بنيتى حسابك ... ردا على الاغنيه الشعبيه ومناصره للمرأه

حكامة جديدة لنج .. مناصرة للمرأة وحقوقها كتبت : تقول رداً عل الأغنية الشائعة بنيتي حسابك

لم نتفق يا ناهد ( لانك عملتى هوى )

على اى حال هذا هو نص بنيتى حسابك و هو ايضا من تراث اهلنا بدارفور.


الله والنبي لـ كلام راجل تسمعا
بنيتي حسابك لـ كلام راجل أسمعا
حسابك يا بنيتي كلامي لا تابا
كلامي كم أبيتيه تكوسيه ما تلقا
* * *
هي لا تخليه ينقنق لـ كلامو تسفها
لا تقوّي راسك ، بكرة يقولوا طلقا
فجر كم ولا عندو لـ عشيّا أمهلا
بلا إذنو لا تمشي لـ محل مآجرا
***
وراجل كم ما ناداك لا تمشي تلحقا
وكم غبّت منك نادي أسألا
قشي بيتك بدري وعيشك أطحنا
الما وساخة ، في خشم بيت لا تكشحا
***
وكم عاطت فوقك لا تدقيه تفلعا
إنتي أشكيه لـ الله لـ حقك يخلسا
انتي بنيتي كم لـ كلامي تسمعا
الله والنبي لـ كلام راجل تسمعا
الله والنبي لـ كلام راجل أسمعا
***
حتّي عجاج بيتك ، عنقريبو فرشيه
وكورة أم قعر تحت سريرو جيبيه ختّيه
توبك المجنقر دا ب إبرة أمسكيه
رجلينك المشقق دا أدرشيه حننيه
***
وشعرك المشمبل دا لميه مشطيه
المدونكت من قعارو فرتقيه
أوطوي أوقاي لـ ألمي أردي جيبيه
عجينة كم تعوسيه لـ دوكي أتّقيه
***
وكسرة كم تلت عقابو لميه شريه
ب طلحاي ب دروتاي حفرتك ولعيه
جيبي مخبرك لـ بطن بيتك بخريه
كم كملتي خدمتك لـ نارك أكتليه
***
كم فتّي بطن حلّه ، لـ بيتك طليه شيفيه
كلام كم تخاف لو من بيت لا تمرقيه
وقالوا وقلنا في لسانك لا تجيبيه
جارتك المهوهوة دا لا بيتك بخربيه
***
نصيحتي كم سمعتيه لـ بيتك أمسكيه
الله والنبي لـ كلام راجل تسمعا

فيصل عوافى التحيه لك

والتحيه لاهلنا فى دارفور بالجد النص بنيتى حسابك معبر بلحيل يدل على حكم كثيره والتراث فى دارفور ملىء بالارث الاصيل الجميل الذى يجسد معنى الحياه وفقا لتقاليدهم وعاداتهم.

نسأل الله السلم والسلام لاهلنا فى دارفور

الاستاذ فيصل الكومديان والمسرحي الظريف
الاستاذة الانيقة الاديبة ناهد بت عبيد
العمل جميل في الاطار العام
لكن ناقص مربع (الكلمة ومعناها )عشان نفهمو بصوره اوسع ..ويبدو ان القصيدة التى كتبتها الاستاذه ناهد هي القصيدة الام والاصلية.. اما القصيدة التي رد بها الاستاذ فيصل مزورة وهو وبذكائه المعهود غير صيغة النص حتى لا تكون القصيدة مناصرة للمراه وحقوقها!!
الف تحية

الحبيبة ناهد الله يجازي محنك (الحطامة) دي وين؟ باقي محتاجين ليها في التخريج الجاي...لوعملتو دمج للاغنتين مع الحذف من هنا وهناك تطلع حاجة قزاز...قزاز دي في محلها يافيصل وول نوية.؟...احترامي

ناااااااااااااااااااهد يديك العافية كم انت جميلة
والاغنية ميه بالميه
راجل كان نزل انتخابات اوعي ترشحا...وحات الله يفوز فوقك يعرسا وانتي تاكلي نيم ما تشبعا حسابك
والكلالالالالالالالالام دا صحي حسابك
وعلي قولك يا استاد محمود القصيدة التي رد بها اخونا فيصل دي مزورة وبدكائة غير الصيغة حتي لا تكون مناصرة للمراه
تسلموا

تمام كل سته فى حته يا اقبال

شنو يا محمود و صباح حسن فاتحين نيران صديقه على اخوكم

ما اجمل هذا التراث يا محمود منصور و ما اجمل كلام الحكامات و انبله.

تسلموا يا فرد

محمود منصور محمد علي كتب: الاستاذ فيصل الكومديان والمسرحي الظريف
الاستاذة الانيقة الاديبة ناهد بت عبيد
العمل جميل في الاطار العام
لكن ناقص مربع (الكلمة ومعناها )عشان نفهمو بصوره اوسع ..ويبدو ان القصيدة التى كتبتها الاستاذه ناهد هي القصيدة الام والاصلية.. اما القصيدة التي رد بها الاستاذ فيصل مزورة وهو وبذكائه المعهود غير صيغة النص حتى لا تكون القصيدة مناصرة للمراه وحقوقها!!
الف تحية

النصيحه لله استاذ محمود منصور انت الاستاذ وبقية اساذتى الافاضل فى المنتدى
عليه خلينى (بتنا او اختنا ناهد) بالجد ح اكون بها سعيده

مشكور يا استاذ على كلامك الزوق والطبطبه عليا لكن يا سيدى مقبوله منك من باب انك تحاول دفعنا الى الامام بس بشويش عشان ما نخاد حق غيرنا

للامانه :- عشان تعرفوا العوين ما بكضبوا طوااالى مرات مرات القصيده الام والاصليه هى اللكتباها فيصل والحكامه ردت عليها من باب مناصرة المرأه بالقصيده اللى نقلتها انا

نتشششششه:-

لاول مره فيصل براءه

محمد نوية كتب:

فعلاً دارفور أرض الحضارات وأرض التراث
وصية رائعة من أم تودع أبنتها للرحول (بيت الزوجيّة)بكلمات حكيمة ؛نامل من كل أم ان تستوصي إبنتها بمثل هذه الوصايا حتي تصير أم مستقبل
بعدين ياعم شايف إنو الــــــــــــ Language بتاعتنا دي بقت تسُود عند السواد الأعظم من السان
التحية للجميع علي مداخلاتم الجميلة

ول نويه لك الشكر ياريت كل ام توصى ابناءها بالخير عوين ورجال

وضح الوصيه الرائعه فى القصيده الاولى ام الثانيه ؟

اكيد قاصد الاولى ولا مو هيك اخوى

الف شكر ومليون تحية يا بنتنا ناهد
انا برضو ساظل متمسك بالتحليل السياسي بتاعي بين القصيده الاصل والقصيدة المستنسخة بتاعة البلطجي فيصل !!! زي النكنتة البتقول ((واحد بتاع غلاط ومغالط لدرجة عبيطة جدا وممكن يغالطك حتى في نفسك جاءه احد الاصدقاء وطرق الباب فرد عليه صديقه المغلاطي مين انت ؟؟؟؟ فرد عليه الطارق انا!!!! فرد عليه المغلاطي : علي بالطلاق ده ما انت !!!
الف تحية

ناهد يارئعة انت ،بجد وصية من حكامة رهيبة عديل،ووصيتها100% وشكرآ يافيصل علي الابيات الهي في الحقيقة هي الاصلوشكرآ لكل أهلي ناس ابو جبيهه الرائعيين حقآ

صباح حسن عبد الرحيم كتب:ناااااااااااااااااااهد يديك العافية كم انت جميلة
والاغنية ميه بالميه
راجل كان نزل انتخابات اوعي ترشحا...وحات الله يفوز فوقك يعرسا وانتي تاكلي نيم ما تشبعا حسابك
والكلالالالالالالالالام دا صحي حسابك
وعلي قولك يا استاد محمود القصيدة التي رد بها اخونا فيصل دي مزورة وبدكائة غير الصيغة حتي لا تكون مناصرة للمراه
تسلموا

صبوحه الحبيبه لكى سلاااااااااام كتير اولادك وابوهم ربى يغطى عليكم

شفتى يا صباح اعملى حسابك يا اخيتى

راجل كان نزل انتخابات اوعي ترشحا...وحات الله يفوز فوقك يعرسا وانتي تاكلي نيم ما تشبعا حسابك

اقبال عبداللطيف كتب:الحبيبة ناهد الله يجازي محنك (الحطامة) دي وين؟ باقي محتاجين ليها في التخريج الجاي...لوعملتو دمج للاغنتين مع الحذف من هنا وهناك تطلع حاجة قزاز...قزاز دي في محلها يافيصل وول نوية.؟...احترامي

كر عليا العدوه انتقلت قزاز يا اقبال

راجل كان نضم في موبايل إتلبدا .. ونضم كلو أسمعا باكر ما يقولو فوقك عرسا
بنيتي حسابك


معناها روحتى فى دوكه

سومه مقدرين مرورك لكن طلب بسيط تلبيه لاقتراح استاذ محمود قومى بترجمه القصيده حتى يتضح المعنى واستعينى بصديق

ولك احترامى

كم فتّي بطن حلّه ، لـ بيتك طليه شيفيه
كلام كم تخاف لو من بيت لا تمرقيه
وقالوا وقلنا في لسانك لا تجيبيه
جارتك المهوهوة دا لا بيتك بخربيه

راجل كان نضم في موبايل اتلبدا... ونضم كلو اسمعا باكر ما يقولو فوقك عرسا
دكتور الجنيد سلامات وتحيات كتارات بقدر طول غيابك اخووووي
وبعدين حتي النضمي لو بالرندوق نحنا نفهما وما بنسطحااااااااا
قال نسطح قااااااااال
احترامي

سلامات د الجنيد والحبيبه صبوحه شكرا على المرور اللطيف

يا دكتور نحنا عملنا بوست فى تراث المدنيه عن الرانوق وتارى الجماعه يزوقوا وتاااانى يذقوا الفيكم اتعرفت

ولكم تقديرى

لله والنبي لـ كلام راجل تسمعا
بنيتي حسابك لـ كلام راجل أسمعا
حسابك يا بنيتي كلامي لا تابا
كلامي كم أبيتيه تكوسيه ما تلقا
* * *
عليك الله اسمعي كلام الراجل
وماترفضي كلامي دا..وكان رفضي تاني ماح تلقي
هي لا تخليه ينقنق لـ كلامو تسفها
لا تقوّي راسك ، بكرة يقولوا طلقا
فجر كم ولا عندو لـ عشيّا أمهلا
بلا إذنو لا تمشي لـ محل مآجرا
***
ماتخلي ينضم وماتعبريه
أسمعي كلامه عشان بكرة مابيقى في طلاق
الصباح كان بيقى ماعنده اصبريه لمساء
كما كلمته ماتمشي لبيت البكاء
وراجل كم ما ناداك لا تمشي تلحقا
وكم غبّت منك نادي أسألا
قشي بيتك بدري وعيشك أطحنا
الما وساخة ، في خشم بيت لا تكشحا
***
وكان ما قال ليكي تعالى ماتمشي ليه
وكان طول منك ناديه اساليه
نضفي بيتك بدري واطحني عيشك
موية الوسخ ماتكشحي قدام بابك
وكم عاطت فوقك لا تدقيه تفلعا
إنتي أشكيه لـ الله لـ حقك يخلسا
انتي بنيتي كم لـ كلامي تسمعا
الله والنبي لـ كلام راجل تسمعا
الله والنبي لـ كلام راجل أسمعا
***
وكان كورك فيكي وماتفلعيه
خليه الله بخلص ليكي حقك
انت بتي كلامي اسمعي
عليك الله كلام الراجل اسمعي
حتّي عجاج بيتك ، عنقريبو فرشيه
وكورة أم قعر تحت سريرو جيبيه ختّيه
توبك المجنقر دا ب إبرة أمسكيه
رجلينك المشقق دا أدرشيه حننيه
***
انفضي بيتك من الغبار وفرشي ليه سريره
جهزي ليه كورة وختي ليه تحت السريره
خيطي توبك لو مشروط
وحنني رجلينك
وشعرك المشمبل دا لميه مشطيه
المدونكت من قعارو فرتقيه
أوطوي أوقاي لـ ألمي أردي جيبيه
عجينة كم تعوسيه لـ دوكي أتّقيه
***
مشطي شعرك
نضفي زيرك نضيف قبل ماتجيبي المويه وتمليه
بعد العواسة ارفعي الصاج بعيد
وكسرة كم تلت عقابو لميه شريه
ب طلحاي ب دروتاي حفرتك ولعيه
جيبي مخبرك لـ بطن بيتك بخريه
كم كملتي خدمتك لـ نارك أكتليه
***
إذا فضل باقي كسرة لميه وجففيه
إدخني وبخري بيتك
بعدما تخلصي اطفي النار
كم فتّي بطن حلّه ، لـ بيتك طليه شيفيه
كلام كم تخاف لو من بيت لا تمرقيه
وقالوا وقلنا في لسانك لا تجيبيه
جارتك المهوهوة دا لا بيتك بخربيه
***
إذا طلعتي لجيرانك ماتنسى بيتك
ماتمرقي كلام بيتك برة
ابعدي من النسنسة
كمان ابعدي من جارات النمامات
نصيحتي كم سمعتيه لـ بيتك أمسكيه
الله والنبي لـ كلام راجل تسمعا
نصحتي ليكي بيتك امسكيه
وعليك الله اسمعي كلام الراجل

الرائعه سومه لكى التحيه والتقدير وشكرا حبيبتى الغاليه

اهلنا قالوا سمح الكلام فى خشيم سيدو

تسلمى يا رب

تسلمي يا سوووووووومه
ما قصرتي تب
تحياتي

لالا والله ده ابداع ما عادى
(دارفور بلدنا)
تراث دارفور العظيم
ربنا يحفظك اختى سومه
ويا ريت كمان تدخلى بقادى فى (التكل)
وتدينا كده من اكلات دارفور الشهيره
ولك منى التحايا .
اخيتى ناهدوالله لقيتك لفيفه خلاص
متعتينا والله علا اخيكى فيصل ده قاعد ليكى فوق
حلقومك كى مالا .
عزيزى فيصل (المى حار ما لعب قعونج)
فتكو عافيه

صبوحه الحبيبه لكى الود وانتى دائما حاضره
ان شاء الله ما تقصر بكى الدنيا


*******************************************
بت خالى سهاد لكى كل الاشواق وانتى دائما ضلك خفيف ودمك شربات رايك شنو دى حلووووووووه

الحمد لله يا سهاد براكى شفتى فيصل انا ما قلت ليكى صاح لكن اعمل شنو لازم اصبر عليه لانو خال وقالو الخال والد والسبب التانى بينى وبينك عنده عصابه عشان هيك

ولكم تقديرى