ابوجبيهه

أتركوني أعيش !

استعرض الموضوع السابق استعرض الموضوع التالي اذهب الى الأسفل

أتركوني أعيش !

مُساهمة من طرف nashi في 14th يناير 2012, 14:22

ساخر سبيل

أتركوني أعيش !

الفاتح جبرا

على بريدى الأليكترونى جاءتنى رسالة تحمل العنوان (يا أستاذ أعمل شنو؟) .. قمت بفتحها .. بعد قراءتها إنزلقت من عينى دمعة ثخينة .. هذه الرسالة أهديها للمسؤولين عن (الشباب) وتشغيلهم وإيجاد فرص العمل الشريف لهم حتى لا يجدوا أنفسهم في موقف كما صاحب هذه الرسالة التى أقوم بنقلها لكم (وللمسؤولين) كما وردت بدون اي تعـديل .



الأستاذ الفاتح جبرا المحترم

على الرغم من مشغولياتك الكتيرة أرجو أن تمنحنى فرصة وتقرأ رسالتى هذه فأنا يا أستاذى محتاج لرأيكم في هذا الموقف الذى أنا فيه ، أنا إبنك (ص) شاب سودانى خريج أحدى الكليات الجامعية النظرية ، تخرجت في العام 2002 وجلست عاطلاً عن العمل لفترة خمسة سنوات رغم الجهد الشديد الذى بذلته من أجل إيجاد وظيفه (في أى حته) ،عملت خلال تلك الخمس سنوات في شتى المهن الهامشية حتى أقوم بتوفير ضروريات الحياة لي ولأسرتي إذ أننى أكبر أبنائها عملت كعامل (طلبة) ، بائع سجائر وعدة أشغال هامشية أخرى إلى أن أخبرني ذات مرة – وقتها- أحد أصدقائي أن (الدرداقات بتجيب قروش كويسة) فقمت بتوفير بعض القريشات أشتريت بيها (درداقة) أحمل عليها الأغراض التى يشتريها المواطنين من السوق وقد كان العائد منها (مش بطال) يكفي بالكاد لسد رمق الأسرة وقضاء حاجاتها الضرورية إلى أن قررت المحلية أن تسحب مننا الدرداقات وتؤجرها لنا لقاء مبلغ زهيد ! وهنا قررت أن أهاجر .. أطلع من البلد بأى صورة فبلد لا تجد للخريج وظيفة ثم تحاربه إن أراد (لقيط رزقو) في عمل شريف غير جديرة بالبقاء فيها !

وسافرت إلى مصر .. ودى قصة طويلة .. المهم لقيت شباب كتار زيي كده طلعوا طافشين من البلد .. ساعدونى وسكنت مع بعضهم .. مرات مرات ألاقي شغل في عمارة .. عتالي في السوق حاجات كده ! المهم في الموضوع الشباب المعاي ديل كووولهم بيحلموا بالهجرة إلى كندا أو أستراليا لأنو قالوا ناس البلاد دى عاوزين أجانب بشرط إنو يكونوا شباب وصحتهم عال العال .. أها مسألة السفر والهجرة دى عاوزه ليها قروش .. معظم الشباب ديل يا استاذ عشان يوفرو ليهم قروش يهاجروا بيها قامو باعوا الكلي بتاعتهم .. وهنا بالمناسبة يا أستاذ (سوق الكلى) شغال شغل شديد والسماسرة السودانيين بتاعين الكلي أكتر من سماسرة العربات والعقارات في الخرطوم تلقاهم قاعدين قدام المستشفيات بتاعت نقل الكلي عشان يصطادوا الناس العاوزه تبيع وكمان في (قهوة) معروفه كل المرتادين ليها هم يا سمسارة كلي يا ناس عاوزة تبيع .. بالمناسبة الناس العاوزة تشتري اغلبهم برضو سودانيين يا جايين مباشرة من السودان يا جايين من دول الخليـج ومعاهم قرايبهم المرضانين وعاوزين ليهم كلي (كويسة) !

أنا بكتب ليك يا أستاذ في الرسالة دى عشان أنا قررتا أبيع كليتى .. واحد من السماسرة لقي ليا زبون وعملنا الفحوصات اللازمة لكن والله يا استاذ أنا بينى وبينك (ملاوز) شديد ..ونفسياتي كعبة شديد .. من جهة المبلغ كبير وممكن لو قبضتا القروش وما لقيت طريقة هاجرتا أجى راجع السودان وأشتري بيهو (ركشة) أو (أمجاد) أو أي حاجة نعيش منها خاصة وأن أسرتي اصبحت حالتها صعبة ومن جهة تانية مرات بتحصل مقالب والزول ما يدوهو قروشو وكليتو تروح (شمار في مرقة) .. بالله يا استاذ ورينى أعمل شنو؟

الرد



الأبن (ص) .. قضيت يومى كله حزينا من أجلك .. ومن أجل أخوانك الذين أوصلهم أعمامكم (الساسة) إلى هذا الوضع (القمئ) بفضل تنازعهم على كراسي السلطة على حساب تهيئة وضع افضل لكم .. عد إلى بلدك يا بنى ولا تبع جزءاً منك عاش معك سنوات حياتك .. عد وسوف نشتري لك (درداقة) لتعمل بها في ذات السوق وسوف نكتب عليها بالبوهية الحمراء .. أتركوني أعيش !

كسرة :

لا حول ولا قوة إلا بالله !!



الراكوبه

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: أتركوني أعيش !

مُساهمة من طرف nashi في 14th يناير 2012, 14:23

Sad Sad Sad Sad
بكاني المقال
Sad

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: أتركوني أعيش !

مُساهمة من طرف غريق كمبال في 14th يناير 2012, 15:15

ص خليك قوى

الامور تتغير ان شاء الله

غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

رد: أتركوني أعيش !

مُساهمة من طرف محمود منصور محمد علي في 14th يناير 2012, 19:46

والله العظيم انه امر لمحزن ومؤسف ان يكون هذا هو حال الشباب امل الامة ومستقبلها الزاهر...
هذا ياجماعة مثال واحد ل الاف من الشباب المحطم الذليل المنكسر الذي ضاع بسبب السياسات الهوجاء والخرقاء...

كل الامور اصبحت في ايدي طغمة فاسدة لا تعرف الحق ولا تعرف العدل ولا تعترف بالمساواة .. والخوف الان من انهيار الدولة... واني اراه اقرب الينا من حبل الوريد...

الله يعينك يا (ص) ويعينك يا (س) ويرحمك يا (خ) وينقذك يا (و)


عدل سابقا من قبل محمود منصور محمد علي في 14th يناير 2012, 21:05 عدل 1 مرات

محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

رد: أتركوني أعيش !

مُساهمة من طرف mohammed في 14th يناير 2012, 20:52

لا حول ولاقوة إلا بالله العلي العظيم. قال تعالي(ياأيها الذين آمنوا اصبروا وصابروا ورابطوا واتقوا الله لعلكم ترحمون)

mohammed
ابوجبيهه يابلدى


الرجوع الى أعلى الصفحة اذهب الى الأسفل

رد: أتركوني أعيش !

مُساهمة من طرف nashi في 15th يناير 2012, 02:42

الاخوان - غريق - محمود - محمد
شاكرة مروركم

nashi
مشرف المنتدى الرياضى
مشرف المنتدى الرياضى


الرجوع الى أعلى الصفحة اذهب الى الأسفل

رد: أتركوني أعيش !

مُساهمة من طرف محمد عبد الله قادم في 15th يناير 2012, 09:59

أفل البدر وأضـــنى العتابا ففقيــــد الروح ليــــــس يعابا
أضمرُ الغيبَ وظلمُ الغياب سربُ أفكارٍ تجول ضــــــبابا
وأنا أميّ في الصبر لكـــن من بلاء الصبر صرتُ كتابا
سائلوا الليل فكم عشت فرداً لأرى عيشَ الفرادى مهـــــابا
لم يكن للبعد خلاً ولكـــــــن قد غدوتَ الأن منــــــــه قبابا
رفد الدمعُ ضفافَ الخزامى تلجُ الشعرَ،،،وتطرقُ بــــابا
يعجب الدهرُ ويلهـــج هدلاً من وكيفَ اختار عيش الغرابا؟؟؟؟؟؟؟؟؟؟؟؟؟؟

اصبر يا (ص) فما صبرك الا بالله وعليك التحلي بالايمان( وفي السماء رزقكم وما توعدون) صدق الله العظيم

محمد عبد الله قادم
نشط مميز
نشط مميز


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى