ابوجبيهه

سعاااال... للجميع ...

استعرض الموضوع السابق استعرض الموضوع التالي اذهب الى الأسفل

سعاااال... للجميع ...

مُساهمة من طرف عثمان محمد يعقوب شاويش في 30th يناير 2012, 14:53


ما رأيكم في المستوي الذي وصل إليه هذا المنتدي ...!!!

* هل إرتقينا به وطورناه ؟؟؟
* هل مواضيعه حيَة جديدة ومفيدة ؟؟؟
* هل الأعضاء يشاركون فيه وبفعالية عالية؟؟؟
* هل المداخلات عالية وكاملة الدسم ؟؟؟
* وهل الردود دون تحفظ ؟؟؟
* هل معظم الأعضاء يأتون بمواضيع جديده ومتنوعه ؟؟؟
وهل ....وهل ...
نأمل من كل الإخوة والأخوات والأبناء والبنات تنشيط هذا المنتدي الجامع ... لأنه أصبح ملاذنا ووجهتنا والتي نقضي فيها معظم وكثير من وقتنا ...
وفيه نلتقي بجميع من يعزوا علينا ....
وأنا شخصياً لا أميل كثيراً للرسميات ...والمواضيع الرسمية..!!
وهذه الدنيا إلى متي نحجم فيها بأنفسنا عن حياة الناس الإجتماعية ؟؟؟
يجب أن تظل الصراحة والوضوح هي ديدننا ....
ونأمل أن لا تكون جادين 100% ....
لأن الجدية الزائدة تقتل وتهبط الهمم وتشعر الإنسان بالملل ...
نأمل ...ثم نأمل ... أن لا نبخل لبعض بزكرياتناالجميلة وطفشاتناالحلوة ....
وتفضلوا بقبول إحترامي ،،،



عثمان محمد يعقوب شاويش
مشرف منتدى شخصيات من ابى جبيهه
مشرف منتدى شخصيات من ابى جبيهه


الرجوع الى أعلى الصفحة اذهب الى الأسفل

رد: سعاااال... للجميع ...

مُساهمة من طرف غريق كمبال في 30th يناير 2012, 17:00

شكرا عصمان انت دائما رائع

السوال مهم جدا واتمنى ان يكون هذا البوست وقفه تقيميه من رواد المنتدى

انا راى الاتى

1= ان المنتدى ادى خدمه اجتماعيه لمحبى الحباك واصدقائهم لا حدود لها

2=المنتدى اصبح مرفاء حقيقى لنا جميعا

3=اتاح خدمه عظيمه لابى جبيهه

4=على مستوى المشاركات هنالك بعض الاعضاء من اصحاب الراى والحكمه قلت مساهماتهم كثيرا

5=كثير من ابناء المنطقه لاذالوا يجهلون وجود هذا المنتدى

6=بعض الاعضاء الذين يمكنهم رفد المنتدى بمواضيع مهمه اختفوا عند تسجيلهم

7=بعض ابناء الحباك نعتقد ان وجودهم فى المنتدى مهم وحتى لو لفترات متقطعه مثل المهندس صالح والبروف القونى والسفير محمد عبدو والسفير عطا وجنابو فضل السيد والفاضل ونيس والدكتور على حموده ومحمود حموده والبيه مختار وعثمان قادم والساده نواب الشعب كالى وعبد الرحمن وعزو

اعتقد ان وجود هؤلاء بيخلق تنوع مفيد فى المنتدى ويثرى الحوار



غريق كمبال
مشرف المنتدى الاقتصادى
مشرف المنتدى الاقتصادى


الرجوع الى أعلى الصفحة اذهب الى الأسفل

رد: سعاااال... للجميع ...

مُساهمة من طرف اقبال عبداللطيف في 30th يناير 2012, 21:02

سلامات يا العزيز شاويش صراحة بقينا مازي زمان

الزعيم سلامات
البند7 مرا مافوقا الحكاية شنو؟
ههههه
الاستاذات سعاد وهنية وعلياء شاويش والقائمة تطول..هي دعوة ..يعني مطلوب نساء


لا اعرف شيئا تواطأ الناس على هضمه وزهدوا في انصافه مثل الحقيقة

اقبال عبداللطيف
مشرف ركن الاسرة
مشرف ركن  الاسرة


الرجوع الى أعلى الصفحة اذهب الى الأسفل

تخريــــمه .......

مُساهمة من طرف عثمان محمد يعقوب شاويش في 31st يناير 2012, 08:38

تخريمـــة ... بـــره الشبكة ....
وونسة سااااكت من على البعد .....

بقيت مازي زمان !!!؟؟

للشاعر : عوض جبريل .

كنت بدورنا وتزورنا وتسعدنا يا أمل من زمان


الريدة بين الناس صلة ريدتنا ألحق حصلا
ليه يعني داير تفصلا ماالدنيا حب ومواصلة


أسعدنا حبك ياجميل بقينا فيهو زمن طويل
ياريتا أيامنا القبيل ترجع تنوم العين قليل


كل ليل تملي الروح هفا ليه رحت سبت المعرفة
علمتنا الحب والوفى من نار جفاك ياجميل كفى


************************************************************

أسامه إبن الشاعر : عوض جبريل يحكي عن والده الشاعر ....


حكايات عن الشاعر عوض جبريل ومناسبات أغنياتة
* الشاعر الراحل عوض جبريل من شعرائنا المتميزين، وتظل بصمته في عالم الفن خالدة عبر مر الدهور والازمان، فقد رحل عنا بجسده فقط الا ان روائع اعماله تظل ذكراه التي تركها من خلفه يرعاها حب الناس لها، فقد كان محبوبا من الجميع في حياته وسيظل كذلك، فقد وهب حياته للفن، الا ان ما خطه في سفر التاريخ الفني الغنائي كنز ثمين. وبمناسبة الذكرى الرابعة لرحيله، فقد اقام منتدى فلاح الثقافي امس الاول بقيادة احمد فلاح، حفل تأبين أمه عدد كبير من الشعراء وأهل الفن، أحببنا أن نشارك في هذه الاحتفائية، فكانت لنا جلسة استثنائية مع ابن الراحل البكر اسامة عوض جبريل، وهو بالمناسبة نسخة اخرى من والده، حيث يشبهه كثيرا.. جلسنا لنعيد شريط ذكريات حافل يستحق الوقفة عنده فكانت هذه الونسة.. الدقاقة.

* نتعرف عليك؟
ـ انا اسامة عوض جبريل، الابن الاكبر للراحل، وانا اعيش مع والدتنا نور اليقين ابراهيم شقيقه الشاعر المعروف الطاهر ابراهيم، ومع اخواني مامون وعباس ممثل والنعيم، ولاننا بنتشابه شديد نحن ووالدنا، فمن الطرائف مرة جانا حرامي لما شافنا جري وقال لي زمايلو «البيت دا مسكون»

* كلمنا عن والدك المرحوم عوض جبريل؟
ـ هو من مواليد حي الهجرة «الدباغة» بام درمان 1932م، درس في خلوة الشيخ خليل «ابو روف» وفي مدرسة ابو روف القديمة الاولية، ثم دخل المعهد الفني، وبعدها انتمى لمنتدى ابي روف الثقافي.

*
بداياتو كيف؟
ـ من قام وجد اخوالو ناس خالد وعباس اسمعيل يغنوا اغاني حقيبة، بدأ يغني، وغنى لعثمان حسين «كيف لا اعشق جمالك» وبدأ ممثلا مع عثمان تور الجر في مسرحية «دامفيقا» في دور «الملك طلحة» بعدها اكتشفه الشاعر الكبير صاحب «الفينا مشهودة» جد عبد العزيز العميري الشاعر عبد الحميد اب شنب، ورعاه مع رفيق دربه ابو قطاطي، بعدها حس انو ممكن يكتب شعر ويلحنه ويغنيه، وفعلا غنى في حفلات الحي، وعشان يجود مشى قعد مع عبد الرحمن الريح في بيتو في فريق العرب اكثر من خمس سنوات، عشان يتعلم منه، بعدها بقي يغني مع زميله في مهنة «البناء» الفاتح حاج سعد عازف العود المعروف.

* أول اغاني كتبها وغناها منو؟
ـ اول اغنية «لي حبيب شاغل بالي دائما محطم آمالي.. لي حبيب محروم منو لي زمن بسأل عنو» وغنتها الفنانة فاطمة الحاج، واول اغنية من كلماته والحانه هي «ورد الغرام» سجلوها في الاذاعة سنة 1949م.

* بعدها كتب شنو؟
ـ كان معجبا بحسناء في الحي هي ملهمته والسبب في كل اغانيه.. كان اهلها صعبين جدا كانوا مانعنو يشوفها ورفضوا قام كتب اغنية:
«
كل ما سألت عليك صدوني حراسك
ردوا الجواب قاسي مع اني من ناسك» وغنتها فاطمة الحاج وكانت في ثنائية بينها وبينه.

* غير فاطمة الحاج غنى ليه منو؟
ـ لاقي الفنان احمد الجابري في حي العرب بغني شرقي، كتب ليه اغاني بنفس السلم الشرقي، وغنى ليه «اسمر يا اسمر يا سكر» و«الشغل بالي انا بريدو كل افكاري» و«شغلني ما انشغل قلبو» لغاية ما سموه بشاعر الانشغالات وغنى ليه «شال من الحمامه وشيها» و«ناس الحب» و«كيف تخلي الريد» والاغنية الكتبها لي ملهمته «حبيبتي بت مصطفى» ولما غناها في الاذاعة حولها لي «حبيبتي بستلطفها ما داير زول يعرفها». وبرضو غنى ليه الفنان حميدة محمد سعيد «انا حبيت الجمال لا تلمني» والفنان رمضان حسن «الصباح الزاهي»

* بعدهم غنى ليه منو؟
ـ كان الوالد جالسا بمنزل الفنان رحمه الله الشيخ عم الفنانة عابدة والفنان اسامة الشيخ بود نوباوي بحي الجبلاب، كان معاهم السماني فضل الله والد الفنان عاطف السماني ووالد الحكم درمة وغيرهم في جلسة دوبيت، منها اكتشف الوالد الفنان بابكر ابراهيم ود السافل، وحوله من الدوبيت للغناء، غنى ليه «يا ماشي لي ام درمان سلم على الناس الحنان» و«ولف يا لساني شكر فني» و«تعال عزيني تعال سليني ما دام النوم طار من عيني» و«يا شباب ود نوباوي».

* متين بدأ يتعامل مع الفنان ترباس؟
ـ جاءه محمود فلاح في البيت قال ليه يا عوض جبريل انا اح اسمعك صوت جديد جميل جدا اسمه كمال ابراهيم سليمان. وفعلا غني ليه ترباس: «هلا يا هلا» و«ضفاف القاش» و«كفاك ما تبكي يا عيوني اتاريهم نسو الريدة» ودي كتبها لما جابو ليه خبر رحيل صديقه الفنان حميدة. وأغنية «حني علي يا ستي الحاصل سببه انتي» وستي دي قاصد بيها الدنيا. واغنية «بقليبك تقول لي تعال وتعال.. بي عيونك تقول لي لا ما في مجال» ودي كتبها في باحثة اجتماعية كانت بتزوره وانقطعت عن زيارته. ولحن ليه أغنية التجاني حاج موسى «أظلم من ظلم».

*
مناسبة أغنية «ما تهتموا للايام» شنو؟
ـ ايام السيول جاء لقى بيتنا واقع شالوا السيل، ووجد زوجته تبكي قال ليها في الحال في نفس اللحظة:
«
ما تهتمي للايام ظروف بتعدي.. طبيعة الدنيا زي الموج تجيب وتودي.. مصيرو الزول حياتو يا ما فيها يشوف» ولما غناها ترباس في سجن كوبر للوزير عمر الحاج موسى قال ليه عممها، بقى الشعب كلو يغني معانا ما تهتموا للايام ظروف بتعدي.

*
و«سيبني في عز الجمر» مناسبتها شنو؟
ـ كانت الدنيا عيد وظروفنا صعبة.. الوالد كتب قصيدة لترباس قال ليه «ما تسيبني في عز الجمر وانت من حولي بتمر.. وانت عارف انو جيبي فات حد الصبر» بعدها اتعدلت.

*
أغنية «مع السلامة» قصتها شنو؟
ـ كان معجبا بفتاة جنوبية ويريد الزواج منها، الا انها رفضت وسافرت السعودية، وهو في المطار كتب الاغنية التي يغنيها محمد احمد عوض:
«
مع السلامة يسعدني انك تذكريني وعني دائما تسألي» وغنى ليه «الجابوها رقصت حلاتها».

*
غنى ليه منو تاني من الفنانين؟
ـ بادي محمد الطيب «ست البنات الضوت السهلة» وخلف الله حمد «الليلة وين يا عيني سهر الليل والنوم ابي لي» وعوض الكريم عبد الله «ام ضي» وعبد الله محمد «الحنين البي ليه ما قدروه العمر من وين بشتروه»، ودي كتبها لي صاحبو اثناء ما بحكي ليه في قصتو مع واحدة رافضاه، في ورقة سجار، و«لما تنسونا يبقى ايه فاضل يا حبايبنا» و«حليل زمن الحنان يا با تسيل دمعة وتقيف دمعة». ولحن ليه اغنية الشاعرة سمرقندية «قدر الزمن» و«شغل القليب الشوق على الزول البحن» والامين عبد الغفار «بريدكم يا الما بتلاقوني لو مرة جاملوني» ودي لما مشى بيت عرس وما عرفوه اول ما مسك المكرفون طوالي قالها بي لحنها.

*
هنا توقفنا لنستمع لفاصل من اغنياته قدمها محمود علي الحاج، وبعدها سألته عن أغنياته.. فرد محمد قائلاً:
ـ كثيرة منها «بقيت ما زي زمان ما كنت بتزورنا وتزورنا وتسعدنا يا أمل الزمان» و«عمري ما جيتك اعاتبك جيت اخاطبك انت طيب واصلو تجريح ما بناسبك» و«لو بتعرف يا المسافر» كتبها لقريبته سافرت بره و«سبب الريد عينيك وعيني» و«سمير القلب الريدة ما بالغصب» و«حاسب ضميرك يوم لو كنا غلطانين نقبل نشيل اللوم» ودي كتبها لما اختلف مع قريبو في ميراث.

*
ما هي مناسبة أغنية «الجميل السادة»؟
ـ يوم جاي من الشغل في الحارة الرابعة لمح حسناء قال ليها سلام، لانو كان ما لابس نظيف ما ردت عليه، قام كتب الاغنية دي لابوعركي البخيت.
«
الجميل السادة وضاح المحيا، التفت يوم شفته، ما قبلان تحية.. من دلالو ولا مالو» ومن الطرائف أن صديقه ابو قطاطي قال ليه «مالو؟.. انت ما عارف مالو؟ اتخيل الحبيب يلتفت ويلقاك في وشو عاوز يرد ليك التحية؟». ويوم شاف الراحل ثوب واحدة في حي العمدة فكتب: شفت التوب وما لاقاني اجمل منو.. دا حالتو التوب سيد التوب يكون كيفنو» برضو لابوعركي البخيت.

*
تاني اتعامل مع منو من الفنانين؟
ـ ثنائي الدبيبة «دمك شربات يا رنا» ورنا دي طفلة الفنان ترباس، وتيمان عطبرة «المابتلاقينا» و«عشان بنريدو» و«تقوم بينا العربية تودينا للسادة» وعبد الوهاب الصادق «صرف النظر عني» وللشيخ شمبات «حب العنب» وخليل اسماعيل «طريق السعادة» و«الحاج عبد الحميد «شتلوك وين يا عنب» وابراهيم حسين «منك الله لي» اضافة لفرقة اولاد البيت والشوادي والاصائل.

*
توقفنا نستمع لغناء الفنان خالد نحل.. سألته عن الاغاني الخاصة بعوض جبريل فقال:
ـ اغنية «الاكسير» و«البريدو قابلني تاني هيج عواطفي وحرك جناني»

*
الراحل اتعامل مع منو من الفنانين الشباب؟
ـ مع وليد زاكي الدين وجمال فرفور «هوي المحبوب المني شغلني» و«الشال قلبي وسلا اخاصمو ولا لا» ولانو كان صديقا لعبد العزيز والد الفنان محمود، لذا اعطاه اغنية «سبب الريد» و«حبك يا جميل» والاغنية التي كتبها لوالدتنا رفيقه دربه «لو تعاين ليها تملأ ود عينك».

*
ومن المطربات؟
ـ اكتشف الفنانة حنان عبد الله «بلوبو» واداها زمان «حمادة» و«المدينة عرب» والآن «لي ايام ما بلاقيني» ولما كانت مريضة ما عرف يشيل ليها شنو.. وهو في الطريق لي بيتها الف اغنية «من الناس ومن عيونها وانت سلامتك يا حنونة». وغنت ليه قسمة ونبوية وزبيدة وسمية حسن وعابدة وماجدة الصافي «يا قمر لا» وهاجر كباشي «سيروه» وندى القلعة «البريدو الشوق كتير».

*
توقفت مرة أخرى استمع لكلمة الشاعر تاج السر الحسن وأحد اصدقاء الراحل ومحدثي.. ثم سألته عن الوقت البألف فيه قصائده فرد:
ـ ما عندو زمن معين، يكتب وهو ماشي او واقف في العربية او اثناء ما هو شغال. ومن الطرائف القديمة انه كان في حفلة في ام درمان حي الكبجاب بالفنانة الرحمة مكي، واثناء اللعب حصلت شكله وضربوا الفنانة بالكراسي، تاني يوم الراحل جاء سايق عجلة وجدها متألمة، سألها فحكت ليه الحصل في ذات اللحظة كتب الأغنية المعروفة:
«
الصبيان الجروا سابوا عروضهم وهملوا يا يمة ساعة الضرب بتحملوا»

*
هل كان بيقبل لما يسخروا من شعره او من شكله؟
ـ ما بزعل.. لكن يوم الشاعر ود البنا جاء ووجد الفنانة فاطمة الحاج بتغني «يستحيل صدك لأني حبيتك» و«انا ما شفتو ورد الغرام» قال ليها خليتيني اتعاملت مع منو غيري؟ قالت ليه: مع عوض جبريل. قال ليها «شعرو شعر شيطان ووشو وش شيطان» قام زعل وكتب قصيدة رد فيها على الشاعر.
*
وزعل لما الفلاتية قالت انو «شين هو والسر قدور»؟
ـ لا لأنو المقصود قدور.. ودي طرفة قديمة يحكيها الشاعر السر قدور بأنه في خمسينيات القرن الماضي كان يسكن بحي البوستة بام درمان فكتب اغنية:
«
يا حبيبي نحن اتلاقينا مرة.. في خيالي وفي شعوري ألف مرة». واعطاها للفنانة خفيفة الدم المرحومة عائشة الفلاتية، الا انها اهملتها وطالبت بادخال بعض التعديلات، فلما زهج منها اعطاها لجاره في الحي الفنان المرحوم العاقب محمد الحسن الذي لحنها وغناها، وتقبلها الناس ووجدت رواجا، فزعلت الفلاتية جدا.. ولما قابلت السر قدور في الاذاعة قالت ليه: «داهية تاخدك ـ تخمك ـ انت وعوض جبريل»..!! ضحك السر وقال ليها «عوض جبريل مالو» قالت ليه: «ما شين زيك».

منقول

عثمان محمد يعقوب شاويش
مشرف منتدى شخصيات من ابى جبيهه
مشرف منتدى شخصيات من ابى جبيهه


الرجوع الى أعلى الصفحة اذهب الى الأسفل

رد: سعاااال... للجميع ...

مُساهمة من طرف اقبال عبداللطيف في 31st يناير 2012, 09:20

الريدة بينا في المنتدى هي الصلة وحاجات كتيرة مفروض نلحق نحصلا..والكل لو تعاين ليهم يملوا ود عينك...وانا متأكدة كلو واحد بقول للتاني عمري ماجيتك اعاتبك جيت اخاطبك انت طيب واصلو تجريح مابناسبك..ما الحباك سبب الريد ..وانت ياشاويش دمك شربات
تحياتي


لا اعرف شيئا تواطأ الناس على هضمه وزهدوا في انصافه مثل الحقيقة

اقبال عبداللطيف
مشرف ركن الاسرة
مشرف ركن  الاسرة


الرجوع الى أعلى الصفحة اذهب الى الأسفل

رد: سعاااال... للجميع ...

مُساهمة من طرف عثمان محمد يعقوب شاويش في 31st يناير 2012, 09:28


الزعيم ... مرورك بطعم السكر ...وتسلم ...

فعلاً نفتقد كثير من أبناء الحباك ... ونحن نقدر كل الظروف والمشغلوليات... ونأمل كل ما سنحت الفرصة أن نلتقي ... ونتفقد بعض ...وأأكد لك بعض الإخوة والأخوات لنا أكثر من عشرات السنين لم نلتقي بهم .... وساحة المنتدي قد إختصرت الزمن وقربت المسافات .... فسيب البعاد ...وتعال لينا وتعاااال .... محبتي ،،،

عثمان محمد يعقوب شاويش
مشرف منتدى شخصيات من ابى جبيهه
مشرف منتدى شخصيات من ابى جبيهه


الرجوع الى أعلى الصفحة اذهب الى الأسفل

رد: سعاااال... للجميع ...

مُساهمة من طرف عثمان محمد يعقوب شاويش في 31st يناير 2012, 09:34


زهرة المنتدي الأستاذه الراقية : إقبال ... مرورك جميل ورائع كروعتك ...
ولكي التحية دائماً .... وتحياتنا (( لل Boss )) وأحبائي أبنائي ...صغاركم ...

وتفضلي بقبول إحترامي ،،،

عثمان محمد يعقوب شاويش
مشرف منتدى شخصيات من ابى جبيهه
مشرف منتدى شخصيات من ابى جبيهه


الرجوع الى أعلى الصفحة اذهب الى الأسفل

رد: سعاااال... للجميع ...

مُساهمة من طرف فيصل خليل حتيلة في 31st يناير 2012, 10:14


عمو عصمان صباح الخير

نعم الاسئلة منتازة جدا و ارى ان الجهد الذى يبذل منكم داخل اروقة المنتدى كبير جدا و ان التطور الذى يحدث بطبيعة

الحال للاشياء يجب ان يمر بكل مراحله الطبيعية و انكم تقدمون نموزجا غير عادى فى هذا المنتدى فى شتى علوم الحياة

هناك مساحات شاسعة للفرفشة و الضحك و المواضيع الخفيفة غير متاحة فى كل المنتديات و لها طعم و لون خاص كونها حباكية

مية المية عمو

فقط لدى ملاحظة عمو عصمان

هناك خيابات كثيرة و هذا الخياب يشكل ضغط عليكم كمشرفين و ناشطين فى كيفية تفادى وجود فراغات داخل المنتدى

لكم االحب



فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

رد: سعاااال... للجميع ...

مُساهمة من طرف محمود منصور محمد علي في 31st يناير 2012, 10:23

استاذ عثمان شاويش..
تحية لك وانت تحمل دائما لواء المبادرات والتجديد وتمسك بزمام التالق والابداع..
وعن تساؤلاتك الهامة التي اوردتها في هذا البوست اود ان اشارك بالرغم من انني مازلت حديث عهد بهذا المنتدى الجامع الشامل الجميل الممتع الشيق و بالرغم من انني مازلت قزما بين العمالقة والفطاحلة المنتسبين لهذا المنتدى الانيق المتطور..


*هل إرتقينا به وطورناه ؟؟؟

لا شك في ان المنتدى متطور ويسير الى الامام بخطا حثيثة ومدروسة ومحسوبة من الادارة النشطة التي لم تبخل يوما ولم تتقاعس لحظة في سبيل ان يرتقوا بهذا المنبر الى مصاف المنابر المميزة التي استقطبت الشباب بمختلف ميولهم ومواهبهم.. والدليل على ذلك تزايد اعداد المسجلين والذين يودون التسجيل..

* هل مواضيعه حيَة جديدة ومفيدة ؟؟؟
وهل توجد في هذا الكون صحيفة او مجلة يمكن ان نقول عنها بان كل مواضيعها جيدة ومقبولة ومفيدة؟؟؟ طبعا لا فحب الناس مذاهب ورضا الناس غاية لا تدرك ..والمهم ان تجد الشئ الذي تبحث عنه والشئ الذي يشبع رغباتك والشئ الذي يسعدك وقطعا الشئ الذي ينال الرضا من البعض ليس لزاما ان ينال الرضا من البعض الاخر..

* هل الأعضاء يشاركون فيه وبفعالية عالية؟؟؟

رغم الظروف والمعوقات الكثيرة الا ان اغلب الاعضاءمتمسكون ويبذلون قصارى الجهود في ان يظلوا على اتصال دائم او حتى متقطع وتواجد مستمر حتى لو كان لسويعات قليلة..
بالرغم من ان هناك اعضاء كان لهم دور فاعل جدا في بدايات تاسيس هذا المنبر وانقطاعهم الطويل ترك اثر واضح مثال لذلك الاستاذ كباشي النور وهناك من ينقطع لظروف خاصة وسرعان ما يعود بمجرد ان يجد سانحة..

* هل المداخلات عالية وكاملة الدسم ؟؟؟
ارى ان اغلب المداخلات جيدة وهي ان لم تضيف على الموضوع شئ لن تنتقص من حلاوته واهميته شيئا..


* وهل الردود دون تحفظ ؟؟؟

والردود ايضا يجب ان تكون دون تحفظ.. لان المنتسبين لهذا المنتدى اخوة واصدقاء واحباب وابناء منطقة واحدة والذي يضع نفسه في هذا المقام يجب عليه ان يكون صادق وامين ولا يتحفظ في ال
رد على اي موضوع حتى لوكان هدفه النقد فهناك نقد بناء ومفيد..

* هل معظم الأعضاء يأتون بمواضيع جديده ومتنوعه ؟؟؟
هناك الكثير من المواضيع الجديدة والمتنوعة والتي نتابعها يوميا وارى ان المنتدى اصبح جامع وشامل لكل المواضيع فالذي يبحث عن السياسة سيجدها والذي يبحث عن الشعر والادب سيجده

************
تخريمة
شكرا استاذ عثمان ونرجو منك تعديل موضوع الشاعر عوض جبريل لاننا لم نستطع قراءته بهذ الخط الذي اضاع في معيته النقاط وجعل الحروف تبدو وكانها بدون نقاط... حتى نستطيع قراءته وانت عارف نحن ناس كبار في السن والقراءة اصبحت لنا مشكلة ومتعبة.. وتفضل بقبول فائق شكري وعظيم تقديري..


<br>

محمود منصور محمد علي
مشرف المنتدى العام و مصحح لغوي
مشرف المنتدى العام و  مصحح لغوي


الرجوع الى أعلى الصفحة اذهب الى الأسفل

رد: سعاااال... للجميع ...

مُساهمة من طرف عثمان محمد يعقوب شاويش في 31st يناير 2012, 14:15


العمده ... الراقي الحااااضر شكراً لك دائماً أيها الكنز الثمين ...وربنا يحفظك لنا ....

وملاحظتك في محلها فعلاً الخياب كثير ... وفي ناس ممكن نجيبم بالخانون .... وتسلم أخي : فيصل ...

عثمان محمد يعقوب شاويش
مشرف منتدى شخصيات من ابى جبيهه
مشرف منتدى شخصيات من ابى جبيهه


الرجوع الى أعلى الصفحة اذهب الى الأسفل

رد: سعاااال... للجميع ...

مُساهمة من طرف عثمان محمد يعقوب شاويش في 31st يناير 2012, 14:31


أستاذ / محمود . بالجد أنت إضافة حقيقية لهذا المنتدي الجامع ...وبأسلوبك المميز ... ومداخلتك بالجد بناءة ولك التحية ...

عثمان محمد يعقوب شاويش
مشرف منتدى شخصيات من ابى جبيهه
مشرف منتدى شخصيات من ابى جبيهه


الرجوع الى أعلى الصفحة اذهب الى الأسفل

رد: سعاااال... للجميع ...

مُساهمة من طرف عثمان محمد يعقوب شاويش في 31st يناير 2012, 14:51

المتألق دائماً أخي الغالي : محمود منصور.

لقد عدلنا نوع الخط ... يا رجل يا عجوز ... ودا إعتراف منك ... بس وصيتي ....

سوف أخبرك بها فيما بعد .....!!!؟؟ وأعرف انك ذكي ...... محبتي ،،،



[ وتعرف معظم الكلام بالعامية العفوية .... عشان كدا الشغلة ما وقعت ليك]








حكايات عن الشاعر عوض جبريل ومناسبات أغنياتة
* الشاعر الراحل عوض جبريل من شعرائنا المتميزين، وتظل بصمته في عالم الفن خالدة عبر مر الدهور والازمان، فقد رحل عنا بجسده فقط الا ان روائع اعماله تظل ذكراه التي تركها من خلفه يرعاها حب الناس لها، فقد كان محبوبا من الجميع في حياته وسيظل كذلك، فقد وهب حياته للفن، الا ان ما خطه في سفر التاريخ الفني الغنائي كنز ثمين. وبمناسبة الذكرى الرابعة لرحيله، فقد اقام منتدى فلاح الثقافي امس الاول بقيادة احمد فلاح، حفل تأبين أمه عدد كبير من الشعراء وأهل الفن، أحببنا أن نشارك في هذه الاحتفائية، فكانت لنا جلسة استثنائية مع ابن الراحل البكر اسامة عوض جبريل، وهو بالمناسبة نسخة اخرى من والده، حيث يشبهه كثيرا.. جلسنا لنعيد شريط ذكريات حافل يستحق الوقفة عنده فكانت هذه الونسة.. الدقاقة.

* نتعرف عليك؟
ـ انا اسامة عوض جبريل، الابن الاكبر للراحل، وانا اعيش مع والدتنا نور اليقين ابراهيم شقيقه الشاعر المعروف الطاهر ابراهيم، ومع اخواني مامون وعباس ممثل والنعيم، ولاننا بنتشابه شديد نحن ووالدنا، فمن الطرائف مرة جانا حرامي لما شافنا جري وقال لي زمايلو «البيت دا مسكون»

* كلمنا عن والدك المرحوم عوض جبريل؟
ـ هو من مواليد حي الهجرة «الدباغة» بام درمان 1932م، درس في خلوة الشيخ خليل «ابو روف» وفي مدرسة ابو روف القديمة الاولية، ثم دخل المعهد الفني، وبعدها انتمى لمنتدى ابي روف الثقافي.

* بداياتو كيف؟
ـ من قام وجد اخوالو ناس خالد وعباس اسمعيل يغنوا اغاني حقيبة، بدأ يغني، وغنى لعثمان حسين «كيف لا اعشق جمالك» وبدأ ممثلا مع عثمان تور الجر في مسرحية «دامفيقا» في دور «الملك طلحة» بعدها اكتشفه الشاعر الكبير صاحب «الفينا مشهودة» جد عبد العزيز العميري الشاعر عبد الحميد اب شنب، ورعاه مع رفيق دربه ابو قطاطي، بعدها حس انو ممكن يكتب شعر ويلحنه ويغنيه، وفعلا غنى في حفلات الحي، وعشان يجود مشى قعد مع عبد الرحمن الريح في بيتو في فريق العرب اكثر من خمس سنوات، عشان يتعلم منه، بعدها بقي يغني مع زميله في مهنة «البناء» الفاتح حاج سعد عازف العود المعروف.

* أول اغاني كتبها وغناها منو؟
ـ اول اغنية «لي حبيب شاغل بالي دائما محطم آمالي.. لي حبيب محروم منو لي زمن بسأل عنو» وغنتها الفنانة فاطمة الحاج، واول اغنية من كلماته والحانه هي «ورد الغرام» سجلوها في الاذاعة سنة 1949م.

* بعدها كتب شنو؟
ـ كان معجبا بحسناء في الحي هي ملهمته والسبب في كل اغانيه.. كان اهلها صعبين جدا كانوا مانعنو يشوفها ورفضوا قام كتب اغنية:
«كل ما سألت عليك صدوني حراسك
ردوا الجواب قاسي مع اني من ناسك» وغنتها فاطمة الحاج وكانت في ثنائية بينها وبينه.

* غير فاطمة الحاج غنى ليه منو؟
ـ لاقي الفنان احمد الجابري في حي العرب بغني شرقي، كتب ليه اغاني بنفس السلم الشرقي، وغنى ليه «اسمر يا اسمر يا سكر» و«الشغل بالي انا بريدو كل افكاري» و«شغلني ما انشغل قلبو» لغاية ما سموه بشاعر الانشغالات وغنى ليه «شال من الحمامه وشيها» و«ناس الحب» و«كيف تخلي الريد» والاغنية الكتبها لي ملهمته «حبيبتي بت مصطفى» ولما غناها في الاذاعة حولها لي «حبيبتي بستلطفها ما داير زول يعرفها». وبرضو غنى ليه الفنان حميدة محمد سعيد «انا حبيت الجمال لا تلمني» والفنان رمضان حسن «الصباح الزاهي»

* بعدهم غنى ليه منو؟
ـ كان الوالد جالسا بمنزل الفنان رحمه الله الشيخ عم الفنانة عابدة والفنان اسامة الشيخ بود نوباوي بحي الجبلاب، كان معاهم السماني فضل الله والد الفنان عاطف السماني ووالد الحكم درمة وغيرهم في جلسة دوبيت، منها اكتشف الوالد الفنان بابكر ابراهيم ود السافل، وحوله من الدوبيت للغناء، غنى ليه «يا ماشي لي ام درمان سلم على الناس الحنان» و«ولف يا لساني شكر فني» و«تعال عزيني تعال سليني ما دام النوم طار من عيني» و«يا شباب ود نوباوي».

* متين بدأ يتعامل مع الفنان ترباس؟
ـ جاءه محمود فلاح في البيت قال ليه يا عوض جبريل انا اح اسمعك صوت جديد جميل جدا اسمه كمال ابراهيم سليمان. وفعلا غني ليه ترباس: «هلا يا هلا» و«ضفاف القاش» و«كفاك ما تبكي يا عيوني اتاريهم نسو الريدة» ودي كتبها لما جابو ليه خبر رحيل صديقه الفنان حميدة. وأغنية «حني علي يا ستي الحاصل سببه انتي» وستي دي قاصد بيها الدنيا. واغنية «بقليبك تقول لي تعال وتعال.. بي عيونك تقول لي لا ما في مجال» ودي كتبها في باحثة اجتماعية كانت بتزوره وانقطعت عن زيارته. ولحن ليه أغنية التجاني حاج موسى «أظلم من ظلم».

* مناسبة أغنية «ما تهتموا للايام» شنو؟
ـ ايام السيول جاء لقى بيتنا واقع شالوا السيل، ووجد زوجته تبكي قال ليها في الحال في نفس اللحظة:
«ما تهتمي للايام ظروف بتعدي.. طبيعة الدنيا زي الموج تجيب وتودي.. مصيرو الزول حياتو يا ما فيها يشوف» ولما غناها ترباس في سجن كوبر للوزير عمر الحاج موسى قال ليه عممها، بقى الشعب كلو يغني معانا ما تهتموا للايام ظروف بتعدي.

* و«سيبني في عز الجمر» مناسبتها شنو؟
ـ كانت الدنيا عيد وظروفنا صعبة.. الوالد كتب قصيدة لترباس قال ليه «ما تسيبني في عز الجمر وانت من حولي بتمر.. وانت عارف انو جيبي فات حد الصبر» بعدها اتعدلت.

* أغنية «مع السلامة» قصتها شنو؟
ـ كان معجبا بفتاة جنوبية ويريد الزواج منها، الا انها رفضت وسافرت السعودية، وهو في المطار كتب الاغنية التي يغنيها محمد احمد عوض:
«مع السلامة يسعدني انك تذكريني وعني دائما تسألي» وغنى ليه «الجابوها رقصت حلاتها».

* غنى ليه منو تاني من الفنانين؟
ـ بادي محمد الطيب «ست البنات الضوت السهلة» وخلف الله حمد «الليلة وين يا عيني سهر الليل والنوم ابي لي» وعوض الكريم عبد الله «ام ضي» وعبد الله محمد «الحنين البي ليه ما قدروه العمر من وين بشتروه»، ودي كتبها لي صاحبو اثناء ما بحكي ليه في قصتو مع واحدة رافضاه، في ورقة سجار، و«لما تنسونا يبقى ايه فاضل يا حبايبنا» و«حليل زمن الحنان يا با تسيل دمعة وتقيف دمعة». ولحن ليه اغنية الشاعرة سمرقندية «قدر الزمن» و«شغل القليب الشوق على الزول البحن» والامين عبد الغفار «بريدكم يا الما بتلاقوني لو مرة جاملوني» ودي لما مشى بيت عرس وما عرفوه اول ما مسك المكرفون طوالي قالها بي لحنها.

* هنا توقفنا لنستمع لفاصل من اغنياته قدمها محمود علي الحاج، وبعدها سألته عن أغنياته.. فرد محمد قائلاً:
ـ كثيرة منها «بقيت ما زي زمان ما كنت بتزورنا وتزورنا وتسعدنا يا أمل الزمان» و«عمري ما جيتك اعاتبك جيت اخاطبك انت طيب واصلو تجريح ما بناسبك» و«لو بتعرف يا المسافر» كتبها لقريبته سافرت بره و«سبب الريد عينيك وعيني» و«سمير القلب الريدة ما بالغصب» و«حاسب ضميرك يوم لو كنا غلطانين نقبل نشيل اللوم» ودي كتبها لما اختلف مع قريبو في ميراث.

* ما هي مناسبة أغنية «الجميل السادة»؟
ـ يوم جاي من الشغل في الحارة الرابعة لمح حسناء قال ليها سلام، لانو كان ما لابس نظيف ما ردت عليه، قام كتب الاغنية دي لابوعركي البخيت.
«الجميل السادة وضاح المحيا، التفت يوم شفته، ما قبلان تحية.. من دلالو ولا مالو» ومن الطرائف أن صديقه ابو قطاطي قال ليه «مالو؟.. انت ما عارف مالو؟ اتخيل الحبيب يلتفت ويلقاك في وشو عاوز يرد ليك التحية؟». ويوم شاف الراحل ثوب واحدة في حي العمدة فكتب: شفت التوب وما لاقاني اجمل منو.. دا حالتو التوب سيد التوب يكون كيفنو» برضو لابوعركي البخيت.

* تاني اتعامل مع منو من الفنانين؟
ـ ثنائي الدبيبة «دمك شربات يا رنا» ورنا دي طفلة الفنان ترباس، وتيمان عطبرة «المابتلاقينا» و«عشان بنريدو» و«تقوم بينا العربية تودينا للسادة» وعبد الوهاب الصادق «صرف النظر عني» وللشيخ شمبات «حب العنب» وخليل اسماعيل «طريق السعادة» و«الحاج عبد الحميد «شتلوك وين يا عنب» وابراهيم حسين «منك الله لي» اضافة لفرقة اولاد البيت والشوادي والاصائل.

* توقفنا نستمع لغناء الفنان خالد نحل.. سألته عن الاغاني الخاصة بعوض جبريل فقال:
ـ اغنية «الاكسير» و«البريدو قابلني تاني هيج عواطفي وحرك جناني»

* الراحل اتعامل مع منو من الفنانين الشباب؟
ـ مع وليد زاكي الدين وجمال فرفور «هوي المحبوب المني شغلني» و«الشال قلبي وسلا اخاصمو ولا لا» ولانو كان صديقا لعبد العزيز والد الفنان محمود، لذا اعطاه اغنية «سبب الريد» و«حبك يا جميل» والاغنية التي كتبها لوالدتنا رفيقه دربه «لو تعاين ليها تملأ ود عينك».

* ومن المطربات؟
ـ اكتشف الفنانة حنان عبد الله «بلوبو» واداها زمان «حمادة» و«المدينة عرب» والآن «لي ايام ما بلاقيني» ولما كانت مريضة ما عرف يشيل ليها شنو.. وهو في الطريق لي بيتها الف اغنية «من الناس ومن عيونها وانت سلامتك يا حنونة». وغنت ليه قسمة ونبوية وزبيدة وسمية حسن وعابدة وماجدة الصافي «يا قمر لا» وهاجر كباشي «سيروه» وندى القلعة «البريدو الشوق كتير».

* توقفت مرة أخرى استمع لكلمة الشاعر تاج السر الحسن وأحد اصدقاء الراحل ومحدثي.. ثم سألته عن الوقت البألف فيه قصائده فرد:
ـ ما عندو زمن معين، يكتب وهو ماشي او واقف في العربية او اثناء ما هو شغال. ومن الطرائف القديمة انه كان في حفلة في ام درمان حي الكبجاب بالفنانة الرحمة مكي، واثناء اللعب حصلت شكله وضربوا الفنانة بالكراسي، تاني يوم الراحل جاء سايق عجلة وجدها متألمة، سألها فحكت ليه الحصل في ذات اللحظة كتب الأغنية المعروفة:
«الصبيان الجروا سابوا عروضهم وهملوا يا يمة ساعة الضرب بتحملوا»

* هل كان بيقبل لما يسخروا من شعره او من شكله؟
ـ ما بزعل.. لكن يوم الشاعر ود البنا جاء ووجد الفنانة فاطمة الحاج بتغني «يستحيل صدك لأني حبيتك» و«انا ما شفتو ورد الغرام» قال ليها خليتيني اتعاملت مع منو غيري؟ قالت ليه: مع عوض جبريل. قال ليها «شعرو شعر شيطان ووشو وش شيطان» قام زعل وكتب قصيدة رد فيها على الشاعر.
* وزعل لما الفلاتية قالت انو «شين هو والسر قدور»؟
ـ لا لأنو المقصود قدور.. ودي طرفة قديمة يحكيها الشاعر السر قدور بأنه في خمسينيات القرن الماضي كان يسكن بحي البوستة بام درمان فكتب اغنية:
«يا حبيبي نحن اتلاقينا مرة.. في خيالي وفي شعوري ألف مرة». واعطاها للفنانة خفيفة الدم المرحومة عائشة الفلاتية، الا انها اهملتها وطالبت بادخال بعض التعديلات، فلما زهج منها اعطاها لجاره في الحي الفنان المرحوم العاقب محمد الحسن الذي لحنها وغناها، وتقبلها الناس ووجدت رواجا، فزعلت الفلاتية جدا.. ولما قابلت السر قدور في الاذاعة قالت ليه: «داهية تاخدك ـ تخمك ـ انت وعوض جبريل»..!! ضحك السر وقال ليها «عوض جبريل مالو» قالت ليه: «ما شين زيك».

منقول

عثمان محمد يعقوب شاويش
مشرف منتدى شخصيات من ابى جبيهه
مشرف منتدى شخصيات من ابى جبيهه


الرجوع الى أعلى الصفحة اذهب الى الأسفل

رد: سعاااال... للجميع ...

مُساهمة من طرف محمد قادم نوية في 31st يناير 2012, 15:27

سلام ياعم شاويش اخبارك شنو وكيف برج المملكة المتاخم ليك في حيّك الراقي "العليا"
بصراحة فتحت نافذة مهمة وفيها أسئلة مهمة ...
لاشك في إن هذا المنتدي أصبح ملاذ لنا جميعاً وظل لنا كظل شجرة نتكئ عليها وخّفف علينا تعب المشغوليات .كما خلق لنا نوع من التواصل والتعارف علي بعض أبنا الحباك المنتشرين في كل بقاع الدنيا ..صحيح في الأيام الأخيرة حصل بطء من الاعضاء في المشاركات وأنا واحد منهم والسبب هي مشغوليات الحياة ..نأمل أن نراجع أنفسنا جميعاً ونخصص ولو بالقليل من وقتنا ونقدم الأفضل لهذا البيت الكبير؛كما نأمل حضور كل الذين غابوا لفترة طويلة ونامل مشاركاتهم الفعّالة

محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: سعاااال... للجميع ...

مُساهمة من طرف عثمان محمد يعقوب شاويش في 31st يناير 2012, 15:31


تسلم الذووق ول نوية ... وشنو يعني منتظرين زيارتك ...

ومنذ العيدين السابقين ...

وأتمني لك الصحة والعافية والسعاده ...بقدر قامة قلبك الكبير ... محبتي

عثمان محمد يعقوب شاويش
مشرف منتدى شخصيات من ابى جبيهه
مشرف منتدى شخصيات من ابى جبيهه


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى