ابوجبيهه

ساخر سبيل!!!!!

استعرض الموضوع السابق استعرض الموضوع التالي اذهب الى الأسفل

ساخر سبيل!!!!!

مُساهمة من طرف nashi في 6th أكتوبر 2011, 07:57

ماطار ناقلنا وارتفع!

الفاتح جبرا
نصح الأطباء حاج (سليمان) بالسفر إلى الخارج لإجراء بعض الفحوصات ذات العلاقة بتقدم العمر ، وبما أن حاج (سليمان) كان من شباب الحركة الوطنية فى خمسينات القرن الماضي فقد إختار (الناقل الوطنى) إذ أعتبر أن إختياره لأى (خطوط طيران ) أخرى يعد عملاً يفتقر إلى ادنى مستويات (الوطنيه) ، لم ينس حاج سليمان عند مغادرته منزله ووداعه لأبنائه أن يقوم بتسليم زوجته (قروش المعيشة) خلال فترة غيابه وأن يدس فى يدها بعض (القريشات) لزوم الإستعانة بهم عند إقامة (ليالى المأتم) ، توجه سليمان إلى مبانى الخطوط وقف أمام موظف الحجز الذى قام بتزيين مكتبه بصدر الحكمة التى تقول (ما طار طير وإرتفع) :
- والله يا ابنى عاوز ليا حجز (الليلة) ماشى الأردن إتعالج.
- والله يا حاج عندنا الليلة سفرية وااحدة (عمان).
- مطار أربعة .. إقلاع ستة .. (دفن) أقصد وصول تسعة!!
- طيب خلاص أقطع ليا ماشى وجاى !!
(شخص خلفه) : يا حاج ما تضيع قروشك ساااى أحسن تقطع زيى كده بس (ماشى) عشان (الورثة) يستفيدوا من تذكرة (الجاى دى ) !
- (وهو غير مكترث لما سمعه) : الأعمار بيد الله .. أقطع ليا يا إبنى ماشى وجاى !
- طيب يا حاج إنت عاوز مقعد إستواء ولا نص (إستواء)؟
- مش فاهم !
- لا يعنى أنا بقصد إنت عاوز مقعدك قريب من أبواب النجاة ولا بعيد منها؟
- أكيد عاوزو قريب منها.. ولو عندكم حاجة أحسن كمان ما بطال.
- والله إلا نحجز ليك (مقعد الكابتن).
بعد أن قام موظف الحجز بتسليم حاج (سليمان) التذاكر اشار عليه بالذهاب إلى (كاونتر) آخر مكتوب عليه(السلامة الشخصية) ، بعد أن قام الموظف بإستلام التذكرة قام بقراءة محتوياتها ثم نظر إلى حاج (سليمان) مخاطباً :
- شوف يا حاج كل مسافر على خطوطنا دى أنحنا لازم نتأكد من سلامتو.
- والله دى الخطوط وإلا بلاش.
- عشان كده لازم كل راكب يشيل (أنبوب الرغوة) بتاعتو معاهو
- ومالو يابنى نشيل0
- تشيل ساااكت ... إنتا عارف الأنبوبة بتاعت الرغوة دى بى كم؟
- يعنى هي ما مع التذكرة ؟
- أكيد بي قروش وما مع التذكرة .. يا حاج هو نحنا (سفرك) ما مسئولين منو .. ح نكون مسئولين من سلامتك؟
- كيف يعنى؟
- أفهمك يا حاج .. الطيارة دى مش ممكن تقع فى البحر؟
- ممكن
- أها يعنى نصرف لى كل راكب (قارب نجاة)؟
- طبعن لا.
- أها والطيارة دى مش ممكن تتعرض لى عمليه (قرصنة) أو إرهاب أو عصابه تختفا؟
- ممكن.
- أها يعنى نصرف لى كل راكب مسدس وسكين؟
- طبعن لا.
- والطيارة دى مش ممكن تنزل اضطرارى فى الإسكيمو؟
- ممكن.
- يعنى نصرف لى كل راكب بالطو وبطانية؟
- طبعن لا.
- والطيارة دى مش ممكن تتعرض فى الجو لى ضغط عالى والشباك بتاعا ينشق?
- ممكن.
- أها يعنى نصرف لى كل راكب (مكنة لحام)؟
- طبعن لا
- الحاجات دى يا حاج مش كلها ممكن تحصل ؟
- أها يا إبنى بإختصار كده عشان سلامتى أنا هسه أشترى منكم شنو ؟ إنبوبة رغوة ولا قارب نجاة ولا بالطو وبطانيه ولا مكنت لحام ولا مسدس وسكين ؟
- والله يا حاج لو عاوز تضمن وصولك سالما غانما تشترى (الباقة) دى كلها وح نعمل ليك عليها تخفيض و نديك ليها بى سعر معقول.
- أقول ليك حاجه يا بنى ؟ ما عندكم (باراشوتات) ؟
- الباراشوتات فى يا حاج لكن المشكلة طياراتنا دى ما بتديك فرصة.
أقتنع الحاج بكلام موظف مبيعات أدوات السلامة الشخصية حيث عدل عن (الباراشوت) وقام بإقتناء أنبوبة (رغوة ضد الحريق ) ، وبعد أن قام الحاج بحمل الأنبوبة أشار عليه الموظف بالمرور على كاونتر (وصايا المسافرين) حيث قابله الموظف مبتسما وهو يسأله :
- يا حاج وصيتك دى عاوز ناس البيت يستلموها بالسريع ولا عادى ولا بالنت ؟
- والفرق بيناتم شنو؟
- بالسريع يعنى ح يستلموها قبل ما تبقى (فحمة) يعنى قبل ناس المطافئ ما يطفو النار (بالمويه). .. وعادى يعنى عادى بعد ما تمشى المشرحة ويتم التعرف عليك والشغلانيه تطول.
- طيب ده كلو عرفناهو قصة (بالنت) دى شنو؟
- أيوااا بالنت دى يعنى إنت بس تدينا الوصية والإيميل بتاع ناس البيت ومع (الوقعة) طوااالى نرسلا ليهم بالإيميل.
- والله يا ولدى (تكنولوجيا الكوارث) ما عندكم !
- وبعدين يا حاج فى حاجه مهمة لازم توضحا فى الوصية بتاعتك دى؟
- اللى هيا أيه يا إبنى?
- اللى هيا يا حاج إنك لازم توضح فى الوصية بتاعتك منو الح (يستلم) التعويض من (أحفاد أحفادك) !
كسرة :
تنبيه : هذا المقال يتم نشره بعد كل كارثة طيران يتعرض لها ناقلنا (الكان) وطني .. حتى الآن تم نشره (تسعة) مرات!!
الرأي العام


عدل سابقا من قبل nashi في 24th نوفمبر 2011, 03:04 عدل 1 مرات (السبب : تم تغيير العنوان)

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: ساخر سبيل!!!!!

مُساهمة من طرف nashi في 22nd أكتوبر 2011, 13:55

ساخر سبيل

جباية في حكاية

الفاتح يوسف جبرا

أمام منزل الحاج (عبد الفضيل) وقف شاب (يعلق) على كتفه شنطة جلدية سوداء ويمسك بدفتر وقلم.. يفتح (حاج عبد الفضيل) الباب
- أهلاً مرحب يا بني
- أهلاً يا حاج..
- إنت بتاع شنو؟ نحنا أمبارح القريبة دي دفعنا النفايات والعوائد والموية و....
- لكن يا حاج ما أظنك دفعت رسوم (تدفئة وضوء) عشان دي رسوم جديدة.
- (في استغراب): رسوم شنوووو؟
- مالك يا حاج مستغرب كده؟ دي رسوم (تدفئة وضوء)! ما سمعت بيها؟
- طبعاً يا ابني ما سمعت بيها هو نحنا نسمع بي شنو واللاّ شنو ما خلاص ما قادرين نلاحق الرسوم والجبايات دي!
- (يخرج من جيبه القلم ويمسك بالدفتر): قلت ليا يا حاج بيتكم ده مساحتو كم؟
- مالك ومالو كمان؟ عاوز بي مساحتو شنو؟ عاوز تطلع ليهو كروكي!
- كيف يا حاج عاوز بي مساحتو شنو؟ ما عشان نضرب ليك الرسوم بتاعتك بتاعت (تدفئة وضوء) دي!
- (في اندهاش): والله محن! أها وبتضربوها كيف دي؟
- ما حسب مساحة السطح المتلقي لأشعة ضوء الشمس يا حاج وكده وفى الحالة دى السطح هو طبعاً بيتك!
- يا ابني إنت عاوز تجنني؟ أشعة أيه؟ وسطح مين؟ ومساحة شنو؟
- يا حاج أهدأ شوية عشان أفهمك الموضوع لو ما عارفو
- طبعاً ما عارفو؟ هو نحنا بقينا نعرف حاجة ما كل دقيقة ناطي لينا زول شايل ليهو دفتر ايصالات وعاوز قروش... هي الحكومة دي قايلانا (وارثين)؟!
- شوف يا حاج الرسوم دي اسمها رسوم (تدفئة وضوء) يعني المواطن عشان يتدفّأ بالشمش دي وكمان يشوف بالضوء بتاعا لازم يدفع رسوم! يعني إنت يا حاج عاوز تدفّأ وتشوف ملح ساااكت!
- ملح في عينك يا ود يا قليل الأدب! هي الشمش دي بتاعت زووول؟
- يا حاج ما تهيج فيني ساااكت أنا زول عبد المأمور ساااكت ونحنا شركتنا دي اسمها (تتحصلون) يعني بتاعة تحصيل يعني ما عندنا أي دخل في مسألة فرض الرسوم دي!
- ومال الشركة العاملة (الفلم) دي اسمها شنو؟
- اسمها يا حاج (لمستقر لها)!
- (في دهشة): قلت ليا اسمها شنو؟
- لمستقررررن لها!
- لا حول ولا قوة إلا بالله هي حصّلت كمان! أها و(مستقرها) وين؟ أقصد مبانيها وين؟
- شفتا الجامع الكبير العاوزين يعملو ليهو صيانة ده.. بس العمارة الصفراء المقابلاهو!
دلف (حاج عبد الفضيل) الى المكتب الفاخر لمدير عام (لمستقر لها) ذو الوجه اللامع الذي تبدو عليه آثار النعمة و(الراحات) و(التكييف طويل المدي) ...
- السلام عليكم،،،
- وعليكم السلام ورحمة الله تعالى وبركاته إتفضّل - مشيراً الى أحد كراسي الجلوس الوثيرة، جلس (حاج عبد الفضيل) ثم قال مخاطباً السيد المدير:
- السلام عليكم،،،
- وعليكم السلاااام
- (مبتسماً) إتفضّل ...
- الحقيقة بس يعني جاني في البيت ولد كده وقال ليا الشمش وما الشمش والضوء وما الضوء وتدفع رسوم وشنو ما بعرف داااك والمساحة في الارتفاع في السطح وما عارف شنو فقلت اجي أستفسر منكم وكده!
- أول حاجة يا حاج مرحب بيك .. وإن شاء الله الجية بتاعتك دي تكون في ميزان حسناتك..!!
- يا بني ميزان حسناتي ميزان (لساتكي) أنا عاوز أعرف رسوم (التدفئة والضوء) دي شنو؟ إنتو أصلكم ما بتشبعوا!
- يا حاج ما تزعل ساااكت.. كدى جاوبني براااحة يا حاج وبدون انفعال... الشمس دي بتاعة منو؟
- بتاعة ربنا!
- طيب ما نحنا بتوع ربنا... تبقى الشمش دي بتاعة منو مش بتاعتنا! وقع ليك يا حاج واللاّ أعيدو ليك ! بعدين يا حاج حقو رسوم (التدفئة والضوء) ديما تستكترا علينا لأنو الشركة بتاعة (لمستقر لها) دي هي شركة بر وإحسان وشركة خيرية لرعاية المسنين ولكفالة الايتام!
- (وهو يتجه نحو الباب): أيتام... أيتام أكتر مننا؟
انتشر في الشوارع أشخاص يرتدون زيّاً أصفر فاقع اللون رسم على صدره شعار شركة (لمستقر لها) وهو شمس حمراء ذات خيوط شعاعية، مهمتهم تحصيل رسوم (تدفئة وضوء) من المارة وأصحاب المحلات والمنازل:
- (وهو يخرج الدفتر ويمسك بالقلم): بالله يا خينا لو سمحت
- في شنو؟
- في شنو كيف؟ الشمس الضاربة في (صنقورك) دي ما شايفا؟
- وما تضرب إنت سيدا؟
- أنا ما سيدا لكن ستها اسمها (لمستقرن لها)! وبالله ما تلاوينا ساااكت ادفع خلينا نشوف غيرك!
- ادفع ليكم كم كده يعني؟
- (ينظر إلى رأسه متمعناً): كدى أقعد في الواطة دي ورينا راسك ده خلينا نضرب ليك رسومك!
- (يستخرج متراً من جيبه ويبدأ القياس): طيِّب المحيط في نصف القطر على باي نق تربيع.. طيِّب إذن المساحة تساوي مية وخمسين سنتيمتر مربع والسنتي بي عشرة قروش نكون عاوزين منك كده جنيه ونص ...
بعد حوالى شهر وبينما كان حاج عبد الفضيل يستلقى على العنقريب فى مساء ذلك اليوم مطفئاً لمبة (الحوش) مستمتعاً بضوء القمر الفضي وهو يضع الراديو الترانزيستور على صدره يستمع إلى الأخبار إذا بخبطات على الباب:
- قوم يا حاج شوف الجاييينا نص الليل ده منو؟
يتجه حاج عبد الفضيل نحو الباب، يفتحه يفاجأ بشاب تدلى من كتفه شنطة سوداء ويمسك بقلم:
- ده بيت الحاج عبد الفضيل عمر؟
- أيوه في شنو؟
- معاك شركة (قدرناه منازل)!
كسرة:
يقبع المواطن عبدالفضيل نزيلاً بالتجاني الماحي بينما يرقد المتحصل في الغرفة «7» عنبر العظام!



nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: ساخر سبيل!!!!!

مُساهمة من طرف فيصل خليل حتيلة في 22nd أكتوبر 2011, 14:36


هههههههههههههههههههههههههههههههههههههههها

ههههههههههههههههههههها

دا الفضل

شكرا دكتورة و التحية للفاتح جبرة

ههههههههههههههههها

فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

رد: ساخر سبيل!!!!!

مُساهمة من طرف nashi في 24th أكتوبر 2011, 12:33

فيصل خليل حتيلة كتب:

هههههههههههههههههههههههههههههههههههههههها

ههههههههههههههههههههها

دا الفضل

شكرا دكتورة و التحية للفاتح جبرة

ههههههههههههههههها


مشكور اخي فيصل

جبرا مسلط والله

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: ساخر سبيل!!!!!

مُساهمة من طرف nashi في 24th أكتوبر 2011, 12:35

ساخر سبيل

يكون ده من شنو؟

الفاتح يوسف جبرا

ما أن تقوم بقراءة أخبار الحوادث في أية صحيفة حتى تقرأ عناوين من شاكلة (القبض على عصابة تقوم بتزوير العملة) ! على الرغم من أن (خبراء تصميم العملات) لدينا ما أن يقوموا بتصميم عملة جديدة إلا ويصرحوا بان تلك العملة لن يأتيها التزوير لا من أمامها ولا من خلفها وأنها تتمتع (بكذا نوع) من أنواع الحماية ضد التزوير بداية بالعلامة المائية التى ترى عند تعرض العملة إلى الضوء (تكون شايل ليك بطارية طوااالي) وانتهاء (بالخط المعدني) والذي يمكن عمل (شبيه له) بأي من برامج الرسوم الكمبيوترية !
بالطبع كلام (خبراء تصميم العملات) لدينا عن استحالة تزويرها (كلام ساكت) وغير علمي بدليل هذه الظاهرة المتنامية للتزوير وكل نفر نفرين عندهم طابعة وماسحة ضوئية وكمبيوتر شخصي (قنبوا) يطبعوا ويوزعوا !!
العبد لله ما (خبير تصميم عملات) ولكن يعلم جيداً أن كثيراً من الدول العندها خبراء عملات وحتى لا تقف موقفنا هذا قد قامت بتصنيع نقودها الورقية من مادة البوليمر (الصديقة للبيئة) والتي تعد أكثر أمانا ضد خطر التزييف وتتضمن العديد من الخصائص الأمنية غير المتاحة لورقة البنكنوت ، مما يجعل عمليات التزييف أكثر صعوبة !
(ومش كده وبس) فإن النقود المصنوعة من مادة البوليمر لها ميزات أخرى كمقاومتها للماء والسوائل والأوساخ مما يحد من التلوث الناتج عن استخدام النقود الورقية العادية كما أنها أيضاً أثبتت الدراسات بأنها تعادل في عمرها أربعة أضعاف عمر العملات الورقية علاوة على أنها تتميز بسهولة الاستعمال في ماكينات الصراف الآلي عكس العملات الورقية ، بالمناسبة أول دولة استخدمت البوليمر فى صناعة العملات هي أستراليا (في العام 1988م) ثم تبعتها ماليزيا وهونج كونج وبنجلاديش وأندونيسيا وتايلاند وغيرها من الدول .
بالطبع ح يجيك (خبير تصميم عملات) ناطى ويقول ليك تكلفة صناعة العملة من البوليمر (غالية) ولكن الخبراء (الجد جد) يؤكدون بانها أقل تكلفة خاصة إذا وضعنا حكاية (التزوير) وعمرها أربعة مرات قدر العملات الورقية (في الاعتبار) !
ما دعاني لكتابة هذا المقال ليست هذه (الجلطة) بل (جلطة تانية) مما يمكن يعملا (طالب في أولى فنون) هذه (الجلطة) تكررت للأسف مرتين متتاليتين فعند تصميم العملة الورقية قبل الأخيرة تم استخدام نفس اللون (البمبي) في الورقة فئة العشرين جنيه (وكمان) في الورقة فئة الخمسة جنيهات (يعني خلاااس ما لاقين ليهم لون) مما جعل المواطنين يعانون كثيراً مشقة التركيز في التفريق بين الفئتين وفي كثير من الأحايين يقوم أحدهم بتقديم العشرين بأنها (خمسة) ولا يكتشف ذلك إلا بعد فوات الأوان !
كان من الممكن أن نقول إن لكل خبير (دقسة) وأن المسالة ليست عدم خبرة بل (سهوة ساااكت) ..
لكن ما حدث فى صناعة وتصميم العملة التى صدرت مؤخراً يؤكد بما لا يدع مجالاً للشك بأن (عبدو الميكانيكى) هو من يقوم بتصميم عملاتنا فها هي الورقة فئة (الخمسين) تحمل ذات لون الورقة فئة (الخمسة جنيهات) ! .. طيب يا (عبدو يااخ) وكت ما لقيت ليك لون تااانى خاااالس والألوان انعدمت طيب خلي (العشرة) تشبه (الخمسة) عشان الفرق (عند الدقسة) يكون (خمسة جنيهات) بدل ما يكون (خمسة وأربعين جنيه) عشان يا عبدو القصة ما بتتحمل وجيوبنا ما ناقصة وكده !
عزيزى القارئ .. بينما خبراء تصميم العملات (الجد جد) يركزون عند تصميم وصناعة العملات البنكنوت على شيئين هامين .. أولهما عدم قابلية العملة للتزوير ..وثانيهما اختلاف الألوان (الوااااضح) بين الفئات واختلاف مقاساتها منعاً للإلتباس نجد (خبراءنا) يركزون على (الرسومات) التى تحتويها (العملة) وهل يقومون بوضع (أفيال) أم (زراف) أم مصفاة البترول (الما شفنا ليهو حاجة) ؟!!
كسرة :
يكون ده من شنو يا جماعة ؟؟ والله قدر ما شغلنا راسنا (الفاضى ده) ما لقينا لينا سبب !!

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: ساخر سبيل!!!!!

مُساهمة من طرف Ahmed kuku Ahmed في 24th أكتوبر 2011, 13:28

مشكورة يا دكتورة

والله الراجل نجيض جنس نجاضة , اخوك عندو تجربة مرة مع شركات التحصيل دى

كنت بشتغل فى تحصيل العوائد المنزلية او عتب البيوت ذكرنى بتاع التدفئة وضوء السمش ده .الناس ما عارفة يعنى شنو ضرائب على عتب البيوت ومستنكرين الامر شديد وكل غضبم يرموه فى المتحصل المسكين نبذ وشتم من شاكلة اتو حرامية بيوتنا ملك وحكر دايرننا ندفع ليكم كمان ’اصعب موقف مرة على فى الشغلانة دقيت الباب فى الثورة الحارة 25 طلع لى راجل كبير فى حدود السبعين كده شرحت ليو الامر الغريبة تقبلو ولكن قال لى يا ولدى اتا ما عندك ذنب انا متقاعد معاشى 75 ج شايف العيال الفارشيين الطماطم ديل طردوهم من المدرسة والله الفى جيبى كلو اشتريت بيهو صفيحة طماطم وحتى الان ما فى زول اشترى منهم حاجة واخواهم الصغار لغاية الان ما اكلو شئ والساعة كانت 2 ظهرا ز من ديل اول ما رجعت المكتب قدمت استقالتى وخليت الشغلانة العجيبة دى.

Ahmed kuku Ahmed
نشط مميز
نشط مميز


الرجوع الى أعلى الصفحة اذهب الى الأسفل

رد: ساخر سبيل!!!!!

مُساهمة من طرف nashi في 24th أكتوبر 2011, 13:49

الله يبارك فيك اخي احمد كوكو

والله قلبي انغطع علي عمنا السبعيني لانه من سن الوالد

وقرارك صحيح في ترك الوظيفه لانه عايزه زول قلبو قاسي

الحل في السودان بقي من بعض ذي ما بقولو

ناس فووووووووووق وناس تحتتتتتتتتتتتتتتتتتتتتتت

والله غالب

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: ساخر سبيل!!!!!

مُساهمة من طرف فيصل خليل حتيلة في 24th أكتوبر 2011, 13:54


موقف نبيل جدا اخى احمد كوكو و رسالة قوية الى كل السودانيين

شكرا دكتورة

فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

رد: ساخر سبيل!!!!!

مُساهمة من طرف Ahmed kuku Ahmed في 24th أكتوبر 2011, 14:13

حقيقى اسوأ شغل مرة على هذه الشغلانة متعبة ومقرفة لدرجة ما يعرفه الا الزول الاشتغل فيها والله انا آخر اليوم يجى بنفسيات من سوْ ما اشاهده من فقر وترى فى نواحى الحياة ما عرفت الناس دى غلابة كده الا لما اشتغلت فى الشركة دى لانى بلف البيوت بيت بيت دار دار زنقة زنقة . الغريب فى الامر الفقراء يتجاوبو معك والاغنياء سمعوك كلام فارغ الحمدلله ربنا فكانى منها .شكرا فيصل شكرا ناشى.

Ahmed kuku Ahmed
نشط مميز
نشط مميز


الرجوع الى أعلى الصفحة اذهب الى الأسفل

رد: ساخر سبيل!!!!!

مُساهمة من طرف nashi في 26th أكتوبر 2011, 02:18

احمد ربنا الريحك منها

بالجد شغله حاره

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: ساخر سبيل!!!!!

مُساهمة من طرف nashi في 2nd نوفمبر 2011, 16:02

ساخر سبيل

الفاتح يوسف جبرا

الفساد يرد !

عزيزي جبرا .. المحترم
تحية طيبة وبعد:

أسمح لي سيدي أن أرد على رسالتكم لي بهذه الزاوية والتى تم نشرها قبل عدة أيام ، بداية أرجو ألا أكون قد تسببت لك وأنت تستلم ردى هذا في (شلل رباعي) أو ما شابه من أثر المفاجأة (وإنتا زول قلب وكده) والمفاجأة هى أنك و(معشر المواطنين) تعتقدون بأنني (شخصية معنوية) لكن الشئ الذى تجهلونه تماما هو أنني كائن حي مثلي مثل كل الكائنات الحية ، أمشى في الأسواق (وأخربها) وأدخل إلى الوزارات (وألغفا) واجلس فى البنوك (وألهطا) وأدلف إلى المؤسسات (فأنشفا) ! وأتربع في المحليات (وأشفطا) .
نعم أنا كائن حي أتنقل وأسافر وأقيم في كل الدول والأقطار ، أمكث فى بعضها إن طاب لى المقام وتهيأت لى الأجواء عشرات السنين (لحدت ما الشعوب تقول الرووووب) ، وإن لم يطب لى المقام ووجدت أن دولة ما (مقفلة اللعب) في وجهى فإننى أكون في تلك الحالة مضطراً لرفع الراية البيضاء ومغادرة تلك الدولة والبحث عن (مأوى مناسب آخر) !
عزيزي جبرا :
لعلك تود أن تسألنى متى (أرفع الراية البيضاء) وأغادر دولة لا تتهيأ لي ظروف العمل فيها ؟ ومتى يطيب لي المقام ويحلو لي البقاء في دولة ما؟ والإجابة على هذا السؤال يا عزيزى جبرا واضحة كما أعتقد (وما عاوزه ليها درس عصر) ، إذ أن فرصتى للعمل تكون شبه معدومة وأتعب غاية التعب وأعاني الإضطهاد و(العطالة وقلة الشغلة) في المجتمعات التي تنتهج أنظمتها السياسية أساليب الديمقراطية وتوسيع المشاركة، لأنو فى الدول دى القوانين كفيلة بردعى وردع كل من يتعاون معي .. كما إنو (دغمسة وغتغيت مافي ) .. وأى عمل (عام) قاعد يتم في العلن والناس كوووولها شايفاهو ومتابعاهو ولو الزول عمل ليهو (شوية فساد سغيروووني) الله قال بى قولو .. وعلى القانون (طواالي) بدون فقه سترة و(أجاويد) وقصة المال (تلتو ولا كتلتو)!
أما عن مسألة (طيب المقام) ومزاولتى لعملي بحرية وبدون أي شوشرة من أحد فأود أن أخبرك عزيزي جبرا بأن الإمور تكون آخر حلاوة عند مكوثى بالدول التى يكون فيها الحكم (شمولي) ومتحكمة فيهو جماعة واحدة لا تمثل عموم أفراد المجتمع الشئ اليخليها غير خاضعة للمساءلة و(تبرطع زى ما عاوزه) وما فيش زول يقدر يقول ليها (تلت التلاته كم؟) ، وبينى وبينك يا أستاذ لمن ألاقى ليا (مناخ) زى ده .. أنا بسوى (البدع) وأظنو براااك شايف (الخط الفي سماهو إتسرق !!) ومنظمة (أصحاب الميمنة) الوهمية بتاعت (المدينة الرياضية) اللذين ذكرتهما كأمثلة في خطابك المذكور لي وغيرهم !
عزيزي جبرا :
لن تجدى محاربتك لي وكتاباتك عني شيئاً .. (إنتا شنو ياخ ؟ أنا الوازع الديني ما قدر يعمل ليا حاجه) .. عشان كده أسمح ليا أنصحك .. يااخ إنتا زول كبير في السن وكمان عيان .. وعندك عيال بتربي فيهم .. يااخ أعمل حسابك وما تقوم نفسك ساااى .. والله تقعد تباري فيني كده يوم يطق فيك عرق يلحقك أمات طه ..!!
كسرة :
نصيحة السيد الفساد دى ما ح أهملا لأنو أثبتت البحوث الطبية مؤخراً أن النفخ فى (قربة مقدودة) سبب رئيس فى إنفجار الشريان الأورطي !!


الراكوبه

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: ساخر سبيل!!!!!

مُساهمة من طرف فيصل خليل حتيلة في 2nd نوفمبر 2011, 16:31


هههههههههههههههههههههههههههههها

الزول دا زى ما قلتى مسلط يا دكتورة

لكين بينى و بينك معاهو الف حق

تتصورى المنظمة المزكورة دى سرقت مدينة رياضية كاملة

بالتمام و الكمال و الشئ المحير انها غير مسجلة فى وزارة الشئؤن الانسانية ولا مفوضية العون الانسانى

يعنى زى جمعية ناس اقبال و محمود منصور ههههههههههههههههههههههها

الله غالب

قبل يومين ظهر مدير عام سودانير و قال الحمدلله الشركة رجعت للدولة و عندنا اصول ثابتة و غيره فقط تنقصنا

الطائرات هههههههههههههههههههههها

شوفى ليكى جنس هوايل؟

شكرا دكتورة

فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

رد: ساخر سبيل!!!!!

مُساهمة من طرف nashi في 2nd نوفمبر 2011, 16:58

هههههههههه قلت لي قال عندهم اصول ثابته
والما ثابته مشت وين؟ ههههههههههههههههه
والطيارات بقن في حق الله؟
الحمدلله رب العالمين


مشكور اخوي كتر الف خيرك
وكل عام وانتم بالف خير

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: ساخر سبيل!!!!!

مُساهمة من طرف حامدونا حامدونا في 2nd نوفمبر 2011, 18:31

ههههههههههههههههههههههه//تحياتى -الدكتورة واخونا فيصل والله كلكم مجانين-وجبرا اولكم((قلت لى عاوزة طيارات بس **تطير عيشتنا نحن ديل))تحياتى

حامدونا حامدونا
نشط مميز
نشط مميز


الرجوع الى أعلى الصفحة اذهب الى الأسفل

رد: ساخر سبيل!!!!!

مُساهمة من طرف nashi في 24th نوفمبر 2011, 03:05

أمات طه

الفاتح جبرا

العلاج بواسطة الأعشاب شئ متعارف عليه منذ قديم الزمان يقوم به من يعرفون باسم (العطارين) إذ كان العطار حينذاك بمثابة الصيدلي الذي يقوم بتحديد العقار(الأعشاب) التى تساعد على علاج بعض الأمراض كالصداع والإسهال وفقدان الشهية وغير ذلك من الأمراض التي يسهل تشخيصها . و(الواقع) يقول إن هذه (المهنة) فى ظل التطورات العلمية فى مجال (الطب) وصناعة الدواء قد تضاءل أعداد الذين يقومون بممارستها ولم يتبق منهم إلا الذين ورثوها عن آبائهم وأجدادهم وأغلبهم (أميون) أو شبه ذلك ، غير أننا دائما فى (حتة) والواقع في (حتة) تانية ,إذ إنتشرت هذه الأيام (هذه الظاهرة) انتشاراً غريباً فما أن تمسك بإحدى الصحف الآن إلا وتجد إعلاناً لشخص أو (مركز) يدعي علاج جميع الأمراض بالأعشاب إبتداء من (الزكام) مروراً (بالسرطان) وانتهاء (بالايدز) حمانا الله وأياكم وليت المسألة اقتصرت على ذلك بل تعدتها إلى عرض بضاعتهم (في سوق الله أكبر) حيث تنتشر (الآن) في شوارع (الخرطوم) بالقرب من الأسواق وأماكن التجمعات عدد من البكاسي والعربات وعليها الملصقات التي توضح للمواطن (الما عارف يلاقيها من وين ولأ من وين) كمية (أسماء) الأمراض التى تعالجها هذه الأعشاب .
بالأمس وفي طريقي لمباني الصحيفة وجدت إعلاناً ملصقاً على إحدى العربات التي تقف ويتزاحم حولها المواطنون ، الملصق يروج (لحبة) يدعى (صاحبها) بان لها القدرة على شفاء الامراض وحتى تدرك ? عزيزي القارئ ? إلى أي مدى وصل الإستخفاف بعقول المواطنين و(النصب) عليهم ..أحيلك لقراءة السطور التالية والتي توضح (الأمراض) التي (تستطيع) تلك (الحبة) والتى يضع (مقدار جرعاتها) وطريقة (تناولها) ذلك (الدجال) الذى ما بينه وبين (الصيدلة) كالذي بينى وبين (اللغة التركمانستانية) :
تساقط الشعر، الصداع ،الأرق ، القمل وبيضه ،الدوخة وآلام الأذن، القراع والثعلبة، القوباء، الأسنان وآلام اللوز والحنجرة ، حب الشباب ، الثآليل والجروح والأورام، البهاق والبرص ، ضياء الوجه وجماله، سرعة التئام الكسور، الكدمات و الرضوض ، الروماتيزم ، السكر، ارتفاع ضغط الدم ، إذابة الكوليسترول في الدم ، الإلتهابات الكلوية، تفتيت الحصوة وطردها ، عسر التبول ، منع التبول اللا إرادي، الاستسقاء، التهابات الكبد ، الحمى الشوكية، المرارة وحصوتها ،الطحال ، ، المغص المعوي ، الإسهال، الطراش ، الغازات و التقلصات . لكل الأمراض الجلدية ، لكل أمراض الصدر والبرد ، لكل أمراض القلب والدورة الدموية (شفتو التعميمات دى) !
إنتهت الأمراض (هى مش كتيرة اوى) يعنى حوالي كم وستين (مرض) غير الأمراض التى تم (تعميمها) !!
كنت أظن (وليس كل الظن إثم) إن ممارسة أية مهنة ذات علاقة بالطب دون (ترخيص) من وزارة الصحة ونقابة الأطباء أو الصيادلة يعتبر من الجرائم الجنائية التي يعاقب عليها القانون لكن يبدو ان ظني في (غير محلو) وان القانون يسمح لكل من هب ودب إدعاء معالجة المرضى في ظل انحسار دور (الدولة) فى إيجاد الرعاية الطبية لمواطنيها وتبنيها لظاهرة العلاج الإستثمارى (البشئ الفلانى)!!
إقتربت أكثر من (البائع) الذى تبدو عليه علامات (الوقار المصطنع) وسألته (متصنعا) الغباء :
- هسه لو عندى الأمراض دى كوووولها الحبة دى بتعالجهم ليا !
وقبل أن يجيبنى (البائع) ليذكر لى (الحديث النبوى الذى رواه البخارى) جاءنى صوت من خلفى يبدو أنه لمواطن مستاء مما يحدث :
- والله يا أستاذ لو عندك منهم (تلاتة بس) ... كان لحقت (أمات طه) !
كسرة :
اشتهر أحد الظرفاء بسوق أم درمان قديماً بالتخصص في بيع المعلبات (الضاربه) منتهية الصلاحية فإشترى منه مواطن واحدة .. ثم طلب أخرى فما كان من صاحبنا ألا أن خاطبه :
- واحدة تانية لشنو والله الشلتها دى توديك الآخرة !


الراي العام

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى