا احبكم.

فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

رد: انا بكرهك للشاعرة نضال حسن الحاج

مُساهمة من طرف د.الجنيد احمد سليمان في 25th مايو 2010, 15:34

يا سلام يا منير على المتعة والابداع
لكن ياجماعة الخير نضال دى ما كرهت الزول دا شديد...الزول دا مننا نحن الرجاله...نضال هوى زولنا ما بنخليه لازم نقيف معاه:
(اتنقد الرهيفه ان شاء الله ما تتلتق)..وهذا صاحبنا يرد عليك:

(سقط القناع صغيرتى
خلى يدك لا ترفعيه
ودعيه يسقط فى انكسار
فأنا عرفت حقيقتك)....

فيصل يا خوى البنيه ما دمرت الراجل...يا ابو مرووووووووووه

د.الجنيد احمد سليمان
نشط مميز
نشط مميز


الرجوع الى أعلى الصفحة اذهب الى الأسفل

رد: انا بكرهك للشاعرة نضال حسن الحاج

مُساهمة من طرف محمد قادم نوية في 25th مايو 2010, 16:30

شكرا يامنير علي الكلمات الرائعة والانتقاء الفريد ؛لكن مارد عجيب دا

محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: انا بكرهك للشاعرة نضال حسن الحاج

مُساهمة من طرف moneertom في 25th مايو 2010, 22:51

ايها الرائعون . . .
شكرا للمرور الجميل
الخال والاخ . . . ابحمد
انت وكشوات تركتم فراغ رهيب . . . كتلة اللحم هي التي بقيت
حتي صحن السلطة اضحي بدون طعم ولون وتلاشت هيبته وصولته
الضحكة يا فيصل ذهبت . . . فقط ريال ابكولا لا زال في جيب الساعة

الدكتور . . .
تمنيت ان اكون جلوس في حضرتك . . . يا صاحب الطرفه يا فاهم
ول نوية ...
مرورك لذيذ شلك راس السوط وصلك . . .
(
ل
كن ما رد عجيب دا )

moneertom
نشط مميز
نشط مميز


الرجوع الى أعلى الصفحة اذهب الى الأسفل

أينا أنتا يا مونيييييير ؟؟؟؟

مُساهمة من طرف الفاتح محمد التوم في 19th أغسطس 2010, 16:32

الكره من داخل القلب !!؟
والله فخر وعز يا نضال
حتى لو أتقطع الشرايين وأتورم الكبد
الجميل ما بيعرف الا الكمال
القلم البتنعلوا .
مكتوب بيه قدرك من زمان
****
مالك قسيت على روحـــــك
أنا كنت فاكرك لوحة جمـال
****
مالك جهرت بألآم ضلوعك
أنا كنت فاكرك بحر الحنان
****
مالك حمست بسر كنوزك
أنا كنت فاكرك خزانة الأمان
****
ذنبي انا ما عرفتو معاك
ليلي هموا طال دا اخر جزاك
****
والله قلباً ما ليهو هم
ما يملاه الا التراب
****
بتبكي على قلبك انو التمسو السواد
ايه يعني قلباً من زمان احساسوا مات
قلب اتحجر ما فيهو ذرة من البياض
****
قبل رسالتك انا كنت ندمان
كنت فاكر اني بعزف من دون نغم
كنت فاكر حروفي لا ليهو معني ولا فهم
كنت فاكر شقاي حقيقة جاري في دواخلي دم
بعد ما قلبي شفق من غناك
****
دمك انت سعادة انسكب
سال وديان بل خاطري فارق دربي كل هم
****
أنا لو سعيد اشوف عينيك في الدنيا
قبل ارحل بعيد .
****
من زمان انا مستني صليل يدخل في عظامي يرجها
يحي إحساسي المات .
****
كيف أجزيك أنا ( والله يعلم بجزاك )
سببت في توبة عبد من عبادو بكل رضاك
****
ما تندم على خبار كتح عيونك
يمكن يكون يوم الحساب
****
قلي قلبك واسع حليم مكتوب عليهو باب
كل مشرك يدخل بيه
يخرج منه اسلم في ايدو حامل القران كتاب
****
مافي شئ اقولو ليك
بودعك بحنين قلب يشاركك المك وشقاك
****
أنا الدفقت دمي الخبيث عليك
أنا الفجرت براكين جراثيمي فيك
انا الما بشبهك كاني دودة لدغ ثناك
****
لآلا لآلا مافي بصيراً يداويك
غير إني اسجد وادعي ليك
واسأل ربنا يجزيك كل خير في دنيتك
ما على شأن القاك وأعيش
بس لأني شربت من دمك الشريف
ومشيت على درب رجليك
لما وقفت لقيت نفسي في المسجد العتيق
****
لا اله الا الله محمد رسول الله صلي الله عليه وسلم
أنا مسلم والإسلام فرج لكل ضيق .
****
لا تهتمي لأمري
بل أتلى آيات من الذكر الحكيم فهو لكى الرفيق.

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: انا بكرهك للشاعرة نضال حسن الحاج

مُساهمة من طرف الفاتح محمد التوم في 19th أغسطس 2010, 17:03

رمضان كريم ... أخي منير
نديك فرصة أدخل بالليل ورد على هذا البوست..... أو أي بوست قديم أو سوي ليك واحد جديد والله بالجد افتقدناك " سأتصل عليكم "

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: انا بكرهك للشاعرة نضال حسن الحاج

مُساهمة من طرف أزهرى الحاج البشير في 21st أغسطس 2010, 10:23

منير يا فاتح في طريقه إلى السودان عبر جدة من مساء أمس وغدا يكون عند جنابو إن شاء الله
..... ولكني سأرد نيابة عنه ولا أدري لماذا تأخرت أنا عن هذا البوح الجميل المليء بالحب
والمرارات والتفاؤل وعفوا أن أتيت متأخرا ... عندما قرأت قصيدة نضال وأنا مستغرق في آلامها أقتبست بعض الأبيات ونسختها
مستعدا للتداخل بسبب الحالة التي إنتابتها وما كنت أدري أن هناك أخت أخرى تصدت لتلك الحالة .. كنت دائما مغرما حد الوله بالشعر والعبارة الجميلة وكثيرا ما تستفزني المقامات فأبكي حيث أعجز عن الرد شعرا وأنا الذي أعرف للشعر دوما فضله... ولكنك يا فاتح كما قال منير إنسان جميل كان لابد أن يستدرجك المقام ويوقظ روحاني الشعر فيك وليس شيطانه ( ليس له سبيل إليك ) فسال مدادك مواسيا وهذا دأبك .. أما أنا مع راحيل .. وعلى فكرة أطربني هذا الأسم الجميل وهو عبراني وأعتقد أنه أسم أم سيدنا يوسف عليه السلام ومداخلتي قبل علمي برد راحيل أدناه

انا شلت ريدك في القليب وسقيتو من دم العروق
صنقعت دليت النجم دنقرت كبيت نور وشوق
وعصرت موية الانتظار ختيتا في وجع الحروق


عشان بحبك يا قاسي إنت

أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

رد: انا بكرهك للشاعرة نضال حسن الحاج

مُساهمة من طرف الفاتح محمد التوم في 21st أغسطس 2010, 16:22

انا شلت ريدك في القليب وسقيتو من دم العروق
صنقعت دليت النجم دنقرت كبيت نور وشوق
وعصرت موية الانتظار ختيتا في وجع الحروق

استاذي أزهري :-- قد آن لي أنا أن أبكي ,,,صمتَ اليراع وجف مداده في حضرتكم ومقاماتكم السامقة ,,, حق لراحيل أن يكون معك ,, مارأينا وما سمعنا أنّ الماء الزلال ينساب عكس الجاذبية.هنيئــاً لنا,,,,, بالجد فرحانين بيك وأسأل الله الكريم أن يكلل خطاوي أخونا شيخ منير بالوصول الى عمتي عشان يشرب معاها " موية رمضان " ويشبع من شوف البراءة في عيون وليداتو ... وينعم بالرضا والقبول ولسانه يلهج بكلمات الحمد و الشكر.... هكذا عرفته وألفته ,, رأيته قبل 25 سنة في أبوجبيهه وسمعت صوته بعد تلك السنون ,, نبرة صوته الصادقة لم تتغير فقد " بان النقا في منير من زمان "

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


صلاحيات هذا المنتدى:
لاتستطيع الرد على المواضيع في هذا المنتدى