ابوجبيهه

ريحة البن (منقـــة تكنــــــــو .... والمنقه دبنــقا)

استعرض الموضوع السابق استعرض الموضوع التالي اذهب الى الأسفل

ريحة البن (منقـــة تكنــــــــو .... والمنقه دبنــقا)

مُساهمة من طرف الفاتح محمد التوم في 8th أبريل 2012, 15:19

احسن ليكم تمشوا تجنو
ومرة تجربوا منقة تكنو
وانا عارفكم مما تسمعوا سيرة المنقة
الواحد يقول في سرو المنقة دبنقة
ذي الدنيا منقة تكنو دي حاجة عجيبة
لونا يحير مابين اصفر ومابين....اصفر
عرفتوا الحاصل؟
ولا اقول ليك لونا مكسر
ذي التلج العايم فيها وقرب يسكر
منقة قواما مرسوم رسمة
منقة تشوفا تقول منقسمة
منقة تساسق جوة عروقك ودمك
في الشريان تتبخر لما تحلق
في الكون بسمة
منقة تكنو تشوفا تعشرق
وقلبك يدقدق
ونفسك تحرد لون المنقة
وطعم المنقة الفي غير تكنو
لكن استنوا
قبل ماتجنوا وتمشوا تجربوا منقة تكنو
بدور اسألكم
حصل جربتوا المنقة تقيلة وسكر زايد
حصل؟؟؟؟
اها لما تكون المنقة تقيلة
ماتتكبكب وتحرج نفسك
وتعمل إنك ماشي تشيلا
اقعد قبلك وأملا عيونك
اصلو في تكنو المنقة دبنقة
منقة عجيبة ذي الدنيا
منقة_الجامعة دي مابتجيبا


*****.....*****

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف اقبال عبداللطيف في 8th أبريل 2012, 17:06

قبل ماتجنوا وتمشوا تجربوا منقة تكنو
بدور اسألكم
حصل جربتوا المنقة تقيلة وسكر زايد
حصل؟؟

تذوقناها الآن ايها الاديب


لا اعرف شيئا تواطأ الناس على هضمه وزهدوا في انصافه مثل الحقيقة
avatar
اقبال عبداللطيف
مشرف ركن الاسرة
مشرف ركن  الاسرة


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف الفاتح محمد التوم في 10th أبريل 2012, 11:15


منقة تساسق جوة عروقك ودمك
في الشريان تتبخر لما تحلق
في الكون بسمة
منقة تكنو تشوفا تعشرق
وقلبك يدقدق
ونفسك تحرد لون المنقة

تسلمي أختي إقبـــال ....
للمرور,,,,,,,,,,,,,,

منقة أبوجبيهه تهادت ودخلت الينا ...
جابها لينا أخونا العزيز ابو المهند
وفي الكرتونه أوراق من شدر المنقة
أكلنا ورددنا
يالون المنقة ,,,,ياشايل المنقة ,,,,

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف محمد قادم نوية في 10th أبريل 2012, 11:42

ما أبهاك يا انيق ..كلمات رائعات رجعنا معها لي خور البطحاء وجناين الكور وابوعروق
للمعلومية: مازلت منتظر (عقاب)الكرتونة كان ناس (سارة)خلوا فيها باقي
تحياتي؛؛؛؛؛؛؛؛؛؛؛
avatar
محمد قادم نوية
مشرف منتدى الصوتيات
مشرف منتدى الصوتيات


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف الفاتح محمد التوم في 10th أبريل 2012, 13:38

تسلم محمد نويه .....
البنيات زرعن " أولاد المنقة " قبل ينشفن
غايتو أنا دسيت ليك شوية نبق ومعاهو لالوب واكيد حتصل اليك ومعاها شوية كرمدوده لازم توصلها للشايب عثمان شاويش ,,, لزوم انخفاض الضغط وكده.....
تحياتي ياغالي .... وبالمناسبة صراحة محتاجين نشوف بعض قريباً,, وسيكون قريباً ان شاء الله
خالص الود

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف الفاتح محمد التوم في 10th أبريل 2012, 19:35

عوداً لعنوان البوست أعلاه.....
فإن حادثة كرتونة المنقة ( وارد أبوجبيهه) والتي فيها تنسمت ذيما قال العزيز ول نوية صوت خرير مياه البطحة وغضب جالي عندما يلتقي بالبطحة ممثلاً لوحة غاية في الجمال ,, منقة كور قــادم وغيرها من الصور أثارت فيّ الشجون ,,, وانا حضور في رمضان الفائت في البلد كنا نحضر برنامج " ريحة البن ".....بعد صــلاة التراويح ,,,, والذي يقدمه الشاعر الفخيم الهادئ الرقيق محمود الجيلي في حضور للشعراء محمد المظلي ، أحمد البلال ، المسلمي ، هتان ، عمار ، إيمان متوكل ، إسلام النحاس ، منتصر الفكي محمد السر ، محمد المهندس ، حسام .......إلخ ,,,برنامج جميل من حيث الفكرة والبساطة في طريقة التقديم ,يقدم مجموعة من الشباب تطرح من خلاله عبر الحلقات أفكار مختلفة لكل حلقة بموضوع شعري معين ,وقد أثبت البرنامج أن الشعر ما زال بخير , مجموعة من الشباب يكتبون الشعر بأنواعه المختلفة في الشعر العامى والعربي ,,مجيدون في كتابة الشعر ,, كانت كتاباتهم جميلة جداً ,,



أعلاة حلقة (23) رمضـــان ..... كانت جميلة,,, فيها قفشات ,,, أدعوكم للمشاهده
ملاحظة : بعد نهاية الفيديو ..... أكتب جملة ( ريحة البن ) في المستطيل أعلى الفيديو واضغط ( ENTER) تظهر لك الحلقات متتالية... شغل وتأمل جمال اللمة في ريحة البن ,,,
مع خالص الود والإحترام .......

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف فيصل خليل حتيلة في 11th أبريل 2012, 08:55


خرج فيصل خليل من الشبكة و لم يعد حتى الآن الاوصاف على المنتدى السياسى

تحايا
avatar
فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

مالو السلام بقي رفعة ايد ؟؟؟؟

مُساهمة من طرف الفاتح محمد التوم في 12th أبريل 2012, 19:54

هذه القصيدة للشاعر الأستاذ محمدالامين محمدالحسن .......... كان ضيــفاً خفيف الظل على هذا البرنامج في رمضان الذي كنت حريصاً على ألاّ تفوتني منه أي حلقة .... وفي هذه الحلقة أبدع شاعرنا وهو يحكي عن " زمان " شعراً وفناً وسياسة...ألاستاذ محمد الأمين من جيل عثمان أحمد سعيد ومحمد الحسن سالم حميد هذه القصيده جاراها الأستاذ عثمان أحمد سعيد والأستاذ محمد اسماعيل الرفاعي ......
قصتها والتي سردها في نفس الحلقة ,, مرّ عليه أحد الذين يعرفونه وسلم عليه من بعيد,, وشاعرنا تسكنه اللهفة للقياه ....وصورة أخرى تلت هذا الموقف وهو في ذات الجلسة عن إمرأة كاسية عارية لا لتبرجها ولكن ملابسها تمزقت ... شبه حافية بسفنجة مقطوعة لضيق ذات اليد ... أتت في حياء تشحد ,سعر صورة الأشعة لإبنها في المستشفى .... مدت يدها للشاعر وحال الشاعر ليس بأحسن منها ... " خالي الجيب إلاّ من أبو النــوم " ,, تأثر لهذا الموقف ,, طلع الكلام شعراً مصحوباً بصور مجتمعية حضرت عند النظم ...

مالو السلام بقي رفعة وسلامنا كان بمقالدة؟؟
ومالوالكلام بقي من بعيد وكلامنا كان بمواددة؟؟
ومالا المسافة بقت تزيد وكتوفنا كانن بحدا؟؟
وينو الزمان جواك بقيد .. وينا الحروف الحاشدة؟؟
ما عندي شي وفوتيني امشي اتحركي.. ما عندي شي
ما عندي ليك غير الورق وورقي انحرق
وما عندي ليك غير العرق وعرقي انسرق
وماعندي ليك غير العمر شوفتيه اندلق.. وباقيه المعاك
ما عندي ليك غير الكلام سمعتي ليك ابكم نطق؟؟
ماعندي ليك غير الدموع..
ياغاليتي وميسي البعيد وحصاني ما بكسب سبق
وماعندي ليك غير الدموع وعمرو الدموع ما بتكفي شق
ماعندي شي وفوتيني امشي اتحركي..
انا ليك بهيم غيبت شمشي اوعك تعانديني وتقيفي
اوعك تلمي ملح دموعك وفوق جروحي جداد ترشي
انا صبري ليك زي صبري فيك.. وانا صدقي ليك زي حبي فيك
وانا خوفي يوم ما اهون عليك
وخايف افوت.. وتشيلي حزنك فوق دروب الناس تخشي
ياالصامدة زي جبل الصوان اتفتت الحجر الاصم..
يا حليلو مااتكشف غطا
زولك فتر لامن عتر تعبت خطا..
وتورك وقع بعد النطاح كترت موتا وحال الردي..
وعيونو غامت وغمضت وطرش اضنيهو ما بتسمع ندا..
لا بنهدي ولا بهتدي ولا دار يكوس درب الهدي..
داير يفوت وقبال يفوت داير يكوس تمن الكفن..,
يحفر قبر.. يعرف تربتو يحددا
ويدفن سلام بمقالدة..
ويدفن كلام بمواددة..
ويدفن كتوف كانت حدا
ويدفن وهج روحو.. وجمرات ريدتو ليك.. يذرف دموعو ويخلطا
ماعندي شي فوتيني امشي اتحركي..
ياالصامدة زي جبل الصوان وزولك دا خايف..
خايف عليك من المبيت في الارصفة..
وخايف عليك من الكفاف.. خايف عليك من الحفا..
وخايف عليك من المدسدس جوه لسع في الخفا
ماعندي شي.

: اوعك تخاف انا ايدي في ايدك اتي..
واوعك تخاف..
قالوا البخاف من الكلاب بتهوي فيه.. اوعك تخاف
واوعك تخاف..
قالوا البخاف من الحصان ما بيمتطيه..
واوعك تخاف..
قالوا البخاف من الضلمة بينتهي..
واوعك تخاف..
قالوا البخاف من الدروب بجي منكفي..
انا ما بخاف من الكفاف وكتين ارشرشو بعفاف..
وانا ما بخاف من العري وانت الضرا والسترة والبيت واللحاف..
وانا ما بخاف وانت البأمن من يخاف..
وانا كيف اخاف؟ وانت الوف . وانت الوفا.. وانت الوفا..
وانت الصفا وانت الكفاف

: دي توبا يامسكينة ما بتضاري زيف وتجيب رغيف..
دي توبا يامسكينة ما بتجيب دوا ويقيف نزيف
وانا زول ِبِرد.. كتلة ومصبرة في تلج..
لا ايد بترعش لا قليبي بيختلج..
وتقولي لي انت الوفا وانت الصفا وانت الكفا؟؟
من وين اجيب ليك الدفا؟؟
ومن وين اجيب ليك الدفا؟؟
ومن وين اجيب ليك الدفا؟؟
وانا وانتي يا وجعي اللطيف زولين رهاف
********.........********

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف الفاتح محمد التوم في 12th أبريل 2012, 20:09

مالو السلام بقى رفعة إيد ؟-محمد إسماعيل الرفاعي
( رد على الأستاذ محمد الأمين محمد الحسن )

الليلة جيت بي إنفعال
تبدي وتعيد نفس السؤال
مالو السلام بقى رفعة إيد ؟
تتباكى زين .. تلعن أبو الزمن العنيد
الخلا بين الناس يخش طاعون فريد
أو قول كمان شيطان مريد
قيد نفوس كل البشر
بي العولمة وسنّالو فينا نظام جديد
ما فيش ولا زولاً نفد
أو عن طريقو قدر يحيد
فيهو القلوب يا خلي
بس زي الحديد
أو قول كمان إمكن تفوت
جبل الجليد
إتنكّرت لي كل شي
واتناست الماضي التليد
زمن البيوت حوشاً كبير
مفتوح علي الجيران جميع
من دون فرز
والناس دي بالنفاج
تخش .. تمرق .. تخش
زي ماتريد
وكان جاك ضيف عز الهجيع
تدخل علي جارك تخش جوّة التكل
من مشلعيبو تضيف علي العندك تزيد
جيرانك الجمبك يجوك
يآزروك ويكابروك
يآنسوك ويشرفوك
واقفين معاك وقفة رجال
أخوان عديل
ما بس جوار
تحلف تقول ..
ياهم ولاد أمّك وأبوك
ولساكا دار تسأل تقول :
مالو السلام بقى رفعة إيد؟
ما داكا كان زمناً جميل
راقي وأصيل
كان فيهو يوت
بحلا المقيل
جلسات مشاط
لي كل حريم الحلة
يتلمن علي الراكوبة
أم ضلاً وريف
وتلقى البنابر والبروش
مصفوفة في ضل الضحى
وتلقى الضحك والقرقراب
بي إلفه تب مافيها زيف
والجبنة ديمة مدورة
فنجانا أبيض وجـد نضيف
والصاج مولع بي هناك
الكسرة بس .. قول يا لطيف
بتشبِّع البايت القوى
وما بتلقى زول طاري الرغيف
وحبوبة أم ظِلاً خفيف
لاما الجهال
تديهم القول الشفيف
تسقيهم الحِن اللطيف
( حجيتك ما بجيتك)
و(يا قمرا أقلبي السنسني الحمرا)
ولازماً تضيف .. حكاية ( اللص الظريف)
ود أمبعلو ده مامخيف
وهاك يا حكي
لا يوم بتفتر لا بتقيف
ويمتد حبل الإلفة لي وكت الأصيل
يومي الشمس قبال تميل
يتغدو بي كسرة وملاح
السرة نادت ..
يا .. سماح
سويلنا شاي بي هبهان
موزون مدنكل شاهي صاح
وكان للبن خشي المراح
تلقي البهم تريانة تب
أحلبي لا مِن تفتري
الخير وفير ..
بكفينا حت شاي الصباح
ولساكا دار تسأل تعيد
نفس السؤال
مالو السلام بقى رفعة إيد؟
وانحنا في الزمن العجيب
زمن الجفاف غمر الخصيب
زمناً بضيق فيهو الرحيب
زمن السفر بقى بالبيوت
زمن الكلام من غير خيوط
زمن البشر سادا البيوت
زمن المعايش اخطبوط
زمن الدشوش
زمن الكريمات والرتوش
الحلوة بيها اتمكيجت
واتعددت فينا الوشوش
زمن الفقر مفروض فرض
زمن الخلوق دار تنقرض
زمن البيوت عدمانه حتى من القرض
زمن الغرض أصبح مرض
كل البشر مرقت تفتش لي الرزق
كان تلقى سترة وتلقى قوت
يسند رويحه قبل تموت
وجواها كم خاطر بجوط
ماهو الزمن
زمن الفقُر
زمن الجميع صار منبهر
بالعولمة
مسكول .. مسج
إيميل ..وشات
وكل الخلق عملت شتات
وفي السكة تلقى الإنفلات
زمن المحنة
بقت محن
زمن الركام
زاد الإحن
زمن العلاقات بالرتب
زمن الضرائب والعتب
زمن العجايب والعجب
زمن الفرح غاب واحتجب
الإلفه بينات الخلق
حّرم بشوفها كضب كضب
والبسمه مابتمرق نقيه
من القلب
كان شفتها .. تحلف يمين
مرقت غصب
وانحنا يا خلّي العزيز
لامن لقينا الحال صِعِب
فزينا من بؤس البيوت
وسكنا في بيت القصيد
ولساكا دار تسأل تقول:
مالو السلام بقى رفعة إيد ؟
وبعيدو ليك قول ود سعيد :
( مش تحمد الله في رفعة إيد )
************************************************
وأقول لصديقي الوريف "بقول الشاعر الرفاعي في رده للأستاذ ...محمد الأمين "

وانحنا يا خلّي العزيز
لامن لقينا الحال صِعِب
فزينا من بؤس " السياسي"
وسكنا في بيت القصيد

تسلم عزيزي فيصل للمرور....
**************************************************



الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف الفاتح محمد التوم في 13th أبريل 2012, 21:18

يا ضل مفروش
جوات الحوش
مقشوش ونضيف
من قول الزيف
مرشوش بى مويه ريد وحنان
والبن في النار
وتهب ريحتك
وانا راسي يدوش
متقريف ليك
والمطره بدت في ذاك الحوش
المامعروش.......

*********..........**********
(( رد الأستاذ ... عثمان أحمد سعيد لصديقه الأستاذ محمد الأمين " مالو الســلام بقى رفعة ايد "))

قالو السلام بقى رفعة ايد
والناس ولا هماها شي
قالو المحنة بقت بعيد
درب الوصال ما بتمشي
ما عندو شي فوتيهو امشي
واختشي ... ما عندو شي
ما تمدي كفك للهوان
دمعك اكان سال قشقشي
كفتني يا زمني اللعين
خلي المواجع تنتشي
ما عندو شي ....
وينك ايا الزمن الحلال
والفرحة وين هملتها
والطيبة من جوع الطمع
لكت الصبر كملتها ....؟
مخلايتي ماليها الفراغ
في جوفه موج الريح سها
ما عندو شي .....
وين مسرب الشوق اللي كان
وين المواعيد الزمان
وين القعاد واللمة والناس الحنان
اافاطنه جاياك بالدرب
ود ام حسين طقوهو عين
قالولك المهدي انفشخ
جاب للسكينه الماهلة توب
توب اب قجيجة الما خمج
والسره ريحة وسبحتين
ظنيتو نفعو الاغتراب
ولا السفر ماليهو دين
ولدي الموطوفش ما رجع
دحين اافطين شفتيهو وين
ظنيتني شفتو رهاب رهاب
تاكل علي طرف الفريق
دكان سعيد سوالو باب
والشفه قبضت صرفته
جابته زير
واديته علبة صلصتي
سوته كوزا" للشراب
تك ااغنم
جر ااكلب
ما شفتي ديك الماهله كيف
حفرلي بي كراعو الدرب
ما عندو شي ..
فوتيهو امشي واختشي
ماعندو شي ...
والساقية لسة مدوره
والفانيه رغم الاختلال
لازمن وعودة نجرجره
طاحونة الجوع ما انتكت
والعيشة فوق المقدره
ما عندو شي ........
ما شين ولا ماشي الفقر
واقفين ولا وقف العمر
تاكلين علي حيط الهوان
راجين صفوف الخوف تمر
يمكن شبابيك اليقين
تحجانا بي بطاقة صبر
والناس توسع في الطمع
والدنيا اخرته فد شبر
ما عندو شي .....
يا الجايه من زمني الحلال
ماعندو شي
يا الصامده رغم الاختلال
ما عندو شي
يا المارقه تندهي للبيوت
والحيطة حاجباهو المنال
ما عندو شي
يا صابره والجوف ما صبر
لا تقودي ضيك للضلال
ما عندو شي
ان تاورك هم البيوت
الباري ما برد السؤال
اطريهو شان يقدل رضاك
وتخبري انو الضيق حلااااااااااااال
رغم اكتمال الخوف جواك
ما ساقت الريح الجبال
والطير اكان من خوفو طار
ما فرق الصفق النبال
ما عندو شي
يا الجايه من زمني الحلال.................
خابراهو ضيقك من وساع
هم الصغار ما بختشي
ما عندي شي
*******

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف الفاتح محمد التوم في 8th أكتوبر 2012, 14:17

...... محمد المظلي ...........
اليوم فامضي إذ نودع عشقنا
وخذي متاعا من بكائك وانسني
كتب الرحيل على السطور مصيرنا
فاخططي دمعي في الدفاتر وارثني
وخذي الظلام بإصبعيك تكحلي
واطلي الأظافر بالوداع تزيني
ما عاد في نزل الفؤاد أسرة
تسع الدموع مع الجروح لتسكني
الليل آذن أن يكبل صرختي
والرمل أقسم أن يزخرف مدفني
لا تعتبي، فالموت ما زاد الصبور
مشقة، فمن سواه يريحني؟

ظلم هوانا في الصدور وظالم
فمتى يزاح عن العرين لتسعدي
قد راق لي همس الأحبة جوفنا
إذ قلت شعري في الخفاء ومسردي
قد طاب بي عرش الخيال حقيقة
إذ كنت درسي في الغرام ومعهدي
قد ضاق بي هذا الدخيل ولم أعد
أقوى العراك مع الحياة بمفردي
حقا يئست ولم أرد في الكون لي
غير الرموس وبضع صخر مرقدي
رغم الرحيل وقد توافد بيننا
يصطف جيشا بالوفاء تجلدي

الليل أقبل ما يزال الصبح حيا
والبرد يضرب لا تقاومه يداي
الوشم ثار قد استشاط بساعدي
والروح تخرج بالمسام كعزف ناي
قد لاح لي ألفا طريق للفضاء تحثني
"ألصق خطاك على خطاي"

والقلب أحسس موتنا وسط المريئ
بانت لنا أشكال شتى من رداي
والآن أخطو رغم ضعفي ثابتا
مودعا فرحا أعبر عن رضاي
إني أسير إلى مماتي راغبا
فلتشهدي إني أموت على هواي
*******...*********

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

قصيدة ابن عبقر........ المظلي

مُساهمة من طرف الفاتح محمد التوم في 8th أكتوبر 2012, 14:26

هو شاعر
عبد المداد كلامه وقتاله
كالسيف إن شهد الوغى متأرجحا
قطف الحروف يمينه وشماله
ومضى بنثر سعادة فوق الخلوق محبة
فالمد من كف السعادة حاله
والشعر يجري في عروق دمائه
والروح كل في الدواخل آله
الشعر يملئ ملئ حلقه أحرفا
الحرف منها قادر أن يعكس الكون الكبير بوهلة
حتى يصير جنوبه رغم البعاد شماله
أما الغرائب شعره
هو زائر من عبقر ألف الحياة بشعرها
واختار من بين الديار لسانه
فأتى إليه مداعبا
حينا يلامس عقله
حينا يهدهد قلبه
حينا يطير وصاحبا ترك الرداء مكانه
يلقي عليه بوحيه
فيزيد نبض في الأعالي دقه
ويطيح عقل كالرواسي شأنه
ليصير عبدا لا يقاوم جانه

هو شاعر
عشق الجنون بلا تردد قربه
والجن جن بحين طال غيابه
أمر الحروف بأن تكبل بعضها
والحرف ينطق إن فتحت كتابه
ولئن سمعت من القوافي ما حملن عجائبا
لصرخت ويحي قد سمعت عجابه
فيه السماء تناثرت من لهفة
وبه العواطف والغرام تملكا طعما وحسا قد تذوق شرابه
القلب فيه كخيط شمع محافل
حرق الغرام بحسنه رغم الجمال شبابه
فيه السطور كما النجوم مضيئة
كم يا تراك ولست تدري
قد شهدت على السماء شهابه

هو شاعر
بل ساحر
جعل القصائد كالجيوش بخلفه
ومضى يشيد حصنه وقبابه
ودنى لأرض ما تذلل أهلها
إذ خر كل في المجالس سجدا
في حين قال خطابه
إن قام يمشي
إن كان يغفو
أو توسد خرقة
جاء الجماد وكل بحر في الدنا
ليلا ليطرق بابه
إن شارف الحسن الذي عمرا تخبط خلفه
لجثى كمثل مصفد
يرجو الردى وحسابه

هو شاعر
الحب يخنق بطشه إن قد تبين لطافته
والحق مجبول على جسر العبور عبارته
حتى الشعوب إذا تفاخر بعضها
ورد الصبي بفخرها
دوما تلوح كنايته

ركب القصائد مثل خيل مجاهد
فالخير دربه في الحياة وغايته
قلم تراقص في يمينه مرعبا
كالرعد في سود الليالي إن تشيع مخافته
فالصدق يلمع في ملامح وجهه
جتى أنارت بالملامح قامته

هو شاعر
أحيى القلوب بموتها
فدنت إلى فمه الكريم لتصغه وتشاهده
فالشمس في عقر المغارب دارها
والروح في رحم النساء تناشده
لو نام أغمضت الدنا
لو عاد يصحو للحياة مجددا
جاء الصباح يعاوده
فالحور تشكو كثر شوق لقائه
والحبر -يا حسن الزمان بقوله-
والحبر عنه يراوده
ما لاح حسن في البسيطة نيفا
إلا وشعره خلفه يصبو إليه يطارده
مذ كان طفلا بالفراش مدللا
طلت عليه قصائده

هو شاعر
خاف الجناة هجاءه
لو رام شيئا في السماء محله
خوفا وطوعا جاءه
هوت اللغات بأن تطيع أمره
حتى وإن تصر الصباح شتائمه
فالغيم ما فاض اللسان بقوله
أو ما رأيت غمائمه
فيه الرباب إذا تساقط فوقنا
خاط القصيد بيوتنا وعروشنا
وغدا الرذاذ ثيابه وعمائمه
واذا شهدت إذا تغرد مدحه
لرأيت من فمه الكريم حمائمه
في وادي عبقر قد تخالط نسله
جن وإنس أوردا
كل الغريب عظائمه
والكل يشهد حول وجهه هالة
مثل الشموس إذا تلوح وسامته
والليل يخشى أن يزور دياره
إذ قد تضيع كآبته
لو عشت دهرا في الحياة معمرا
ما كنت أنت تشابهه
****.....*****

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف فيصل خليل حتيلة في 8th أكتوبر 2012, 14:33


وانحنا يا خلّي العزيز
لامن لقينا الحال صِعِب
فزينا من بؤس " السياسي"
وسكنا في بيت القصيد

تسلم عزيزي فيصل للمرور....

تسلم يا شهاب و بكل أسف مشغولين من اصحاب الشأن و اولئك اللذين لا شأن لهم

سبحان الله



بــِقـِـيــنــا ضَـــهــَابــا مِـتــل الــزول ضَـريــر وبــِـلــيــِّــد
avatar
فيصل خليل حتيلة
مشرف إجتماعيات أبوجبيهة
مشرف إجتماعيات أبوجبيهة


الرجوع الى أعلى الصفحة اذهب الى الأسفل

مدينة الشعر والجمال ...انجبت كذلك محمود الجيلي ( ريحة البن رمضان 1434هـ - 2013م)

مُساهمة من طرف الفاتح محمد التوم في 28th يوليو 2013, 18:27


التقته: تغريد ادريس : تشكلت علاقته مع الشعر منذ الطفولة فى بيئة شاعرية بمدينة طابت وتفتقت براعم موهبته فى رحاب جامعة الجزيرة وكان من مؤسسى منتدى «ريحة البن» الذى تحول الى برنامج تلفزيونى يتمتع بنسبة مشاهد عالية عبر قناة النيل الازرق التقينا به وكانت هذه المقابلة مع الشاعر والاعلامي محمود الجيلي حول تجربته الشعرية والجديد فى نسخة «ريحة البن» الجديدة وقضايا اخرى..
من انت؟
محمود الجيلي صلاح الدين السماني من مواليد مدينة طابت الشيخ عبد المحمود، درست الابتدائي في القرية اربعين بالفاو، والثانوي في مدينة طابت الشيخ عبدالمحمود، ثم جامعة الجزيرة كلية الهندسة قسم هندسة الكمبيوتر وحاليا مهندس اتصالات.

كيف تشكلت علاقتك بالكتابة؟
الشعر عندنا ممكن نقول وراثة، فموضوع الشعر في طابت ليس بالامر الملفت للنظر لأن بطبيعة الحال كل اهل طابت شعراء وفي عام 1997 شاركت في الدورة المدرسة وتم اختياري من ضمن طلاب الفصل ليس لأنني اعرف كتابة الشعر بل لأنني كنت اجيد الالقاء، واذكر في تلك الدورة المدرسية نلت الميدالية الذهبية في مسابقة الشعر.
«ريحة البن» من منتدى الى برنامج تلفزيوني!!
البرنامج إمتداد للمنتدى الذي أسسه مجموعة من طلاب جامعة الجزيرة، وقصدت ان يكون البرنامج جديدا من نوعه ونافذة للشعر الشبابي في القنوات التلفزيونية، وان يكون مغايرا لكل البرامج الشعرية المعروضة، وبالفعل تحقق الحلم، وتم بث البرنامج في رمضان على قناة زول وكنا نسجله بدون عائد واستضافنا فيه مجموعة كبيرة من الشعراء الشباب، و قد أحرز البرنامج المركز الأول في المشاهدة على كل برامج رمضان في كل القنوات السودانية للعام 2011
ما الذى يميز هذا الموسم الجديد فى رمضان الحالى؟
لقد فرغنا من تسجيل حلقات النسخة الجديدة من ريحة البن التى سوف تبث خلال شهر رمضان الحالى على شاشة تلفزيون النيل الازرق والذى يميز هذه النسخة التنوع الثقافى والفكرى ومشاركة نخبة من الشعراء الشباب من مختلف بقاع الوطن ولاول مرة سوف نقدم قصائد باللهجة النوبية وهناك ضيف فى كل حلقة من الاصوات الشعرية الجديدة وكل القصائد التى سوف يتابعها المشاهدون عبر البرنامج هذا العام تعبر عن ثقافة السودانيين بمختلف تنوعهم وتدعو لنبذ الفرقة والخلافات وايضا هناك قصائد تتناول مواضيع وقضايا اجتماعية.
ماذا عن الشعر الغنائي؟
كتبت عددا كبيرا من الاغاني لمجموعة من الفنانين الشباب منهم «محمد جزار .. حسين الصادق .. أحمد الصادق .. الشاب أمير .. عمر فقيري .. منتصر هلالية .. محمد الكناني .. سودانيز باند .. السودانيين باند .. سودانيل باند .. خالد حسن .. خالد الدوحة .. إجلال البرير .. عادل حسن .. و عدد من الفنانين الشباب المميزين»، ولم اتقيد بنوع واحد من ضروب الشعر، مثلا كتبت ، فصحى ، دارجي ، عمودي ، تفعيلة ، مربعات ، وحاولت من خلالها ان اصنع شخصية محمود الجيلي الشعرية.
٭ البعض يرى بان ريحة البن يميل لقصيدة العامية؟
الشعر بصورة عامة هو لسان حال القبيلة وانا اعمل فى توازن بين اللونين: الشعر العامى والفصيح حتى لا ننسى لغتنا وتكون العربية بمعزل عنا وفى كل حلقة من ريحة البن هناك شاعر يلقى قصيدة بالفصحى.
بنظرك ما مدى نجاح البرنامج ؟
ريحة البن مؤسسة شعرية طوعية وليست مجرد برنامج تلفزيونى موسمى فقط بل منظمة طوعية وقد قمنا بالعديد من الاعمال الطوعية والاهتمام بالشرائح الاجتماعية الضعيفة ونفذنا عدة برامج لصالح دعم الاطفال مجهولى الابوين والايتام.

٭ هل لديكم انشطة اخرى؟
نعم لدينا انشطة ثقافية مختلفة وفعاليات واقمنا عدة ندوات عبر منابر مختلفة منها مركز راشد دياب ومعهد جوته الالمانى بمشاركة شعراء كبار منهم القدال وآخرين.
٭ الدواوين الشعرية ليست لها اي صدى اعلامي وماذا عن آخر انتاج لك؟
حقيقة هذا واقع معاش، بالرغم من ان الاغنية اساسها نص شعري في المقام الاول، ربما يكون الاعلام مساهما في هذه الاشكالية نوعا ما لإفراده المساحات الواسعة للاعمال الغنائية دون غيرها وحتى الآن ليس لدي ديوان خاص ولكني اسعى لاصدار ديوانا لوالدي الشاعر الذي كتب العديد من القصائد، يحمل الديوان اسم شيء من الصفوة وسوف يرى النور عما قريب.
٭ ناس طابت يتهمونك بالتقصير وعدم اتاحة الفرص لشعرائهم؟
هذا غير صحيح والشاهد على ذلك أني استضفت مجموعة من شعراء مدينة طابت الشيخ عبد المحمود وعلى سبيل المثال لا الحصر الشاعرالراحل معتصم محمد سرور.
٭ ما هي خطة ريحة البن للعام القادم؟
سوف يشهد الموسم القادم العديد من المفاجآت وسوف تقدم العديد من الحلقات خارج الاستديو ونغطى كل ارجاء الوطن الحبيب وكل حلقة سوف تكون مختلفة.
٭ تسجيل القصائد الصوتية على كاسيت!

امر جيد، واذا عدنا الى زمن الجاهلية نجد ان القصائد كانت لا تكتب فقط، وانما تحفظ بالالقاء الصوتي ايضا، وهي اصدق وانسب طريقة في توصيل احساس القصيدة للمتلقي، وانا في الفترة القادمة لن اصدر ديوانا شعريا الا ومعه نسخة صوتية على كاسيت واسطوانات.
٭ قصيدة نقاط الزير تحمل الكثير من الملامح، كيف ترى هذه العلاقة؟
بالضرورة لابد ان يكون شعر الشاعر مرتبطا بالبيئة بل يجب ان تكون علاقته اعمق من بقية الناس، لانه يستطيع ملاحظة ادق التفاصيل بعينه الشعرية، فيمدح الصفات الحسنة في المجتمع شعرا، ويستنكر العادات السيئة والدخيلة فيه، وان يمثل بيئته التى يقطنها.
٭ ما رأيك فى الشعر السياسي؟
الشعر السياسي دائما ما يصنف الشاعر بأنه مع او ضد، وانا ارى ان الشعر الوطني هو الانسب في هذا المقام، لأن الدافع الحقيقي لأن تكون مع او ضد هو الوطن وانا بقدر ما اعشق هذا الوطن اكره السياسة.
الوطن فى اشعارك؟
٭ مفردة مميزة اكتب بها ومن خلالها استطعت ان اصل للناس، التجارب، من معاناة، ووجدان، وراحة نفسية، عاطفة، شجن، لوعة، محبوبة، زوجة، صد وهجران، سفر ورحيل، والسودان دفتر كبير مكتوب عليه كل حياتي.

٭ اجمل المقاطع التى كتبتها؟
القصائد كثيرة ولكن من القصائد التى ارتاح لها ونالت رضاء الناس قصيدة نقاط الزير
ياضل مفروش جوات
الحوش مقشوش ونضيف
من قولة زيف
مرشوش بموية ريد وحنان
والبن فى النار وتهب ريحته
وانا راسى يدوش متقريف ليك
والمطرة بدأت في داك الحوش
الما معروش

٭ لو اعطيتك ثلاث زهرات لمن تهديها؟
الاولى الى الوالدة «ربنا يديها العافية» والثانية لزوجتي العزيزة والثالثة «ليك ولي كل من يعرف محمود ويكن له الحب والتقدير».
٭ توقيع؟
اشكر كل من وقف بجانبي وكل طاقم ريحة البن من الشركة المنتجة الى المخرج وشكر خاص الى جريدة الصحافة التي كانت ولا زالت تشكل منبرا مفتوحا للمبدعين، ورمضان كريم لكل الشعب السوداني
************************************************...........******************************************************
تعليقي ........
التحية الى اهل طابت شيبا وشباباً نساء ورجالاً وأطفال ...... تلك النفحة المتفرده بمخرجاتها ..... مدن السودان ذات طابع صوفي هادي  صورة متكررة ترى فيها الود والزهد وتحلق الناس حول التقــابة  وشيخ المسيد بسوطه يسمع ويصحح لمايربوا على المائة طالب .... سبحان الله  هو دثار معظم مدن وقرى السودان ..... ولكن أن  تجد سكان قرية أو مدينة  جميــــعهم .. رجالاً ونساء شيبا وشبابا متعلمين وأميين تجدهم شعراء مجيدين للشعر ورواة فطاحلة متفردين في شتى ضروبه ...شعر المديح  الشعر الغنائي الرثاء ال... الــ...  فهذا لن تجده إلاّ في طابت !!!
لي منها أصدقاء أتخذ من لمتهم متكأ في مســـاءات الضجر وضيق النفس لتخرج روحي متسربلة بجمال لا أحسه إلاّ معهم محلقاً في فضاءات وعوالم لا أحدها إلاّ عندهم ..................
محمود الجيلي شكراً ... كثيراً


 

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف الشاذلي محمد عبدالله ادم في 31st يوليو 2013, 14:30

طابت الشيخ عبد المحمود مهد الشعراء من لدن الشيخ عبد المحمود مرورا بالشيخ هاشم والمكتفي بالله محمد سرور واخوته واعمامه وحتى محمود الجيلي
تحياتي
avatar
الشاذلي محمد عبدالله ادم
نشط مميز
نشط مميز


الرجوع الى أعلى الصفحة اذهب الى الأسفل

حوار الفراشة والورد ......... محمود الجيلي صلاح الدين

مُساهمة من طرف الفاتح محمد التوم في 27th يونيو 2015, 05:23

سأل الفراش ورده
ليه ما سألتي علي
ما حاسه حالي البي
غايب عليك يومين
بالنسبة لي سنتين
و أكتر بتتعد
سأل الفراش ورده
أنا هسه لما أطير
و اكون محلق فوق
و يجيك نسيم الروض
بي لهفة ليكي و شوق
و يفوح عبير تعبير
بتحسي بشعوري
بتحسي اني بغير ؟؟
ونيراني ما بتهدا ؟؟
سأل الفراش ورده
الطل علي الخدين
دففق عشاني متين ؟؟
ولا يوم شفقتي علي
لا ساهرت ليك عين
كايس حنانك يوم
راجيهو من مده
رسلت ليك الضو
شايل خطاب واضح
رجع الغبار في الجو
رد الخطاب جارح
فتشت ليك اعذار
مهما قسيتي علي
تلقيني متسامح
و ما برضى لي حبي
بي ظني يتهد
لابد يا الورده
تهديني منك ريد
و تشتاقي لي شديد
كلما ازيد تحنان
البينا يمشي و يزيد
لابد لابد
الورده ردت ليه
بعد ألف ألف سؤال
قرب علي تعال
وقول قالت الورده
ما تلوم حبيب جافاك
قرر خلاص ينساك
يصنع ظروف من ماف
يبدأ الطريق و يخاف
و يخاف يتمو معاك
وقول قالت الورده
الريده و التحنان يا سيدي مهما كان
ما بتتشحد شحده
*********
شكرا ود الجيلي   لتنتنة البن !!!!

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف أزهرى الحاج البشير في 28th يونيو 2015, 10:53

هذا البوست الجميل لأول مرة أراه .. مرات في حاجات جميلة تفوتك .. كيف ؟  الله أعلم .
avatar
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف الفاتح محمد التوم في 28th يونيو 2015, 14:58

تسلم شـــيخي العزيـــــــــز ..... ورمضان كريم ......... وتقبل الله صالح أعمالكم وأعمالنا ..... يا شيخي إنتـــا دايــمأً حضور  الحاجات هي البتـــحرم  منك عشان تلاقيك وحيــــدها في يوم زي ده .. وريحة البن تحتضن فاروق جويدة في حلقة 10 رمضان فازدان المكان على زينته .. حلة زاهية ...غاب فيها الزمان والمكان وتعطرت أنفاس القصيد  متقطعة  معزية تعانق كلمات  فاروق جويدة يردد   لوأننـــا  لم نفترق .............
لو اننا لم نفترق
لو اننا ...لم نفترق
لبقيت نجما في سمائك ساريا
وتركت عمرى في لهيبك يحترق
لو اننى سافرت في قمم السحاب
وعدت نهرا في ربوعك ينطلق
لكنها الاحلام تنثرنا سرابا في المدى
وتظل سرا.. في الجوانح يختنق
لو اننا .. لم نفترق
كانت خطانا في ذهول تبتعد
وتشدنا اشواقنا
فنعود نمسك بالطريق المرتعد
تلقي بنا اللحظات
في صخب الزحام كأننا
جسد تناثر في جسد
جسدان في جسد نسير .. وحولنا
كانت وجوه الناس تجرى كالرياح
فلا نرى منهم احد
مازلت اذكر عندما جاء الرحيل
وصاح في عينى الأرق
وتعثرت أنفاسنا بين الضلوع
وعاد يشطرنا القلق
ورأيت عمرى في يديك
رياح صيف عابث
ورماد أحلام .. وشيئا من ورق
هذا أنا...
عمرى ورق
حلمى ورق
طفل صغير في جحيم الموج
حاصره الغرق
ضوء طريد في عيون الافق
يطويه الشفق
نجم اضاء الكون يوما ... واحترق
لا تسألي العين الحزينه
كيف أدمتها المقل؟!
لا تسألى النجم البعيد
بأي سر قد أفل؟!
مهما توارى الحلم في عينى
وأرقنى الأجل
مازلت ألمح في رماد العمر
شيئا من أمل
فغدا ستنبت في جبين الأفق
نجمات جديده
وغدا ستورق في ليالي الحزن
ايام سعيده
وغدا أراك على المدى
شمسا تضئ ظلام أيامي
وان كانت بعيده
لو اننا لم نفترق
حملتك في ضجر الشوارع فرحتى
والخوف يلقينى على الطرقات
تتمايل الاحلام بين عيوننا
وتغيب في صمت اللقا نبضاتى
والليل سكير يعانق كأسه
ويطوف منتشيا على الحانات
والضوء يسكب في العيون بريقه
ويهيم في خجل على الشرفات
ماكنت اعرف والرحيل يشدنا
انى اودع مهجتى وحياتى
ماكان خوفي من وداع قد مضى
بل كان خوفي من فراق آت
لم يبقى شئ منذ كان وداعنا
غير الجراح تئن في كلماتى
لو اننا ..لم نفترق

*****************************
لله ما أعطى ولله ما أخذ ولا نقول إلاّ مايرضي ربنا إنّا لله وإنــّا اليه راجعون
ورمضان كريم 

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف أزهرى الحاج البشير في 29th يونيو 2015, 21:59

لا أرآك مكروها في عزيز لديك .. أبهجتني كعادتك بهذا البهاء الجميل .. لا عدمناك من أخ وشيخ كريم
avatar
أزهرى الحاج البشير
مشرف عام
مشرف عام


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف الحازمي في 2nd يوليو 2015, 01:09

فرحة

بين الريد والهوى عشنا أيامنا سوى 
ما قاسينا النّوى 
ما أحلاك يا هوى الهم راح وإنطوى 
عش ريدتنا استوى 
بين إيديهُ هنايا في عينيهُ منايا 
حققنا أحلامنا 
والعاشق عقباله
=====
بيني وبينه حكاية ما ليها نهاية 
وأحلام دنيايا 
لو شفتوهُ معاي خطوُه الحالم آية 
يروي محاسنُه رواية 
كم ضوّت دنيايا نور دربي برايا
حقّقنا أحلامنا 
والعاشق عقبالُه
=====
أنا بحبُّه أكتر ياما هواي بيكبر 
ياما مشاعري بتسكر 
حبه النامي الأخضر راعيناهُ وأزهر 
في قلبينّا ونوّر 
والعزّال كدناهم في لحظة نسيناهم 
حققنا أحلامنا 
والعاشق عقبالُه 
======
الأحباب شافونا بالأزهار لاقونا 
هنيناهم وهنونا 
حبيناهم وحبونا غنوا معانا وشاركونا 
بالأزهار لاقونا 
يا عشاق عقبالكم قولولنا هنيّالكم 
حققنا أحلامنا 
والعاشق عقبالُه
====
قالوا بتحبّوا
قلت ليهم مالُه 
إيدو على إيدي الهنا مشينالُه 
حققنا أحلامنا 
والعاشق عقبالُه
avatar
الحازمي
نشط مميز
نشط مميز


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف الحازمي في 2nd يوليو 2015, 01:11

لـست وحـدك

شق بالسيف ضمير الظلمة السوداء ناضل
لست وحدك..
أرفع الراية يا عرس النضال المر..قاتل
لست وحدك
يا شموخ النخل يا راية شعبى.. يا مقاتل
كل جرح فاغر..يلتام..يضحك
لست وحدك
كل ليك حالك تنبض في أحشائه شمس عنيدة
والنجوم الحانيات البيض ضوان..امانينا البعيدة
لست وحدك...
فالصباح المرتجى المخضر في كف الحدائق
يتندى.. يتندى .. يتندى..
يا ندي.. ابن العاص.. يا مجد صلاح الدين
يا صيحة .. ناصر .. يا حبيبى
شعب مصر الطيب الصامد..
يا سيفى ورمحى
انت مذ كنت وتبقى
ليلي الدامى .. وصبحى
يا رفيقى في نضال الامس مذ كنا
ومذ كان النضال...
لست وحدك
قولة يعرفها التاريخ والنيل وندوات المقطم
فالذرى الشماء... لا تركع لا تسجد..
لا تبكى وليست تتحطم
وسيبقى شعبنا الحر ومهما
وستبقى ارضنا الحرة مهما
قدر يعرفه الفجر المغنى في حقول الكادحين
فأسال النهر الذي يعبر دهرا
من صحاري... لا يجف
كيف يسقيك حيا الفجر الملون؟
كيف بعد الرحلة الظامئة ..الجوعى
يهش الحب في اعماقه
كيف رق النور في افاقه
كيف بعد الموت يشدو بالحنين...المر.. من أشواقه..
لست وحدك..
إن من يصنع من الآمه الثكلى بقلب الجرح..واحه
قادر يا شعبنا..الرائع..أن يدعو.. جراحه
قادر مهما إدلهم الليل...مهما كان..
أعداء النهار..
أن يظل السيف ..والقرآن...والوحدة
والاحزان والفرحة والموج المسافر..
لست وحدك..
شمسنا الغاضبة الشماء تبقى
يا هدير النيل.. يا تاريخ.. حزن المجد يا وعد الصباح
بيننا يا شعبى المصرى.. يا أغنية النور
ويا حلم الغد..
إعتناق الثورة الواحدة الكبرى
وبوح المسجد...أمل النصر الذى يورق فينا
أناشيد الكفاح المشترك .. بالدم المسكوب في الجبهة..
في فوح القنابل.. في نضالات شعوب الأ{ض
من أجل السلام..حين تضوى الشمس للكادح.. تحبو
مثل طفل رائع الضحكة غنى للسلام...
عصرنا.. عصر الصباح المزهر الدافق
لا عصر الظلام..
انتهى..عصر الظلام..انتهى
انتهى.. عصر الظلام 
avatar
الحازمي
نشط مميز
نشط مميز


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف الفاتح محمد التوم في 2nd يوليو 2015, 17:53

شـــكراً عزيزي الحازمي على مرورك الجميـــــــــــــــــــــــــل يا باااهي يا زاكي العبير .... وأنت تنعشـــنا من الجانب الشرقي لجبل التاكا ... من أناس  يعشــــــقون البن  وريحـــة البن حيث دلقت لنا من جبنة أبو آمنــــة حــــامد  " لست وحدك " ...........
وإحتفاءً بك عزيزي الحازمي في تقديمك المميز لأبو آمنـــة خامد ...... سأدعك ترتشف  من حلقة  (( قهوة على مزاجك )) لتمشي في (( الشارع )) مع الشاعرة وئـــام  كمـــال 

وئام كمال - الشارع
من حلقة (قهوة على مزاجك)
الشارع الزاد آلامي
يا سيدي هو نفس الشارع
الباني عليو أحلامي
لو ماك دريان بالحاصل
لو ما صدقت كلامي
يا زول طالعني الشارع..
الشارع 
جاتو الحمى
دخان و هلمة و لمة
بيبيع و إشتري و إتفرج
ويناقش سعر اللحمة
متسول يدعي لغيرو
بزيادة الخير والنعمة
و مكتوب في آخر حافلة
يا كاشف الهم والغمة
الشارع ما بتجما
يتصنط ويرمي أضانو
لي ناس و إشارة وزحمة
و قزاز عربية وبايع..
الشارع
شارع الجامعة 
العلم الفكر الطالب
أستاذ و مناضل و ظالم
في المين الضاجي وصاخب
الصوت الصاح يا بلدي
ماضاع حق ليهو مطالب
و الركن الأثبت إنو
ميدان الطالب واسع...
الشارع
شارع بيتنا
و الباب في الباب يا جارة
مدقوق صيوان في نصو
ومعطل سير المارة
أغراب وقراب تجمعنا
أتراح ومناسبة سارة
لو غايب بسألو عنك
دكان الحي والجامع....
الشارع 
شال الصحبة
أداهم اول خطوة
في الدرب الاسمو الغربة
طيارة تنزل شنطة
وصندوق مشوارو التربة
وطيارة تشيل الخلة 
والشوق المابيتخبا
في كتير واقفين في صالة 
بيوادعو صحاب و أحبة
وكتير واقفين في صالة
راجين الصاحب الراجع....
الشارع
اضيق شارع هو الفاتح على واقعنا
في خورو طفل متشرد
تحت التشييد كم مبنى
في الشارع حلم مغيب
سامعنو وما سامعنا
الشارع البرة أنحنا
والشارع الجوة أنحنا
والشارع الماشارعنا
ياصاحب برضو أنحنا
الأرصفة فارشة جرحنا
وبضاعة تزيد المحنة
معروضة في نص الشارع...( الباني عليو أحلامي)
لو ماك دريان بالحاصل
أو ما صدقت كلامي
يا زول طالعني الشارع.....

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

راجعين يا خي راجعين والله .....أنفاسك في قولة اتفضل والعيد الجانا بهيج طلة

مُساهمة من طرف الفاتح محمد التوم في 16th يوليو 2015, 18:01

في حيطة خاطر الذكرى الحي
شافعة أحلامي المهووسة
شخبطت الخوف بي قلم الضي
هبشت آلامي المدسوسة
و رسمت على ضفة نيل واحد
أطلال الخلة البنكوسا
ونشلت في غفلة خلافاتنا
و الفتنة الغدارة بسوسا....
ما القسمة القسمت قسمتنا
وقلوبنا المن نفس المعدن
واللحظة البملاها حضورك
وبنات الذكرى المابنسن
والزمن الرامي على الساعات
لحظاتنا البي طيفك إنسن
والدمعة الساقية خدود عاشقك
من مجرى العين بالكف والدن
صاينين ميثاق العهد البين
عيني وعينيك الدرسن
نيلين في الود قلبي وقلبك
(أبيض و أزرق)
لا بد يتوحدو في مقرن
والفتنة البيناتنا ندوسا....
أطيافك ما أحلى وشوشا
بطراك في كل العشتو معاك
فرع اللبلاب البيتاوق من سقفة حوشنا المعروشة
و يتصنط ونسات الشارع منقولا صحيحا ومغشوشا
في الصحن الممدود بالحيطة
والجارة المن يوما بشوشا
و في العتبة الرامية ظلال الحب
وخريطة الماضي المنقوشة
في الصوت الحالف (نبنيهو)
وفي قصة (ميري وعيوشة)
و في الكوز الكشح موية البين
والدق نحاس المنحوسة...
يا مسافر من بلدك ومارق لي بلدك بعدنا ما حيدوم
ماليني دليبك والتمتم جراري ونقارة و مردوم
يشهدو سوميتنا وودعاتنا وسكسكنا الفوق الجيد منضوم
ووحاة الشادي (جدودنا زمان) والقلم الخط (حلم مقسوم)
والصوت الغنا عليك طربان( يا مسافر قوم سيب الخرطوم)
راجعين ما دام أشجار الحن في طينتي وطينتك مغروسة....؛؛
راجعين يا خي راجعين والله
أنفاسك في قولة اتفضل والعيد الجانا بهيج طلة
في الغيم الشايل من جيهتك والسيل الزاد الطين بلة
في الحلم الكل ما ليو بكبر لا بقل لا عنك بتخلا
في النيم والنخلة وفي عينين شافعة أحلامي المهووسة
الشخبطت الخوف بي قلم الضي
هبشت آلامنا المدسوسة
و رسمت على ضفة نيل واحد
نخلة و لبلابة و أبنوسة
اتشابكو فوق طينة العزة
و اتكاملو بالحن نادوسا....



***************

وئـــام كمال الدين 

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

رد: ريحة البن (منقـــة تكنــــــــو .... والمنقه دبنــقا)

مُساهمة من طرف الفاتح محمد التوم في 13th أبريل 2016, 19:15

الفاتح محمد التوم.... كتب:من طرف الفاتح محمد التوم في الجمعة أبريل 13, 2012 12:54 am
هذه القصيدة للشاعر الأستاذ محمدالامين محمدالحسن .......... كان ضيــفاً خفيف الظل على هذا البرنامج في رمضان الذي كنت حريصاً على ألاّ تفوتني منه أي حلقة .... وفي هذه الحلقة أبدع شاعرنا وهو يحكي عن " زمان " شعراً وفناً وسياسة...ألاستاذ محمد الأمين من جيل  عثمان أحمد سعيد  ومحمد الحسن سالم حميد هذه القصيده جاراها الأستاذ عثمان أحمد سعيد والأستاذ محمد اسماعيل الرفاعي ......
قصتها والتي سردها في نفس الحلقة ,, مرّ عليه أحد الذين يعرفونه وسلم عليه من بعيد,, وشاعرنا تسكنه اللهفة للقياه ....وصورة أخرى تلت هذا الموقف وهو في ذات الجلسة عن إمرأة كاسية عارية لا لتبرجها ولكن ملابسها تمزقت ... شبه حافية بسفنجة مقطوعة لضيق ذات اليد ... أتت في حياء تشحد ,سعر صورة الأشعة لإبنها في المستشفى .... مدت يدها للشاعر وحال الشاعر ليس بأحسن منها ... " خالي الجيب إلاّ من أبو النــوم " ,, تأثر لهذا الموقف ,, طلع الكلام شعراً مصحوباً بصور مجتمعية حضرت عند النظم ...

مالو السلام بقي رفعة وسلامنا كان بمقالدة؟؟
ومالوالكلام بقي من بعيد وكلامنا كان بمواددة؟؟
ومالا المسافة بقت تزيد وكتوفنا كانن بحدا؟؟
وينو الزمان جواك بقيد .. وينا الحروف الحاشدة؟؟
ما عندي شي وفوتيني امشي اتحركي.. ما عندي شي
ما عندي ليك غير الورق وورقي انحرق
وما عندي ليك غير العرق وعرقي انسرق
وماعندي ليك غير العمر شوفتيه اندلق.. وباقيه المعاك
ما عندي ليك غير الكلام سمعتي ليك ابكم نطق؟؟
ماعندي ليك غير الدموع..
ياغاليتي وميسي البعيد وحصاني ما بكسب سبق
وماعندي ليك غير الدموع وعمرو الدموع ما بتكفي شق
ماعندي شي وفوتيني امشي اتحركي..
انا ليك بهيم غيبت شمشي اوعك تعانديني وتقيفي
اوعك تلمي ملح دموعك وفوق جروحي جداد ترشي
انا صبري ليك زي صبري فيك.. وانا صدقي ليك زي حبي فيك
وانا خوفي يوم ما اهون عليك
وخايف افوت.. وتشيلي حزنك فوق دروب الناس تخشي
ياالصامدة زي جبل الصوان اتفتت الحجر الاصم..
يا حليلو مااتكشف غطا
زولك فتر لامن عتر تعبت خطا..
وتورك وقع بعد النطاح كترت موتا وحال الردي..
وعيونو غامت وغمضت وطرش اضنيهو ما بتسمع ندا..
لا بنهدي ولا بهتدي ولا دار يكوس درب الهدي..
داير يفوت وقبال يفوت داير يكوس تمن الكفن..,
يحفر قبر.. يعرف تربتو يحددا
ويدفن سلام بمقالدة..
ويدفن كلام بمواددة..
ويدفن كتوف كانت حدا
ويدفن وهج روحو.. وجمرات ريدتو ليك.. يذرف دموعو ويخلطا
ماعندي شي فوتيني امشي اتحركي..
ياالصامدة زي جبل الصوان وزولك دا خايف..
خايف عليك من المبيت في الارصفة..
وخايف عليك من الكفاف.. خايف عليك من الحفا..
وخايف عليك من المدسدس جوه لسع في الخفا
ماعندي شي.

: اوعك تخاف انا ايدي في ايدك اتي..
واوعك تخاف..
قالوا البخاف من الكلاب بتهوي فيه.. اوعك تخاف
واوعك تخاف..
قالوا البخاف من الحصان ما بيمتطيه..
واوعك تخاف..
قالوا البخاف من الضلمة بينتهي..
واوعك تخاف..
قالوا البخاف من الدروب بجي منكفي..
انا ما بخاف من الكفاف وكتين ارشرشو بعفاف..
وانا ما بخاف من العري وانت الضرا والسترة والبيت واللحاف..
وانا ما بخاف وانت البأمن من يخاف..
وانا كيف اخاف؟ وانت الوف . وانت الوفا.. وانت الوفا..
وانت الصفا وانت الكفاف

: دي توبا يامسكينة ما بتضاري زيف وتجيب رغيف..
دي توبا يامسكينة ما بتجيب دوا ويقيف نزيف
وانا زول ِبِرد.. كتلة ومصبرة في تلج..
لا ايد بترعش لا قليبي بيختلج..
وتقولي لي انت الوفا وانت الصفا وانت الكفا؟؟
من وين اجيب ليك الدفا؟؟
ومن وين اجيب ليك الدفا؟؟
ومن وين اجيب ليك الدفا؟؟
وانا وانتي يا وجعي اللطيف زولين رهاف
********.........********

استاذنا الفضل أكيد مريت على هذا البوست !!!!!!! 
الشاهد في رفعي للبوست هو ((توارد الخواطر واحساس  الحال بالحال  )) لأنو :-
سبحان الله في مثل هذا اليوم 13/4/2016م أوردتها ياشيخنا بالفيس .....
وفي تاريخ  13/4/2012م المداخلة أعلاه  في هذا البوست !!! لها  أربع ســــنوات بالتمام و الكمـــــال !!!!!! عجبي

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى