ابوجبيهه


انضم إلى المنتدى ، فالأمر سريع وسهل

ابوجبيهه
ابوجبيهه
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

(طه المدرس ود خدوم) للروّاد والى أستاذنا أزهرى الحاج

+3
غريق كمبال
أزهرى الحاج البشير
الفاتح محمد التوم
7 مشترك

اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty (طه المدرس ود خدوم) للروّاد والى أستاذنا أزهرى الحاج

مُساهمة من طرف الفاتح محمد التوم 27th أغسطس 2010, 16:33

طه المدرس ود خدوم
" عمر الطيب الدوش "

يا تلاميذى العُزاز
بسم الله
بسم المجد فى أحضان سُعاد
اكتبوا التاريخ
خمستاشر ربيع أول
والمُوافِق
موِلد الايقاع على خطوات سُعاد
والمُرافِق للصباحات ، المناحات
واخضرار الغيم وفقدان الشُعاع
ارتفاع الموجهْ لى صدر الشراع
اكتبوا
ارتفاع الموج إلى صدر الشراع
يا تلاميذى العُزاز
خلِّى بينك وبين زميلك
زى مسافَهْ
قَدْر أيه؟
قَدْر المسافَهْ البين عيونى وبين سُعاد
قَدْرِ آلاف الفواجع فى انهيارات الحصاد
قدْرِ مسحوق الأنين فى تواريخ البُعاد
اكتبوا
.........
...
ودَيَّه أيه يا اْستاذ يكون؟
دا المُجنن طه اسألأوا ودْ سكِينَهْ
اسألوا الريح المسافر فى تجاعيد السكينَهْ
شاوِرِوا الموج اللِّى ساكِن فى مسافات السفينَهْ
تسألونى عن سُعاد
اكتبوا العنوان بخط ممشوق وواضح
احذروا اللحظ البيضحك وهو جارِح
مُرْكَب على الله ويلأّ نجتاز الحدود
اكتبوا العنوان بِخَط مستور وفاضح
(رقصة الموج الأخيرَهْ جُموح نُهودِك يا سُعاد)
عنوان طويل
يا تلاميذى العزاز
كِلمَهْ..كِلمَهْ على مهلْكُم واكتبوا
والصيف طويل لمْلَم العُشاق مواعين الرحيل
نجمَهْ شاردَهْ
وغيمَهْ هاجدَهْ
ضَمَّهْ ضَمَّهْ ضَموا شرف المستحيل
جَوهَرُوا الحزن الكحيل
مُركَب على الله ويلأّ نجتاز العويل
بانت سُعاد
غامت ملامح السكَّهْ وانكتم المكان
رَقَصتْ سُعاد
فى خانَة الأصفار وميلاد الزمان
جمّعتْ من كل زهرَهْ مواجع الحُب المُهان
مُركب على الله ويلأّ نجتاز الدّثخان
يا تلاميذى العزاز
خلّوا بينكم وبين رنين الضحكة صرخَهْ
حُب مُهان والصبر أولىَ
خلُّوا بينى وبين جنون الخيبَهْ شَوْلَهْ
واكتبوا
(عاشَ فى زمن المذلًهْ المدعو طه ودْ خدوم
باع تفاصيل الكآبَهْ عشان يفرِّغ وتانى يمْلاَ
جاع وخيرِك يا سُعاد مرْدُوم رَدوم
عاش المدرِّس ود خدوم
كأنو نكْبَهْ -كأنو شُوم
عاش المدرِّس ود خدوم
تسْقُط حكايات الهموم
الأزاهِر
والدفاتِر
والمتاجِر
والمقابِر
والخافر والمشاعر والنجوم
عاش المدرِّس ود خدوم
يا تلاميذى العُزاز
من كانَ حاضِر أو تَوَلَى
يقفِل الكرّاس ويلأّ
نشوف بداية المهزلَهْ
***
يا تلاميذى العُزاز
فى صيف طويل مبطوح على صدر الزمن
منظُلمَة الشوق ابتدا
فى حضرَة الحُب اندَفن
والنيل مدامِع للنجوم
والصبر مُفتاح للشجن
والحِلَّهْ مبتورَهْ وكسيحَهْ ومُهْملَهْ
بانت بداية المهزلًهْ
بانت سعاد بانت تفاصيل الشجون
والجنون والمقصلَهْ
بانت سُعاد
وقفتْ على خِصر الجبل
فتَحت مشارع للظنون والأسئلَهْ
رقدَت على شَعَر السهل
ضفَرت ملايين القُبل
"والجو صفا والنيل هَدَا
وغاب الأتر"
وأنا يا سُعاد
فى الحِلَّهْ معجون من رماد من حسرَهْ
مقطوع من شَدَر
يا تلاميذى العُزاز
لا زوايَهْ لا قوس لا وتَر
وأنا يا سُعاد
فتّشتَ ساحات الأمانى
ناصيهْ ناصيهْ
حجر حجر ، ما لقيتْ إلاّك زمن
مالقيت إلا بِلاد
وأنا يا سُعاد
يا شهوَة الحُب للعِناد
يا شهقَة الفرح المُعَاد
خلِّينى فى بالك نغم
وأنا يا تلاميذى العُزاز
مخلوق بسيط من شوق وغَم
وأنا يا سُعاد مخلوق بسيط من شوق وغم
قامت سُعاد من رقدتهْا
الكون جميع كان انحصر مابين
قيامَهْا ووقفتَهْا
النخلَهْ والهجليجَه والسيّالَهْ
والشوق والمطر
الغابَهْ والهم القديم
الفرحَهْ والذُّل والخطر
كلُّو انْجَمَع فى كفّتهْا
قامت سُعاد من رقدتهْا
قامت قيامة العُمْدهْ مليون اتجاه
اشتَّتتْ كل الجموع
من كلِّ أنَّهْ وكلِّ آه
ومشيتْ عليكْ أنا يا سُعاد
حتَّة مُعلَّم مُبتدىء
غاوِى وبسيط
ولو ما خَدوم
كان من زمان محْسوب لقيط
ما آصلى مولود لللَقِيط
أو مُغفّل
أو مبهدَل
أو عبيط
يا زعيطاً يا معيط
ومشيت عليك أنا يا سُعاد
شُبّاك على النار انفتَح
درويش نحيل
فى صُرَّهْ شال حزنو وسَرَح
سيلاً تقيل
وسَّع خطاويهو وكَسَخ
ومشيت عليك أنا يا سُعاد
مربوطهْ عينى على خُطاك
فى عيونك اتجمّع كلام
فى صوِتك اتجمّع ظلام
حسيتو فى الحَشَا والعِظام
وقريتو فى سعف النخيل
ولمحتو فى طوق الحمام
فى العفهْ والخُصْلهْ الحنِينَهْ
اللفْتهْ والتوب والحِزام
بارَت مواعيد الغرام
ونزرْتُو حُبِّك للزنازين
والمساجين والهوام
والعُمدهْ فوق راس الفرح
جمّع جريوْاتو ونبح
(مسئول كبير زاير البلد)
قُتْ ليهو يا عمدهْ اختشى
مسئولك الزاير الكبير
يا ريتو بس لو شاف سُعاد
كان رسم للعفَّهْ
أوصافا وتقاطيعا ومقاسا
كان دخل للحِلَهْ من بابا وشبابيكا وأساسا
كان اتْوَلد برَّهْ المُتاجرهْ
والمحاورَهْ والمصاهرَهْ والخساسَهْ
كان تاب
وباع للصدقِ مجدو وذمّتو
يمرُق جديد
من حَر دهاليز النِخاسَهْ
من هدومِك يا مرازِل
يا مزابِل
يا مباخر للتعاسَهْ
يا مناكر
يا عساكر
يا ، سُعـــــاد
......
فِك علَى كلب الحراسَهْ
.....
يا تلاميذى العُزاز
فى يوم طويل مبطوح على صدر الزمن
اتلمّت الحِلَهْ
الحنينْه عشان وداعَك يا غروب
حُزن فارس
وكيف يصير فى لحظَهْ مولَى
كيف يجوز
يا عمدَهْ كيف؟
الذُّل مُصان
والحّثب مُهان
والسجن أولى؟
كيف لقيت يا عُمدهْ كيف
للمجازر
والخنازير
والخناجر
فى رموش الغيم مَحَلَّهْ؟
كيف بنيت يا عُمدهْ كيف
من رماد حزن المآتم
من تُراب غضب المآتم
ليكْ ولى ضيفَك مَظلَّهْ
حِلَّهّ حادَّه
وإنتَ تزْرع فوق ضُوع الوادي حفْلَهْ؟
كيف يجوز؟
قد يجوز وقد يجوز
يا تلاميذى العُزاز
ضَلّض مَن قَد لا يحوز
من تبتّلْ أو تيَمَمْ
أو تيتَم أو ترمّل
يا تلاميذى العُزاز
اكتبوا التاريخ
خمِستاشر سُعاد أوّل

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف أزهرى الحاج البشير 28th أغسطس 2010, 09:34

قامت سُعاد من رقدتهْا
الكون جميع كان انحصر مابين
قيامَهْا ووقفتَهْا

شكرا يا فاتح لهذه القصة الشعرية الجميلة والتي هي إمتداد لقصة سعاد الأولى
اللهم أغفر للدوش وتجاوز عن سيئاته وزد في حسناته
أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف غريق كمبال 28th أغسطس 2010, 11:48

قصيده رايعه يا الفاتح


دقت الدلوكة
قلت الدنيا مازالت بخير
أهو ناس تعرس وتنبسط
تكتكت سروالي الطويل
سويتلو رقعات في الوسط
في خشمي عضيت القميص
أجري وأزيد في الشوق وأنط
لامن وصلت الحفلة زاحمت الخلق
وركزت شان البت سعاد
أصلي عارف جنها في زول بيركز وينستر
لكني عارف إنها
لو كل زول في الحفلة إنجلد
ياني الأذاها وجنها
برضي عارف أظنها
ديمة في صرة وشيها
يلفحني شوق نافر لبد
غريق كمبال
غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف مدثر عثمان النو 28th أغسطس 2010, 14:40

شكرا يا الفاتح علي القصيدة القصة

********

واسْتَلِم يا وَدْ قِنِعْنَا:

إنتَ عارِف بيت سُعاد ،

وعارف إنَّك من قَبيلَهْ

لا رأينَا

ولا سِمِعنْا

ولا عِشمْنَا ولا ..

طِمعْنَا

وانت مُرْسَال يا ..بَجَم

تدخل البيت زى كأنّك..

مارِق الآن...

من جهنم

ولمَّا تَطْلَع ليكْ سُعاد

كُون خفيف ..زي الأمل

ومرَّه أتْقَل

زي جَبَل :

أوْعَىَ تَفْرَح ..

أوْعَى تزْعَل

واقْصِر ايدك من سلام

خلّى نَظَركْ يِكُون كفيف

ومَشِيكْ يكون...

ناعم..

مُغرْبَل..

ولما تَطْلع ليك سُعاد

زي حلم فى توب رهيف..

أدّيهَا ضَهَركْ يا ..

مُغفّل..

وبكُلِّ ما علّمْتُو ليكْ

من طاعَهْ

من ذُّل..

من وجل...

أمْرُق حشاي قِدَّامهْا يلْمَع

بالوجع..

قُول ليهَا..

لمَّا الشوق يبين..

مابين ..شجيرات الأراك

والفرحَه تغْسِل طرْحتهْا

والبدر يمشى على الهلاك

والخوف يكون لسَّع جَنين

فى رُكْنِ من ساحة الوَّلَه

فىزاويَهْ من ساعة الحنين

ما بين..

دِى ارْضَك..

ودَاكْ سَمَاك..

العُمْدهْ منْتظْرِك هِناك..

مدثر عثمان النو
نشط ثلاثة نجوم
نشط ثلاثة نجوم


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف غريق كمبال 28th أغسطس 2010, 15:34

الكاتب بكرى سيد محمد كتب:-

ولد عمر الطيب الدوش في مدينة شندي 1948م تخرج في معهد الـموسيقي الـمسرح قسم الـمسرح - عام(1974) وهي أول دفعه تتخرج في الـمعهد ومن زملائه هاشم صديق وإسحاق الحلنقي وصلاح الدين الفاضل وناصر الشيخ . وفي قسم الـموسيقي كان محمد وردي وانس العاقب وعثمان مصطفي.. ورائعة الحلنقي (عصافير الخريف) في افادة من صلاح الفاضل يقول فيها إن الدوش قد كتب الـمقطع الأول لأغنية (عصافير الخريف) علي السبورة(..ليه يا عصافير الخريف ) ثـم قام الحلنقي وعلي ذات السبورة مجاوبا.
وسعاد محمد الحسن زميلة فاضلة جمع بيننا العمل في الإدارة العامة للشئون المالية والإدارية بوزارة الدفاع كانت هي في شعبة الحسابات وكنت أنا في شعبة المراجعة وتمتاز بالهدوء وطيب المعشر والأحترام وكانت تحظى بالأحترام والتقدير من جميع زملائها وهي زوجة الشاعر المبدع عمر الطيب الدوش (طيب الله ثراه) وشاعرنا غني عن التعريف فهو من أعلام الشعر في السودان وصاحب الروائع الخالدات ـ الساقية للفنان حمد الريح ـ بناديها والود وتأجوج والحزن القديم للأستاذ محمد وردي ـ وسعاد للأستاذ الكابلي وهذه القصيدة سعاد لا علاقة لها بالأستاذه سعاد فهي قصيدة قديمة كتبها قبل أن يلتقيها.
وقد تحدثت الأستاذه/ سعاد محمد الحسن عن الأستاذ المبدع الدوش وعن قصة الزواج ومواقف آخرى في حوار لها فإلى ذلك الحديث:
كنا ندرس في معهد الدراسات الاضافية بجامعة الخرطوم آنذاك، في فترة حكم مايو 1983، خرج أساتذة المعهد لإستقبال شخص ما لا نعرفه نحن الطلبة وكانوا (متكتمين) عليه، كنا ننتظر هذا القادم بشغف بعد أن عرفنا من الأساتذة أنه صديق عزيز لديهم، فجاءنا شخص أشعث أغبر يحمل كمية من الكتب لا يستهان بها، كنت أول من أصدر تعليقاً عليه وصحت( سجم أمو واخواتو بدل مايجيب ليهم شنطة هدوم جاب ليهم شنطة كتب)،درسنا تاريخ المسرح وبعد شهر على بقاء هذا الأستاذ معنا عرفنا أنه عمر الدوش.
وعن اللقب (الأستاذ أبوحجاب) تروي الأستاذه سعاد:عندما جاء الدوش لتدريسنا كان يعلق حجاباً قديماً على عنقه (ضحكت واردفت بطريقتها المسرحية (أظنو مما سافر كان لابسو)، أطلقت عليه الأستاذ أبو حجاب، في أثناء المحاضرة إنقطع حجابه وهوى على الأرض فتناوله مسرعاً ومده اليّ ووسط دهشتي قال الدوش(أمشي أعملي لي خيط للحجاب دا) ، خرجت احتج بين زملائي وأقول( لي قال لي صلحي الحجاب الأستاذ دا عذبني) ومن الحجاب بدت الحكاية.
وتحكي الأستاذه سعاد حكاية زواجها من الأستاذ الدوش (زواج مخالف للعادات السودانية كان في شهر سبتمبر 1986 ) : أنا اول فتاة تتزوج بلا مهر ودون شبكة، الدوش دفع لأهلي خمسة عشر جنيهاً وقال لي(إنت اغلى من إني إشتريك)، خالاتي زعلو شديد وقالوا لي( الترابة في خشمك إنت ناقصة من البنات شنو)!، كنت مقتنعة بالفكرة ووقتها كنا نناهض المظاهر الفارغة في المجتمع السوداني لذلك قررنا أن نبدا بانفسنا، تم الزواج دون حفلة ولم أرتدي الزفاف، عند المساء إشترينا (جردل) فول وذهبنا الي بيت أخت عمر،الوحيدة التي حضرت عقد القرآن من أصدقائي هي سهير عثمان قوليب، في المساء تجمع أصدقاءنا في بيت أختو، حسب الرسول كمال الدين شال العود وغنى وأصحابي غنوا لي ، وانا ذاتي غنيت فاصل في العرس، وناس بيتنا ذاتهم إشتروا عشاهم من الدكان!
وتقول الأستاذه سعاد:عمر كتاب مفتوح للجميع،بسيط،واضح وساخر جداً للدرجة التي كانت تغضبني منه، سهل ممتنع يمكن لاي شخص أن يتعايش معه، لا يعيش في دور الأستاذ والشاعر، كسول جداً (الموية دي الإ أديها ليه) لا يساعدني في المطبخ لكن كان عنده(حلة) بيعملها كل شهر، عمر ما كان بيرضى أنظف غرفته لأنه كان يكتب الشعر على الأرض ، يكتب في صندوق السجائر وعلى قصاصات الجرائد، كان يكتب تحت شجرة ظليلة في البيت وعندما الحظ أنه إنصرف عني اليها ادرك أنه يكتب في قصيدة أو رواية



هجرة عصافير الخريف
فى موسم الشوق الحلو
هيج رحيلا مع الغروب
احساس غلبنى اتحملو
وكتمت اشواق الحنين
داير الدموع يتقلو
ورجعت خليت الدموع
ينسابو ..منى وينزلو
ليه يا عصافير الخريف
خضرة مشاعرى اشيلا صيف
تحت الغمام شايف
مواكب الهجرة اتلاشت سراع
ليه يا عصافير ليه الاسف
مين علمك أسف الوداع
وعارف دا ما اول سفر
لبلاد بعيدة بدون متاع
زى ما بتخافي من الرياح
بنخاف كمان انحن الضياع
ليه يا عصافير ليه الضنى
صفقة جناحك احزنها
غايب السنين الليله
مالو غنا العصافير غلبو
طراهو زولا كان ولوف
كم رضا خاطرو وطيبو
سمع قليبو كلام حنين
هدهد مشاعرو ودوبو
الناس سعيدم فى الحياة
لا ضاق فراق لا جربو
وانا حالى فى بعد الوطن
دفعنى ضي العين تمن
غريق كمبال
غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف ابوعشه (نمل السكر) 28th أغسطس 2010, 17:00

الاخ الفاتح لك التحايا العطرات
وانت دوما تتحفنا بعيون الشعر والكلام الجميل
عمر الطيب الدوش انسان مسكون بالابداع وغني
عن التعريق اعماله الخالدات تشهد بذلك
لك الموده والمحبه
ابوعشه (نمل السكر)
ابوعشه (نمل السكر)
نشط ثلاثة نجوم
نشط ثلاثة نجوم


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف الفاتح محمد التوم 29th أغسطس 2010, 06:02

لك الشكر أستاذي الأزهري على الألق ,,,,
الزعيم غريق مشكور على المقدمة عن شاعرنا الجميل ,,وعلى القصيده الحماسية الجميلة الرائعة وهي تشبه إحدى قصائد أهلنا العبدلاب عندما قحّ النحاس وخرج صاحبنا وحالتو حاله ,,, " أتمنى أن أجدها و أدونها ليكم"...
عثمان .....معقول تقدر تديها ضهرك ؟؟؟؟ " كذب الشعراء ولو صدقوا".... أنا عارفك حتلبد وستراقب بدقة كل خطوها ومشيها وستسيل دموعك أنهاراً ...... نعم لن تصافحها ,, لكنك ستراقبها حتى تغيب عنك بعيداً وثانيةً في الأفق ..
دكتور حسن شكراً جزيلاً لك أيها الراقي...

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف أزهرى الحاج البشير 29th أغسطس 2010, 09:33

وتأجوج والحزن القديم للأستاذ محمد وردي


تنويه تاجوج من كلمات كجراي وليست من كلمات الدوش ومطلع الأغنية

قليبي المنوّ أصل شقاي وريدي
بزيد الهم عليّ يسفح وريدي ...
بيعشق في الألم نبرة قصيدي ...
دي تاجوج ما أتلقت يا خملة زيدي

وبالرغم من أن هذه الأغنية من الأغاني الجميلة التي سكب فيها وردي جرعة حنية عالية
لم تنل حظا كبيرا من الشهرة ولم يرددها وردي كثيرا وهي غير معروفة للكثير
أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty للفاتح ومدثر والزعيم غريق .. أهدي مع التحية

مُساهمة من طرف أزهرى الحاج البشير 29th أغسطس 2010, 10:26

محمد عثمان صالح كجراى.

تاجوج

قليبي المنو اصلو شقاي ريدي
بزيد الهم علي يسفح وريدي
بعشق في الألم نبرة قصيدي
دي تاجوج متلقت يا خملة زيدي

تمر المحنة زي ضل السحابة
حروف اسمك نغم يسقي الغلابة
حروف اسمك بشارة خير حبابة
حروف اسمك حليفة ونار صبابة

مع الأيام يزيد حسنك نضارة
عشان عينيك تخضر الصحارى
نموسق ليكي ألحان العذارى
نعيش باقي العمر في الريد سكارى( كساره )

نخوض بحر الهموم نبحر نعدي
نقابل بالثبات موج التحدي
سنين العمر تاخد وما بتدي
ودربك لشاطي النور يودي


تغنى وردي بهذة الأغنية وعمره عشرون سنة في عام 1962 وتوقف عن ترديدها لأكثر من خمسة عشر عاما وتغني بها في النصف الثاني من السبعينات ثم توقف مرة أخرى ..... ولها في قلبي مكانة خاصة وأهديكم أياها مع كل المحبة
أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty للفاتح ومدثر والزعيم غريق .. نجدد الهدية مع التحية

مُساهمة من طرف أزهرى الحاج البشير 29th أغسطس 2010, 10:32



للشاعر: عمر الطيب الدوش
والغناء لمصطفى نخلة السلفاب

سحابات الهموم .. ياليل

بكن بين السكات والقول

وباقات النجوم

الجّن ..

يعزّن فى المطر

فاتن عزاك .. رجّعن

فاتن عزاك .. رجّعن

وشوق رؤياك دوام مشدود

على أكتاف خيول... هجّعن

وصوت ذكراك .. مكان يجرى

يلاقى السيل ...

وسر مدفون بصدر النيل

ولولا الذكرى مافى أسف

ولا كان التجّنى ... وقف

وصوت ذكراك

رزاز صّفق

على خطوات بنات .. سجّعن

وصوت ذكراك ..

حنين لى غيبة فى المجهول

ولولا الذكرى مافى ..وصول

ولولا الذكرى مافى .. إصول

ولولا الذكرى مافى شّجن

سحابات الهموم ياليل

بكن

بكن

بكن
أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف غريق كمبال 29th أغسطس 2010, 11:00

شكرا ابو الزهور على هذا الالق الشعرى المميز
غريق كمبال
غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف Suhad Abduelgfaar 29th أغسطس 2010, 12:42

مشكور اخى الفاتح على هزا الابداع
ومشكورين الاعزاء على الاضافات الرائعه
مشكور يا خال ازهرى على المعلومه بخصوص (تاجوج)ولكن لا ادرى انها نفس القصيده ام لا ارجو الافاده
تاجوج بتكْتب بالشمال

منحوتَهْ في شكل اكتئاب

بتْكحَّل الإبل النحيلَهْ

بالمشاوير النبيلَهْ

وتعشِّي ضيفان القبيلَهْ

بالأناشيد الطويلَهْ

موهوبَهْ زي كل البنات

في الأسى المنْسُوج خيال

واتخيّلَت

إنو المُحلَّق حابَّهَا

تلجوج بتحْلِب من غيوم كسلا

المطر

وتوزِّع القش والشجر

بتفرِّق الهم والكدر

حفيانَهْ تجري ورا السراب

تاجوج بتكتٍب بالحراب

تاجوج بتكتِب بالشمال

وبتْرتِّق التوب والنعال

وتمْرُق الهم الموكّر

في قلوب كل الرجال

تاجوج سؤال

تاجوج غزال

تاجوج مُحال

تاجوج خيال

اتخيّلَتْ انّو المحلّق ساكّهَا

بي طريق شاقِي الغمام

يا يتامي

يا غلابَهْ

شوفوا لي تاجوج زمام

Suhad Abduelgfaar
Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف أزهرى الحاج البشير 29th أغسطس 2010, 13:12

نعم أستاذة سهاد تاجوج التي أرفقتيها هي للشاعر المبدع الراحل عمر الطيب الدوش أما التي غنّاها وردي فهي قصيدة كجراي ومن هنا جاء الخلط
عمر شاعر يسكنه الإبداع لم يهتم بصحته وحياته الخاصة فخسر السودان فارسا من فرسان الكلمة المعبرة والرصينة ، في إعتقادي
إن الدوش تأثر بطبيعة شعر قبيلة الجعليين والذي بدوره أخذ شكل القصة كما في أعمال العبادي وشعراء هذه القبيلة

شكرا سهاد ..
أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف Suhad Abduelgfaar 29th أغسطس 2010, 13:24

مشكور خالى وعمى واخى واستازى ازهرى بالجد انا الرابحه فى هزا المنتدى لانى استفدت منك الكثير والكثير ومن الاخوان الاعزاء (وانشاءالله يوم شكرك ما يجى قول امين ) لك منى والى اخى فيصل خليل ورواد هزا البوست


الود


أعيشهْا معاكَ لو تعْرف

دموع البهجَهْ والأفراح

أعيشهْا معاكَ واتأسّف

على الماضى اللّى ولَّىَ وراح

على الفُرْقَهْ الزمان طويل

على الصبر الّى عِشْنَاهو

مع طُول الألم والليل

زمان كُنّا بنَشيل الوُّد

ونَدِّى الوُّد

وفى عينينا كان يكْبَر

حناناً زاد

وفات الحدَ

زمان ما عِشْنَا فى غُرْبَهْ

ولا قاسينا نِتْوحّد

وهسَّع

رُحْنا نتْوجّع

نعيش بالحسرَهْ نتأسّف

على الماضى اللِّي ما بِرْجَع

أحبَّك

لا الزمن حوّلْنى عن حُبّك

ولا الحسرَهْ

وخوفى عليكَ يمْنَعْنى

وطول الإلفَهْ والعُشْرَهْ

وشوقى الليك من طوَّل

لسّه معاي

ولى بُكْرَهْ

Suhad Abduelgfaar
Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف الفاتح محمد التوم 29th أغسطس 2010, 16:05

حردان الرد عديل كده!!!!! ...... وروني أعمل شنو مع روحي المشحتفه دي في ألق كليماتكم المتدفقة,,, وداً ,,إلفاً,, وصدقــا ,,,تداعب مخيلتي تأخذني ,, تأسرني ,,, يا استاذي أزهري وسهاد وغريق وعثمان وفيصل والرواد ,,, تأسرني الكلمة الصادقة تقيد عقلي تغتالني من جوه,,, ولكن دوماً خلاصي في الإحساس بالأمان في لمة ذي دي ,,وصدق القال العز بالأهل ,,, آه يا أهل الصدق و الشعر و المعانى السامية والأصل والبيان ..

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف فيصل خليل حتيلة 30th أغسطس 2010, 15:51

شكرا لكم جميعا ايها الاحباب.

نص للشاعر الدوش نقدمو هديه لكم جميعا -الفاتح الانيق - استاذنا ابوالزهور -الزعيم غريق الاخ مدثر النو

ثم الى اختنا الصغيرة النشطة سهاد عبدالغفار.

+++++++++++

ماضلمت


أقول
والشمس ِفي عز الأمل
تهتَ ومَشيتْ
أقول يا نِحنَ يا إنتو
وبكيتْ
يا مواعيد ..
يا صباح من غير وسـِم
تهتَ ومَشيتْ

ما ضَـلـّمتْ ..

ما بْـتــَعرِفْ الزول البجيك ..
ولا البـِجيكَ بيـَعرِفكْ

حتى الشبابيك
والزوايا الكان بـِتَجْمَع
في حناياها الشكوك
ضَـلـّمتْ

أغشاكِ يا نفسي الغريبه
من همومي أطلـّعـِك
ألقاكِ واقفهْ على الطريق
أحزان بتـَفرح وتشتبـِك
أفراح بتحزن وتـِرتبـِك
لمّنْ رحلتَ مع الغـُنا
عـِز الأماني
وضَـلـّمتْ

مدّيت على الأمل القريب
أشواق كـَتيره وقصّـرتْ
في زاويه من ضُل الشجون
جابت ظنونا وقيـّـلت

كلّـمتَ أشجار الخريف
عن شوق نما
في الوحشه والزمن الأسيف
دلـّتنيـ اْفتـّش في المغارب
وفي المشارق
عن علامات أو رصيف
تـَرقـُد الأزهار عليهو

يا بنفسج
كُحلي غالي
وبـُرتقالي
أمشو إنتو ..
أنا البقيف

ما ضَـلـّمتْ ..

فيصل خليل حتيلة
فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف الفاتح محمد التوم 2nd سبتمبر 2010, 16:10

فيصل اخوي ...... ياخي مالك ضلمتها كده وماخليت فيها " ضي " ولا شعاع صباح ..... والى ان يصبح الصبح ,سأحضن بقية من أمل سقطت سهواً بين ابيات القصيدة ,,,,, تدثرت في الأحزان بين الكلمات .... أشكرك للإهداء........

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف أزهرى الحاج البشير 4th سبتمبر 2010, 09:43

يا حلة تنّوري

ياحلة تنّوري


عدل سابقا من قبل أزهرى الحاج البشير في 4th سبتمبر 2010, 15:15 عدل 1 مرات
أزهرى الحاج البشير
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

(طه المدرس ود خدوم) للروّاد والى أستاذنا أزهرى الحاج Empty رد: (طه المدرس ود خدوم) للروّاد والى أستاذنا أزهرى الحاج

مُساهمة من طرف الفاتح محمد التوم 4th سبتمبر 2010, 15:04

والله نوّرت وهلّت و أشرقت يا استاذنا.
طـلـعـــت مــــن جــــوه احــــزانـى الـــعديـــده
نجـمـة تحى بتــضــوى فى دجى الليلات وحيده
فكـرة فـنــانه وجــديـدة نـظــــره لـماحه وفريده
فـتـشـتـــا عـنـهــا فـى الــقــــري النـائية البعيده

أشكرك للإضاءة ياشيخ ازهري

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى