ابوجبيهه

قصـــــــــــــــــــــة فاطــــــــــنة السمحــــــــــــة

استعرض الموضوع السابق استعرض الموضوع التالي اذهب الى الأسفل

قصـــــــــــــــــــــة فاطــــــــــنة السمحــــــــــــة

مُساهمة من طرف محمد عبد الله قادم في 5th يونيو 2011, 14:12

كانت فاطنة اجمل بنات زمانها فسميت( السمحة)أى الجميلة ولم يكن جما لها جما ل وجه اوجسد
فقط بل كانت طيبة كريمة الأخلاق احبها كل من عرفها .اصبحت سيرتها حديث
مجالس الشباب وكم من امير تقدم لخطبها واعتزر اهلها لصغر سنها اعجب بها
الكبار وأحبها الشباب ، وغارت منها وحسدتها كثير من بنات جيلها ، تعيش
فاطنة مع أهلها في إحدى القرى الوادعة الجميلة على ضفاف واديا اخضر يفصلها
عن غابة كثيفة لم تطأها رجل بشر يسكنها غول شرير ، ينام سنة ويصحو سنة ،
عندما ينام يضع شعر زوجته تحت رأسه . كان من عادته أن يتزوج شابة جديدة كل
عشرين سنة ، يختار أجمل بنات القرى المجاورة ويخطفها لتصبح زوجته ، وبعد
عشرين سنة يقتلها ليختار عروساً جديدة ، كان أهل القرية يعرفون انها سنة
الاختيار ، ويتهامسون خوفا على فاطنة لأنها اجمل بنات المنطقة على الإطلاق
كذلك عائلتها تدرك ذلك لذا منعوها من الخروج أو الابتعاد عن الدار ، كانوا
مصممين على حمايتها بسيوفهم وارواحهم . حرمها هذا الحصار كثيرا من أنواع
اللهو والتسلية مع قريناتها ،، كانت حبوبتها تقف لها وتمنعها من كل شئ يمكن
أن يعرضها للخطر ، ولا تسمح لها بالخروج الا بعد ان تتأكد من سلامة المكان
الذي ستذهب اليه ، كل هذا الحذر يزعج فاطنة ويشقيها ويحرمها التمتع بحياة
طبيعية كثيرا ما اشتكت لوالدتها من الحرمان الذي افقدها الكثير من صديقاتها
متع اللهو البرئ في الحقول المجاورة ، كانت الغيرة والحقد يسيطران على
عقول كثير من فتيات القرية اللائى يدركن ان الشباب مشغولون عنهن بفاطنة
السمحة وجمال فاطنة واخبار فاطنة يعلمن تماما بان أحدا من لن يتقدم لخطبتهن
طالما لدى الجميع الأمل ان تكون فاطنة من نصيبهم ، ذات يوم جمعتهن مناسبة
عند إحداهن وبينما هن يتجاذبن أطراف الحديث ذكرت احداثهن ما يشغل بالهن :
الزمن يجري والشباب مشغولون بفاطنة فما العمل ؟؟ كيف يتخلص منها ، تفاكرن
وتدبرن ووصلن لفكرة تريجهن من فاطنة وما تسببه لهن من بوار ، في الصباح
الباكر تجمعت الفتيات وذهبن لفاطنة وطلبن منها الذهاب معهن الي بساتين
النحيل لجمع البلح فرحت فاطنة ورأت في ذلك فرصة طيبة للخروج مع البنات
للمرح والتسلية ، سئمت الحبس بين جدران الدار لكنها كانت تعلم ان السماح
لها بالخروج ليس بالسهل لذا طلبت من البنات ان يكلمن والدها في ذلك الوقت ،
قابلت البنات والد فاطنة فاعتزر لهن واخبرهن بأن الشورى في ذلك عند
والدتها التي اعتزرت بدورها قائلة ان كل ما يخص فاطنة لا يتم الا بمشورة
حبوبتها ، رفضت الحبوبة رفضا باتا ان تسمح لفاطنة بالخروج لم تيأس البنات ،
وم يقتنعن برد الحبوبة الحاسم بل كررن طلبهن والححن في ذلك ، مؤكدات
للحبوبة حرصهن على سلامة فاطنة ، فكرت الحبوبة في طريقة لتثنيهن عن طلبهن
وذلك بإعطائهن واجبا صعبا فقالت لهن (علشان اخلي فاطنة تمشي معاكن اشتت
ليكن رحل سمسم ورحل دخن في ساحة الحوش وتلمنوا لي حبة حبة لو نقصت حبة
واحدة فاطنة ما حتمشي معاكن ) ، قبلن البنات هذا الشرط التعجيزي ، نشر
الخدم حمولة بعير من السمسم والدخن في ساحة حوش الدار الواسعة ، اخذت
البنات يجمعن الحبوب بصبر شديد ، اثناء هذا العمل المضني حضر ديك والتقط
بعض الحبوب فطاردته البنات وقبضن عليه وذبحنه واخرجن الحبوب من جوفه ، هكذا
حتى جمعن كل الحب ، ولم يكن في وسع حبوبتا الا ان تسمح لها بالذهاب معهن ،
خرجت فاطنة مع البنات الي البساتين وهي في غاية السعادة لانها لم تخرج
لتلعب مع صديقاتها منذ وقت طويل ، عندما وصلن البنات لمكان جمع البلح ، كان
لابد من طلوع احداهن على النخلة لقطع سبائط البلح ، زورت البنات القرعة
لتقع المهمة على فاطنة ، طلعت فاطنة أعلى النخلة ، وأخذت ترمي لهن بسبائط
البلح والبنات يلتقطن البلح من السبائط فيضعن الناضج في قفاهن والأخضر في
قفة فاطنة ثم يغطينيه بالبلح الناضج ، واقترب الغروب نزلت فاطنة واستعدت
البنات للرجوع وهنا اقتربن من الخطة التي عزمن علي تنفيذها ، وصلن البئر
فقلن لفاطنة سنلعب لعبة البير والسوار وهي ان ترمي كل منا اسورتها في البئر
ثم تخرجها والتي تخرج اسورتها اولا لها جائزة تنفق عليها ، ترددت فاطنة
فأقنعنها بأنهن يلعبن تلك اللعبة دائما عندما يصلن البئر ، وافقت فاطنة بعد
الحاح ، تظاهرت البنات برمي أساورهن في البئر ، ولكنهن رمين مجرد حجارة
فرمت اسورتها وانتظرت نهاية اللعبة تضاحكت زميلاتها وتغامزن وهن راجعات نحو
القرية دون ان يلتفتن لنداء فاطنة وبكائها واستجدائها ، ظلت فاطنة وحدها
تبكي حائرة لا تدري ما العمل ولا تريد العودة لدارها بدون اسورتها النادرة ،
بدأت الشمس في الغروب ، واذا بريح غريبة تزحف بطريقة مريبة وفي اخرها
عاصفة صفراء لها صوت مدو كأنها ريح صرصر عاتية ، قالت
الريح
مخاطبة فاطنة : (إنتي فاطنة السمحة الله ليكي من الوراي)، خلف الريح
الصفراء ظهرت ريح حمراء كلون الدم ، أشد وأعتى من الصفراء وقالت لفاطنة :
(إنتي فاطنة السمحة البنات فاتو خلوك هنا ما تخافي لاكين الله ليكي من
الوراي ) هكذا تكررت العواصف حتى وصلت العاصفة السابعة السوداء فخاطبت
فاطنة بنفس الكلام قبل ان تنتهي من حديثها ظهر الغول بجثته الضخمة وشكله
المرعب يتكاير الشرر من عينية وتهتز الارض تحت قدميه وصـــاح بصوته المخيف :
(إنتي فاطنة السمحة ما تخافي هسع اطلع ليك صيغتك من البير )ثم
ادخل راسه في البئر وشرب ماءها عن آخره واخرج الاسورة واعطاءها لفاطنة
التي فرحت ظنا منها ان مشكلتها قد انتهت فشمرته وهمت بالذهاب لدارها ، لكن
الغول فاجأها ((يلا تمشي معاي بيتي وكت نومي جا ))
، خافت فاطنة واخذت تبكي وتستجدي الغول ليتركها ترجع لأهلها ، ولكن بدون
فائدة طار بها الغول وفي غمضة عين وصل بها قصرة وسط الغابة الكثيفة التي لم
تطأها رجل بشر ، أمر خدمه ان يهتمو لفاطنة ويقوموا على راحتها ثم وضع
شعرها تحت راسه وراح في نوم عميق سيظل هكذا لمدة عام كامل ، حاولت فاطنة
عبثا الافلات وهي تبكي منادية على الخدم طالبة مساعدتهم لكنهم يعتزرون خوفا
من غضب الغول وانتقامه غابت الشمس وزحف الظلام على الناحية ولم تعد فاطنة ،
اسرعت حبوبتها لديار صديقاتها واحدة بعد الاخرى تسألهن عنها واين تركنها ؟
واي الطرق سلكت ؟ كان ردهن جميعا واحداً (وصلت معانا لغاية الحلة وبعدين كل واحدة مشت لبيتها ما بنعرف وهي بعد داك مشت وين ؟)
ظلت القرية كلها ساهرة تبحث عن فاطنة ، كلما تقدم الوقت زاد معه اليأس
وشعور بقرب الفجيعه ، ودب في قلوب الاهل حزن عميق ، هل سيتأكد الظن الذي
ساورهم جميعا ظ نعم فاطنة ضحية الغول الاخيرة ، لقد
خطفها الوحش فما العمل ؟؟ أشار الناس على إخوتها بأخذ رأي حكيمة القرية
العجوز ام كلامن بجوز ، طلبت العجوز من اخوة فاطنة السبعة ان يعودوا غدا مع
الفجر ومعهم ثور ابيض ليس على جلده بقعة واحدة يذهبون به الي الغابة حيث
يختلفون وينتظرون بين اشجار الغابة الكثيفة حتى المساء عندما يتأكدون من
نوم خدم الغول يدخلون قصره ويزبحون الثور الابيض ويرشون كل شئ في القصر
بدمه اي شئ لا يرشونه بالدم سيعمل على تنبيه الغول بأن غريبا دخل داره
وسيظل يردد ذلك حتى يصحو الغول ، نفذ الاخوة ما أمرتهم به العجوز ثم قصوا
شعر فاطنة وحملوها مسرعين بعيدا عن دار الغول ، في تسرعهم لتخليص اختهم لم
ينبهوا وهو يرشون كل شئ بالدم ان هناك حجر منقار في مكان مظلم لم يصله الدم
بعد خروجهم مباشرة اخذ الحجر يضرب على صدر الغول مردداً : (الغول اب قومتن
سنة نوارة البيت ساقوها)، واستمر يدد هذه الجملة ويضرب على صدر الغول حتى
افاقه من نومته الطويلة لما لم يجد فاطنة جن جنونه وانفع خلف رائحتها مسرعا
خارج القصر تسبقه العواصف ذات الالوان المختلفة ، حتى لحق بركب فاطنة
واخوتها ، حالما ظهرت العواصف الملونه استعد الاخوة كل شاهرا سيفه ، هجم
الغول عليهم مهددا بانه سيخلط لحمهم على عظامهم ويشرب دماءهم ، فانبري له
اولهم وبضربة
واحدة من سيفه قطع رأسه ، في غمضة عين ظهر للغول رأس
آخر وهو يقهقة ضاحكا (انتو قايلين راسي واحد)وعندها هجم الاخ الثاني وقطع
راسه وهو يصيح فيه : (انت قايل سيفنا واحد ) كما
في الحالة السابقة ظهر للغول رأس ثالث ، استمر الحال على هذا المنوال حتى
قضى ستة من الاخوة على ستة من روؤس الغول الذي ادرك انه هالك لا محالة اذا
اظهر رأسه السابع فعمد الي الحيلة وهرب وهو مصمم على العودة لاخذ فاطنة
والانتقام من اخوتها ، خرجت القرية كلها لتستقبل فاطنة ، حامدة الله على
سلامتها وسلامة اخوتها الفرسان الذين قضوا على الغول
وتهديداته ، في دار فاطنة بدأت الاستعدادت للحتفال بهذا الحدث العظيم ، كان
الغول يتابع كل ذلك عن كثب ، ويفكر في الطريقة التي يعيد بها فاطنة ويقتل
اخوانها ، فتذكر انه لا بد للاحتفالات من ولائم وذبائح فصور نفسه في شكل
ثور ضخم مكتنز اللحم والشحم يسر الناظرين ، واندس بين الثيران المعروضة
للبيع وكان أجملها بطبيعة الحال وقع عليه اختيار اهل فاطنة ، فقد كان افضل
ثور معروض للبيع اخذوه لدارهم ليبقي في الزريبة مع غيره من الحيوانات حتى
يحين موعد الاحتفال بعد ايام قليلة كان الموسم الزراعي في قمة نشاطه ،
وعادة أهل القرية الخروج للعمل في مزارعهم ، كذلك أهل فاجنة يتركونها مع
خادمتها التي تعد الطعام وتحمله لهم في المزرعة تاركة فاطنة وحدها في الدار
، رأت فاطنة رأس الثور يتحول لرأس الغول ويقترب من طاقة الدار ويناديها بصوت أجش مخيف (( فآآآطنة ....... فآآآآآآطنة))
خافت فاطنة وامتلأت رعباً وصاحت مستغيثة ، سمعت الخادمة ، التي لم تبتعد
كثيراً صوت استغاثة فاطنة ، أسرعت راجعة وهي تصيح وتنادي على الأهل الذين
يعملون في المزراع ليهبوا لحماية فاطنة ، وصل الجميع ليجدوها ترتجف

وهي تردد (ده ما تور دا الغول ) في البداية لم يصدقوها الاهل وظنوا ان
تجربتها المخيفة مع الغول جعلتها تراه في لاكل شئ ، أصرت فاطنة مؤكدة أن
الثور هو الغول بعينه ، في الليل وبعد ما نام الجميع رأت فاطنة رأت فاطنة
الثور ورأسه رأس غول ، وهو يقترب من طاقتها ويناديها : (فآآآآآطنة ....فآآآآطنة أنا الغـــــول) فصاحت خائفة فقام جميع الأهل من نومهم وتجمعوا حولها لتؤكد لهم : (دا ما تور دا الغول )
اقتنع الاهل بقصتها وذبحوا الثور وحرقوه حتى صار رماداً نثروه في الفضاء
مع الرياح ، اثناء ذبحه سقطت نقطتان من الدم بعيدا ولم ينتبه لها . إحدى
نقطتي الدم صارت خرزة جميلة ، والنقطة الاخرى صارت عرق نبته قرع نما وزحف
ليملأ أرض الحوش ليصبح أعظم نبته قرع رآها انسان ، أثمرت كميات هائلة من
القرع فأصبح في كل بيت من بيوت القرية اوان منها ، بينما كانت الخادمة تنظف
الحوش وجدت الخرزة الجميلة فأعجبت بها وحملتها لفاطنة ، التي أعجبت بها هي
الأخرى فنظمتها في قلادة من حرير وعلقتها لتتدلى من عنقها الجميل ، وفي
منتصف الليل والناس نائمون تحولت الخرزة لعين الغول وأخذت تهمس في أذن
فاطنة : (فآآآآطنة يا فآآآآآطنة أنا الغـــــول)
صاحت فاطنة بأعلى صوتها فأفاق الجميع وتجمعوا حولها لتخبرهم بما حصل أخذوا
الخرزة وطحنوها طحناً وحرقوها ودفنوا رمادها ، إطمأن الجميع بأنهم تخلصوا
نم كل شئ يذكر فاطنة بالغول ، عادت القرية لحياتها الهادئة ، وصار الاهل
يخرجون للمزارع كما كانوا يفعلون في كل موسم ، خادمة فاطنة تحمل الطعام كل
يوم ساعة الغداء تاركة فاطنة وحدها ، وحالما يغادر الجميع القرية تبدأ
اواني القرع في التجمع والخروج من كل بيت وهي ترقص وتنادي بعضها


يــا قريعات .... يــا قريعات
يــا قريعات يــا إاخيات
الفيها لبينة ..... التنكب تجي
الفيها سمينة التنكب تجي
يــا قريعات يا قريعات


وهكذا
تكرر جموع القرع هذا النداء فيجتمع القرع من كل بيوت القرية وهو يرقص في
حلقات وتشكيلات دائرية متجها نحو فاطنة لتسمع الصوت الذي لا يخفاها (يا
فآآآآآآطنة أنا الغول ) فتنتفض خائفة تجري نحو المزارع مستغيثة مستنجدة
والقرع يدور من حولها متجمعا من كل صوب ، يسمع الأهل استغاثتها فيهرعون
نحوها ليكون القرع قد عاد لأماكنه وكأن شيئاً لم يكن ، كما هو الحال دائما
لا يصدق الناس ما رأته فاطنة ، ولكن مع تكرار الحال يقرر الأهل قطع دابر
الشك ، وذلك بجمع القرع من كل البيوت القرية وحرقه عن آخره ودفن رماده ،
منذ ذلك الحين لم يسمع أحد عن الغول ، عاشت فاطنة حياة هانئة سعيدة وتزوجها
ود النميري لتصبح أماً وجدة لكثير من أهل السودان


عدل سابقا من قبل محمد عبد الله قادم في 7th يونيو 2011, 08:39 عدل 1 مرات

محمد عبد الله قادم
نشط مميز
نشط مميز


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف غريق كمبال في 5th يونيو 2011, 15:24

فاطنه السمحه 0000قصه رائعه شكرا ياول قادم

غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف محمود منصور محمد علي في 5th يونيو 2011, 15:55

الاستاذ محمد قادم
مشكور على هذه الروعة والقصة الحلوة التي ذكرتنا ماضي الطفولة
الف شكر

محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف محمد عبد الرحمن كمبال ادم في 5th يونيو 2011, 17:52

مشكور علي القصة الرائعة والجميلة...
ودمت..

محمد عبد الرحمن كمبال ادم
عضو نشط
عضو نشط


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف فيصل خليل حتيلة في 6th يونيو 2011, 10:58


شكرا محمد ول قادم

هاك قصيدة فاطمة السمحه للشاعرة الدكتورة عفاف الصادق حمدالنيل

قصة زات قيمة تراثية

كم ايام يا بت الزين

تقول هى سنين
كتيرة خلاص
تطول وتطول
واشتاق ليك وافكرفيك
يجينى دعاش سمح بلحيل
شايل لى سماح امى
وحنين امى و يطرينى
صوت امى وكت ما تصيح تنادينى
تعالى ضناى
وجيبى معاك فنجان شاى
واقعدى حداى
تحكينى وتهبش لىّ فى شعرى
وتجر التوب تغطينى
احس بالنسمة هابة على
لامة الدنيا بين إيديا
واقول يايمة حجينى
تقول فرحانة ليك حاج بات
خيراً جانا خيراً جاك
قالوا زمان
في بتاً سمحة عاد بلحيل
عيونها جميلة
زى القمرة فوق النيل
وسبايب راسها متل السيل
طويلة عديلة بس البانة
قط ما ليها تانى مسيل
وزى ما قالوا بتاً واحدة وإيداً لاحقة
وأى انسان داير
فاطنة ليهو عروس
وعاد بى وين ؟
وفاطنة ابوها ما بديها راجلاً شين
وفاطنة اماتا بيضاروها فى العينين
وكان لى فاطنة عم محمول
بسبع بنات
فات فوات عليهن وحول
قالن مرة كان دى الحالة
ما بنرتاح
ما دام ما فاطنة ماسكة الدنيا
ليل وصباح
شبت واحدة
لازم فاطنة بس تنزاح











فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف محمد عبد الله قادم في 7th يونيو 2011, 08:50

شكرا على المرور يا عم غريق وعم محمود والابن محمد وجد يا استاذ فيصل قصيدة جميلة تزكرنا بحكاوي الحبوبات والزمن الجميل وكت نتلمى تحت ضو القمرة ونلعب شليل وينو شليل وين راح
يا حليل الزمن الجميل لما نرجع من حجا الحبوبات ونلقى الحبوبة معلقة لينا في المشلعيب (كِِِِِويريّة ام قعر) مليانة لبن ومعاهو (بوسيب) اكيد البوسيب دا مافيش زول عارفو

محمد عبد الله قادم
نشط مميز
نشط مميز


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف سومه العمدة في 7th يونيو 2011, 09:06

استمتعتا حقيقي بقصة فاطنة السمحة
تسلم ياود قادم

سومه العمدة
نشط مميز
نشط مميز


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف محمد عبد الله قادم في 7th يونيو 2011, 10:14

تشكري على المرور يا بت العمدة

محمد عبد الله قادم
نشط مميز
نشط مميز


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف خالد عثمان في 7th يونيو 2011, 12:25

شكراً يا ول قادم على القصة الرائعة السمحة..
وعلى طلعتك السمحة..

خالد عثمان
نشط مميز
نشط مميز


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف محمد عبد الله قادم في 7th يونيو 2011, 13:35

شكراً أخي خالد علي مرورك البهي ؛؛؛؛؛؛ تشجيعكم ومروركم هو الذي يدفعنا للأمام
تحياتي؛؛؛؛؛؛؛؛؛؛؛؛؛؛؛؛؛؛؛؛؛

محمد عبد الله قادم
نشط مميز
نشط مميز


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف عثمان محمد يعقوب شاويش في 8th يونيو 2011, 10:32


يا ود قادم صدقني أنا خفت من القووول ...فما بال فاطنة البنت الطيبة الحلوة الكريمة !!!؟...بالجد قصة جميلة جداً ...ولأول مره أكملها ...وصدقني مثل هذه القصة كانت من أجمل أفلام الزمن الجميل ...شكراً أخي قادم ...ولك محبتي

عثمان محمد يعقوب شاويش
مشرف منتدى شخصيات من ابى جبيهه
مشرف منتدى شخصيات من ابى جبيهه


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف محمد عبد الله قادم في 8th يونيو 2011, 13:22

تكرم يا شاويش بس يا سيدي ما تخاف من القول لانو بنوم سنة ويصحو سنة . انت بس اعمل حسابك ما تصادفو صاحي


عدل سابقا من قبل محمد عبد الله قادم في 9th يونيو 2011, 10:52 عدل 1 مرات

محمد عبد الله قادم
نشط مميز
نشط مميز


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف عثمان محمد يعقوب شاويش في 9th يونيو 2011, 07:57


ههههههههههههههههههههههههه
تسلم .... ولك محبتي

عثمان محمد يعقوب شاويش
مشرف منتدى شخصيات من ابى جبيهه
مشرف منتدى شخصيات من ابى جبيهه


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف Suhad Abduelgfaar في 23rd أكتوبر 2012, 12:21

اخونا محمد قادم فاطمة السمحة منتظراك
ارجع لينا
وكل عام وانتم بالف خير

تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف الشاذلي محمد عبدالله ادم في 22nd فبراير 2013, 17:59

محمد عبدالله قادم

اسم في الخاطر اين انت ايها الصديق ؟

تحياتي

الشاذلي محمد عبدالله ادم
نشط مميز
نشط مميز


الرجوع الى أعلى الصفحة اذهب الى الأسفل

رد: قصـــــــــــــــــــــة فاطــــــــــنة السمحــــــــــــة

مُساهمة من طرف الحازمي في 12th أبريل 2013, 20:39

فاطمة السمحة ..!!!



فاطمة السمحة ..!!!

حجيتكم مابجيتكم,,خيرا جانا وجاكم,,قالوا: ابدأ ليكم بالقصة المعروفة قصة فاطمة السمحة ..!!!

فاطنة القصب الاحمر كانت أسمح بت في الحلة,عشان كده سموها فاطنة السمحة واي ولد في الحلة كان بيحلم يعرسا. يوم فاطنة مشت البحر ودخلت تعوم ورجعت البيت,, بعد داك جاء ولد عمها محمد يسقي الحمار حقو ,, وفجأ كده واثناء الحمار بيشرب بقى يهنق شديد ورقد في بطن الواطة زي كانو حاجة وقفت ليهو في حلقو,, محمد حاول يشوف الحصل علي الحمار لقى سبيبة شعر في حلق الحمار,,السبية كانت طويلة طول شديد محمد حلف يمين الا يعرس صاحبتا.
اها بعد كده اي بت في الحلة قاسو شعرها بالسيبة وكلو كلو ما لقوها,,في النهاية قالو يمكن تكون حقت فاطنة,,فعلا قاسوها طلعت من شعرها,,محمد قال الا يعرسا,,الجماعة قالو ليهو ماممكن لانو كان صغير شديد,,وهي كانت أكبر منو بي خمسة سنين,, ابا كلو كلو يتنازل عن قرارو.
يوم العرس لبسو فاطنة داك يا التوب وملوها بالدهب,,كانت جميلة جمال شديد,,طبعا فاطنة كانت رافضة العرس قامت واثناء الناس مشغولة شردت من البيت وجرت على الغابة,
بقت ماشة بين الشجر زمن طويل شديد,,فجأة لقت راجل عجوز مشت عليهو,,بعد سلمت عليهو قالت ليهو عمي اذا عايز تتطلع جلد عجوز تعمل ليهو شنو؟ قال ليها كان طقيتي عجوز بي شوكة في نص رأسو جلدو بيطلع,, فاطنة بسرعة شالت شوكة وطقتو في رأسو وطلعت جلدو لبستو,, بقت متنكرة في صورة العجوز.
بعد كده بقت ماشة وماشة وماشة لحدي وصلت ليها قصر كبير,,دخلت القصر وقالت عايزة تقابل الامير,,,اهاا قالت لي الامير عايزة تشتغل عندو,, الامير قال لي: بتعرف تزرع؟,, العجوز قال لي: ما فيني قدرة على الزراعة,,الامير قال لي: بترعى الغنم ؟ العجوز قال لي: بيجرن بعيد مابقدر ألحقن,, الامير قال لي: طيب بتعرف تعمل شنو؟ العجوز قال لي بعرف ارعي الوزين (يعني طيور الوز),, الامير قال ليهو خلاص كويس تاني كل يوم من الصباح تمشي البحر ومعاك واحد من الخدم ترعوا الوز وترجعوا مع الغروب.
اليوم التاني من الصباح طلع العجوز ومعاهو خادم إبيكم(يعني ابكم),,لمن وصلو البحر العجوز طلع الجلد وظهرت فاطنة وكمان طلعت الدهب اللابساهو وختتو مع الجلد,, وطبعا الخادم مخلوع شديد لكن مابيقدر يتكلم,,اهاا فاطنة دخلت البحر مع الوز وبقت تغني.......
شن بدور يا إبيكم..
كورعين حمام يا إبيكم..
ريش النعام يا إبيكم..
شعرا طويل يا إبيكم..
متل الحرير يا إبيكم..
واستمرت تغني كده والوز يرقص معاها لحدي الغروب,,طلعت ولبست الدهب والجلد,,والوز بيّض بيض كتير شديد,, لمن رجعوا القصر الخادم حاول يقول للامير شئ بقى يقوم ليهو اممم ام اممممم ويأشر,,والامير ماقدر يفهمو قام سأل العجور,,العجوز قال لي: بيقول ليك عيان كوكوني بالنار مشو كوهو بالنار.
برضو اليوم التاني مشى معاها خادم تاني,, برضو بيكم وحصل نفس الشئ,,الامير لمن سأل العجوز قال ليهو بيقول ليك يدي واجعاني اقطعوها لي,, وقطعو للخادم يدو,, بعد كم يوم الامير شك انو في شئ بيحصل في البحر.
اليوم البعدو الامير مشى قبل العجوز والخادم وطلع في شجرة جنب البحر,,لمن وصل الخادم والعجوز حصل نفس شئ طلعت الجلد والدهب ودخلت تعوم مع الوزين,,الامير اندهش شديد,, قام براحة بدون مايحس الخادم مد عصاية وشال خاتم من ختم فاطنة. لمن خلاص وقت الغروب جاء فاطنة طلعت تلبس الدهب والجلد لقت في خاتم ناقص,, قامت تتشاكل مع الخادم "تسرقني أنااا؟؟,,,شكيتك على الله,,اااا,,طلع الخاتم" وضربتو ضرب شديد,,الامير لمن شاف الحاصل رجع الخاتم براحة,, هي شافت الخاتم شالتو ولبست الجلد ورجعت مع الخادم القصر.
اليوم البعدو الامير نادى العجوز قال ليهو عمي العجوز رأيك شنو تلعب معاي سيجة (لعبة زى الشطرنج )لكن البيفوز يطلع جلد التاني,,لعبو أول مرة فاز العجوز,,الامير قال ليهو: أعفيني,, العجوز عفى ليهو,, لعبو للمرة التانية وبرضو العجوز كسب,,الامير قال ليهو: اعفيني,,العجوز برضو عفى,, تالت مرة كسب الامير,,العجوز قال ليهو: اعفيني,,الامير ابا يعفي ليهو,, وشق جلدو وظهرت فاطنة السمحة.
بعد داك حكت لي الامير قصتها مع اهلها,,والامير رجعها قريتها وطلبها واهلها ووافقوا,,واتزوجوا وعاشو في تبات ونبات وخلفوا صبيان وبنات.
المصدر: منتديات سودان كام - من قسم: قسم التاريخ والتراث السوداني

الحازمي
نشط مميز
نشط مميز


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى