ابوجبيهه


انضم إلى المنتدى ، فالأمر سريع وسهل

ابوجبيهه
ابوجبيهه
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

يا مريخــــــــــــاب..متي تشعــــــرون بالخجــــــــــل؟

3 مشترك

اذهب الى الأسفل

يا مريخــــــــــــاب..متي تشعــــــرون بالخجــــــــــل؟ Empty يا مريخــــــــــــاب..متي تشعــــــرون بالخجــــــــــل؟

مُساهمة من طرف خدورة أم بشق 11th نوفمبر 2010, 06:18


منقووووووول قوون محمد عبدالماجد

يا مريخــــــــــــاب..متي تشعــــــرون بالخجــــــــــل؟

لم اكن اريد ان اعلق على قضية لاعبي المريخ الذين استوقفهم النظام العام ..باعتبار ان هذا الامر سلوك شخصي ..يعاقب عليه القانون ويسأل منه يوم الحساب.

وبالتأكيد هذه المواضيع (الشخصية) مكانها ليس في مثل هذه المساحات.

لكن اعلام المريخ (السالب) ابى إلا ان يؤكد انه فعلا (سالب) عندما حاول هذا الاعلام السلبي ان يبرئ لاعبه باتهام الهلال باعتبار ان الهلال خطط لكي يبعد (راجي) من لقاء القمة بهذا المخطط.

راجي دا بيلعب وين؟.

اوعك تكون صدقت.

ضحكت من هذا التبرير ...وعرفت لماذا الامور في المريخ تسير بهذا السوء.

وتلك بشرى لكل لاعب في المريخ ان يرتكب كل الموبقات ...من بعد فان اعلام النادي سوف يرد سوءتهم للهلال.

ما هذا السخف الذي يحكون عنه.

بدلا من محاسبة اللاعب الذي وقع في المحظور خرجوا يجملون موقف لاعبهم بان هذا الذي وقع فيه من تخطيط نادي الهلال.

دا شنو البتعملوا فيه.

يا جماعة انتوا زول عاقل واحد ما فيكم.

هل القاريء السوداني بهذه السطحية ..ليحسب ان هذه المخطط قام به الهلال.

يعني زي ما قال الاستاذ معتصم محمود ...(الشرطة) بدلا من ان تكون في خدمة الشعب ..اصبحت في خدمة الهلال.

ناس الهلال يخططوا ..والشرطة تنفذ.

ما هذا السخف؟.

لا القاريء ولا المشجع المريخابي العادي نفسه يمكن ان يصدق هذا الذي خرج به اعلام المريخ ليبرر ما فعله لاعبه.

راجي مين يا عم؟.

راجي شنو؟.

لاعب بهذا السلوك لا خوف منه ...مهما كانت موهبته ...وهو خصم للمريخ قبل ان يكون خصما على الهلال اذا كان هذا فعله.

لقد سقط راجي من حساباتنا بشكل نهائي ..وهو في مباراة القمة لا يحتاج حتي الي مراقبة ..ولا يمكن ان يشكل خطورة على الهلال ..لأن اللاعب الذي يسوء تصرفه خارج الملعب ..يسوء تصرفه ايضا في الملعب.

اما المصيبة الاكبر التي ارتكبها مجلس ادارة نادي المريخ ..وجهازهم الفني كما اشار الاستاذ عبدالمجيد عبدالرازق هو اشراك راجي في مباراة المريخ وجزيرة الفيل ..بدلا من ان يتعرض اللاعب لعقوبة او حتي يبعد من المشاركة مؤقتا حتي يكون (عبرة) للاخرين.

لكن في المريخ ...ليس الاعلام وحده هو (السالب)..مجلس الادارة ايضا (سالب)...والجهاز الفني كذلك (سالب).

اشركوه في مباراة رسمية ..ثم عادوا بعد ان تعرضوا الي النقد والهجوم وقالوا انهم سوف يحاسبوه

اكبر من هذا ...انهم توجوا (راجي) نجما للمباراة ...ولا نملك هنا اكثر من نقول : (يا مهازل امرحي).

سفاري غاب في تمرين حرموه من مرتب 5 شهور. .. راجي لا.

انتوا القوانين دي بتجيبوها من وين؟.

ان الذي اؤكده ...واراهن عليه بعد هذا الذي شاهدته في المريخ ...(تفكك بين اللاعبين ...وتهاون في مجلس الادارة وخداع من الاعلام السالب) ..بعد هذا الذي يحدث ..المريخ سوف يتعرض لاكبر هزيمة في تاريخه من الهلال.

الحساب اصبح عسيرا.

الموضوع بقي خطير جدا.

نحن بي حالتكم دي ما بنرحمكم.

ماذا سوف يكون موقف سفاري ..وقلق وبلة جابر وموسي الزومة ...ولاعب يضبطه النظام العام قبل 48 ساعة من مباراة المريخ وجزيرة الفيل ..ويشارك في المباراة.

والطامة الكبرى ..يفوز بنجومية المباراة.

دا شنو البتعملوا فيه دا؟.

معقولة ...وصلت الامور في المريخ الي هذا الحد.

نقول لاهل المريخ ..للذكري.

ان الاخلاق قدمت على (العلم)...وقبل العلم اخلاقا.

لكنهم في المريخ يقدمون (اللعب) على الاخلاق.

يعني شنو؟..لو انتصر المريخ على الهلال وفاز حتي ببطولة الدوري الممتاز.

يعني شنو؟.

ولا فارقة في حاجة.

الشيء الاخر الذي نقف عنده ...هو حكاية (الجواسيس).

ناس النفطي والمرابط ..قالوا نحن اصلا ما جينا السودان عشان نلعب كورة.

نحن جينا ...(نتجسس).

هو وينو الفريق البنلعب ليه كورة.

السن ذاتها عندها حكم.

الواحد فيهم بقي ما يقدر يعمل حاجة اكتر من ان يتجسس.

عشان كدا ..هيثم ...اسمو (المرابط).

يعني من الساعة 3 ..بكون حائم في استاد الهلال.

الولد بعمل في شنو؟.

الولد بتجسس.

طيب ممكن اسأل سؤال.

مرتبات النفطي والمرابط البدفعها منو؟.

المريخ وإلا (الصفاقصي).

انا هيثم المرابط دا من شفتو ..حسيت انو (جاسوس).

شعرت بي الموضوع دا ..طبعا انا الحاسة السادسة عندي قوية.

كورة شنو البيلعبها (المرابط).

المشكلة الكبرى ...(النفطي) دخل البلد عامل فيها (لاعب ارتكاز).

زولكم طلع (جاسوس).

انتوا يا ناس السودان تستاهلوا...تجنسوا في الاجانب ...وهم بتجسسوا عليكم.

الجنسية تمنحوها للاعب من سلم الطيارة...عشان كدا اللاعب بتجسس عليكم.

انا خايف الجماعة ديل يكونوا بتجسسوا في حاجات تانية.

يعني موضوع (البترول) دا ما تهملوه.

والاستفتاء.

نحن ناقصين ..عشان ناس النفطي ومهدي بن ضيف الله ...وهيثم المرابط يقعدوا يتجسسوا لينا.

هي البلد (ناقصة).

هو انا جبت حاجة من عندي.

براكم بتفتشوا المشاكل.

جماعة ...عندهم مشاكل مع النظام العام.

وجماعة يتجسسوا.

بي حالتكم دي عاوزين تغلبوا الهلال.

عاوزين تغلبوا ناس هيثم مصطفي (حفظه الله ورعاه).

ناس عمر بخيت ..وبشة ومساوي ...والواحد فيهم ما بتسمع ليه صوت.

التزام ..ومسؤولية واحترام للاخر.

هسع خلوا الموضوع دا ...الحديث في الحتة دي بالذات ما في داعي ليه.

قالوا ليك ...في واحد كدا ..اتذكر ان العيد يوم الثلاثاء.

وان العيد باقي ليه 4 ايام.

صاحبكم جرى على السوق ...اشتري ليه قماش جلابية ...وبقي يفتش ليه في (ترزي) عشان يخيط ليه الجلابية.

ما خلي ليه (ترزي) في السوق العربي.

أي ترزي يمشي ليه يقول ليه : انا بعد كدا ما بمسك لي قماش.

يا ود الناس انت عاوز تمسك (سادومبا).

والزول شايل قماش الجلابية ..وبلف في السوق.

طبعا في الحالة الزي دي ممكن عادي جدا ..تلقي ليك زول يوصف ليك ترزي.

أي واحد تحكي ليه الموقف دا ..بقول ليك انا عندي ليك ترزي.

تمشي للترزي ...الترزي برفض يمسك القماش.

اول ما تدخل على الترزي ..بقول ليك : انت الجلابية دي عاوزه متين؟.

طبعا انت بتقول ليه : عاوزها قبل العيد.

الترزي طوالي بنفض ايدو..وبقول ليك والله انا ما بقدر امسكها منك في وقت زي دا.

المهم زولكم ..من ترزي لي ترزي.

أي ترزي بمشي ليه ..بعتذر ليه.

اخر حاجة زولكم لقي ليه ترزي نص كم.

النوع البقول ليك تعال استلم جلابيتك العصر.

ما عندو أي زحمة.

ترزي فاضي ..زي (وارغو).

وارغو هسع ذنبو شنو؟.

الزول طلع ليه القماش ...والقماش بيني وبينكم غالي.

الترزي قال ليه : عاوزني اطلع ليك القماش دا متين؟.

زولكم قال ليه : قبل العيد طبعا.

الترزي عاين للقماش كدا ...وقال ليه : انا ممكن اسلمك القماش دا قبل العيد ...لكن ما بقدر اجزم ليك ...قماشك دا بعدين يطلع جلابية ..او يطلع (كيس مخدة) ما بقدر احدد ليك ...عشان انا مزحوم شديد ..وبراك عارف.

صاحبكم كبس ..قال ليه : ما مشكلة ...وضرب ليك (كرشتو) بي ايدو ..وقال ليه : نحن المخدة عندنا.

ملحوظة: هسع المخدة ذنبها شنو؟.

هوامش

فاروق جبرة بسمع أي مدرب يلعب ضد الهلال في الدوري الممتاز ..يقول قدمنا تجربة مفيدة للهلال.

والمدرب طبعا بقصد ان الهلال استفاد من المباراة كتجربة للمباريات الافريقية في البطولة الكونفدرالية.

تصوروا فاروق جبرة بعد مباراة المريخ وجزيرة الفيل ..قال : نحن قدمنا للمريخ تجربة مفيدة.

تجربة مفيدة على شنو يا جبرة.

انتوا بتلعبوا في بطولة واحدة.

يا ربي فاروق جبرة قاصد انو بعد في المريخ للهلال.

الجواسيس ديل ما بقدروا على الهلال.

فريق حي العرب الذي لعب امس مع الهلال واضح عليه انه كان (محفز).

الحافز ظاهر في (الخشونة) الزايدة.

انتوا يا ناس حي العرب ..بحفزوكم ..هنا وهناك.

عارفين (الحافز) كان لي شنو؟.

عشان يعوقوا ناس هيثم مصطفي حفظه الله ورعاه وعمر بخيت.

بالله حي العرب تقول فريق اجنبي.

شغال ضرب في فريق سوف يلعب بعد 72 ساعة امام الصفاقصي.

نحن يا حي العرب نلقاها منكم وإلا من الجواسيس وإلا من الاتحاد العام.

بالله ناس حي العرب ديل جايبين ليهم لاعب اسمو (قصي) تقول كان معسكر في (افغانستان).

الزول دا بالذات على ما يبدو حافزو بالدولار.

هي شنو؟.

بعدين انتوا يا ناس حي العرب (الملاكمين) ديل بتجيبوهم من وين؟.

لاعب يشاكل ضلو.

يا زول روق..انت لو لعبت مائة سنة ما بتجيب كأس الممتاز.

انا اول مرة اشوف لي لاعب بعمل مخالفة مع (ضلو).

يا ابوشامة ...انتوا متأكدين (قصي) دا ما تونسي.

قصي كان عاوز يعمل فيها احمد سعد تاني.

عاوز يضرب (البرنس).

الحكم (كرتو). .. والمدرب (غيرو).

خايف يطلع (جاسوس).

في زول بعمل كدا مع هيثم مصطفي حفظه الله ورعاه.

الغريبة اللاعب بعد ما غيروه ...طلع يشاكل في الجهاز الفني.

قلت ليكم الزول دا بشاكل في ضلو.

الطريف في الامر زولكم لعب 30 دقيقة ...وطلع ما خلي ليه قارورة موية صحة حائمة.

قدر ما الكاميرا تجيبو هو قاعد يشرب في الموية.

انت قايل اللعب امام هيثم مصطفي ساهل.

تشرب ما تروى.

يا ود ألعب بعيد.

لو عملنا مباراة في (جر الحبل) بنجيك.

خلى تلفونك فاتح.

انت يا قصي ما عارف هيثم مصطفي دا عندو (جواز دبلوماسي).

قلنا ليكم الزول دا (سفير) عديل.

يعني الكورة دي بيلعبها (سياسة).

وانتوا بتلعبوها (مصارعة).

الزول دا (سفير).

مية مرة نقول ليكم كدا.

انتوا مالكم عاوزين تجيبوا لينا (الامم المتحدة).

هو نحن ناقصين.

الارهابيين ديل بتجيبوهم من وين؟.

دا ذاتو النوع البجيب لينا الهوا.

يا ناس حي العرب اللاعب دا لو ما شطبتوه ...بنزلكم من الممتاز.

بعد دا ممكن نلحق الموضوع دا.

الحافز بعمل اكتر من كدا.

سادومبا مفروض يراجع حساباتو.

يا سادومبا مالك انت.

بكرى المدينة متي ما شارك اثبت انه مهاجم كبير.

كاريكا ..فات.

مهند بعوض في المريخ.

ضحيتنا الاولى باقي ليها 72 ساعة.

نحن أي حاجة عندنا بي نظام.

خبر عاجل: الجواسيس الحمر ديل كلامهم بقي كتير.

خدورة أم بشق
مشرف منتدى الشعر
مشرف منتدى الشعر


الرجوع الى أعلى الصفحة اذهب الى الأسفل

يا مريخــــــــــــاب..متي تشعــــــرون بالخجــــــــــل؟ Empty رد: يا مريخــــــــــــاب..متي تشعــــــرون بالخجــــــــــل؟

مُساهمة من طرف عوض السيد ابراهيم 11th نوفمبر 2010, 08:01

عاوزين تغلبوا ناس هيثم مصطفي (حفظه الله ورعاه).

ناس عمر بخيت ..وبشة ومساوي ...والواحد فيهم ما بتسمع ليه صوت.

***********
***********
هذا صحفى معتوه ليس الا!!!!!
*هيثم فليحفظه الله ويرعاه ويحفظنا ويرعانا جميعا(ما قلنا حاجه).
*ولكن كيف لهذا(الحاوى) أن يضمن سلوك غيره ويصفهم بأن لا يسمع لهم صوت.
*قال (ص)....انّ الله يستر ثم يستر ثم يستر ثم يكشف.
*أوّل مره نعرف أنّ عمر وبخيت ومسّاوى و بشّه من سلالة الأنبياء.
*هذه نشوه عارمه سابقه لأوانها وحدّها أوشك على الظهور.

عوض السيد ابراهيم
عوض السيد ابراهيم
مشرف المنتدى العام
مشرف المنتدى العام


الرجوع الى أعلى الصفحة اذهب الى الأسفل

يا مريخــــــــــــاب..متي تشعــــــرون بالخجــــــــــل؟ Empty رد: يا مريخــــــــــــاب..متي تشعــــــرون بالخجــــــــــل؟

مُساهمة من طرف محمد قادم نوية 11th نوفمبر 2010, 09:00

نعم ياسيدي الصحفي ......هذا سلوك شخصي وفي جهات مختصة تحاسب علي هذه السلوك
فالقصد من هذا الكلام هو:شل تفكير لاعبي المريخ وإخراجهم من جو لقاء القمة وهذا لايزيدنا الا قوةً وإصراراً
محمد قادم نوية
محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

يا مريخــــــــــــاب..متي تشعــــــرون بالخجــــــــــل؟ Empty رد: يا مريخــــــــــــاب..متي تشعــــــرون بالخجــــــــــل؟

مُساهمة من طرف خدورة أم بشق 11th نوفمبر 2010, 13:17


تصوروا فاروق جبرة بعد مباراة المريخ وجزيرة الفيل ..قال : نحن قدمنا للمريخ تجربة مفيدة.

تجربة مفيدة على شنو يا جبرة.

انتوا بتلعبوا في بطولة واحدة.

يا ربي فاروق جبرة قاصد انو بعد في المريخ للهلال.

الجواسيس ديل ما بقدروا على الهلال.
حاجة تحير الهلال هو لاعب ضد حي العرب ولا نيل الحصاحيصا ولا أمل عطبرة .. كلهم بيقدموا خدماتهم ضد الهلال ... هم كوم والهلال كوم

خدورة أم بشق
مشرف منتدى الشعر
مشرف منتدى الشعر


الرجوع الى أعلى الصفحة اذهب الى الأسفل

يا مريخــــــــــــاب..متي تشعــــــرون بالخجــــــــــل؟ Empty رد: يا مريخــــــــــــاب..متي تشعــــــرون بالخجــــــــــل؟

مُساهمة من طرف خدورة أم بشق 11th نوفمبر 2010, 13:21

وهذا إعتراف ضمني أن الله فضحهم بعد أن سترهم كثيراً ،،، والشيئ المحير أن أحدهما كوفئ بنجومية المباراة .. يعني بالواضح أسكر ونحنا نكافأك

خدورة أم بشق
مشرف منتدى الشعر
مشرف منتدى الشعر


الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى