ابوجبيهه

حركات بعاعيت سااااااااااااااي ...!!

استعرض الموضوع السابق استعرض الموضوع التالي اذهب الى الأسفل

حركات بعاعيت سااااااااااااااي ...!!

مُساهمة من طرف الحاج عبدالرازق الحاج الب في 17th يوليو 2010, 19:03

من منا لم يسمع بالبعاعييت ..!!
هذه سياحة بعاعيتية لكم تفضلوا :
بعد أن قرأت كتاب رحلة ابن بطوطة.. وقفت محتار ومتمحن.. عند الحتة بتاعت إنو زار أرض السودان.. وزار مكان فيهو ناس بياكلو لحم الناس .. بعاعيت يعني .. سحاحير .. والبعاعيت ديل قال بيحبو ياكلو لحم النسوان .. وفي لحم النسوان أكتر حاجة بيحبوها هي الكفين والثديين .. ما عارف حكمتهم في كدي شنو؟

بعد قراءة الكتاب وتمعن فينا نحن معشر السودانيين .. قربت أصل إلى إنو نحن أحفاد هؤلاء البعاعيت ما فيها إتنين تلاتة.. لقيت إننا ربما نكون الشعب الأوحد على وجه الأرض بياكل لحم ني(المرارة ـ الكبدة ـ أم فتفت ـ الكرشة).. وبعض البعاعيت مننا ياكلو سن البرك .. وهي منطقة تلاقي الضلوع عند الصدر .. الحقيقة الحتة دي مغرية للأكل نية .. وتستاهل مني كل ثناء وإحترام.

الكرشة خلقها ربنا عشان تهرس الأكل وتهضمو نجي نحن ناكلها نية ونهضمها كمان .. أها في بعوتية أكتر من كدا؟!

تنتابني مشاعر بعوتية .. عندما أقف عند جزار وهو يقطع في اللحمة بدون ما أشعر ألاقي ريقي جرى وبطني كوركت .. ولولا الخوف من شيل الحال أشيل لي حتة لحمة نية وآكلها..

أما حكاية أكل الكفين عند بعاعيت ابن بطوطة .. وجدت أننا إستعضنا عنها بأكل الكوارع .. فقلما نجد سوداني لا يحب الكوارع مما يثير لدينا رغبة قديمة وموروثة وهي أكل مزمزة الكفين .. خصوصا" كوارع الضان .. وشوفو المتعة في وش أي زول بياكل في العضام الصغيرة الفي كوارع الضان .. متعة بعاتي ما فيها شك .. تلقاهو ياكل العضم ويمصو ويملصو من خشمو في الصينية أو الطربيزة بكل متعة .. وينف .. ثم يتناول الذي بعده يسوي فيهو ما سواهو في أخوهو .. في اللحظة ديك لو سألتو من إسمو ما حيتذكرو ليك.

أكل الثدي يتضح جليا".. عند أطفالنا الرضع .. تلقى الشافع وهو يرضع وفجأة وبدون مقدمات يعضي أمو .. وهو سلوك بعاتي موجود في أطفالنا .. يدحض فرضية نظرية فرويد .. الشافع يعضي أمو .. والأم عشان تكبح جماح هذه الرغبة البعاتية .. ترصع الشافع في ضهرو وتقول ليهو(احي.. الله يازاك) بالمناسبة .. كلمة أحييييي دي.. هي كلمة بعاتية من صميم قاموس البعاعيت .. على حسب ما ورد في الأحاجي ..

لكي أتأكد من أن كل رضع الدنيا بيعضو أثداء أمهاتهم .. وهروبا" من فكرة أننا بعاعيت .. سألت بعض الإخوة العرب .. ذكروا أنه ليس لدى أطفالهم هذه الحركة البعاتية .. وحتى إنو في واحد مصري قال لي .. وهو مطير عيونو: (إيه يا زول .. أوعى يكون أطفالكم بسووا كدي؟..) نهرته وزجرته وأنا أستشيط غضبا" وقلت ليهو (أفو .... إنت قايلنا نحن بعاعيت واللا شنو؟) وبيني وبين نفسي أتأكد إنو نحن بعاعيت أولاد بعاعيت أحفاد بعاعيت .. وقاعدين نلد بعاعيت .. الله يجازيك يا ابن بطوطة كان داير تشككني في نفسنا .. وتجنني وتركبني القصبة.

أما أكل البني آدم وعلاقتو بثقافتنا وسلوكنا .. البنحاول نهذبو .. خدو مثلا".. أتحدى أي واحد أو واحدة .. يشوف ليهو واللا تشوف ليها شافع صغير وسمين ومبغبغ وعندو جضوم .. بطنو ما تفور عليهو؟.. ويكون عاوز يجضمو .. أو يعضيهو في جضومو ..
أما في النضم تلقى جملة زي (أكل لحمي) أو (أكلت لحمو) ..و(إيدي أكلتني) و(قلبي أكلني) في الأغاني .. أغنية (يوم طلعت القمرا) .. يتضح الأكل والبلع للزول جد جد .. في المقطع (يبلع جب وجب في خصيمو .. جيت ليا ) .. شفتو البلع دا؟!..

أما أغنية زيدان : (لو الأماني بإيدي كنت أهديك عيوني وأسقيك من وريدي) .. أنا لا أشك أن حبيبة الشاعر دا بعاتية .. ومتعودة على الأكل وشراب الدم .. أها لو ما كدي عاد البيخلي الشاعر يهدي ليها عيون ويسقيها دم شنو؟.. بعاتية وكمان بتحب راس النيفا بتاع الزول .. وفي النيفا بتحب العيون .. الغريبة إنو أنا لما أسمع المقطع دا في الغنية دي .. أحس برومانسية شديدة .. أتاريها ما رومانسية .. أتاريها حركات بعاعيت ساكت ..

لله الأمر من قبل ومن بعد قفل الباب :




هواي يعجز فكرتك
وجمالك يعجز فكرتي
في الصد تزيد في خبرتك
وفي الحب أزيد في خبرتي




والموضوع معروض للتداول والبحث :_

الحاج عبدالرازق الحاج الب
نشط مميز
نشط مميز


الرجوع الى أعلى الصفحة اذهب الى الأسفل

رد: حركات بعاعيت سااااااااااااااي ...!!

مُساهمة من طرف عوض السيد ابراهيم في 18th يوليو 2010, 08:03

الحاج يا اخوى طلّعتنا بعاعيت عديل كدا.
أنا شخصيا ما ميّال لأم فتفت والكبده النيّه.
فى الحقيقه السودانيين بياكلو لحم بعض(حنك) يعنى (سلفكه) لكن أكل عدييييييييل (قرقشه) مافى.
تخريمه:-
زمان قالو حلة المحلج كان فيها بعاتى الكلام دا صح يا حجّوج

عوض السيد ابراهيم
مشرف المنتدى العام
مشرف المنتدى العام


الرجوع الى أعلى الصفحة اذهب الى الأسفل

رد: حركات بعاعيت سااااااااااااااي ...!!

مُساهمة من طرف زهيرحسن السيد في 18th يوليو 2010, 12:26

اخي الحاج لك الشكر..
بعد كل المعطيات ...والبراهين والادله ...لاشك يعني نحن بعاعيت من الدرجة الاولي ...(مراره ...ام فتفت...كوارع...نيفه...كمونية.. سن البرك...كبدة ابل نيه...والبتاعة بتاعت كبدة الضأن الصغيره ديك)
وما أحلي النيفه عند عمك معروف زمان تحت السينما...
والله ايام ياحاج ...

زهيرحسن السيد
مبدع مميز
مبدع مميز


الرجوع الى أعلى الصفحة اذهب الى الأسفل

رد: حركات بعاعيت سااااااااااااااي ...!!

مُساهمة من طرف الحاج عبدالرازق الحاج الب في 19th يوليو 2010, 15:45

لو جاك بعاتى أتبع التعليمات الأتية : _
أقلب نعليك
أستعمل السوط

النبى معانا ما تغشانا .. واحد إتنين وكف .....

شكرا" أستاذي شكرا" زهير لمروركم الأنيق ..
طبعا" يا أستاذ زمااااااااااان كانوا بخوفونا عشان مانمشي بعيد ونلعب وبقولوا لينا في بعاتي هناك واليومين دول هايج شديد وقايم علي الناس لكن لحدي الآن ما متأكد هل حقيقي يوجد بعااااااااتي ولا دي خرافات وبدع ..!!؟
زهير حليل عم معروف وحليل ايام النيفة العجيبة ديك والكوارع والمشاكل الليلية ديك والخطف والزوقان الكتير .. ايام لن تعود ..
مودتي

الحاج عبدالرازق الحاج الب
نشط مميز
نشط مميز


الرجوع الى أعلى الصفحة اذهب الى الأسفل

رد: حركات بعاعيت سااااااااااااااي ...!!

مُساهمة من طرف Suhad Abduelgfaar في 20th يوليو 2010, 11:21

الحاج يا اخوى ضحكتنى شديد خلاص لقايت ما اولادى سألونى بضتحكى فى شنو يا ماما؟ ما قدرت اقول ليهم لاننا طلعنا بعاعيت يقومو الاولاد يتكلمو فى المدرسة وبعد داك الانجليز يستفيدو مننا يدخلونا فى اقفاص ويخلو العالم كلو يزورنا والزيارة بى خمسين باوند والصيف جاء والسياحة عييييييك شوف حيستفيدو من البعوتية بتاعتك دى قدر شنو....الان عرفت ان الطبيخ ما ممكن يكون من غير لحمة لى الا فى السودان...تسلم يا اخوى البعيعيت الصغير على البعوتية

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى