ابوجبيهه

البركة فينا

استعرض الموضوع السابق استعرض الموضوع التالي اذهب الى الأسفل

البركة فينا

مُساهمة من طرف مرتضى عبدالعظيم عبدالماجد في 23rd مايو 2012, 11:05


هذا ويقام المأتم بمنزل الفقيد بين خطى طول (38.24- 21.4) دقيقة، وخطى عرض (8.45 - 23.Cool ….. إنا لله وإنا إليه رأجعون.. قدمنا لكم سيادتي وسادتي مستمعينا في كل أرجاء الكون الفسيح نشره أخبار الوفيات من الأذاعة ( الكونية(
فور سماع نبأ الوفاة تقاطرت الجموع من كل أنحاء الكون الفسيح يعتصرها الحزن والألم والأسي .. نعم.. أخيراً تم نعي ( المرحوم) رسميا بعد رحلة شقاء وعذاب وألم وجحود ونكران من أبنائه.. مات المرحوم بعد فشلت كل المساعي في علاج جراحة النازفه.
- المرحوم كان بشتكي من حاجة ؟
- هسع لمن مات وإلا زمان؟
- زمان كان عندو شنو وهسع الحصل ليهو شنو؟
- والله المرحوم كان زمان كويس وفي أمانتى الله … عندو شوية مضاعفات بسيطة وأولادو القاعدين هنا كانوا قاعدين يعالجو فيهو وشوية شوية قعد بتحسن .
- وطيب الحصل شنو بعد داك ؟
- الحصل إنو عندو ( أولادو) تانين (فجأتن) جو قالو العلاج دا ما بنفع وعاوزين يعالجوهو بى (كتاب الله) و (الرقية الشرعية) عشان ينقذوهو ، قاموا ( زحوا) اولادو القاعدين يشرفوا على علاجو واستلموا هم المسألة والحاصل براك شايفو
- بإستغراب) شنو يعني أهملو فيهو؟
- والله ما أشتغلو بيهو شغله.. همهم كلو في (العقود السرية) والحسابات (الخارجية) والمدن الرياضية والخطوط (الجوية) والتقاوى والأقطان والما بعرف شنو !
- أها و ما قاعدين يصرفوا على البيت؟؟
- عليك أمان الله ( البيت) من عدم ( الصرف) بقت حالتو صعبه.. يوم الكهرباء قاطعة.. يوم المويه قاطعة.. يوم أكل مافي.. ( الأولاد) خلوا المدرسة عشان المصاريف
- وأولاد المرحوم التانين ديل ساكتين كيف ؟
- والله ما سكتو .. لكن تقول شنو بعد قروش أبوهم كلها (إتلغفت) وحالة ( أبوهم) بقت خطيرة والبيت بقى ما بنقعد من عدم ( الصرف) عليهو.. كلهم الاغترب إغترب والقاعد عاطل بدون شغل قاعد اليوم كلو (مركلس) و(الفكت منو) قعد ليهو في ( صينية) !
- وأولادو العاملين عاوزين يعالجوهو ديل هسع وين ما شايفهم في الصيوان.. يكونوا مع الجثمان في المستشفى
-جثمان شنو عليك أمان الله مما قالو ليهم ابوكم مستحضر واحدين سافرو ليك ماليزيا وواحدين مشوا ليك بانكوك وواحدين الأمارات !
- وبعد الحالة ما وصلت كدا جيرانكم ديل ما قاعدين يساعدوكم؟
- يساعدو منو ؟ أي قروش يجيبوها لينا ( تتلحس) أول بأول…
- طيب ما يجيبوها أكل .. ومعلبات ( يغيثوكم ) بيها ؟
- عليك أمان الله يجيبوا المعلبات الليلة.. بكره تلقاها قاعدة تتباع في (سوق ليبيا)
- والله ديل ناس عجيبين خلاس
- أقول ليك حاجة هسع دا مش البكاء بتاع أبوهم عليك أمان الله البرسلوهو يجيب ( الخضار) تلقاهو طلع حقوه بره.. والمشى جاب (التلج) تلقاهو ختا ليهو كم (لوح) زيادة.. والمشى أجر ( الصيوانات) تلقاهو عمل ليهو (فاتورتين) .. ( مواصلاً) أنت قايل المرحوم دا مات بالساهل؟
- هسع قلت ليا اولادو ديل كلهم سافروا وللا في ناس منهم قاعدين عشان نديهم الفاتحه؟
-شوف المسافرين ديل خليهم ماخلاص مسافرين … لكن أنا أوريك القاعدين … شفت أي زول لونو (رايق) وفاتح ولامع وجضومو ( نايره) و ( مدغلب) ولابس نضيف وسايق ليهو عربيه جديدة وفاخرة وعندو (العلامة ديك في جبهتو) .. دا وأحد منهم أديهو الفاتحة طوااالي..
- وطيب أولادوا التانين أعرفهم كيف؟
- أولادو التانين تلقى الواحد منهم قاعد يكلم في روخو و( عضام وشو طالعة) ولابس ليهو جلابية ( شربانه) وفيها كم ( فتق) ولابس ليهو في كرعينو ( سفنجة) مقطعة وألا مركوب مقدد وعيونو (ورمانه) من البكاء
تركت ( محدثى) وذهبت إلى بداية ( الصيوان الكبير) حيث كان فى مقدمة ( الصيوان) أولاد المرحوم (المرتاحين) يقفون صفا من كل جانب يستقبلون ( كبار الزوار) والوفود الأجنبية.. المعزية.. وهم يلبسون الجلاليب (الزبدة) البيضاء .. والشالات (المطرزة) والعمائم (التوتال الأصلى) يتكئون بيد على عصى (الأبنوس) المزركشة (بالعاج) وباليدالأخرى على (المسابح) متعددة الأشكال والأنواع … وقد إنتهزها (واحد منهم) فرصة فقام بوضع تربيزه فاخرة أمامه عليها دفتر وقلم لإستلام الكشف (ما بالعملة الصعبة وكده) ! بينما كان أولاد المرحوم الآخرين بثيابهم المتسخة (المكرفسة) يقومون بتقديم الشاي والقهوة والماء البارد للمعزين وهم في حالة الحزن والشحوب والإعياء ..
بعد صلاة المغرب تم تفكيك قطع الصيوان على الأرض حتى تستخدم لأداء الصلاة عليها.. وبعد أن قام الجميع بأداء صلاة المغرب وبينما كانت أسرة المرحوم تتداول حول من سوف يقوم بإلقاء (كلمة الأسرة) بعد أن تم رفع الفراش تقدم (واحد من الجماعة) نحو الصدارة :
- بسم الله الرحمن الرحيم وبه نستعين والصلاة والسلام على أفضل المرسلين سيدنا محمد وعلى آله وصحبه أجمعين .. أيها الجمع الكريم (أحسب أن) :
- (صوت يقاطعه) : إنتو تاااني .. هو بلا (أحسب أن) بتاعتكم دى الكتل المرحوم شنو؟
كسرة :
(أحسب) أن البركة فينا (إن شاء الله) وجزاكم الله كل خير !!
كسرة ثابتة :
أخبار خط هيثرو شنو(ووووو)؟


أولئك الذين خسروا أنفسهم وضل عنهم ما كانوا يفترون * لا جرم أنهم في الآخرة هم الأخسرون)

مرتضى عبدالعظيم عبدالماجد
مشرف المنتدى العلمى
مشرف المنتدى العلمى


الرجوع الى أعلى الصفحة اذهب الى الأسفل

رد: البركة فينا

مُساهمة من طرف الفاتح محمد التوم في 23rd مايو 2012, 12:33

مرتضى عبدالعظيم عبدالماجد....((منقول من جــبرا)) كتب:
- زمان كان عندو شنو وهسع الحصل ليهو شنو؟
- والله المرحوم كان زمان كويس وفي أمانتى الله … عندو شوية مضاعفات بسيطة وأولادو القاعدين هنا كانوا قاعدين يعالجو فيهو وشوية شوية قعد بتحسن .
..............................................................................................................
-الحصل إنو عندو ( أولادو) تانين (فجأتن) جو قالو العلاج دا ما بنفع وعاوزين يعالجوهو بى (كتاب الله) و (الرقية الشرعية) عشان ينقذوهو ، قاموا ( زحوا) اولادو القاعدين يشرفوا على علاجو واستلموا هم المسألة والحاصل براك شايفو
.......................................................
..........................................................................................................................
بعد صلاة المغرب تم تفكيك قطع الصيوان على الأرض حتى تستخدم لأداء الصلاة عليها..


"كتاب الله -والرقية الشرعية.... " الشهادة لله مافيهن كلام..بس ياجبرا المشكلة من الفكي "الحمبريطي وأبوعكاز اشتغلوا بطلاميس الوسواس الخنّـاس"
أعملوا خير في " أولادو القاعدين" وأدوهم باقي الصيوان المفرتق والكراسي...ماعندهم ورثة,, لاودايع لابكاسي...

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى