ابوجبيهه

النسخة السودانية!!

استعرض الموضوع السابق استعرض الموضوع التالي اذهب الى الأسفل

النسخة السودانية!!

مُساهمة من طرف nashi في 13th يونيو 2011, 16:02

ساخر سبيل

النسخة السودانية


الفاتح جبرا

أرادت جوزفين أن تفاجئ زوجها (جون) فقامت بترتيب المنزل ورشت هلي جنباته عطراً ذورائحة جميلة .. غيرت من تسريحة شعرها وأردت أجمل ما عندها .. عندما دق حرس الباب فتحت لجون الباب فإستقبلها قائلا :

-ما هذا الجمال يا حبيبتى .. كم إنتى رائعة اليوم



النسخة السودانية :

أرادت سعاد أن تفاجئ عوض .. غيرت من تسريحة شعرها التى لم تغيرها منذ أن تزوجا قبل عشرة سنوات .. إرتدت فستاناً زاهياًً .. غيرت كل الملايات في البيت بأخري جديدة .. وضعت على المبخرة عروق من الصندل .. ما أن دق باب الشارع حتى هرعت تفتح الباب لعوض الذى نظر إليها وكأنه يراها لأول مرة قائلاً :

- إنتى جنيتى وللا شنو؟ شنو العاملاهو في روحك ده ؟

*************

بينما كان جون وجوزفين يسيران على شاطئ البحر إصطدمت رجل جوزفين بإحدى الحجارة فتأوهت من الألم .. خاطبها جون فى رفق وحنية :

- هل هي مؤلمة الضربة .. دعينى أعمل لها مساجاً



النسخة السودانية :

بينما كان عوض وسعاد يسيران بشارع الدكاترة .. أصدمت رجل سعاد بأحدى علب البارد الفارغة وقبل أن تتأوه سعاد من الألم خاطبها عوض قائلاً :

- عميانة؟ ما بتشوفى؟ ما تعاينى قدامك

*************

فى عيد زواجهما قالت جوزفين لجون تعاتبه :

- أنسيت أن اليوم عيد ميلاد زواجنا يا حبيبي

أخرج لها جون من حافظته تذكرتان لتناول العشاء في أحد المطاعم الفاخرة وهو يخاطبها :

- كيف انسى يا حبيبتى يوما جمعنى بك .. سوف نتناول طعام العشاء على ضوء الشموع

النسخة السودانية :

في عيد زواجهما قالت سعاد لعوض وهى تعاتبه :

- نسيت يا عوض إنو الليلة عيد زواجنا ؟

أخرج لها عوض من جيب الجلابية ورقة (الجمرة) وهو يخاطبها قائلاً :

- هو الواحد يشتري ليكم الجمرة وللا يتذكر ليكم الحاجات الهايفة دى؟

*************

وهما عائدان من الطبيب بعد ان أثبتت الفحوصات أن جوزفين مصابه بمرض إرتفاع السكر خاطبها جون مخففاً :

- لقد أخطأ السكر العنوان يا حبيبتى فأنتى أحلى من أن تصابين به فأنتى عسل يا حبيبتى

النسخة السودانية :

وهما عائدان من الطبيب بعد ان أثبتت الفحوصات أن سعاد مصابه بمرض (السكر) خاطبها عوض قائلاً ً :

- الما بجيب لك السكري شنو؟ اليوم كلو تضربى فى الباسطات والحلويات

*************

أرادت جوزفين أن تحضر أحد الأغراض من مخزن المنزل فباغتها فأراً يتجول .. هرعت خائفة نحو جون وهى تصيح مذعورة ، إحتضنها فى رفق قائلاً :

- لا تخافي يا حبيبتى الفئران غير مؤذية .. دعينى أذهب بدلا عنك لأحضر لك أغراضك

النسخة السودانية :

أرادت سعاد أن تحضر أحد الأغراض من مخزن المنزل فباغتها فأراً يتجول .. هرعت خائفة نحو عوض وهى تصيح مذعورة

- الفار يا عوض .. الفار يا عوض

أشاح عوض بالصحيفة التى كان يقرأ فيها جانباً وهو يخاطبها :

- مخلوعه كده مالك؟ هو أصلو فار وللا أسد ؟ وإنتى ذاااتو الوداكى تمشى تكابسى هناك شنو؟

*************

قالت جوزفين تخاطب جون وهى تشير إلى أحدى البلوزات وهما يتجولان في أحد المحلات :

- ما رائك يا حبيبي فى هذه البلوزة المحذقة ؟

خاطبها جون وعينيه تشع فرحاً :

- سوف تمون مذهلة عليك يا حبيبتى

النسخة السودانية :

قالت سعاد تخاطب عوض وهى تشير إلى أحد البلوزات وهما يتجولان في (سعد قشرة) :

- رائك شنو يا عوض فى البلوزة المحذقة دى ؟

رد عليها عوض :

- و (كرشك) دى توديها وين؟

*************

جاءت جوزفين وهى منهارة وإرتمت على أول كرسي إنزعج جون وسألها مستفسراً عما حدث أخبرته بأنها قد نجت بأعجوبه بعد أن كادت تسبب فى حادث مرورى وهى تقود سيارتها الجديدة ، قال لها جون بعد أن أحضر لها كوبا من العصير البارد :

- أحتسى هذا العصير يا حبيبتى .. غداً نذهب إلى مدرسة قيادة السيارات لتتمرنى أكثر على القيادة .. إطمئنى سوف تتحسن قيادتك كثيراً

النسخة السودانية :

جاءت سعاد وهى منهارة تماًما وجلست فى طرف السرير نظر إليها عوض فى إندهاش وهو يقول لها :

- مالك؟ الحاصل شنو؟

أخبرته بأنها طلعت من الموت بأعجوبه بعد أن كادت تدخل فى أحدى الحافلات ، قاطعها عوض قبل أن تكمل حديثها :

- ما قلنا ليك سواقتك التعبانة دى يوم بتجيب خبرك !ّ!

كسرة :

- (وهى تطلب منه شراء فستان لإحدى المناسبات) : أفتحي محفظة النقود وخذى ما شئتى ياحبيبتى ويا حبذا لو إشتريتى له حذاءاَ بنفس اللون حتى تكونى أجمل إمرأة في الحفل

- (عوض) : الشهر الفات ده ما إشتريتى ليكى فستان ؟ إنتى قايلانى كاسر ليا بنك وللا القروش دى قاعد أطبعا ؟

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف Suhad Abduelgfaar في 13th يونيو 2011, 16:07

**الرحمه يا ادم **
ضحكتينى اخيتى الدكتوره ربنا يديك العافيه
وتسلمى ويسلم كاتبنا الساخر
ويسلم
جون زاتو ياخى
تحياتى

Suhad Abduelgfaar
مشرف حكاوي المهجر
مشرف حكاوي المهجر


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف اقبال عبداللطيف في 13th يونيو 2011, 18:06

والله ضحكتيني يادكتورة..الله ماحرمنا منكم ومن الضحك..ناس يقولوا بقوي عضلات القلب وناس يقولوا بكتل القلب والاتنين ماكعبات مع وجع القلب دا...يطول في عمرك


لا اعرف شيئا تواطأ الناس على هضمه وزهدوا في انصافه مثل الحقيقة

اقبال عبداللطيف
مشرف ركن الاسرة
مشرف ركن  الاسرة


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف صباح حسن عبد الرحيم في 13th يونيو 2011, 18:22

ههههههههههههههها
والله عالم يحير ......
والله ضحكتوني
ويا اقبال يا اختي
قلتي لي وجع القلب
يديكن العافية

صباح حسن عبد الرحيم
مبدع مميز
مبدع مميز


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف محمود منصور محمد علي في 13th يونيو 2011, 18:46

الدكتورة احسان
الف تحية لك وللاسرة
معليش.. هذه سخرية واستخفاف وانتقاص صريح من الباش كاتب الفاتح جبرا لشخصية الرجل السوداني النبيل الاصيل ( اخو البنات ,,وعشاء البايتات ,,ودخري الحوبات,, ومدرج العاطلات ,,وسند الضعيفات,,والبستر الكاشفات,,ومرشد التايهات,, وما الى ذلك من اوصاف ونعوت اطلقتها المراة السودانية الاصيلة على ابنها وزوجها ووالدها واخوها وابناء قبيلتها وهذه النعوت لم تاتي من فراغ..
واذا كان هو من هذه الاصناف والتي تعتبر قليلة في المجتمعات السودانية كان عليه الا يعمم تجربته الرجعية على الجميع..
الرجل السوداني من اكثر الرجال احتراما للمراة وحفاظا عليها والتسابق لحمايتها ومعاملتها بارق ما تتطلبه دواعي الرقة والحنية والمعاملة الحسنة والكريمة التي اوصانا بها الرسول صلى الله عليه وسلم في اكثر من حديث..
خلاصة القول فان السيد الفاتح جبرة رغم احترامنا وتقديرنا لشخصيته الصحفية المتفردة الا انه لم يوفق اطلاقا في كتابته لهذا الموضوع..
الف تحية

محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف أزهرى الحاج البشير في 13th يونيو 2011, 19:19

والله يا محمود أنت رجل تتجمل .. لكن والله جنس عوض عندنا بالكوم ... كديه أطلع شوية على شندي وأهلنا ناس المتمة كان ما تطلع ليك بمليون عوض .... ما تتعقدوا يا بنيات نحن مشينا بلاد العم سام عشان ناخد نقله من صاحبنا جون الكضاب

أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف ود عشمان في 13th يونيو 2011, 19:46


الدكتوره ..

ههههههههههههههههههه هههههههههههههههههه

قربته افطس من الضحك ..

لك التقدير

ود عشمان
مشرف تعريف المنتدى
مشرف تعريف المنتدى


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف الفاتح محمد التوم في 14th يونيو 2011, 00:14

هويا عوض !!! أقصد محمود ... و الله العظيم الزول ده موفق جداً ... يا أخي أحمدوا ربكم إنو قاعد يكتب ليكم مجـــاناً ...!!!!

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف سومه العمدة في 14th يونيو 2011, 08:44

هاهاهاهاهاهاهاها
والله الضحك شرطنا يا دكتورة
تســـــــــــــــــلمي يارب
***
وياعــــــــــــم محمود الحقيقة دي ماحــــــــــــــــــــارة قالوا كدة
زي عوض دة موجود بلكوم والردوم هنا ودي حقيقية
والحالة النادرة ياهو حال جون دا
يمكن مقابل 1000 يكون 1ولا2
ولا خلاص عشان ماتزعل مقايل 100 يكون 1 رايك شنو
مع خالص الاحترام

سومه العمدة
نشط مميز
نشط مميز


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف محمود منصور محمد علي في 14th يونيو 2011, 10:34

الاستاذ الفاتح التوم
الاستاذة سومة العمدة
هذا البوست لا يخصني يا جماعة عاوزين تجرجروني معاكم ليه ؟؟ وبعدين تورطوني مع الدكتورة وتهربو.
الفاتح وسومة انا لا انكر بان ظاهرة هذا العوض منتشرة لكن ليست بهذه الصورة المخيفة فهناك الكثير من الظواهر الموجبة التي تستدعي الوقوف عندها والاشاده بها.. لا يمكن لهذا العوض ان يكون بهذا المنتهى من اللؤم وهذا الدرك من الضحالة والجهل.

محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف الفاتح محمد التوم في 14th يونيو 2011, 10:48

إنها ليست ضحالة حبيبي محمود ..... ولكنها (حماقة الرجل السوداني ... ).....
" عايزها دايماً صاغ سليم "....!!!! معقولة

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف محمود منصور محمد علي في 14th يونيو 2011, 13:02

الابن الفاتح التوم
لكل داء دواء يستطب به الا الحماقة اعيت من يداويها
ان المكارم اخلاق مطهرة فالعقل اولها والدين ثانيها
طيب يا الفاتح: دافعنا عن المراة السودانية وعن حقوقها المهضومة والمسلوبة والمنزوعة والمسروقة اقمتم علينا المنتدى ولم تقعدوه انت والبلطجي فيصل خليل.. دافعنا عن الرجل السوداني المفترى عليه ظلما وزورا ويهتانا برضو ما عاجبكم.. خلاص خلونا نمشي ندافع عن الاطفال وما يتعرضوا له من عنف اسري وما يلاقونه من تحرش من ذوي النفوس الضعيفة المريضة.. والاطفال فاقدي السند.. وذوي الاحتياجات الخاصة.. واطفال الشوارع.. خاصة وانه قدمرت الذكرى السنوية ليوم الطفل,,
الف شكر... سكتنا عن المطلب الدستوري المتعلق بالصورة,,
الف تحية

محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف الجبالي في 14th يونيو 2011, 14:53

تحملي مسئولية هدا البوست عن جون وعوض القطع قلوبن بالضحك هههههههههههههههههههههههههههههههههههههههههاي كعكعكعكعكعكعكعكعكعكعكعكعا انا الا اعمل ليه قرقره بالمحلج حتي اقدر انوم
والبجد امثال عوض بالكوم وليس انتقاص من حق الرجل السوداني
مثل عوضونا ده كثير
النساء
وما اكرمهن الا كريم وما اهانهن الا لئيم
الله يديكي العافيه يادكتوره
يلا اكتبي لي علاج وجع الحلق
احترامي وتقديره

الجبالي
نشط مميز
نشط مميز


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف nashi في 14th يونيو 2011, 15:17

الاخوات سهاد- افبال - صباح
الله يديم السعاده
وعوض يبفي زي جون
ههههههههههههههه

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف nashi في 14th يونيو 2011, 15:25

محمود منصور محمد علي كتب: الدكتورة احسان
الف تحية لك وللاسرة
معليش.. هذه سخرية واستخفاف وانتقاص صريح من الباش كاتب الفاتح جبرا لشخصية الرجل السوداني النبيل الاصيل ( اخو البنات ,,وعشاء البايتات ,,ودخري الحوبات,, ومدرج العاطلات ,,وسند الضعيفات,,والبستر الكاشفات,,ومرشد التايهات,, وما الى ذلك من اوصاف ونعوت اطلقتها المراة السودانية الاصيلة على ابنها وزوجها ووالدها واخوها وابناء قبيلتها وهذه النعوت لم تاتي من فراغ..
واذا كان هو من هذه الاصناف والتي تعتبر قليلة في المجتمعات السودانية كان عليه الا يعمم تجربته الرجعية على الجميع..
الرجل السوداني من اكثر الرجال احتراما للمراة وحفاظا عليها والتسابق لحمايتها ومعاملتها بارق ما تتطلبه دواعي الرقة والحنية والمعاملة الحسنة والكريمة التي اوصانا بها الرسول صلى الله عليه وسلم في اكثر من حديث..
خلاصة القول فان السيد الفاتح جبرة رغم احترامنا وتقديرنا لشخصيته الصحفية المتفردة الا انه لم يوفق اطلاقا في كتابته لهذا الموضوع..
الف تحية

اختلاف الرأي اخي محمود لا يفسد للود فضية
وثورتك ضد من تعتفد انه انتفص من الرجل السوداني تثبت الكثير الكثير
ومعليش نعتذر اذا اعتفدت ان في الامر اهانه او تفليل من شأن الرجل السوداني
بالجد اوردت المفال من باب ادخال الفرح في فلوب اعضاء المنتدي
وارجو ان تعفر خطأنا هذا ان سبب لك اي نوع من الاذي
ولك العتبي حتي ترضي
احسان

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف nashi في 14th يونيو 2011, 15:29

سومه العمدة كتب:
هاهاهاهاهاهاهاها
والله الضحك شرطنا يا دكتورة
تســـــــــــــــــلمي يارب


الله يسلمك يا سومه من كل شر يا رب
تحياتي

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف nashi في 14th يونيو 2011, 15:36

عمو ابوالزهور
الاخ ودعشمان
الاخ الفاتح
شكرا لمروركم

ويا ريت عوض اتير حبه كده
ههههههههههههههه

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف nashi في 14th يونيو 2011, 15:42

الجبالي كتب:تحملي مسئولية هدا البوست عن جون وعوض القطع قلوبن بالضحك هههههههههههههههههههههههههههههههههههههههههاي كعكعكعكعكعكعكعكعكعكعكعكعا انا الا اعمل ليه قرقره بالمحلج حتي اقدر انوم
والبجد امثال عوض بالكوم وليس انتقاص من حق الرجل السوداني
مثل عوضونا ده كثير
النساء
وما اكرمهن الا كريم وما اهانهن الا لئيم
الله يديكي العافيه يادكتوره
يلا اكتبي لي علاج وجع الحلق
احترامي وتقديره


وفت الحارة الزول بلفي اخوه يا جبالي
ههههههههههههههههه
اللهم امين جمعا
والف لا بأس عليك وسلامتك اخوي من وجع الحلف
اشتعل مضمضة بالملح بوية دافية ساكت
الا اخيتك ما طبيبه
ما يفوم الملح يضرك كمان ندخل في مشكلة مع الاطباء
ونحولك لدكتور مرتضي فهو طبيب
وربنا يتم عليك العافية

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف محمود منصور محمد علي في 14th يونيو 2011, 15:57

يا دكتورة
اقسم بالله اني لم ازعل منك يا دكتورة
وانا لا امثل فريق الدفاع عن كرامة الرجل وقوامته
انا اقصد فقط كاتب الموضوع الفاتح جبرا و ماعندك اي ذنب
وانا اردت من خلال مداخلتي ان اثير حماسة الباقين واشحذ من هممهم فقط ليتداخلوا معنا ويصبح البوست حلقة نقاش محتدم,,
الف تحية

محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف nashi في 14th يونيو 2011, 16:03

محمود منصور محمد علي كتب: يا دكتورة
اقسم بالله اني لم ازعل منك يا دكتورة
وانا لا امثل فريق الدفاع عن كرامة الرجل وقوامته
انا اقصد فقط كاتب الموضوع الفاتح جبرا و ماعندك اي ذنب
وانا اردت من خلال مداخلتي ان اثير حماسة الباقين واشحذ من هممهم فقط ليتداخلوا معنا ويصبح البوست حلقة نقاش محتدم,,
الف تحية


الله يريحك في الدارين اخوي
الحمدلله رب العالمين انك ما زعلان مننا
وكتر الف خيرك

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف اقبال عبداللطيف في 14th يونيو 2011, 17:14

ياجماعة انا زاتي زعلانة لمحمود دايما ناطين لي في حلقومي..صحي ناس عوض ديل راقدين زي الهم في القلب..بس مافي داعي عوض جبرا دا يبشع بيكم ..تقرقروا ساكت قلتو لي عوض جبرا دخل الحوش..يزيدك زايدا من الله الدكتورة


لا اعرف شيئا تواطأ الناس على هضمه وزهدوا في انصافه مثل الحقيقة

اقبال عبداللطيف
مشرف ركن الاسرة
مشرف ركن  الاسرة


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف محمود منصور محمد علي في 14th يونيو 2011, 17:25

الجبالي الله يعطيك العافية ويديم عليك نعمة الضحك والفرفشة
والله انت زاتك ضحكتنا هههههههه عرفنا معناها,,, طيب كعكعكعكع دي معناها شنو؟؟؟
الف تحية يا جبالي يا مثالي,,

محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف محمود منصور محمد علي في 14th يونيو 2011, 17:33

الف شكر يا استاذة اقبال وام اواب جون سينا
وانتي دائما صاحبة مواقف وحقانية ,, والفاتح جبرا ده راجل ماعندو فكرة وماعندو موضوع وعاوز يكتب اي حاجة المهم عندو ان يملا الصفحة ويبيع الجريدة !!!انت يا اقبال ماسمعتي بالمثل البقول ( كلام جرائد ساي)
الف تحية

محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف ناهد عبيد في 15th يونيو 2011, 23:51

وهما عائدان من الطبيب بعد ان أثبتت الفحوصات أن سعاد مصابه بمرض (السكر) خاطبها عوض قائلاً ً :

- الما بجيب لك السكري شنو؟ اليوم كلو تضربى فى الباسطات والحلويات



عليكم الله حسع الزول يبكى ولا يضحك (عوضنا الله العوض النافع )

احسان اذيك والله يجازى محنك بحتى بحتى جبتى لينا شتن حااااااصل بلحيل علا خشمى قادره عليه والله شكرا ليك وللفاتح جبرا

ناهد عبيد
مبدع مميز
مبدع مميز


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف nashi في 16th يونيو 2011, 02:33

ناهد عبيد كتب:وهما عائدان من الطبيب بعد ان أثبتت الفحوصات أن سعاد مصابه بمرض (السكر) خاطبها عوض قائلاً ً :

- الما بجيب لك السكري شنو؟ اليوم كلو تضربى فى الباسطات والحلويات



عليكم الله حسع الزول يبكى ولا يضحك (عوضنا الله العوض النافع )

احسان اذيك والله يجازى محنك بحتى بحتى جبتى لينا شتن حااااااصل بلحيل علا خشمى قادره عليه والله شكرا ليك وللفاتح جبرا

الله يسلمك ناهد
كيفك عساك بخير
اضحكي يمة اضحكي تضحك الدنيا علي فول ابوعركي البخيت
cheers

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف الجبالي في 16th يونيو 2011, 08:08

الاخ ود منصور بجد الموضوع شيق والمداخله رائعه من الاخوان اتمني ان يصلوا الاخوان لنتيجة والتعامل المثالي لزوجاتهم
كعكعكعكعكعكعكعكع دي ضحكه من نوع اخر منتهي الفرحه والظرافه بالموضوع
الله يخليكم لينا جميعاً
لكم احترامي

الجبالي
نشط مميز
نشط مميز


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف محمود منصور محمد علي في 16th يونيو 2011, 09:06

الاستاذ الجبالي
اقول ليك حاجة... انا زاتي كعكعكعكعكعكعكع وتاني كعكعكعكعكعكع
المهم الله يكون في عون المراة السودانية المسكينة المستضعفة على هذا العوض اذا كان فعلا هذا هو اسلوب التعامل مع حواء السودان المغلوب على امرها... الف تحية

محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف فيصل خليل حتيلة في 16th يونيو 2011, 10:41


السلام عليكم

يا جماعة مالكم جايطين ؟

هههههههههههههههههههههههههههههههههههها

الزول دا كلامو صاح بس الزول دا منو؟

الاجابة عند شهاب هههههههههههههههههههههههههههههها

هههههههههههههههههههههههههههههههههههههههههههها

الفاتح جبرا خطير جدا

تحياتى

فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف حسن قادم نوية نواي في 16th يونيو 2011, 14:57

الرجل السودانى يتعامل مع المراءة بجديه وحسم شفاهة" لكنه يحمل لها فى دواخله كل العطف والحنان دون ان يظهره لها امام الناس لانه يري فى ذلك تقليل من شهامته حسب تقاليدنا ..مثلا"..لو تجولت مع زوجتك وانت ممسكا بيدها فى شارع من الشوارع بيقولوا (شيف الرويجل الهوين دا تابع مريته كيف ..بى بقول اهلنا ) صحيح هنالك بعض المفاهيم الخاطئه يجب ان تصحح
على عكس جون فهو منذ الصغر لديه ما يعرف بال

Girl friend
ودا عندنا مرفوض تماما كمسلمين
حتى لو حاولت تقول لى حواء السودانيه الكلام الرومانسى دا احتمال ما تصدقك لانو غير مألوف لدى االكثيرات منهن
تخريمه
الاخوة المتزوجين ....حواء تريد تغيير النظام ...اعملوا حسابكم وجهزوا كلامكم

حسن قادم نوية نواي
نشط ثلاثة نجوم
نشط ثلاثة نجوم


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف nashi في 16th يونيو 2011, 15:13

حسن قادم نوية نواي كتب:الرجل السودانى يتعامل مع المراءة بجديه وحسم شفاهة" لكنه يحمل لها فى دواخله كل العطف والحنان دون ان يظهره لها امام الناس لانه يري فى ذلك تقليل من شهامته حسب تقاليدنا ..مثلا"..لو تجولت مع زوجتك وانت ممسكا بيدها فى شارع من الشوارع بيقولوا (شيف الرويجل الهوين دا تابع مريته كيف ..بى بقول اهلنا ) صحيح هنالك بعض المفاهيم الخاطئه يجب ان تصحح
على عكس جون فهو منذ الصغر لديه ما يعرف بال

Girl friend
ودا عندنا مرفوض تماما كمسلمين
حتى لو حاولت تقول لى حواء السودانيه الكلام الرومانسى دا احتمال ما تصدقك لانو غير مألوف لدى االكثيرات منهن
تخريمه
الاخوة المتزوجين ....حواء تريد تغيير النظام ...اعملوا حسابكم وجهزوا كلامكم

عودة فوية للاخ|حسن فادم نوية

مرحب بالعوده وحواء لوعيرت النظام معاها حف ولا شنو
ههههههههههههههههه

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف salih jabal ellogma في 16th يونيو 2011, 17:36

هههههههههههههههههههههههه هههههههههههههههاي
وما زلنا نتسآل لماذا العزوف عن المسلسلات المصرية ونظيراتها العربية,,,,, والتوجه الى مهنـــد ونور؟
فنان قال: لو قايله ريدتنا زي مهند ونور تبقي عيانة ودايرة ليك دكتور.
اكيد الفنان سوداني واحتمال يكون اسمو عوص.كاااااااااااااك هههههههههههههه

salih jabal ellogma
نشط مميز
نشط مميز


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف اقبال عبداللطيف في 17th فبراير 2012, 11:34

يادكتورة من الخرطوم سلام

ماشفت عوض يا ساري الليل؟


لا اعرف شيئا تواطأ الناس على هضمه وزهدوا في انصافه مثل الحقيقة

اقبال عبداللطيف
مشرف ركن الاسرة
مشرف ركن  الاسرة


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف nashi في 17th فبراير 2012, 11:56

ياااا سلااااااااااااام يا إقبال احيتي بوست لذيذ
والله عوض قااااعد زي الهم في القلب Very Happy الا جون ما ظهر هههههههههه
كيفك يمه مع الوليدات عساكم طيبين


عدل سابقا من قبل nashi في 17th فبراير 2012, 12:03 عدل 1 مرات (السبب : خطأ مطبعي في كلمة احيتي)

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف اقبال عبداللطيف في 17th فبراير 2012, 12:21

تسلمي يااحسان طيبين والله...قلتي لي لا بطورو لاببارو ناس جون..
ربي يسدد خطاك ويستر غربتك


لا اعرف شيئا تواطأ الناس على هضمه وزهدوا في انصافه مثل الحقيقة

اقبال عبداللطيف
مشرف ركن الاسرة
مشرف ركن  الاسرة


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف أزهرى الحاج البشير في 17th فبراير 2012, 13:00

شكرا يا أقبال كونك أخرجت هذا البوست من أضابير النسيان .. لقد أستمعت به كأني لم أقرأه من قبل ولم أعلق عليه

الله يجازيك يا جون الكضّاب

أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

رد: النسخة السودانية!!

مُساهمة من طرف كرم هجانه في 17th فبراير 2012, 22:02

هههههههههههههها و كعكعكعكع
الله يكون فى عونك يا عوض اخوى
يا حليلك دكتورة

كرم هجانه
نشط مميز
نشط مميز


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى