قصة عاشه ام رشه

هاجر صالح من اقصى شمال السودان يبتقى الرزق فى ارض الله الواسعه وقد انتهى به الطواف ان استقر فى امدرمان البقعه كما يحلو لعشاقها ان يسمونها ولما كان صالح لايجيد اى مهنه عند خروجهه من قريته فى الشمال أجبرته الظروف ان يعمل اى عمل يعتمد على الجهد البدنى حتى يستطيع ان يوفر لنفسه لقمة العيش ويحقق الهدف الذى خرج من اجله وهو جمع المال ومن ثم العوده الى قريته لكى يعيش حياة مستقره وسط اهله ويتزوج من احدى بنات قريته وينجب الزريه ؟؟؟؟؟؟؟؟

وذلك كان ديدن فتيان القريه 00يذهبون الى المدن بحثا عن فرص عمل اوسع مما متاح لهم فى بلدهم وكانت امدرمان قبله لهؤلاء الباحثين عن المال وهى تمثل ملتقى طرق وبها الكثير من فرص العمل ؟؟؟؟؟؟لذا فان البقعه كانت المحطه الاولى فى رحلة صالح 0000وبدأ حياته بالعمل فى السوق يساعد فى شحن اللوارى المتجه الى الغرب ويفرغ التى اتت تحمل المحاصيل الزراعيه من الجزيره ووسط السودان 00وظل صالح على هذه الحاله سنين عددا لم يستطيع ان يدخر ما يغريه للرجوع الى اهله ويضمن له عيش كريم فى قريته !!!!!!!!!!!!!!!!!!!!!!!!!!!!!!!!!!!!!!!!!!!!!!!

كان صالح ياتى فى الصباح ويجلس بجوار العم جادين الترزى وكان جادين من اشهر الترزيه فى سوق امدرمان فى ذاك الزمن وكان ماهرا فى خياطة الجلاليب ويفصل ايضا القمصان للستات وهو ترزى شامل يدغن مهنته بكفاءه عاليه وتجده معظم الوقت مشقول بعمله والبرنده التى يعمل فيها مزدحمه دائما بالصبيه والبنات ينتظرن ان ينتهى جادين من خياطة ملابسهن 0000000وكان العم جادين رجل مرح ويحب الحديث والثرثره وتجده يخيط وفى نفس الوقت يشاغل هذا وينكت مع ذاك وفى نفس الوقت يخيط بمهارت المحترف الواثق من مهنته 0000اعتاد صالح ان يجلس فى صندوق حفظ القماش الذى يقبع جوار الترزى جادين وكان صالح فى اوقات فراغه يقوم بخياطة الزرائر للقمصان والجلاليب ويقوم بأخز الجلاليب معه الى البيت لعمل عمود لها وهذا العمل يتقاضا صالح عليه بضع ملاليم 0000إقترح الترزى جادين لصالح ان يعلمه الصنعه صنعت الخياطه مقابل ان يقوم صالح بعمل العمدان للجلاليب وخياطة الزراير 0000وافق صالح على هذا العرض على الاقل عمك جادين اصبح رجل كبير وتقدمت به السن واصبح نظره لا يساعده على هذه المهنه وفى كثير من الاحيان اصبح يغلط فى الخياطه واصبح الزبائن يمتعضون منه !!!!!!!!!!!!!!!!!!!!!

هذه الظروف ساعدت صالح ان يتعلم مهنة الخياطه ويخلف عم جادين علما بان المكنه مملوكه لصاحب الدكان وعم جادين كان يعمل بنظام المناصفه مع صاحب المكنه 0000وقصة عمك جادين شبيهه بقصة صالح هو الاخر جاء الى البقعه من كردفا قبل اربعين سنه من مقدم صالح واتى لكى يبحث عن عمل يحسن به دخله وهو الاخر تعلم هذه المهنه بعد ان تتلمز على يد إغريقى فى نفس المكان لمدة عشره سنوات وبعد ان رحل الاغريقى ترك المجال الى عمك جادين لكى يصبح ترزى محترف 000هكذا كانت تتوارث المهن وليس بالسهوله ان يستطيع الانسان ان يكتسب الخبره ويمتهن الحرفه إلا بعد مكابده تمتد الى سنين عددا وان تتم اجازتك من واحد من اهل المهنه يتعهدك بالرعايه حتى تصبح صناعى محترف للمهنه 00000000

وظل عم جادين يمارس مهنة الخياطه وقد افنى كل عمره فى هذه المهنه وكان يمنى نفسه ان يستطيع فى يوم من الايام ان يوفر من عمله ما يغتنى به مكنة خياكه مستقله ويكون عائدها خالص له ويتحرر من سيطرت صاحب المكنه والدكان 0000ويعود الى قريته فى كردفان ويسطحب معه المكنه ويبدأ يخيط لاهله الملابس ويتكسب على ريع مكنته ويدخل هذه الاله المدهشه الى قريته وينال شرف إدخال هذا النشاط الى اهله!!!!!!!!!!!!!!!!!!!!!!!!!!!!!!!!!!!1

هيهات 00لم يستطيع عمنا جادين تلبية هذه الرغبه واصبحة حلم يبتعد يوم بعد اخر كلما تقدم العمر بعمنا جادين 000

وجد عم جادين فى صالح الابن الذى لم يرزق به لان عم جادين لم يتزوج واجل الزواج حتى الحصول على المكنه ولم يحصل على المكنه ولم يتزوج وظل عازب طوال حياته 00بدأ ينظر الى صالح كأبنه تماما وبدأ يحكى له عن اهله فى كردفان وجمال كردفان والاراضى الزراعيه فى كردفان والانتاج الوفير الذى تنتجه كردفان وحكى له عن اهله وكرمهم وإحترامهم للغريب 000وعن تفاصيل كثيره وعن خطيبته التى تزوجت من غيره بعد ان فشل هو فى الرجوع الى البلد 000حديث عمك جادين شوق صالح الى كردفان ورسم صوره زاهيه فى زهن صالح عن كردفان وصالح هو ابن الشمال المزارع التربال الذى يعشق الارض ويعرف قيمتها جيدا فاصبح يشتاق الى كردفان أولا ليشبع رغبته فى إغتناء الارض ويمارس هوايته فى الزراعه وبدأ يلح على العم جادين ان يذهبا معا الى قريته فى كردفان00000000000

اصبح صالح يجيد المهنه واصبح عم جادين يعتمد عليه فى العمل 00واصبحا يخططان معا للسفر الى كردفان 000وهم على هذه الحاله مرض عم جادين ودخل المستشفى وقد تدهورت حالته الصحيه وقد ترك الوصيه التاليه الى صالح لكى يعمل بها عند وفاته هى (لى اخ فى البلد اسمه حسين إذهب له وقل له ان يزوجك بنته عائشه وخذ هذا المال واشترى مكنه واعمل فى القريه0)ومات ؟؟؟؟؟؟؟؟

قام صالح واهل السوق بتجهيز الجثمان ودفنه وقاموا بواجب العزاء وبعد ثلاث ايام قا صالح بتنبيه ناس السوق إذا كان هناك أى انسان له امانه او دين فى زمة المرحوم جادين ولما اطمأن من ذلك اخز المبلغ وذهب واشترى مكنه جديده 00وحجز مقعد امامى فى ابو رجيله وتوجه الى حيث اهل المرحوم جادين 000

بعد مسيرة اربعه ايام واستقلال اكثر من وسيله وبعد الحصول على تسريح بدخول القريه من قبل سلطات الاستعمار 00وصل صالح الى قرية المرحوم جادين وسأل عن حسين ودلوه عليه ونزل عند حسين كأى ضيف عابر سبيل وهذه العاده عندسكان القريه ان ياتى التجار الذين يسمون بالجلابه ياتوا وتتم استضافتهم وحمايتهم من قبل السكان المحلين وفى القالب ان ياتى التاجر ويتحالف مع عشيره او مجموعه ذات منعه فى البلد 00نزل صالح فى خلوة حسين وسأل الصبيه ان كان لحسين هذا بنت يقال لها عائشه واجابوه ان لحامد بنت واحده فقط وهى عاشه ام رشه 00

انتحى صالح بحسين جانبا بعد ان اطمأن الى انه حسين المقصود وقص عليه قصة اخيه المرحوم منذ ان التقاه الى لحظة الموت 000وقال له انا عاوز انفذ وصية المرحوم وان تجد لى محل ابدأ فيه الخياطه واعطنى رايك فى الشق الثانى من الوصيه00

أطرق حسين براسه الى الارض مليا وقال له حقو انا اقوم اعمل الواجب وافرش الى اخى وبعد عمل الواجب نقعد نتفاكر فى امور الدنيا 00000اعلن حسين وفاة اخوه جادين فى امدرمان وتقاطر الناس على منزل حسين لزوم العزاء وبعد عزاء امتده الى ثلاث ايام زفع الفراش وطيلت هذه الفتره صالح يراغب سلوك اهل البلد ويتفرس فى وجوههم ويحاول التاقلم على لهجتهم المحليه وكان كذالك يسترق السمع كلى يعلم اى شيى عن عائشه بت حسين 000000000000000000000000000

فى عصر اليوم الرابع ناداه حسين وانتحى به بعيدا عن الناس وقال له قد تكلمت مع حاج المكى ان تعمل قدام دكانه وهو رحب بالفكره وقال البلد ما فيها اى مكنه وهو سوف يجلب القماش من المدينه يوم السوق الجاى 000اما بالنسبه للزواج من بنتى عائشه فأنت حر يا ابن اخى انا بقول ليك الحقيقه عشان ما تعمل حاجه وبعدين تقول حسين غشانى اولا انا واخى المرحوم جادين ليس من اهل هذه البلاد نحن جئنا من دارفور وجادين مشى دار صباح وخلانى انا هنا وانا هنا ماعندى اهل ولا ابناء ولدى بنت واحده وهى عائشه هذه وهى بنيه تلفانه ذى ما انتو تسمو هى بنيه عوقه وناس البلد هنا بقولو ليها خليقه والجهال بنبزوها بقولوا ليها عاشه ام رشه الجمل رفسهه قطع نفسها0000

نواصل

سلامات يا زعيم..
بالجد قصة جميلة جداً..

وشوقتنا للباقى.
فى انتظارك..

شكرا يا الفاضل على المرور ووينك يا راجل ماباين000

موجود يا زعيم..
علا (بكسر العين)منتظر
اليوم الخامس الحصل فيه شنو ؟؟

شكراً ياغريق علي مواصلتك لنا في السرد الجميل والقصص الرائعة ...بعد أن تجولنا معك في قصةِ ام محفوظ ظنيت انك سوف تستريح شويه لعل تجهز لنا بأخري لكن ماشاء الله الجراب مليان ؛اليوم أتيتنا بأجمل منها قصة عاشه ام رشه..
وتعرف عم جادين مازال أحفاده يمتهنون مهنته هذه .. وأعرف أحد أحفاده وهو ترزي مشهور في سوق امدرمان مكانه قبالة المسجد الكبير
والقصة بدايتها جميلة ..ننتظر ماذا حصل لصالح مع عاشه
لك مودتي‘‘‘‘‘‘‘‘‘‘‘‘‘‘‘‘‘

شكرا يا ول نويه على المرور الجميل 0000

من طرف **nashi** 19th ديسمبر 2010, 03:24

شكراً غريق
منتظريييين

سلام أيها الحكواتي الزعيم

تعرف أخي غريق ما يعجبني فيك ...بساطتك ...وعفويتك في الكتابة ...وهذا دائماً ما يشدني لأن أتابعك ...بعدين القصة محبوكة بطريقة روائية جميلة جداًورائعة ....تصلح لأن تكون فلم ...أو حلقات تلفزيونية ...تسلم على هذا الأسلوب الشيق البديع الممتع ...محبتي

الدكتوره وابوالزهور وابوعلياء00مروركم رائع اشكركم

جلب حاج المكى كميه كبيره من الاقمشه الى دكانه فى القريه وبدأ العتاله يرصوا الاقمشه فى الرفوف بطريقه منتظمه وإمتلأ الدكان عن آخره بالاقمشه البيضاء والملونه 000ومن جهه ثانيه قام صالح بنصب مكنته فى الراكوبه التى تقع امام دكان حاج المكى وتجمهر سكان القريه لمشاهدة هذا الحدث الفريد وهذه النقله فى حياة سكان هذه القريه الوادعه واصبح صالح الغريب حديث الجميع وكانت الدنيا درت وبداية موسم جديد واهل القريه يجهزون الى العيد الذى اضحى قريبا 000000

بدأ صالح بعد ان جهز المكنه الخياطه اول قميص لحاج المكى وكان قميص من قماش الساكبيس الابيض وبخفه ومهاره انتهى صالح من خياطة قميص حاج المكى وعلقه فى حبل مربوض فى الراكوبه لكى يرى من يرغب نوعيت الفصاله وتجمهر الصبيه والصبايا حول ام جكاكى وهذا ما اطلقوه على الترزى الغريب وام جكاكى تعنى الترزى !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

وبدأ اهل القريه يقطعون القماش من دكان حاج المكى ويأتو به الى صالح لكى يخيط لهم وبدأ صالح يستلم القماش واستعان بأحمد ود التوم ليسجل اسم صاحب القماش عليه واستمر صالح يعمل طوال اليوم وكل صبى او صبيه تستلم فستانها تكون فرحه 000ومسروره بالجديد واستمر ام جكاكى فى عمله يلبى طلبات اهل القريه والناس يتفرجون فى المكنه حتى خيط معظم سكان القريه ملابسهم وبدأت القرى المجاوره تتوافد على دكان حاج المكى طالبه القماش والترزى 000000

فى ذات يوم وكان صالح جالس على سدت المكنه كعادته ظهرت امامه فتاة فى بداية العشرينات من عمرها صفراء اللون تبدو عليها آثار الاهمال متسخه الى حد ما
بها مسحه من الجمال يراها من يتفرسها 000مدت إليه القماش الذى كانت تحمله 00نظر إليها وابتسمت بسمه بلهاء سريعه وكشفت عن اسنان مترادفات منذ الصبا 00دليل ظاهر على عدم وجود من يعتنى بها منذ ذاك الحين من عمرها 00سالها احمد دايره يعملو ليك قميص يا عاشه !!!!!!!!!!!!!!!!!!!!!!!!!!!!!!!!!!!!!!!
اومأة براسها بان نعم!!!!!رفع صالح بصره ببط إليها وتيقن انها عائشه المقصوده من معلمه صاحب المكنه وراى عائشه على حقيقتها 00بنت صغيره مبهدله متخلفه فى الظاهر واقتنع صالح بان هذه البنت التى راها محتاجه الى رعايه وعنايه ويمكن ان تكون انسان مفيد وهو يسترسل فى هكذا فكره صاح احد الصبيه عاشه ام رشه 000وعند سماعها الى هذا الاسم حملت حجرا وغزفة به اتجاه الصبى 00وانتابتها حاله من الانفعال واصبحت تصرخ وتشتم بطريقه آليه جميع الصبيه والصبايا وبدأت الاصوات عاشه ام رشه الجمل رفسهه قطع نفسها 00تاتى من جميع الاتجاهات وعائشه تزيد فى هيجانها وترقى وتشتم بألفاظ نابيه كل من تراه من الصبيه وتحمل فى يديها الحجار وتغزف بها من حين الى آخر كل من يقع عليه نظرها وهناك من اهل القريه من يزجر الصبيه وهناك من اعتاد على هذا المنظر المتكرر ولا يعيره اهتمام ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

نهض صالح من المكنه واتجهه نحو عائشه وامسك بيدها وعندما امسك بها سقطت من يدها جميع الحجاره التى كانت تحملها وقال لها بلطف لم تتعوده يا عائشه ورح اوديكى البيت 000انقادت له بسهوله ويسر وهذا التصرف ادهش اهل القريه كيف تنصاع هذه الهبله الى هذا الغريب بهذه السهوله 000مشى معها الى ان وصلا البيت 00واجلسها فى عنقريب بجوار امرأه عجوز سألت عن الزائر القريب 00وقالت عائشه للعجوز ده ام جكاكى يا حبوبه وتكلمت بلغه مفهومه الى صالح وبها بسيط من الخنخنه فى الحروف 000وبعد ان جلست قالت الى صالح اجلس !!!اديك مويه ؟؟قال لها شكرا وسلم على العجوز وقال لها عائشه دى لو عايزه تمرق خلى زول يمشى معاها عشان الشفع ما يشاقلوها 00واتجه الى عائشه وقال لها انا يا عائشه اخوكى الكبير وانتى بتعرفى عمك جادين المرحوم انا ولدو عشان كده انت تسمعى كلامى وتانى ما تمرقى من البيت ده إلا تكلمينى 00هزت رأسها بالموافقه 00ونظرت الى صالح نظره احس فيها بانها راضيه عنه وكشفت عن عيون بيضاء واسعه يخفين جمال مهمل 000ونظرت الى صالح ثانيه وقالت له عراقيى البجيبو لى منو ؟؟قال لها انا بجيبو ليك 00ابتسمت ووضعت اياديها خلف ظهرها وبرز صدرها الى الامام مظهرا نهديها من شروخ القميص!!!!!!!!!!!

رجع صالح الى حيث يعمل وعند جلوسه قال له احمد ود التوم الله مرقك ساكت يا صالح عاشه هذه متوحشه ويمكن ان تعوقك وتضربك او تعضيك 00انا ما عارف الوداك للبت دى شنو اعمل حسابك منها 00000وانت عارف يا صالح هسع الناس ديل كلهم مستغربين فى تصرفك مع المجنونه دى 000

رد عليه صالح ان هذه البنت مسكينه وهى ما مجنونه لكن تعامل الناس لها هو السواها مجنونه 00واردف قائلا لاحمد انت العجوز القاعده معاها دى تبقى ليها شنو ؟؟قال له احمد دى ما حبوبتها ام امها المرحومه وامها كانت مبدله زى بتها دى كده وقاموا ادوها الى حسين الغريب وعند ولادت المسنوحه دى امها ماتت وبتها دى ربتها حبوبتها 000سال صالح احمد انت يا احمد ناس حسين ديل قرايبهم هنا منو 000رد احمد مل قلت ليك حسين ده هنا ما عندو اهل تدخل صالح وقال انا اقصد اهل مرتو ؟؟؟دنا منه احمد وقال له بصوت منخفض بعض الشى انت عارف غير العجوز الشفتها دى ناس حسين ديل ما عارف ليهم اهل وانت عارف حسين ده كان بيشتقل مع حاج المكى فى الزراعه وكل مال حاج المكى ده سواه ليه حسين من الزراعه وبعدين البت الهسع دى قامت ضربت ود حاج المكى بعود والضربه سوت للولد صرعه الولد بقى بيقع بالصرعه وناس الحله قالوا يطردوا حسين وبتو والعجوز من الحله ولكن حاج المكى راجل طيب عفى عن البنت ومن الوقت داك طرد حسين من شقل الزراعه وحسين هسع إلا بيمشيى بيتأجر للناس وحالتو بقت مبهدله000
اجاب احمد ود التوم على جميع الاسئله التى يحتاجها صالح فاصبح الامر واضح فى زهن صالح ان ولى نعمته المرحوم جادين اسرته فى الحله هم اكثر بؤسا من المرحوم جادين فى امدرمان 000

اصبح صالح الغريب واحد من وجهاء القريه واصبحت الدعوات تنهال عليه من جميع المناسبات فى القريه التى يقيم بها والقرى المجاوره 00وكلما خلى صالح بنفسه كان هناك شبح يطارده وهو متمثل فى وصية المرحوم جادين لماذا لم ينفز الوصيه 000

ذهب الى منزل احمد ونادى من الباب على عائشه وعند سماع صوته خرجت وهى ترتدى التنوره فقط كاشفه عن صدرها وجميع تفاصيل جسدها العلوى(طبعا هذه عاده عند سكان تلك المناطق حتى الستينات واوائل السبعينات كانت الفتيات يلبسن التنوره ويكشفن عن صدورهن بصوره كامله وهذا السلوك من الفتاة غير مستغرب)

لم يندهش صالح من هذا المنظر اذ ظل يرى هذه المناظر منذ مقدمه على هذه القريه 0000رمى الفستان فى صدر عائشه وضمته بحبور وفرح وقفلت راجعه الى جدتها وهى تردد عبارات الثناء الى امجكاكى 00000الذى تأملها مقبله ومدبره وراى فيها انوثه تستحق التضحيه!!!!!!!!!!!!!!!!!!!!!!!!!!!!!

اضحى صالح فى حوار مستمر مع ضميره هل يتقدم للزواج من هذه المعتوهه الفقيره وهو الان من سادات المجتمع ووجهائه وكيف يكون ذلك وهو فى مجتمع بدائى لا يعرف الشفقه والرحمه ومثل عائشه هذه كتب عليها فى نظرهم ان تعيش هكذا حتى تموت ولا احد يعيرها اى اهتمام ومن يقدم الى خطوه مثل التى يفكر فيها يجد استهجان من الناس لا نظير له 00وصالح اصبح محل اهتمام من اهل القريه والكل يتمنى ان يدخل صالح فى جواره ويناسبه حتى يكون من اهل القريه بالاصاله حيث ان النسيب فى مجتمعاتهم له وضعيه خاصه وقد لمح حاج المكى الى صالح ان يكمل نصف دينه وهم فى الحله سعداء به وهو يختار البت العاوزها وحاج المكى سوف يتكفل بالباقى 00

كل هذه الاغراءآت كانت امام صالح الغريب00000000فهل يظل غريب وينفز الوصيه ويعيش فى غربتين غربه مع اهله واخرى فى مجتمع القريه ام يختار الانعتاق من القربه ويناسب الحاج المكى ويصبح من سياد البلد ومحمى من نسابته 000

اصبحت هذه الافكار هى المسيطره على تفكير صالح وكل ما خلى مع نفسه تغازفته الهواجس واحس انه خان عهد رجل إتمنه على ماله والان هو يعيش على غلة المكنه دون ان ينفز باقى الوصيه!!!!!!!!جاءه جادين ممسك بيد والده وقال له يا صالح هذا ابوك وانا ابوك الذى علمتك الخياطه وإتمنتك على مالى لماذا لم تنفذ وصيتى 00وقال ابوصالح وهو ينطق بصعوبه يا صالح اوفى لجادين اوفى لجادين اوفيييييييييييييييييى ياولدى0000وصحى من النوم والعرق يتصبب من جبينه!!!

نواصل

غريق المبدع !!!...أم جكاكي .... هذه عبارة بالجد حلوة ...يستخدمها أهلنا البقارة كتير ...قال : لو ما أدوه تور عشان يبيعو ....بشتغليهم أم جكاكي في السوق عشان يفضحهم !!!وطبعا بعض من أهلنا رعاة البقر بشوفوا مهنة الترزية عيب عندهم ..ولكن بمرور الأيام تغيرت الفكرة ....[[000ونظرت الى صالح ثانيه وقالت له عراقيى البجيبو لى منو ؟؟قال لها انا بجيبو ليك 00ابتسمت ووضعت اياديها خلف ظهرها وبرز صدرها الى الامام مظهرا نهديها من شروخ القميص!!!!!!!!!!!]] ما هذا الوصف الرائع يا غريق يا خطير !!!؟؟ وطبعاً معظم أهلنا ناس الغرب ولا زالوا بيقولوا للفستان عراقي ...وهناك قصة الطالبة الجامعية والعراقي سبق أن سردتها في هذا المنتدي ..وكلمة عراقي تريحني نفسياً ...أما عن عائشة ...فمعظم النااااس تستاء من أمثال عائشة وتسخر منها ولكن يضع سره في أضعف خلقه ...أنا شخصياً قبل نهاية القصة ..متوقع أن يكون لعائشة شأن في مستقبلها ...وننتظر لنري ماذا يصير ...وننتظرك أخي غريق بفارق الصبر ..... محبتي

قصة جميلة والطموح كبير مشكور ياغريق على المجهود والصبر على الطباع الطويلة

مشكور شاويش امجكاكي هي مهنة مرفوضة في ثقافة قبائل البقارة بالاضافة العمل في المطاعم طباخ او جرسون.
وحدة ولدها مسافر البحر يعني الخرطوم بكت بكاء شديد قالت خايفة ولدها امشي البندر ايتسلتخ ويلبس البنطلون يتسلتخ يعني يتمدن.

تشكر يا زعيم يا رائع ..............
ونحنا منتظرين عاشة ام رشة
تسلم

لك التحية يازعيم علي السرد الجميل ...والشئ الذي نال إعجابي أكثر ..كتاباتك كانت ممزوجة بين الفُصحي والدارجية ...ياتري هل الأيام ستجمع صالح مع هذه المعتوهة أم له رأي آخر فيما رآه فيها ..كل ذلك ستوضحه لنا حلقاتك القادمة
--------------------------------

تسلم اخوى غريق
على اسعادنا بقصصك الجميله
اها يا اخيتى الدكتوره جيبى بنبرك وتعالى
علا صاحب البيت مافى يا اخوانا
لعل المانع خير
اين انت اخى غريق
منتظرين باقى القصه
تحياتى

مبدع يازعيم ودكرتنا ايامنا الحلوه بوصفك للترزى وهو بمكنته فى البرندة وصندوق الخشب لوضع الملابس وتركيب الزراير واخذ الجلاليب للعمود فى البيت وانا لى ذكريات جميلة مع هذا حيث كنت اذهب للوالد بالغداءفى السوق وارجع بجلاليب العمود واجلس فى صندوق الخشب

يلها من ذكريات

مشكور يازعيم

شاويش 000ود النو 000صباح000ول نويه0000سهاد000ابوهريره00كلكم رايعين ومداخلاتكم هى الحافز لاستمرار القصه 000

عمنا غريق بالغتنا عديل قصة رااااااااااااااااااااااائع والاحلى منها مكان وقفت في القصة شوقتنا نتم الباقي ومن عادتي في الروايات وخصوصا في القصص الجميلة اول حاجة بنظر الى آخر القصة اذا لقيت نواصل مابقراها لاني بتشهلت شيد وبنتظر الباقي ثم ابدا بعد ذلك ومن سوء حظي نسيت ان انظر الى نهاية القصة هل هي منتهية اول لا وكان المقلب .اننـــــــــا في شوق .
ياريت البقية باسرع فرصة .
والغريبة واثناء كتابة هذا التعليق اكتشفت انك واصلت بس لقيت ان لسع هنالك باقي ارسل التعليق واقرأ الجزء التاني . وياريت توريني من كم حلقة عشان نكون متيقنين ونعرف .

لك تحياتي ايها الرااااااااااااااااااائع غريق

لم يستطيع صالح النوم من جديد واصبح كلما اغمض عينه يرى المرحوم جادين ممسك بيد والده 00ووالده يردد اوفى اوفى يا صالح !!!!!!!!!!!!!! حمل الابريق وانتحا جانبا من القريه وكان القمر صاطع ينشر شعاعه على الكل بكرم غريب دون من او ازى وكانت الدنيا من حوله ساكنه سكون مصحوب برهبه تصيب الانسان فى مثل هذه المواقف 0ولم تكن هناك الا خشخشة الحشائش الصغيره التى تحركها نسمه بارده هبت من تلقاء الشمال 00جلس صالح فى الفضاء وقضى حاجته بتلذذ ونهط من مكانه وقرر ان يصلى حتى الصباح عسى ان تبعد عنه الصلاة شبح جادين ووالده0000صلى ماشاء الله له من ركعات حتى اذن ود التوم الصلاة خير من النوم ونهض وذهب الى الزاويه وصلى الصبح فى جماعه !!!!!!!!!!!!!!!!!!!!!!!!!!!!!!!!!!!!!1

ظل شبح جادين يلازم صالح فى صحوه ونومه وظلت الوصيه تؤرق مضاجع صالح وتشكل له مشكله حقيقيه 0000وبدأ صالح يفكر بصوره جاده فى تنفيذ الوصيه حتى يرتاح من همها والمحير له كان كيف يبدأ ومع من وعبر من ومتى وكيف يتصدى للمجتمع من حوله ووو00عشرات الاسئله لا اجابه لها 00000000

خطرت فكره الى صالح ان يتحدث فى الموضوع مع صاحبه احمد الذى اصبح ملازم له ويعمل مع صالح ويكسب عشرات الملاليم من عمله فى تركيب الزرائر 000وقد نشأة صداقه بين الاثنين فضلا عن انهم متقاربين فى العمر 00وسبق لصالح ان استفسر وسأل احمد ودالتوم عن الكثير عن هذه الاسره؟؟؟؟؟؟

قال صالح لاحمد يا ود التوم انا عندى ليك كلام دايرك تسمعنى كويس وكلامى البقولو ليك ده يكون سر بيناتنا وانا عاشرتك من يوم ما جبت الحله دى وما بعرف زول فى الحله دى اكتر منك وانا خاويتك وعملنا اصبح مربوض مع بعض وانت بقيت ضراعى اليمين فى الشقل 00عشان كده انا داير اقول ليك الكلام ده وثقتى فيك انك راجل بتحفظ السر 0؟؟؟؟؟رد عليه احمد ود التوم ثق يا صالح ان سرك فى بير ؟؟؟؟؟قال صالح يا احمد اخوى انا بدور بعرس ؟؟؟؟؟؟؟؟؟؟؟؟؟؟؟؟؟

توقف احمد من تركيب زراره كانت فى يده ونظر الى صالح وقال انت بتتكلم جد قال له صالح انا بتكلم جد 000قال احمد بنات الحله كلهن عيونهن على ام جكاكى 00دى منى البخيته دى الانته داير تعرسها ورينى ليها وجرى على حاج المكى يكمل الباقى كده قول لى !!قاطعه صالح 0أفو يا ود التوم دى ما المابيها ذاتها 00تمشى جرى تكلم حاج المكى انا ما قلت ليك كلامى ده سر 00نظر إليه ود التوم مليا وقال له هوووى هوى يا صالح انت داير تعرس بالسر وده اسمو عرس 0000قاطعه صالح اسمع يا احمد انا ما داير اعرس فى السر لكن العرس ده من البدايه كده الناس بيكوركو بيه والواحد بيقيف فى نص البلد وبيقول يا ناس انا داير اعرس فلانه بت فلان 000ولا فيه مرحله الناس بيتكلمو فى الموضوع بالسر والموضوع بيبدأ بين اتنين وبعد داك بكلموا فلان وعلان لحدى ما الموضوع بيتم ولا ما ياهو يا ود التوم 0000قال ود التوم كلامك صحى والله يا صالح انا شقلى فرحه ساكت الخلتنى اقول ليك الكلام داك واسع الناس كلهم ما عندهم مانع وانت بس سمى لينا البنت ونفكر انا وانت بس كيف نستطيع ان نصل لاهلها 000فى هذه اللحظه ظهرت امامهم عائشه لابسه تنورتها والجزء الاعلى من جسدها تستره رحمة الله وتحمل فى يدها قميصها الذى خيطه لها صالح من قبل 0000صاح فيها ود التوم 00انت ماشه وين فى الحر دى 000نظر إليها صالح وقال لها يا عاشه انا ما قلت ليكى ما تمرقى من البيت 000اطربت من حديثهما قليلا وقالت انا عراقى ده مشروط جيت تعدلو لى 0000والقت بالقميص فى تربيزة المكنه 000حمل صالح القميص وقلبه يمنى ويسره وقال لها مشروط وين ؟؟؟؟اشارت الى فتحه فى موضع محل السسته وقالت ده الشرط 00ضحك صالح وقال لها دى الفتحه سويناها عشان القميص يدخل فى راسك شيلى قميصك وامشى وبعدين انا بجى وبوريكى القميص ده بيلبسوه كيف 000حملت قميصها وغفلت راجعه الى البيت 0000000000000000

نظر صالح الى جليسه مليا وقال له وهو جاد يا احمد ود التوم انا داير اقول ليك البنيه الداير اتزوجها وانا عارفك انت ما حتصدقنى ولكن داير اذكرك ان الكلام ده سر ما تمرقو يا ود التوم ونشوف بعد داك نسوى شنو 000إلتفت عليه ود التوم بصوره كامله وقال ليه كلامك ده مهم معناتو !!!كده ورينى زولتك دى 0000عاشه 000عاشه بت حسين 000عاشه الهبله 000فتح ود التوم فاه وقال له انت شقلك ده فريح ساكت ؟؟؟وانا كنت قايلك داير تعرس بالجد لكن لقيتك بتفارح فريح 000كده خلينى اتم العراقى ده وامشى اجيب غنمى 000جزبه صالح من كتفه حتى اتجه نحوه بصوره كامله وقال له يا ود التوم انا ما قاعد افارحك انا بتكلم بالجد 000رائى فى عينيه جديه ومن تعابير وجهه انه يعنى ما يقول وقال له ود التوم يا زول انت جنيت ولا شنو انت يا زول ماك عاقل !!عوقت شنو البتعرسها انت هى دى اسع كن ادوك ليها لوجه الله انت بتدورها وكن ادوك ليها هى وحبوبتها وابوها كلهم انت بتدورهم انت كن شوطنت قول لى انا بنادى ليك الفقير بداويك هووووى هوى يا ام جكاكى انت المكنه دى شوطنتك ولا شنو من بنات الحله دى كلها ما شفت ليك واحده إلا امرشه دى !!!!!!!!!!!!!!!!!!!!

قال صالحه لصاحبه احمد000 يا احمد انت البتعرس ولا ان ويا اخى انا البت دى عاجبانى انت مالك ؟؟؟؟؟؟؟؟ضحك احمد بصوت عالى وقال 00عاجبنك والله دى قصه يا صالح 000العاجبك فيها شنو دى من الرشاش ما اتبردة بى مويه ساكت كده قول لى تعرسها كيف؟؟؟؟؟؟قال صالح اها انت قلتها براك تعرسها كيف انا دايرك تساعدنى فى عرسهاقاطعه كن على دى انا فى محلى ده بعقد ليك عليها وعلى الطلاق الحله دى كلها ما فيها زول بيقول بقم !!!!!يا ود التوم ده ما المقصوض 00انا عاوزك تساعدنى قاطعه نان اساعدك كيف 000قاطعه صالح بحزم !!! يا ود التوم ما تسمعنى انا بشرح ليك كيف تساعدنى 000قال له يلا اشرح لى انت داير يساعدوك كيف يا صالح يا اخوى 00اعتدل صالح فى جلسته وقال له طبعا هذه البنت اهل الحله كلهم عارفنها مجنونه وكلهم قاعدين بعيروها وبقولو ليها الخليقه 00يلا انا دايرك تفكر معاى على مراة تساعدنا0000السلام عليم كان هذا صوت حاج المكى نزل من حماره امام الدكان وربط حماره فى دقاقة الراكوبه0وجلس فى العنقريب الهباب القابع فى ركن راكوية ام جكاكى إنقطع حديث الاصحاب فى حضرت صاحب نعمتهما00000

نواصل

شكرا يا خوجلابى هذه الحلقه التالته واخريات انا والله ما عارف ظروفى كيف لو المزاج بقى رايق والجماهير شجعتنى سوف امطها الى أكثر من عشره حلقات 000لك مودتى واشكرك على هذا الاطراء

يابروف غريق ان القصة اروع من رائع بجد وقطع شك وانحنا في غاية الشوق لتمامها ارجوا ان يكون المزاج رايق ومايعكرها شيئ ......
احترماتنا يازعيم...........

انشاء الله تسلم يا زعيم
وحاج المكي دا وقت يجئ فيهو ؟؟
القصة رائعة كما عودتنا يا زعيم
ونحنا منتظرين بشوووووووووووق شديد
تحياتي ودمت

الاخ الامير غريق

لك التحية و التقدير

القصة جميلة و السرد رائع و الحبكه اروع ..

يا بنات سون براد شاي للامير غريق عشان مزاجو ما يتلخبط .. نحن منتظرين يلا كمل الباقي ..

لك التقدير

ياود ابوي عشمان براد الشاي جاهز وكمان في زيادة لشان الضيفان..
في الانتظار........

سومه وصباح وودعشمان انتم رائعون ومروركم اروع000اشكركم كتتتتتتتير على المرور والتعليقات الجميله

احىىىىىىى انا يا غريق يا اخوى غايتو يوم بتوقف قلبى ده عديل كدى
يا دى النيله على حاج المكى ده

والله مبالغه ياخى انت ما عادى
ربنا يديك العافيه
ومنتظرنك والشاى جاهز يا
ود عشمان علا ابوقو مارقين
اخوى غريق ده ادوه الشاى
وخلوه يتم لينا
قبل ما نفسى ينقطع

شكراً يا زعيم ...
رأيك شنو يا زعيم القصة دى
تطبعها فى كتيب..

شكرا سهاد وشكرا الفاضل على مروركما0000000ونواصل00000000000000000000000

ياصالح يا ولدى الايام دى انا شايف شقلكم فى المكنه بقى قليل وبعدين يا ود اخوى انا عندى ليك فكره 0000نقوم نقطع ليك قماش من الدكان وانت تقوم تسوى عراريق للبنات وجبب للعيال الصغار ويوم السوق نقوم نوديهن نسومهن هناك وانا شايف ناس الحله ديل كلهم اشترو وخيطوا عندك وباقى إلا فريق ناس ود الضهبان داك ما فيهم زول جا باع مننا قماش انت الناس ديل يا ود التوم مالهم ما قاعدين يلبسوا ولا شنو الواحد عراقى الدموريه يرقعو كده لمن يبقى فوق لركبتو 00000قاطعه احمد ودالتوم انت يا حاج المكى ناس ود الضهبان ديل ما طاردين الدنيا والله يا حاج انا كنت بدور لى فى نعزايه رايحه مشيت فريقهم ده الفريق كلو واقف على فد كراع والناس كلها شقاله هم وبهايمهم واحد واقول ليك يا حاج الناس ديل شبعانين بهايم شبع جد ولكن لبنها ده ما لاقينو 000قاطعه حاج المكى يا ود التوم هوى ما تتكلم فى الناس الناس ديل جيرانه ما شفنا منهم إلا الخير انا القواله فى الناس ما بدورها كده خلينا فى موضوعنا بتاع الشقل القلتو لصالح انت يا صالح رايك شنو فى الفكره القلتها ليك دى؟؟

والله يا حاج المكى الفكره دى كويسه نسويها طوالى ونبدأ من هسع نقطع القماش وود التوم ده يضرب لينا تكلفت القميص ونضع الربح ويوم السوق نسوم الجاهز منهن انا موافق 000نهض حاج المكى وفتح ضلفت الدكان ونادى على ود التوم وبدأ فى تقطيع القماش وود التوم يصنف كل مجموعه لوحدها ويردم لصالح الترزى فى الصندوق 000000

خرج حاج المكى بعد ان انهى تقطيع العراريق وبصوره مفاجأه قال !!!!!يا صالح يا ولدى انت ما داير تعرس ولا انتو ناس البحر ما بتدورو بناتنا بتاعات الضهارى ديل؟؟؟؟؟؟؟صاح ود التوم داير يعرس يا حاج المكى !!!!!!واستدرك ان الامر سر وحول مجرى الحديث 00لامن يلقى بت الحلال 00حاج المكى قال هوى يا ود التوم بنات الحله ديل كلهن ما بنات حلال بت الحلال يجيبوها ليه من وين ؟؟

يا حاج المكى انا موضوع العرس ده ما قلت ليك لسع بدرى عليه وانا لما ابقى عليه انت اول زول بقول ليك 000اسع خلونا ننجض شقلتنا البديناهه دى 000ونظر الى احمد نظره تحمل كوم من العتاب 00واستمر فى ترتيب الهدوم 000

قفك حاج المكى دكانه وقال لهم ودعتكم الله وخرج تلقاء منزله 00000جزب صالح احمد من كتفه وقال له كنت داير تقول لحاج المكى شنو يا مزنوح 000وعاوز تخرب لى مالك 00اعتزر احمد على تهوره امام حاج المكى ووعد ان لا يتصرف مثل هذا التصرف مره ثانيه 00000

شوف يا ود التوم انا دايرك تقنع لى زوجتك وندخلها معانه فى موضوع زواجى من عاشه وانا عندى فكره ما بتتنفذ إلا بواسطة مرأه ومافى انسب من زوجتك 000هوووى يا صالح مرتى الدخلها شنو فى زواجك انت والعوقه 00وانت عارف مرتى دى الفولايه فى خشمها ما بتمبل دى تجيب خبر أم صبقى دى عندنا فى الحله هنا العوين بسمنها ريبا المحطه الجديده من شدت الكضب نمشى نوريها والله بكره تلقى الحله دى كلها عارفه وكمان الحلال الجنبنا !!!!!!!!!!!!!!!!!!!!!!!!!!!!!!!!!!!!!

كلام ود التوم لخبط على صالح خطته 000واستدرك صالح وشرح لود التوم خطته ومدى حوجته لانثى لتنفيزها 00اطرق ود التوم مليا وقال لصاحبه انت عارف يا صالح الموضوع ده مافى مره بتقدر عليه إلا اختى كله انا كده خلينى امشى اشيل لى وقية بن وامشى لاختى كله اشرب معاها الجبنه وادخل عليها السر ده يله قوم جيب لى وقية بن ونص رطل سكر من دكان حسن داك وانا اليوم بمشى على كله اختى وبتونس معاها فى الكلام ده وانت عارف يا صاحبى يا دوب انا لقيت ليك المره البتريحنا من الموضوع ده 000000000000

ذهب ود التوم الى اخته كله 000وسلم عليها واعطاها ما يحمل من بن وسكر وبعد ان تنتنت الجبنه وشممت ود التوم الدخان 00سكبت فنجال الى اخيها وآخر لها 000وشفطت من فنجالها شفطات متتاليه ووضعت الفنجال فى الصنيه وقالت لود التوم هوى يا اخوى انت اليوم عندك خبر كده نتونس فى قرضك قبال ما الوليدات وابوهم يجو من الزرع 000كده قول لى خبرك شنو 0000بدأ احمد بحديث عاطفى ووضع اهميه قصوى لما يقوله لكله حتى جعلها تعير اهتمام اكبر للموضوع 00وبعد ان مهد لموضوعه قال لها كله يا اخيتى انت عارفانى انا كنت قاعد فى الحله دى بدون شقل ولا مشقله وبعد ما امجكاكى ده جانا انا بقيت بطلع مصاريفى من الشقل معاه وعشان كده انا عاوزك يا بت امى تقيفى معاى فى موضوعى البقولو ليكى ده 000

شفتى يا كله انا صاحبى ده عاوز يعرس وعاوزين منك مساعده 000اعتدلت كله فى جلستها وقالت دى منى المحظوظه دى 00بلحيل يا اخوى انا تحت الخدمه 00000قال لها اصبرى لى يا اخيتى اقول ليكى الكلام كلو 00صاحبى ده عاوز يعرس عاشه بت حسين العوقه !!!!!!!!!!!!يا فليلى !!صاحبك ده مشوطن ولا شنو 00كده اصبرى لى اشرح ليكى الموضوع 000وبالتفاصيل الممله شرح ود التوم لاخته كله قصة صالح من وفاة جادين الى مجيئه الى القريه وشرح لها دورها المطلوب منها القيام به اتجاه العروسه عاشه 000واستوعبت الموضوع بشكل جيد ووافقت على تقديم خدمه لصديق اخيها !!!!!!!!!!!!!!!

خرج ودالتوم من منزل اخته وهو مسرور لانجازه والتقى مع صديقه وانتحيا جانبا وبشره بنجاحه 00وتناقشا معا فى الخطوه التاليه

نواصل

تشكر يا زعيم علي الابداع
ومنتظرين بلهفة
تسلم

متابعين يازعيم

صباح وابوهريره مروركم رائع وجميل 00000تحياتى

نواصل يابروف .. الشاي جاهز منتظرك

شكراً يازعيم علي المواصلةِ في الإبداعِ ...والسرد الشيِّق ...ويبدو إنو صالح سينفذ وصيِّة عم جادين والأمور سايرة علي مايرام ...أعقتد أن ود التوم وأخته سيكونا سبب في إرتباط صالح بـــــــ عاشه
كده ننتظر ماذا خبأة لهم الأقدار------------

سومه وول نويه لكم الود 000لدينا وفد كويتى وانا من ضمن المرافقين معزره سوف تتاخر الحلقه الجايه حتى رحيل الوفد

بالتوفيق إنشاء الله؛والجماعة ديل عندهم بزنس صاح كان لقيتهم فيهم طريقة كدا وديهم البلد يستثمروا فيها عشان الأهل يستفيدوا .... نرجع لـــــ عاشه وطبعاً ماورانا حاجه ح ننتظرك بعد تعدي ضيوفك دول ...عشان ذاتو نراجع القصة من اولا بمزاااااااااااج كده

اخذت لى زوقه من الكوايته كده نواصل فى القصه

بعد صلاة المغرب ذهب صالح الى منزل حسين الغريب سلم على عاشه وحبوبتها وسألهم من حسين 00قالت له عائشه ابوى ما جا من الزرع وهم بالخروج واستوقفته عائشه قائله له يا امجكاكى انت ماقلت ود عمى جادين ولشنو ما بتجى تتونس معانا بس من الخلوه وتمشى 0000وقف صالح والتفت نحوها وقال لها صح يا عاشه انا اخوك ولكن انا جاى مستعجل وداير ابوكى فى كلام 00قالت له مالك ما عدلت لى عراقيى انا ما قلت ليك مشروط 000رجع الى داخل الحوش وقال ليها وينو العراقى كده جيبى اشوفو 000بسرعه اتت بالعراقى واخذه صالح منها وقال ليها تعالى قريب وصلح العراقى وادخله لها فى راسها واعانها على إرتدائه بالطريقه الصحيحه ونزل القميص فى جسمها وكان القميص محزق فى الوسط مما جعل صدرها بارز وكذلك العجز !!!!!!!!!!!!!!!!!!!!!!!!!نظرت الى نفسها فى حلتها الجديده وكانت فى غاية السرور ونظر لها صالح متمعنا فى جسدها الغض 000قطع عليهم وضعهم صوت كله تقول السلام عليكم يا ناس البيت ووقفت فجأه وقالت صالح صاحب اخوى احمد وسلمت عليه وقالت لها عاشه هوى ده ما صاحب اخوكى ده ول عمى جادين وانا اختو 0000تفاجأة كله بالمعلومه الجديده وسلمت عليها وعلى العجوز وقالت لعاشه بعد ان خرج صالح وبصوت عالى يا عاشه انا دايراكى بكره عندى كرناكه عاوزاكى تجى تكسريها معاى ونسوى ليكى جبنه وشاى قالت عاشه انا دايره تجيبى لى طحنيه من دكان حاج المكى قالت لها خلاص وكمان طحنيه من دكان حاج المكى وجزبتها من يدها وابتعدت بها قليلا من العجوز وقالت لها وبصوت هامس!!!!!!!!!!!!!!!!!!!!!!!

bounce

0 انت يا عاشه انا من زمان ما صاحبتك مالك قطعتى صحبى انا يا بت امى ما قاعده ادور ليكى إلا الخير

ردت عليها عائشه انا ماقطعت صحبك لكن انتو ناس الحله ديل ما بدورونى واولادهم بعايرونى 000000عشان كده انا ما قاعده امرق 00قالت لها كله خلاص يا عاشه تانى من اليوم ده انا وانتى نبقى صاحبات لحدى ما انتى تعرسى وانت يا عاشه ما بدورى العرس اسع كن جاكى عريس بتابيهو كده تعالى 000قاطعتها عاشه بضحكه حتى وضعت يدها فى فمها وقالت لها يا كله والله ضحكتينى انا ناس الحله دول بقولو لى الخليقه والمجنونه 000كيف اعرس 00ربتت كله على كتفها وقالت لها انت لو سمعتى كلامى يا عاشه انا اجيب ليكى عريس لحدى عندك بس عاوزك تسمعى كلامى واول حاجه دايرك تسمعيها انت ما مجنونه ولا خليقه انت بنيه سمحه ومره عديل زى العوين 000قاطعتها سمح يا كله انا اسوى شنو 000قالت لها كله سمح انت بتسمعى كلامى 000قالت لها بسمع قالت لها من الصباح تمشترى مويه من بتاع الخرج وتدخلى التكل وتستحمى وتغسلى جسمك كويس لما تطلعى كل الوسخ ده وانا بديكى التعريفه بتاعت المويه وهاكى ده الصابون ابو ريحه تتبردى بيه حملة التعريفه والصابون وصاحة فى كله انت صاحبتى بالجد000وهمت كله بالمغادره وقالت لها بصوت عالى ماتنسى ياعاشه تجى بكره من الصباح عشان نكسر الكرناكه 00قالت لها بصوت عالى سمح بعد ما البرد بالصابون ابوريحه وبجيكى 0000

فى الصباح اعدت عاشه الصفيحه ونادت على بتاع المويه واشترت من مويه بتعريفه ودخلت التكل واغتسلت بالماء والصابون ابوريحه ولبست عراقيها الجديد بنفس الطريقه التى علمها لها صالح واخزت طرحتها ولبست جزمتها العروسه وخرجت ملبيه لوعدها مع صاحبتها كله 00000مرت كأى بنت محترمه امام دكان حاج المكى وامام الترزى صالح والكل لم يتعرف على عاشه ام رشه ذاك اليوم حتى وصلت الى صاحبتها كله واندهشت كله من التغير السريع الذى طرأ على مظهر عائشه 00جلستا معا تحت ضل اللالوبه واحضرت كله كميه من عيال اللالوب فى طبق واتت بالحجار التى تستخدم فى كسر ولد اللالوب واخراج النواه منه وبدأن العمل والونسه فى التفاصيل النسائيه الخاصه وكلام البنات لما يقعدن براهن وعرفت كله من صاحبتها تفاصيل مدهشه عن معرفتها بالعنايه بنفسها كأنثى وعرفت انها تعلم جيدا مثل كل انثى علاقتها بالرجل ولمست منها أشواق مخفيه لمثل هذه الاحاديث وكانت تكسر الفصى0اولاد اللالوب بمهاره عجيبه وكانت فى قمة مزاجها ومسروره سرور كبير وتضحك من كلام كله من كل قلبها 00وقضت الضحى مع كله حتى نفد اللالوب ولم يجدن ما يكسرن من اولاد اللالوب وشربن الجبنه وسلمتها كله لفافه بها طحنيه وذهبت بنفس الطريقه راجعه الى بيت ابيها حسين00فى طريق عودتها لمحها صالح وعرفها والكل لها منكرون 000ونادى صاحبه احمد ود التوم وقال له يا احمد ورحكا نتمشى شويه ونجى نواصل الخياطه يا ود التوم يلا طلق رجلينك وخرجا كل واحد منهم يحمل ابريق فى يده

قال صالح لود التوم قبيل يا ود التوم انت لما كنت بتتكلم مع ابراهيم الفران فى بت جات ماشه عرفتها قال له شفت البت لكن ما عرفتها 00قال له البت الجات دى ياهه عاشه بت حسين؟؟يا زول كن دى عاشه بت حسين يمين بالله بقت مره تب 00انت عارف يا ود التوم اختك كله دى استطاعت ان تعمل معى البنيه دى عمل كبير وانت عارف انا ناديتك لى شنو انت من محلك ده جرى لحدى كله واسمع منها وانا عارفها بتكون محتاجه لى حاجات كده انت امشى واسمع كلامها وتعالنى 000وافترقا احمد ذهب الى منزل كله وصالح رجع على محل عمله 0000

وصل ود التوم الى بيت بنت التوم وسلم عليها وجلس وبعد ان شرب المويه سألها اها كيف مع الزولايه يا بت امى الزولايه طلعت عارفه كل كلام العوين والله يا ود امى حيرتنى بس فى حاجات شويه خلينى اسويها معاهه وبعد داك صاحبك خلى اليعرس على طول وانت عارف الزولايه دى هى زاتها حاسه بحركات صاحبك 00والبارح صاحبك وراها كيف تلبس القميص انا لما مشيت ليها ما لقيت زولك هناك واقف معاها فى نص الحوش وهى منشحطه فى القميص الجديد وبتلكشم ساى 00عسع انا فتحت ليه الطريق وعايزه حاجات خلى يدينى ابوقرشين اودى ليها 00هى بتحب الطحنيه 00وكمان دايره ليها ملابس جوانيه 00وعراقى تانى وكمان يجيب ليها زيزى بدل العروسه اللابساها دى المرقعه دى 00لما الحاجات دى تجى وما تنسى فتيل ريحه اوراق الخريف وخلونى انا لباقى الموضوع 000والله يا ود امى كما سنونها المرادفات ديل ابقيها ليك اجمل بت فى الحله 000رجع ود التوم الى صالح وبلغه الخبر وصالح جاهز لمثل هذه الطلبات

خرج معظم سكان القريه فى الصباح الباكر متجهين تلقاء السوق وخرج معهم صالح واحمد ود التوم يحملان ما تمت خياطته من ملابس وتقدمهم حاج المكى على صهوة حماره السريع والكل يحمل فى دابته شيى من انتاجه حتى صالح وود التوم يحملان انتاجهما من الملابس وصلوا السوق وبعد ان فطروا فى الكلوب (المطاعم) اتجهوا نحو محل تجارتهم وفرشوا ملابسهم على الارض واصبح الزبائن يتوافدون عليهم ماهى إلا ساعات حتى باعو ما لديهم من ملابس وإتجهوا الى السوق لكى يشتروا اغراضهم ومن ثم يعودوا الى قريتهم 0000اشترى صالح الريحه اوراق الخريف واشترى ملابس داخليه ورجع الى القريه مع بقية المتسوقين

نواصل

والله ابداع ما عادى
ربنا يديك العافيه
اخوى غريق
ومنتظرنك بشوق لنعرف
الحاصل

كيف اخبار اخونا العريس
طارق
مقطوع مننا تحياتى له

الامير غريق

كلما لقيت ليك زوقه من الكوايته واصل .. القصة بقت لينا زي المسلسل

لك التقدير

كلامك في محلو ياود عشمان............... الا ماطول لينا يازعيم

انشاء الله تسلم يا زعيم
وكله بارك الله فيها خلت الزولاية دي حاجة تانية
القصة شيقة ونحنا منتظرين

شكرا عمو غريق سردك جميل وقصصك كلها حلوة ...منتظرين تتمة القصة................

يافليــــــــــــــــــــــــــــلي يا بروف رائع

شكرا لكم يا سهاد على المرور والعريس طارق بخير 000ود عشمان 00صباح 000بت العمده000ندى00و الدكتور لكم جميعا الشكر والتقدير

سلام عليكم يااستاذ كمبال..والله كل يوم من ماادخل المنتدى اول شيئ ابدا بلقصة القاها لسة ماواصلت فيها الكوايتة ديل لسة معاك ولاشنو

يا بت العمده يا راقيه اليوم نواصل إن شاء الله 000الكوايته سافروا امس

حمل احمد ودالتوم هدايا صالح الى كله لكى تقوم بمهمتها وتوصلهن الى العروس المرتقبه واحضر لها عراقى جميل وزيزى وملابس داخليه وريحه اوراق الخريف حسب رغبت كله وارسل لها خمسه قروش( شلن )لزوم الطحنيه والحاجات التانيه 000سلم احمد ود التوم اخته كله بت التوم الحاجات 00قالت كله لاخيها انت يا ول امى عارف صاحبك ده قعد بحب البنيه دى جدجد 00وقالت انا مالى ما دى رغبتو انا واسطة خير بس وحملت الامانه ودخلت الى القطيه واخفت الحاجات من اعين زوجها الذى حضر من السوق لتوه 00استاذن ود التوم من اخته وزوجها وخرج تلقا صاحبه صالح وبلغه بنجاح المهمه

ذهب صالح بعد صلاة المغرب الى بيت حسين والد عاشه وعندما سلم من باب الحوش استقبلته عاشه بترحاب وقالت له اتفضل قدام ياول عمى جادين ومرقت عنقريب هباب فى ساحت الحوش وجلس صالح واحضرت له ماء بارد فى كوره نظيفه ودعته ان يشرب 00سالها عن ابوها واجابت ان ابوها اليوم بيشتقل مع السبابه فى زريبة البهايم ومابجى إلا بالليل خالص 00سالها صالح وقال لها يا عاشه انتى ماعندك فى الحله دى صاحبه ولا شنو تبسمت وقالت له وايى عندى صاحبه 00قال لها دى منى قالت له دى كله اخت احمد ود التوم القاعد معاك فى المكنه 0وقالت هى قاعده بتجينى وانا بمشى ليها وبكسر معاها الكرناكه 00نهضت من البنبر وذهبت الى الراكوبه لتلبى نداء من حبوبتها وعند نهوضها تدى شعرها من الخلف وكان طويل واسود وراى بوضوح جيدها الطويل وقال فى نفسه عاشه دى لو ما الاهمال ده مافى بنت اجمل منها وذادت رغبته فى الزواج منها وبسرعه رجعة من الراكوبه وجلست بالقرب منه فى البنبر واستاذن منها وهم بالخروج قالت له ماتقعد يا ول عمى وتتونس معاى شويه انا ما قاعده براى زى ما شايف 000مسكها من يدها وقال لها معليش انا ماشى الحق صلاة العشا فى الزاويه وبعدين لما ابوكى اجى انا بجى وبلونس معلكم وانا يا عاشه جايب ليكى هديه معى صاحبتك بت التوم جايب ليكى عراقى ومعاه خلقان وريحه واب خمسه عشان تبيعى ليكى طحنيه ولما تجى ماشه الدكان تلبسى عراقيكى الجديد وتلبسى طرحتك وما تمشى حفيانه البسى الزيزى الجايبها ليكى وما تراعى للناس وكن واحد من الاولاد عايرك انا بجلده ليكى وانتى ما تشتمى زول وامشيى فى مشيكى 00مسكت يده بكلتا يديها وقالت له سمح يا ول عمى جادين انا بسمع كلامك وكله بتجيب لى الشقلات بتين 00قال لها هى بتجيكى هنا 000وترك يدها وخرج ولحقت به قبل ان يتجاوز الباب الخارجى للحوش وقالت له يا ول عمى انا دايره شقلات البنات بدور لى دبيبه وعاجايه وخاتم !!!!قال لها من ما الدلاله اجو بشتريهن ليكى طوالى يا عاشه تانى دايره شقل قالت كو

ذهب الى الزاويه وبعد لحظات من خروجه من بيت حسين جاءت كله بت التوم تحمل هدايا حسين لخطيبته التى حتى هذه اللحظه لا تعلم انها هى الوحيده المسيطره على تفكير امجكاكى صالح دخلت عليها كله ومجرد ان راتها استقبلتها جرى واخذت الصره التى كانت تحملها وقالت لها ديل شقلات ول عمى جادين الجابهن لى وبدأة تفرفر فى محتويات الصره وبدأة تاخز كل قطعه وتضعها على صدرها وتصيح يا حلاتى ياحلاتى 000اندهشت كله من السرور الذى سيطر على عاشه الهبله 00وبصعوبه اجلستها فى العنقريب وقالت لها يا عاشه شفتى اخوكى ده بريدك قدر شنو 00قالت لها وداير يشترى لى خاتم ودبيبه قالت لها كله يا عاشه اسمعى اقول ليكى يا بت امى انت عاوزه تعرسى ولا لا 000نظرة اليها وقالت لها انت يا كله فى رايك كده انت مفتكره ول عمى ده بدورنى 000قالت لها كله ومالو ما بدورك يا عاشه انت ما بت زى البنات وزياده 000قاطعتها شفتى قبيل جانى هنا وكلمنى بالشقلات الجايبهن لى ديل ومسك يدى لمن رجفت كن شفتى يا كله اختى ايده دافيه انا حسيت بيها جوه قلبى 000اقول ليه شنو انا يا كله اقول ليه يا ول عمى انا بندورك 0000لا لا يا عاشه ما تقولى ليه اى شيى وانت بس تسمعى الكلام البقولو ليكى انا وبس اسع اليوم اتبرتى 00اطرقت براسها الى الارض وقالت كو اتبرته اول امس 00000هاااااا يا عاشه تستحمى يوميا عشان ريحتك تبقى حلوه زى العروسات وحكت معها كله فى تفاصيل كثيره ودقيقه تخص البنات 000وخرجت منها بعد ان سلمتها اماناتها ومعها ابوخمسه 0000000000

فى الصباح جاء صالح الى حسين الذى اتى متاخرا من عمله مع تجار البهائم وسلم عليه وجلس وشعرت عاشه بالقادم العزيز الذى اصبح وجوده المتكرر فى منزلهم حافز معنوى كبير لها وعلى طول ملأة الكوره مويه وبعد ان ارتدت العراقى الجديد ولبست الزيزى وجات شايله المويه بكل ادب واحترام لفت نظر ابيها وكذلك اندهش لمظهر بنته ومن اين لها هذا العراقى الجديد والزيزى الجديده وان بنته بقت كالفتيات ممسحه وتفوح منها رائحة النساء من هن فى سنها سألها ابوها منو الجاب ليك الشقلات الجداد ديل رد عليه صالح بسرعه انا جبت الحاجات ديل يا حسين وانا هسع جيت اتكلم معاك فى الموضوع ده نهرها ابوها وقال لها يلا يا بت امشى بقادى على محل العوين ورجعت مسرعه وهى تسترق السمع على الحديث الذى يدور بين والدها وصالح 00قال صالح الى حسين انا جبت الحاجات دى لعائشه عشان شويه تبقى زى البنات وانا زى ما قلت ليك يا حسين انا لازم انفذ وصية المرحوم وانت عارف الوصيه دى انا المرحوم قاعد بلاقنى فى النوم طوالى وبقول لى نفذ الوصيه عشان كده انا عاوز ادرب البنيه وخليت كله بت التوم تدربها وانا داير اوريك انو انا وكله قاعدين نجى البيت وده عشان البنيه توالفنا !!!!!وانت عارف يا حسين انا طبعا قررت ان انفذ الوصيه واتزوج البنيه 000قال حسين لصالح يلى يا صالح اعمل الحاجه البتشوفها صاح وانا ما عندى مانع ولو عاوز تعقد نادى ناس حاج المكى خليهم يعقدوا ليك كن انا بقيت فى ولا مافى 00000خرج صالح من عند حسين وعائشه سمعت جزء كبير من الكلام

تغير حال عاشه وبقت تشبه البنات وبدأ الهمس فى الحله بان صالح امجكاكى هو ابن عم عاشه هو ول جادين اخو حسين الذى توفى وبدأ الهمس ينمو بان صالح له علاقه بعاشه الهبله وبدأ خبثاء الحله يقولون ان عاشه حامل من صالح ووو احاديث كثيره اصبحة تكاك من قبل مجتمع القريه 000وعاشه تاتى كل يوم الى دكان ود المكى وتشترى الطحنيه وترجع الى بيت ابيها بهدوء ولم تعد صيحات الصبيه عاشه امرشه الجمل رفسه قطع نفسهه تمثل عندها وعندهم اى شيى والوضع بالنسبه لها تغير تماما واصبحة واحده من فتيات الحله المحترمات 000نادى حاج المكى على صالح وقال له يا صالح يا ولدى انت الكلام البنسمعوا ده يا ود اخوى ده شنو انا ما قلت ليك من زمان نعرس ليك وده كلو عشان نحميك من كلام الناس يا ود اخوى قال صالح لحاج المكى فى شنو يا حاج المكى والناس قاعده بتقول فى شنو يا حاج 000افو انت ما عارف الناس قاعده بتقول انت والعوقه بت حسين عندكم كلام ما كويس يا ولدى 000قاطعه صالح وقال له يا حاج المكى البنيه دى بنت عمى وانا ابوى جادين لما جا يموت وصانى ان اعرس البنيه عاشه دى ودى وصية ابوى وانا استعنت باخت اخوى ود التوم ده ودايرين ندرب البنيه وانا كلمت ابوها وقلت ليه انا بدور البنيه للعرس وقال لى متى ما راسك يحمى كلم حاج المكى يعقد ليك واسع يا حاج المكى انا راسى حمى وبدور اعرس البنيه وانت رايك شنو 0000نظر حاج المكى الى الارض مليا ورفع راسه تجاه صالح وقال له كن ده رايك حاج المكى ما عليه إلا ان يقول خير 000لكن يا ولدى انا بدور بتاكد من كلام النا والناس بقولو البنيه قلبانه وكن بقت قلبانه دى الفضيحه يا صالح 000قاطعه صالح ما قلبانه يا حاج المكى وكن داير تتاكد اسأل كله بت التوم وهى كله دى ما ياها الدايه البتولد العوين عندكم هنا فى الحله 000يلا يا حاج المكى لما تتاكد اعقد لى فى الزاويه 0000000000

شهدت صلاة العصر حدث اصبح حديث اهل الحله والحلال المجاوره هو عقد قران عاشه بت حسين على صالح الغريب

نواصل

أخي المحترم دائماً غريق ...تصدق مشغولياتي قطعتني من متابعة القصة الرائعة جداً لعاشة أم رشة ...ومعليش ..وبإذن الله سوف اتابع معك ...ولك معزتي دائماً أيها الفاهم العاقل ...

يا ابوعليا يا رائع شكرا على مرورك الجميل