ابوجبيهه

ثرثرة المياه والعصافير لامرأة بالغة العذوبة ..أزهري محمد علي

استعرض الموضوع السابق استعرض الموضوع التالي اذهب الى الأسفل

ثرثرة المياه والعصافير لامرأة بالغة العذوبة ..أزهري محمد علي

مُساهمة من طرف أزهرى الحاج البشير في 2nd ديسمبر 2010, 09:10

هيأوني للآن للموت

فقط امنحونى جرعة ماء كعادتكم قبل ارتكاب شهوة الذبح

امنحوني جرعة ماء

وامنحوا العصافير حيزاً للغناء

وصلوا علىَّ واقفاً

سبحاننى أنا

سوف ارفع الأذان فيكم

قبل ميقات التجلى

فحَّي على الغناء

لا فئة تؤدى الى أختى فاطمة وإلى كل فاطمة.

فاطمة خبّاره ما مرقت على المطره

ولا لاقت أيديها الغيث

معلِّقة روحا في حبل الصبر قادوس

ولا كفّت من الدعوات

على التاكوه باب الروح

ولا فاقت من الفاتوها

فى درب البحر بتكوس

فاطمة حبيبة الاطفال

ضاقت المُرّه ما ضاقت

فارّه بسيمها في الضلام فانوس

غرستها في الارض تيراب

لا كمْلت ولا حاقت

ولا نَقّر عريقها السوس

فاطمة

لافتة تؤدى إلى النص

ممطوره ومتحاشيه البلل

عصفوره في وش الرياح والزيفه

والخوف والعلل

حمّدْني ودْعِك بالرحيل

وقعّدْني دربك بالشلل

عصفورة الوطن الجميل

يا باقة والايام دول

امسينا حاضننك حلم

اصبحنا باكنّك طلل

يا خيّه بحجم الرهان

فى المحنه والخطب الجلل

نص:

حان الآن موعد اذان الغيث

وصلاة المويه على الواطه

الحلبت ضرع الغيمة الدرّا

الغيمه الانشّت في السماء تبروقه

ودشرت همهما من سبلوقة القبله

وفتحت بنيان الافق الواسع

للطير الرجّع عصفورة قلبي المطلوقة

وفرَّ

للشمس السلت روحها

ومرقت من قفطان الليل ذي قرّه

ودعوات القلب الفاتح

لطفله اتبرّت من اوزار الطين

اتوضّت من درن الاحزان المُره

وفتحت للطير الطار القبله

يا طير يا طيب يا صالح

تحلم بس عالم متصالح

ونحلم بالحاصِب في النِّبْله

لي وين بنودّي وشينا الكالح

من اسئلة الارض

ومن نقنقة الغيم الحبلى

نحن القصينا جناح الريح

وعبينا العالم في طبله

يا طير يا طيب يا صالح

ارحل ما شاء الترحال

في طلب المويه وقوت العام

وفِذ ما فَذّ الوز

فى السماء أو عام

وامرق منسلة حلمى الخاص

لرحاب الحلم العام

يا كائن - عام

قفاك اعوج وما طاب

فى البسيطه مقام

يا طير يا طيب يا صالح

منو الفتح الافق لحَمام

فلت من ناب لمخلب

عطش جارح

يغايض الصحراء ببقّه

فى بطن الابل

وريق صبار يضاير الُّجه

لآخر فجّه

فى ذاكرة المياه العذبه

وينتخب المطر سلطان

وكان..ما كان

حديث المويه فى قعدة

بداية الخلق

ابتدر الغناء الصلصال

وكشفت في الهجيج النار

اشتدَّ الانين والطلق

دخلت في الوجع سرسار

وقالت قولتها الفاجعه

-الولادة اتعسَّرت

وانقطع العشم فى صرخه

انقطع حبل الحلم

وندَهْنا:-

يا حلاّل تَحلّها

الواسعه اضيق من رحم
ياالله فاض بينا الحنين لطفله

حتحتنا فى غناها النضم

ويا زوله امّنْتِك غناي

وقهيت وراها نجم نجم

جاييك والايام وراى

مكسوف وخائب ومنهزم

أدِّيني من صبرك معاى

للزيفة والايام هِدم

ادِّيني لروحك درب

واتعلمي انّو العشق

يعنى الغُنا فى من تُحب

يعنى إشتعالك فيك

واخضرارك فى القلب

قرنفلة ونعناعةِ

يا مسبية بي قسَم الوعاظ الباعه

براك اديتي الشواذ العِصمه

ودخّلتي الاغانى الناشزة بيت الطاعة

براك

يا طاهرة فى الزمن النجس

ومستّفة الحيل بغناك

انا ما نسيتك فى الرماد

شان ازرف الدمعات وراك

وانا لوببيعك

ما كان غمدتا الكلمه

فى لُب الجفير

ومرقتا أعزل فى العراك

وانتى فى مفترق الطرق تطمثى

تتحسسى السلك الهلاك-وتهبّشى

للغله فى بيت النمل بتْفّتشى

ماقطّ ماعون من كفاف

الاّ وتُراق موية وشى

يا واقفة فى باب السقط تدهشي

يمرجحك العطش من بحر الجبل لي دجله

عاودنى الحنين لسحرتك

ساكت حمَتِْي الخجله

انا كل ما شرقت شمس

القاك تنقّبي فى اليقين

من جلدى

وتلعبى فى المفاصل حِجله

كل ما شرقت شمس القاك

تردحى فى المنابر

((هى النار..هى النار))

ما لهلبت جمره فى كبد الرماد

تتشالقى وتاطيها

هى النار.....

قريبة الموية ومريودة السحاب تاريها

مارست الكُمون في روحا

وانقطع طاريها

غبت للنسيم والغيم

ولّبت هواها

غادر الشعراء انهار النبيذ فيها

كنت كفيف والدنيا قيامه

وكل النار بتعاين

فيك مندهشه

وانا جاييك من عبر تقاطع

طالع بين الشوق والوحشة

انا جاييك مهموم

جدعت فيني علق من يوسف

شفتها قامت زي اللهبه

طلعت زي السيف من غمدو

كنا تداعي الجسد الواحد

انتى بتهذي وانا محموم

جريت لقّطِتك من عينهم

جريت بي احساس

الجرى فى النوم

كوركتى المد .. المد

كان النهر فاتح

حضن المدينه سبيل

ومادى الايادى تكّيه

وانا بين صرختك والبر

لوّحت لي آخر غريق ومشيت

لقيت قوس قزح فى كتفى

وشنّقْتَ الغمام طاقّيه

صافحت الحراز للمويه

حمّدنى الخريف بي طيّه

غنيتلك

"قسيم التوبه

حدّث لي ابويا

عشان ازور الدونكى

واجيب لى حبّة مويه"

مويه

لي بت منسابه وعذبه وصافيه

بتنبت فى الجسد اشجار

وتنقع النيل الأزرق

حرِْدَت منى

ودقت ضهر الفيض بالموج

ناديتها العِينه...

صبّت فى الرحم العاقر

وسألت كم؟؟

جرعه بشفى

غليل الواطة؟؟

وصبحت طينه

طلقت شيطان الريح الهوج

ناديت الام المرقت من ضلعى المعوج

فرفر صوتها

وضحكت مليانه

وبرانا برانا اتونّسنا

ونامت مبسوطه ورويانه ، وطامنه

اتعارت توب المويه - واشتعلت

برداً وسلام

صعدت سمّوها البرق

وهبطت سميتها الطاقه الكامنه

وصلينا صلاة المويه على الواطه.
avatar
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

رد: ثرثرة المياه والعصافير لامرأة بالغة العذوبة ..أزهري محمد علي

مُساهمة من طرف Suhad Abduelgfaar في 2nd ديسمبر 2010, 11:21

عندما نزكر الشاعر
ابن الحصاحيصا ازهرى محمد على
نزكر الفنان مصطفى سيد احمد
رحمة الله عليه
ومشرع الحلم الفسيح
و...و...
يا مشرع الحلم الفسيح
أنا بيني ما بينك جزر
نتلاقي والموج اللديح القدرة والذات الشحيح
كملتو ما كمل الصبر
نتلاقي في الزمن المريح
وميعادنا في وش الفجر
يا مشرع الحلم الفسيح

تسلم استاذنا
الغالى ابو الزهور
وانت تفيدنا بكل ما هو حميل ونادر
ربنا يحفظك
من كل عين ما صلت على النبى
عليه افضل الصلاة والسلام
عندى طلب خاص لو ممكن
قصيدة يا زول
رثاء مصطفى سيد احمد
ربنا يرحمه ويغفر له
لانها عجبتنى جدا عندما
سمعتها
ولم اجدها مكتوبه
لك منى الشكر والتقدير
avatar
Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: ثرثرة المياه والعصافير لامرأة بالغة العذوبة ..أزهري محمد علي

مُساهمة من طرف مدثر عثمان النو في 2nd ديسمبر 2010, 11:32


فاطمة خبّاره ما مرقت على المطره

ولا لاقت أيديها الغيث

معلِّقة روحا في حبل الصبر قادوس

ولا كفّت من الدعوات

على التاكوه باب الروح

ولا فاقت من الفاتوها

فى درب البحر بتكوس

فاطمة حبيبة الاطفال

ضاقت المُرّه ما ضاقت

فارّه بسيمها في الضلام فانوس

غرستها في الارض تيراب

لا كمْلت ولا حاقت

ولا نَقّر عريقها السوس

فاطمة

************
أزهري محمد علي ما أظن يختلفو إثنين على أنه مبدع و متفرد

كل الشكر لك الرائع دوما ... ابو الزهور
حقاً هو متفرد كتفردكم بهذا الحضور الجميل
أدامك الله وأبقاك

مدثر عثمان النو
نشط ثلاثة نجوم
نشط ثلاثة نجوم


الرجوع الى أعلى الصفحة اذهب الى الأسفل

رد: ثرثرة المياه والعصافير لامرأة بالغة العذوبة ..أزهري محمد علي

مُساهمة من طرف محمد قادم نوية في 2nd ديسمبر 2010, 11:44

أزهري محمد علي شاعر صاحب الكلمة الرصينة ...غذي مسامع المتذوق للفن بأجمل الكلمات وأعذبها
لك التحية عم أزهري علي البوح الشعري الغني بالجمال والروعة
avatar
محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

النــار ولّعت !!!!!

مُساهمة من طرف الفاتح محمد التوم في 2nd ديسمبر 2010, 22:06

يا واقفة فى باب السقط تدهشي
يمرجحك العطش من بحر الجبل لي دجله
عاودنى الحنين لسحرتك
ساكت حمَتِْي الخجله
انا كل ما شرقت شمس
القاك تنقّبي فى اليقين
من جلدى
وتلعبى فى المفاصل حِجله
كل ما شرقت شمس القاك
تردحى فى المنابر
((هى النار..هى النار))

أستاذنا يستلهم أستاذنا ...... يا للألق والروعه
يسحرني حديثه الهــادئ ونقده الواضح وأنا أرقبه في" سحر القوافي "

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ثرثرة المياه والعصافير لامرأة بالغة العذوبة ..أزهري محمد علي

مُساهمة من طرف دكتور عبدالوهاب الزين في 8th يناير 2011, 18:29

هذه المفردات الرائعة والكلمات المتوهجة وكأنها تف بأريج الليمون في حديقة مخضرة وارفة النيت مشروع لألف قصيدة رائعة نقلتها بكاملها إلى دفاتري أتأمل حروفها اليانعات لك الشكر على استنهاض حدائق البرتقال
avatar
دكتور عبدالوهاب الزين
عضو نشط
عضو نشط


الرجوع الى أعلى الصفحة اذهب الى الأسفل

رد: ثرثرة المياه والعصافير لامرأة بالغة العذوبة ..أزهري محمد علي

مُساهمة من طرف أزهرى الحاج البشير في 5th يونيو 2014, 07:54

أين أنت يا أخي عبدالوهاب ؟؟؟ وشغلتنا عنك زحمة الأحداث
avatar
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

رد: ثرثرة المياه والعصافير لامرأة بالغة العذوبة ..أزهري محمد علي

مُساهمة من طرف الفاتح محمد التوم في 12th يونيو 2014, 19:32

اســتاذي ... نعم نكاد نرى بريقــــــ نجمه ..لكنه لم يأفل .. وكما أسلفت في مداخلة لأخي فيصل خليل 

"يقيني أن دكتور عبدالوهاب
امرؤ تأتيه راضية ......كلُّ القوافي على أطرافها تقف
يغربل الحرف حتى منتهى قلمه ...وكل مفرده لذاك البحر تنجرف
شعراً ونثراً .... ألقاً... وتدفق 
.أي مهر نهديك....!!!!

يا هذا النجم الذي ألفنا قلمه؟؟؟؟ "

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ثرثرة المياه والعصافير لامرأة بالغة العذوبة ..أزهري محمد علي

مُساهمة من طرف كرم هجانه في 1st أكتوبر 2014, 12:58

فاطمة خبّاره ما مرقت على المطره

ولا لاقت أيديها الغيث

معلِّقة روحا في حبل الصبر قادوس

بسسسسس

ليه يا أزهرى ... تهرى أشياءنا الرهيفة هذى الكلمات الفراشات النسايم

ما لى أنا ... و عذوبة الأوطان ... و الآن عزابى يرتش صورة الوطن ... فكرة الوط

:::: لحى الآن ... و أنا أكتب هذا المرور العفيف ... لم أستكمل قراءة النص

لكنه لفحنى ... لحفة توب بنية بتصارع الريح

و أخذى إلى هنات مرفأ ...

أعشق هذه الكلمات ... أحفظها عن ظهر قلب .... دفنتها سفاية الزمن فى غيابة جبى الخاص ...

فزفرتها أنت يا أبو الزهور .... إنت مش أبو الزهور ... إنت كل الزهور

يييياااااااااااااااااااااااااااااااااااااااااااااااااا
ح أرجع أقراها .... و أطبعها ... و ح أقراها فى العيد تحت القمرا فى رمال كردفان

كرم هجانه
نشط مميز
نشط مميز


الرجوع الى أعلى الصفحة اذهب الى الأسفل

رد: ثرثرة المياه والعصافير لامرأة بالغة العذوبة ..أزهري محمد علي

مُساهمة من طرف كرم هجانه في 1st أكتوبر 2014, 13:23

"يقيني أن دكتور عبدالوهاب
يااااااااااااااااااااا فاتح ::: أموت ةسط الجنون الجنون ::: أحبك
امرؤ تأتيه راضية ......كلُّ القوافي على أطرافها تقف
يغربل الحرف حتى منتهى قلمه ...وكل مفرده لذاك البحر تنجرف
شعراً ونثراً .... ألقاً... وتدفق 
.أي مهر نهديك....!!!!

شكراً يا فاتح القلب نقيه

أزهرى رجل تسكنه القوافى :::
سألته ذات شباب وارف بالأهلية ::: يااااااااا .....
..........       ............
الطشاش غيب إحساس الرضا ...
و مسح الروح بالغباش ....
و انا ما نسيت طيب معشرك و لا اقمت عليك عزا ...
إشتهيت افرد ضفيرتك للمطر و أفضل أريدك إندهاش ...
يا مدهشة ......
 أو ألوز بنفسى عنك ................ يا مدشة (فعلاً كانت مدهشة)

سالته ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
قال لم تسأل ؟؟؟ و قال لم أفهم شئ ... ماذا تريد أن تقول ؟؟؟؟؟؟؟؟؟؟؟؟
 قلت أنا ذاتى لا أدرى  .....

هكذا قوافى ازهرى محمد على .... تشعر و أنت تقرأها ... أنا بلت ريقك ... زادت عطشك ... أدخلتك فى غلاط بينك و بين ذات (رويت ؟؟ لا ؟؟ عطشان ؟؟ لا داير تشرب سا ... مالك طيب ؟؟ عارف / ماعارف) ..
و ابو الزهور يماس ذات الأشياء بإستثارة شهيق الحروف و زفير البكاء

كرم هجانه
نشط مميز
نشط مميز


الرجوع الى أعلى الصفحة اذهب الى الأسفل

رد: ثرثرة المياه والعصافير لامرأة بالغة العذوبة ..أزهري محمد علي

مُساهمة من طرف الفاتح محمد التوم في 5th أكتوبر 2014, 13:14

كرم الدين كل ســـنة وإنتـــا بخير ...... ياومضـــــــــة من جواهر  الزمن الجميل 
فتشتا ليك كل الســـــــــــكك ....المراحيل  مـــــــاااااااا  دلاّني حــــــد
وصيت عليك كل الدروب كل الخلوووووق الــ في الطرق وكل حــــــد
لقيت خبرك ..بعيـــد من حباك  المحنة  ...زايد عطاك ما ليهو  حـــــد


وكتبتا ليك !!!!!!!!!!! في منتدى الابداع

كرم سلام يغشاك في شـــــــــــــــمال كردفان وحدوده

في أم صنيقير شيال للتقيلة وترقع المقــــــــــــــــــدودة
تهديهم  من اسمك نصيب ومن صفاتك المشــــــــهودة
ياربي بالسلامة تعود عاليه رايتك ..ورايات الرجال معدوده
*****
شكراً لتلك المرأة إنها فعلاً  بالغـــة العذوبة .. أخرجتك من صمتك لتطل علينا ....ياصباح العيد

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ثرثرة المياه والعصافير لامرأة بالغة العذوبة ..أزهري محمد علي

مُساهمة من طرف ناهد عبيد في 5th يناير 2015, 12:52

كل سنه وانتا بخير ابو الزهور  اتمناها سنه سعيده عليك وعلى الجميع
avatar
ناهد عبيد
مبدع مميز
مبدع مميز


الرجوع الى أعلى الصفحة اذهب الى الأسفل

رد: ثرثرة المياه والعصافير لامرأة بالغة العذوبة ..أزهري محمد علي

مُساهمة من طرف أزهرى الحاج البشير في 5th يناير 2015, 18:31

علينا وعليك بت أختي كم كنت سعيدا بلقاء بت جعفر في عرس الحبيب الفاضل .. كان لقاءا بعد غيبة طويلة
سبحان آمنة .. آمنة لم تتغيّرشكلا أو مضمونا .. تلك الابتسامة الصافية صفاء أبوجبيهة في أزهى وأحلى أيامها قبل نصف قرن .. سلامي الكثير لها وللوالدة الكبيرة وعبيد والباشا وكل الأسرة الجميلة.
avatar
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى