ابوجبيهه

الاحاااااااااجى

اذهب الى الأسفل

الاحاااااااااجى Empty الاحاااااااااجى

مُساهمة من طرف غريق كمبال في 21st أبريل 2011, 15:21

حجيتكم مابجيتكم,,خيرا جانا وجاكم,,قالوا: ابدأ ليكم بالقصة المعروفة قصة فاطمة السمحة ..!!!

فاطنة القصب الاحمر كانت أسمح بت في الحلة,عشان كده سموها فاطنة السمحة واي ولد في الحلة كان بيحلم يعرسا. يوم فاطنة مشت البحر ودخلت تعوم ورجعت البيت,, بعد داك جاء ولد عمها محمد يسقي الحمار حقو ,, وفجأ كده واثناء الحمار بيشرب بقى يهنق شديد ورقد في بطن الواطة زي كانو حاجة وقفت ليهو في حلقو,, محمد حاول يشوف الحصل علي الحمار لقى سبيبة شعر في حلق الحمار,,السبية كانت طويلة طول شديد محمد حلف يمين الا يعرس صاحبتا.
اها بعد كده اي بت في الحلة قاسو شعرها بالسيبة وكلو كلو ما لقوها,,في النهاية قالو يمكن تكون حقت فاطنة,,فعلا قاسوها طلعت من شعرها,,محمد قال الا يعرسا,,الجماعة قالو ليهو ماممكن لانو كان صغير شديد,,وهي كانت أكبر منو بي خمسة سنين,, ابا كلو كلو يتنازل عن قرارو.
يوم العرس لبسو فاطنة داك يا التوب وملوها بالدهب,,كانت جميلة جمال شديد,,طبعا فاطنة كانت رافضة العرس قامت واثناء الناس مشغولة شردت من البيت وجرت على الغابة,
بقت ماشة بين الشجر زمن طويل شديد,,فجأة لقت راجل عجوز مشت عليهو,,بعد سلمت عليهو قالت ليهو عمي اذا عايز تتطلع جلد عجوز تعمل ليهو شنو؟ قال ليها كان طقيتي عجوز بي شوكة في نص رأسو جلدو بيطلع,, فاطنة بسرعة شالت شوكة وطقتو في رأسو وطلعت جلدو لبستو,, بقت متنكرة في صورة العجوز.
بعد كده بقت ماشة وماشة وماشة لحدي وصلت ليها قصر كبير,,دخلت القصر وقالت عايزة تقابل الامير,,,اهاا قالت لي الامير عايزة تشتغل عندو,, الامير قال لي: بتعرف تزرع؟,, العجوز قال لي: ما فيني قدرة على الزراعة,,الامير قال لي: بترعى الغنم ؟ العجوز قال لي: بيجرن بعيد مابقدر ألحقن,, الامير قال لي: طيب بتعرف تعمل شنو؟ العجوز قال لي بعرف ارعي الوزين (يعني طيور الوز),, الامير قال ليهو خلاص كويس تاني كل يوم من الصباح تمشي البحر ومعاك واحد من الخدم ترعوا الوز وترجعوا مع الغروب.
اليوم التاني من الصباح طلع العجوز ومعاهو خادم مبكم(يعني ابكم),,لمن وصلو البحر العجوز طلع الجلد وظهرت فاطنة وكمان طلعت الدهب اللابساهو وختتو مع الجلد,, وطبعا الخادم مخلوع شديد لكن مابيقدر يتكلم,,اهاا فاطنة دخلت البحر مع الوز وبقت تغني.......
شن بدور يا بيكم..
كورعين حمام يا بيكم..
ريش النعام يا بيكم..
شعرا طويل يا بيكم..
متل الحرير يا بيكم..
واستمرت تغني كده والوز يرقص معاها لحدي الغروب,,طلعت ولبست الدهب والجلد,,والوز بيّض بيض كتير شديد,, لمن رجعوا القصر الخادم حاول يقول للامير شئ بقى يقوم ليهو اممم ام اممممم ويأشر,,والامير ماقدر يفهمو قام سأل العجور,,العجوز قال لي: بيقول ليك عيان كوكوني بالنار مشو كوهو بالنار.
برضو اليوم التاني مشى معاها خادم تاني,, برضو بيكم وحصل نفس الشئ,,الامير لمن سأل العجوز قال ليهو بيقول ليك يدي واجعاني اقطعوها لي,, وقطعو للخادم يدو,, بعد كم يوم الامير شك انو في شئ بيحصل في البحر.
اليوم البعدو الامير مشى قبل العجوز والخادم وطلع في شجرة جنب البحر,,لمن وصل الخادم والعجوز حصل نفس شئ طلعت الجلد والدهب ودخلت تعوم مع الوزين,,الامير اندهش شديد,, قام براحة بدون مايحس الخادم مد عصاية وشال خاتم من ختم فاطنة. لمن خلاص وقت الغروب جاء فاطنة طلعت تلبس الدهب والجلد لقت في خاتم ناقص,, قامت تتشاكل مع الخادم "تسرقني أنااا؟؟,,,شكيتك على الله,,اااا,,طلع الخاتم" وضربتو ضرب شديد,,الامير لمن شاف الحاصل رجع الخاتم براحة,, هي شافت الخاتم شالتو ولبست الجلد ورجعت مع الخادم القصر.
اليوم البعدو الامير نادى العجوز قال ليهو عمي العجوز رأيك شنو تلعب معاي شطرنج لكن البيفوز يطلع جلد التاني,,لعبو أول مرة فاز العجوز,,الامير قال ليهو: أعفيني,, العجوز عفى ليهو,, لعبو للمرة التانية وبرضو العجوز كسب,,الامير قال ليهو: اعفيني,,العجوز برضو عفى,, تالت مرة كسب الامير,,العجوز قال ليهو: اعفيني,,الامير ابا يعفي ليهو,, وشق جلدو وظهرت فاطنة السمحة.
بعد داك حكت لي الامير قصتها مع اهلها,,والامير رجعها قريتها وطلبها واهلها ووافقوا,,واتزوجوا وعاشو في تبات ونبات وخلفوا صبيان وبنات.

وراجعين تاني
فتكم بعافية

ياجماعة اى زول عندو اى قصة من احاجى حبوباتنا اسردها هنا

اديكم العافية
غريق كمبال
غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

الاحاااااااااجى Empty رد: الاحاااااااااجى

مُساهمة من طرف محمود منصور محمد علي في 21st أبريل 2011, 18:41

ياسلام عليك يا استاذ يارائع
تصدق قرات القصة الظريفة ثلاثة مرات ....وبعدين عندي اولاد صغار دائما يطلبو مني احكي ليهم قصص من السودان لانهم شافوا السودان وهم في مرحلة الطفولة المبكرة وامهم مولوده هنا وما بتعرف حاجة عن السودان.. وقمت حكيت ليهم القصة دي واستمتعوا بها غاية الاستمتاع وطلبوا مني واحدة تاني ووعدتهم الاسبوع الجاي يعني برضو انا منتظرك .... الف تحية
محمود منصور محمد علي
محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

الاحاااااااااجى Empty رد: الاحاااااااااجى

مُساهمة من طرف غريق كمبال في 22nd أبريل 2011, 11:12

شكرا محمود على المرور ربنا يخلى ليك الوليدات ويمتعهم بالصحه والعافيه ويجعلهم غرة اعين والديهم نعدك بالمزيد
غريق كمبال
غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

الاحاااااااااجى Empty رد: الاحاااااااااجى

مُساهمة من طرف غريق كمبال في 22nd أبريل 2011, 11:36

كان في قرية بنت جات اخر العنقود وكان الفرق بينها وبين باقي اخوانها واخواتها كبير شديد.ابوها واخوانها كانوا من اكبر التجار ودلعوها دلع شديد.كانت اكثر البنات ذهبا مكنكشة كنكيش ما عادي.عشان كده سموها ام دهيبون.
يوم اتلموا البنات يلعبوا ومشوا على جه الغابة لقوا ليهم شجر نبق(سدر) شايل شيل تقيل. وقاموا اتفقوا زول يطلع يحت النبق والباقين يلقطوا.

قالوا لي ام دهبون انتي مدلعه وطلوع الشجر ما بتقدري عليه.
وهي زعلت واصرت تطلع وفعلا طلعت.وحتت ليهم النبق كلوا.بقوا هم يلقطوا في النبق السمح ويختوا ليهم والكعب والني يختوه ليها.لحدي ما نزلت.
وكل زول شال نبقوا وكان مصرور.لحدي ما وصلوا البئر.
قالوا نشوف نبق كل زول.
كل وحده نبقها اسمح من الثانية الا ام دهبون حقها كلوا كعب.
زعلت شديد وقالت انا راجعه تاني ألقط ارح معاي.كلهم ابو.وقالوا تعبانين بنستناك جمب البئر دي. وهي مشت براها زعلانة من حقارة البنات.
لقطت نبق اسمح من حقهم ورجعت ليهم.وورتهم نبقها وهم اتغاضوا شديد.سالتهم انتوا شربتوا بشنو؟؟
قالوا ليها رمينا ذهبنا والموية طفحت جابت لينا ذهبنا وشربنا.
قالت ليهم يعني انا لو رميت ذهبي بيجيني تاني؟؟؟.
قالوا ليها اي نحنا عملنا كده.
وفعلا شالت ذهبها كلوا ورمتوا في البئر.
بعد ما شالت ام دهيبون دهبها كلو ورمتوا في البئر
وقعدت استنت الموية تطلع وترجع ليها الذهب
ولا حس ولا خبر
والبنات قعدوا يضحكوا فيها
غشيناكي يا عويرة
شربنا ودسينا الجركانة

ومشوا خلوها
وهي قعدت متمحنة في المصيبة الجاتة بلادتها في تصديق البنات
وفجأة جات هبوب صفرااااااااااااااااااااااااا
قامت قعدت تكورك الله لي منك يا الهبوب
والهبوب ردت عليها
الله ليك من الوراي!!!!!!!!!!!!!!!
وجات بعدها هبوب حمراااااااااااااااا
وقعدت تكورك ليها
الله لي منك يا الهبوب
والهبوب ردت عليها
الله ليك من الوراي!!!!!!!!!!!!!!!!!!!!!!
وجات بعدها هبوب سوداااااااااااااااا
وقعدت تكورك ليها
الله لي منك يا الهبوب
والهبوب ردت عليها
الله ليك من الجواي!!!!!!!!!!!!!!!
وفجأة طلع ليها غول:000:
وام دهيبون قعدت تبكي وتبكي بكاء يقطع القلب
الغول قال ليها مالك يا بت قعد تبكي
قالت ليه بنات الحلة غشوني وخلوني ارمي دهبي كلو في البئر
الغول قال ليها انا بطلعوا لكن بشرط تعرسيني
ام دهيبون وافقت كان ابت حياكلها الغول وما في اي فائدة
قالت ليه اي بوافق
والغول قعد يشرب ويشرب في موية البئر لمن خلصت وطلع ليها ذهبها كلوا
وخطف ام دهيبون ومشى
البنات لمن رجعوا خافوا على ام دهيبون الخلوها براها وخافوا تكلم اهلها
ولمن رجعوا ليقوها مافي
وجروا لي اهلها كلموهم
ووروهم انهم رجعوا ما لقوا ام دهيبون
واهلها رجعوا معاهم وما لقيوا حاجة
قصوا الدرب لقيوا اثر الغول
وقال كدي نمشي للعجوز نسالها عن العمل
ومشوا للعجوز
وقالوا:عجوز كلامك يجوز ورينا نعمل لي بتنا ام دهيبون شنو
العجوز قالت ليهم تمشوا لي بيت الغول
لقيتوه نايم معناه صاحي
لقيتوه مفتح معناتوا نايم تكسروا اي حاجة في البيت وتشيلوا بتكم وتجروا وتمسوا الدرب الوراكم.
وفعلا مشوا لقوه مفتح
كسروا العده الفي البيت ونسوا الحجر البيطحنوا بة (الدحاية)
وشالوا ام دهيبون وجروا
بقت الدحاية تطير فوق وتنزل تضرب في راس الغول ويكورك: غول يا غول قوم يا غول
بتك ختفوها الرجال
الغول قام على حيلو وفتش وما قدر يلحقهم عشان الدرب الممسوح
واتغاظ غيظة
لكن يعمل شنو
وام دهيبون اتعظت وبقت ما بتمرق ذهبها خالص لأي سبب
غريق كمبال
غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

الاحاااااااااجى Empty رد: الاحاااااااااجى

مُساهمة من طرف محمود منصور محمد علي في 22nd أبريل 2011, 12:02

استاذ غريق
انت رائع وبس
المزيد المزيد
محمود منصور محمد علي
محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

الاحاااااااااجى Empty رد: الاحاااااااااجى

مُساهمة من طرف غريق كمبال في 23rd أبريل 2011, 10:38

امحمد وفاطنه


عشان قندول ياجلابه


اليوم الحجوه حلوه

كل الناس تنتبه وتفتح خشومها

تسكت ما اسمع حس واحد وللا واحده


نبدأ

سافر رجل صبيح الوجه الى الحج وترك ابنه محمد وابنته فاطنة مع اخوه
وطالت غيبته في الحج وجاء الخريف ومرق الناس للزراعة ومرق محمد واخته مع عمهم وزرعو وطال الزرع وشال السنابل ولبنت السنابل وبقي عندها شرا ثم بقت فريكا وقال العم لمحمد واخته احرسو العيش من الطير وبنى لكل واحد (حاحاية) عشان يحرسواالعيش.
وكان العم لئيما وكان يعد االسنابل في كل يوم ليتاكد انو الولد واختو ما اكلو منها وفي مرة من المرات جاع الولد وقال لي اختو (يا فاطنة تعالي نقطع لينا قندول ولا قندولين ناكلن)
قالتو فاطنه : (ياخوي اكان قطعنا قندول واحد عمنا بجي يعد القناديل وبعرفو
لكن في النهاية الجوع غلب محمد فقطع سنبلة واحد وشواها واكل وادي فاطنة اكلت وحفر لي السنبله في الواطه ودفنها .
وجاء العم وعاين وعدا السنابل ولقي سنبله مقطوعها وقال لي محمد انتا قطعتا القندول يا ولد
قال محمد
- لا ياعمي القندول اكلو الزرزور .
وسكت العم وقال لي الولد :
- انتا شعفت دحين جيب الموس في شان ازينك
واحضر الولد الموس وغسلو عمو راسو وسن الموس وبداء يزينو وحنا الولد راسو لي عمو وقال العم لي محمد :
-احني راسك زيادة وحني الولد راسو زيادة وقال العم :
- انت قطعتا القندول وانا بقطع رقبتك زي ما قطعتا القندول ، وفطع العم راس الولد ، وكانت فاطنة واقفا قريييييب وشافت المنظر وصرخت وسمعا عمها وجري وراها وجرت هي منو وجري وراها بسرعة ولما قرب يحصلها صاحت
- ياواطه ابلعني
وبلعتا الواطه
و وقف عمها قريب من الواطه ، وجاءت جلابة مارة ، وكانت فاطنة وهي تحت الواطه تري الجلابة ، وقالت للواطة :
- ياواطة امرقيني .
ومرقت من الواطه : ووقفت قدام الجلابة وقالت لها:
سلام سلام يا جلابة
جملو الهدير ياجلابة
سوطو الوروير ياجلابة
توبو توب حرير ياجلابة
قام عمها وقال لي جلابة :
- البت دي رزيلة وشاردة مني دحين اقبضوها .
ولمن الجلابة دايرين يقبضوها جرت وجرت ، وجري عمها وراها ولما تعبت قالت :
- ياواطه ابلعيني
وبلعتها الواطة، ووقف عمها قريب من المكان يحرسها . وحرس وحرس وحرس ويئس في الاخر ، وقال في نفسه : ارجع لي الحلة .
ولكن فى نفس الوقت جاءت قافله مارة . ومرقت البنت قدام رئيس القافلة وبقت تبكي وتبكي وتبكي وتقول:
عمي اخوي ابوى يا جلابة
كتل محمد اخوي ياجلابة
في شان قندول ياجلابة
والقندول ياجلابة
اكلو الزرزور ياجلابة
وطار ووقع في سبع بحورياجلابة
وقالت الجلابة :
مالك يا بت ودايرة شنو
قالت :
ابوي اخدراً طويل ياجلابة
وتويو توب حرير ياجلابة
جملو الهدير ياجلابة
سوتو الورويرياجلابة
ابوي مو فيكن ياجلابة
جاء العم وقال لي رئيس القافلة:
- اسرع اقبض البت الكلبة دي باقي هي شاردة مني ما تصدق كلامها ده
قام رئيس الجلابة داير يمسكه لكنها جرت وجرت وجرت ، وجري عمها ورها
ولما قرررررررب منها قالت :
- ياواطة ابلعيني
وبلعتا الواطة .
ووقف العم قريب منها وطالت وقفته فسئم ويئس وقال في نفسو ( ارجع لي الحلة)
لكن ظهر غبار جلابة ولما قربت الجلابة مرقت فاطنة وقفت قدام رئيس الجلابة وقالت :
عليكم الرسول ياجلابة
طه ابو البتول ياجلابة
كان فيكن ابوي يا جلابة
قام الرئيس قال ليها
ابوك منو يابنية
نحنا اكتر من مية
قالت ليهو
ابوي الاخدر الطويل يا جلابة
اسمو ابو الفضيل يا جلابة
توبو توب حرير يا جلابة
جملو الهدير ياجلابة
سوتو الوروير يا جلابة
عدوه كسير ياجلابة
عمي اخي ابوي ياجلابة
كتل محمد اخو ياجلابة
في شان قندول ياجلابة
والقندول ياجلابة
اكلو الزرزور ياجلابة
وطار ووقع في سبع بحور ياجلابة
قام رئيس الجلابة قال ليها:
ابوك يا بنيه
في الجلابة الورانية
بتجي وقت العشية
ولمن سمع العم الكلام قال لي رئيس الجلابة اقبض البت دي ، وخافت البت و قالت للواطة ابلعينى
- وبلعتها الواطة
ومرت الجلابة ووقف العم يحرس المكان لما زهج وقربت الشمس تغيب
وجاءت الجلابة التانية وطلعت البت ووقفت قدامه وقالت
عمي اخي ابوي ياجلابة
كتل محمد اخو ياجلابة
في شان قندول ياجلابة
وسمعها ابوها وعرفها وجاء من نص الجلابة علي جمله الهدير وراه العم وشرد وهرب من ابوها وجري ابوها وراءه . ولما قرب منو قال العم
يا واطه ابلعيني
وابت الواطه تبلعو ، ومسكو ابو فاطنة ومحمد وذبحو وحرقو و شتت رماده مع الريح


واقطعت وانشبكت في راس الصغير والكبير


يلاااااااااااااا نومو

غريق كمبال
غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

الاحاااااااااجى Empty رد: الاحاااااااااجى

مُساهمة من طرف غريق كمبال في 23rd أبريل 2011, 10:44

ام توباً بني


في منطقه من مناطق سودانا الحبيب كان في رجل متزوج وله سنين كثيره شاء القدر انو يحرم من الاطفال.وكان هذا الشي بيحزنو وماثرو.في يوم من الايام مع الصباح قام يدعي بالخلف الصالح وفعلا استجاب لي دعاه وولدت له طفله فرحه عمرو.فرح بيها فرح ماعادي وكل ما كانت الطفله تكبر فرحوا كان بيزيد معاها اكتر.
واصبحت شابه وكانت بتحب اللون البني وما بتلبس غيرو عشان كده اشتهرت بام توب بني.كانت اجمل بنات الحته .لونها اصفار زي الذهب وعيون كبااااااااار ورموش طواااال زي السيوف متراصة وشعر اسود من الليل وفي نص ظهرها والحواجب هلالين عديل مرسومات .لاطويله ولا قصيره لا سمينة ولا ضعيفة.كفانا من الوصيف الباقي اكيد بتعرفوه. كان عندها اعذب صوت لمن تغني الجميع بيسكت.
كل الصفات دي خلتها تكون محسوده من جميع بنات الحله.الداير يخطب يخطب ام توب بني البيحب ويعشق ام توب بني .ام توب بني هي السمحه. ام توب بني هي الظريفة اللطيفه ........... ام توب بني..........ام توب بني........... ام توب بني اي حاجه ام توب بني.
ابوها وامها كانو بيخافوا عليها شديد كيف دي ما البكر والحتاله.
جاء يوم اتلموا فيه بنات الحله وقالوا نحنا خلاص كفانا زهجنا ودايرين نقعد كده اي زول داير يعرس يمشي لي ام توب بني .هي زاته قاعده ترفض ومابية اي زول.كان عرست كان خلصنا من الموضوع بدل ما مطفشه لينا العرسان.
المهم الحقد والغيره عمتهم وقاموا اتفقوا يغدروا بيها.
لمن اتفقوا البنات عليها والغيره عامياهم قاموا مشوا ليها وقالوا ليها (ارح نمشي البحر نعوم) قالت ليهم انا امي قعد تحميني امشي البحر وانا ما بعرف اعوم.قالوا ليها ما تقولي ليها وانتي الوحيده في بنات الحله الما بتعرفي تعومي.كده امشي معانا بنعلمك.
المهم يحنسوا ويحنسوا لمن رضت تمشي معاهم.ولمن نزلوا البحر دخلوا عاموا لي جوه ولزوها بعييييييد .وطلعوا هربوا.
ام توب بني غطست الغطسه الاولى وطلعت. وغطست الغطسة التانية وطلعت.وغطست الغطسة الثالثة وما طلعت.......؟؟؟؟؟؟
جات سمكه كبيييييييره وبلعت ام توب بني مع غطستها الثالثة.
قعدت ام توب بني في بطن السمكة يوم كامل.
ورحمه من ربنا اصطاد السمكة صياد.وبعد تعب طلع السمكه هو ومعاه اكتر من 10رجال وفرحانين فرح شديد.ام توب بني سمعت صوت الناس هايجة بقت تكورك (طلعوني طلعوني) الناس خافت وقالت السمكة بتتكلم.الصياد لاحظ الحركة في بطن السمكة,طوالي شال سكينة وشق بطن السمكة.وكانت الغريبة والعجيبة البنت الطلعت من جوف السمكة.
الصياد قال ليها يا بتي احكي لي قصتك ودخلتي جوه السمكة كيف.
وحكت ليه القصة كلها.
قام حن عليها وقال ليها تمشي معاي البيت وتقعدي مع بناتي لمن تلقي اهلك.
وقعدت مع اهل الصياد.وكل يوم تطلع مع بناتو يلقطوا حطب الوقود.تمشي تقيف تحت شجرة كبيرة وتغني.
(يا يمة........... يا يمة
انا ام توب بني
والبنوت رمني في البحرني
يا يا به............. يا يابه
انا ام توب بني
والبنوت رمني في البحرني) وتقعدت تبكي بكى يقطع القلب
كل يوم بنفس الطريقة.
اما عن اهل ام توب بني.ما عرفوا بنتهم دي مشت وين.خطفها غول ولا وحش ولا مشت وين مافي زول عارف عارف عنها حاجه. امها مرضت مرض شديد وبقت ما بتتحرك.والاب كل يوم يمشي البحر تنزل دموعوا ويرجع البيت لا بيكلم زول وكل يوم بنفس الطريقة.
ومرت الايام.
في يوم ولد السلطان طلع يصطاد.وجابو القدر جمب الشجره البتغني فيها ام توب بني,وسمع غناها وبكاها.وعجبتوا عجب شديد. طوالي جاها وقال ليها ابشري يا ام توب بني اي حاجه دايراها تلقيها. ام توب بني خافت وجرت على بنات الصياد.وبنات الصياد عرفوه.وطلب منهم يمشي معاهم يقابل ابوهم.وقعد مع الصياد وحكى ليه القصة.وانو لحدي هسي مافي زول عارف عن اهلها حاجة ولا الجهه الجات منها.
ولد السلطان وعد ان يساعدهم ويلقى لام توب بني اهلها.
قام ولد السلطان سافر مده ثلاث ايام عشان يلاقي العجوز.(العجوز دي يعني الحكيمة ومرأه مبصره بتشوف وبتعرف )
واول ما دخل قال ليها عجوز كلامك يجوز.
وريني اهل ام توب بني وين.
العجوز قالت ليه تمشي البحر وتتجه جه الشرق بعد عشرة ليالي تلقى روحك عند اهلها.
فرح ولد السلطان.وكلم الصياد وام توب بني
وفعلا سافروا والصياد حلف الا يمشي معاهم يوصلوا ام توب بني.
في اليوم العاشر مانامت ام توب بني الليل كلوا وفي صباح تعاين لي بعيد لقت ليها ارض باينه من بعييييييييد لمن قربت عرفت البيوت وبقت تكورك ديل اهلي ديل ناسي.وتلمت اخيرا بامها وابوها وحكت ليهم القصة من البنات رموهافي البحر والصياد لقاها لحدي مارجعت ليهم كيف. وطلبت يعفوا عن البنات.
وولد السلطان طلب من ابو ام توب بني انوا يعرسهاوالاب قال ما بيوافق الا الصياد يوافق.
والصياد طبعا وافق وتم العرس.

والبنات كان عقابهم انهم عنسوا ومافي زول اشتغل بيهم وبقوا منبوذات من الجميع.


انقطعت وانشبكت في راس الصغير والكبير
غريق كمبال
غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

الاحاااااااااجى Empty رد: الاحاااااااااجى

مُساهمة من طرف محمد قادم نوية في 23rd أبريل 2011, 11:11

شكراً ياغريق علي إضافاتك الرائعة عن أحاجي حبوباتنا الغنية بالمعلومات والذكريات الجميلة ؛وكلنا شهدنا هذه الثقافة العريقة في بداية طفولتنا وكنا نحسب الساعات حتي يجي الليل ونحضر تلك الجلسات الثقافية الرائعة
بس قصة ام تويب بني حلوه خالص ..أبدعت في سردها
محمد قادم نوية
محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

الاحاااااااااجى Empty رد: الاحاااااااااجى

مُساهمة من طرف Suhad Abduelgfaar في 23rd أبريل 2011, 13:35

يا سلام
يا غريق يا اخوى
على الابداع
والله
العبره مسكتنى
اين ابناءنا من
الاحاجى الاستمتعنا بيها وحبيناها وحفظناها
هل هو الزمن ام نحن ؟
خالص التحايا والشكر
على الروائع
Suhad Abduelgfaar
Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

الاحاااااااااجى Empty رد: الاحاااااااااجى

مُساهمة من طرف غريق كمبال في 23rd أبريل 2011, 15:51

اشكركم على المرور الجميل
غريق كمبال
غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

الاحاااااااااجى Empty رد: الاحاااااااااجى

مُساهمة من طرف سومه العمدة في 26th أبريل 2011, 12:30

الله يديك العافيه يازعيم ومايحرمنا منك ولا من احاجيك
والله استمتعت بكل الاحاجي من تقل سمعته اول مرة
بس رهيبة ام توب بني دي وجديدة لنج والله بنسبة لي
يارب تسلم
سومه العمدة
سومه العمدة
نشط مميز
نشط مميز


الرجوع الى أعلى الصفحة اذهب الى الأسفل

الاحاااااااااجى Empty رد: الاحاااااااااجى

مُساهمة من طرف غريق كمبال في 26th أبريل 2011, 12:38

شكرا يا بت العمده يا اصيله
غريق كمبال
غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى