مفردات تلازمك في الكلام

احيان كثيرة هنالك مفردات تستخدمها في الكلام كثيرا حتى تصير لاصقة في كلامك .. تصير لقبا لبعض الناس...هل تذكر منها ان كانت لك او لاحد غيرك...ابوالعيال( جدا جدا) من غير تنفيذ...

أختي اقبال .... تحياتي
قفشاتك رهيبه يابت !!!
كلمة يرددها أغلب السودانين الذين تتم استضافتهم في التلفزيون أو الراديو أو حتى في أمسية شعريه.....
وفي النقاش و الونسه .......
ومشهوره جداً ... الغريبة لا نقحمها عندما نكتب نفس الموضوع الشفهي .......
هي كلمة " يعني "
عايزك تقعدي أمام التلفاز وتشوفي أي برنامج .......
" وبالله يعني كده أحسبي لينا كم يعني وردت ؟؟؟؟؟؟"

من طرف **ناهد عبيد** 23rd مارس 2011, 15:08

اقبال والمحن

عندنا عمنا خبير وطنى فى المكتب بستعمل كلمة Actuallyكتير جدا مره فى اجتماع اصبحها يقولها بطريقه كده مزعجه خلتنى بقيت اعد فيها وفجاءة قال لى يا الله يا بتنا ناهد (يبدو فى سؤال موجه لى )

طبعا يا اقبال اختك مسطحه وقلت ليه 77 Actually فضحك الجميع وطبعا دخل فى خنافيرنى

حقيقة

نعم كثر استخدام هذه الكلمة فى الأونة الاخيرة.

تانى فى واحده فكاها فينا حسين خوجلى برضو يا شهاب

( زى ) انا زى حاقوم اتصل على الفاتح مثلا

موضوع جيد يا اقبال

تسلموا

الرايعين الفاتح فيصل ناهد...تشكرو...مية مية كلمة موضة اليومين ديل.

من طرف **amin_manga** 24th مارس 2011, 13:30

والله البوست ظريف وفي كلتشات كتييييرة ياما بتحصل بسبب العادات دي
*اشهر واحدة بتاعت عمنا مقدم برنامج (جراب الحاوي)
يا رااااجل والنتيجة كانت معروفة...
*المرحوم الفنان رمضان زايد مع المرحوم الريس نميري (خليك معانا ياريس)
وعمك ابو الزهور يا اقبال يمكن يفك ليك الشفرات

تحيّاتي

أتفضل يا خينا:

يديك العافيه

عليك الله ما تنسى الموضوع:

يديك العافيه

ما تنسى تشيل الحاجات للبيت:

يديك العافي

.

. يديك العافيه...جملة جميله..ودعاء أجمل صارت ردود لعدد غير قليل من اهلى الزينيييين

يديكم العافيه

من طرف **ناهد عبيد** 24th مارس 2011, 13:45

يا ستى يديكى العافيه

والله بوست جميل جداً ... فعلاً في قاموس جديد في الونسة وأظنه منتشر بين المثقفاتية ... حلوه Accually وبعدين المتلقي يجب أن يرد exactly.....
كانت هناك جلسة شعرية...
((هرول الشاعر على خفيف حتى وصل نص الدايره
نظر الى أعلى
بسرعة ادخل كلتا يديه في البنطلون ... تمطى الى الأعلى
ثم نظر ...
تفحص الحضور فرداً فرداً...
أنا قلتا الليله جانا الأستاذ / يحيى فضل الله ...
وفجأة قــــــال...
***
يالغبـــائي
***
استمرت الحاجه البقول فيها دي بنفس الغباء
الذي بدأ به ..محتشده بمفردات من نوع (( زي قامت تسلم ..))
أحد الحضور علق وقال " ده قلق ... وين الشعر ؟؟ "
تخريمة
****
يعني يافيصل زي عايز أقول ليك كده
الحاجات دي بشكلها ده ...زي ماشه في ازدياد
وسط الشباب... وطبعاً ليها مبررات
شي من ضآلة المفردات ... وزي يكون يعني مافي موضوع
*****************************
كتير حاولتا أجاري الشباب في الكلام ده ... لكن يمين غلبني
والغريبه أنا أستمتع عندما يتحدثون الى ... ومعاها حركة في اليدين ..
شكراً أعزاي للمساحة الجميله ومداخلات جنابو واقبال وناهد ودكتور الجنيد...وبقية العقد الفريد

اديكم العافية..

أقبال البوست جميل بجد ،،والعبارات والكلامات العفوية دي كتيرة شديد في حياتنا
انا عندي جملة سبحان الله ممكن اكون معاكي في خلال نص ساعة اقول ليكي 35 مرة
عندنا استاذ المحاضرة كلها ماسك في بجد بجد، في يوم واحد من الطلاب علق قال استاذ بجد وصل قمنا ضحكنا وهو بجد أستاذ لذيذ سئل من سبب الضحك حكو ليه سبب الضحك هو زاتو ضحك معانا وقال :بجد انتو طلاب مشاغبين
مع تحياتي

وبجد انتي رايعة..تسلمي

من طرف **الجبالي** 13th أبريل 2011, 09:13

بجد يااقبال الكلمه سبقتنى له الاخت سومه - بسم الله - الحمد لله - كلمات تلازمني وتلازم كل مسلم وبجد الموضوع رائع لك التحيه

تشكر الجبالي على المرور

المنتدى زي فقد الوريف
ياالله فتشيهو يا اقبال ؟؟؟

سلام يا حلوين البوست رائع

عندما تكون تتكلم يكون هناك مستمع متايع ويردد أها00أها

من طرف **نور** 4th يونيو 2012, 17:19

حياك الله اختى اقبال كثير من الناس كما تفضلتى تلازمه كلمه معينه يكررها كثيرا وتسمى لزمه كلاميه كما يطلق عليها علماء النفس او لزمه حركيه كحركه الايدى اثناء الكلام

بالنسبه لى انا اكرر كلمه سبحان الله

وتعجبنى كلمه يديك العافيه

ويديك العافيه على البوست الرااااااااائع

من طرف **shazli** 6th يونيو 2012, 15:11

البوست جميل اوي واشيا من هزا القابيل فاهم معاي

صباح الخير " حنجاف " إنتا عارف الكثير من المفردات الطريفة في العامية بنستخدمها زمان وهي في المعجم الوسيط .... (((خليني كده أقوم زي أديك منها مثال )))

*ركب راسو: نقول في عاميتنا فلان ركب رأسو أي تعصب على رأيه ولم يستشر أحدا ، وفي المعجم المراد : مضى على وجهه بغير روية لا يطيع مرشدا أو تمسك برأيه.

[/color] * سحابة صيف: نقصد بها الأمر القصيرالذي يزول سريعا 0قال عمران بن حطان في ذم الدنيا:
أرى أشقياءالناس لايسأمونها ملالاً وهم فيهاعراة وجوع
أراها وإن كانت تحب فإنها سحابة صيف عن قليل تقشع..

* سكران طينة: قول تقوله العامة لمن سكر سكرا شديدا ونفس المعنى في العامية السودانية0 قال المعمار :
وجرة أبرزها والروح فيها كمينة شممت طينة فيها فرحت سكران طينه

* شرب الكلام : نقول في العامية فلان شارب اللغة شراب أي أنه متضلع فيها وفي المعجم المراد : فهم الكلام0

* ضحك على ذقنه: نقول فلان ضحك على ذقن فلان أى خدعه ولم يحترمه0 وفي المعجم المراد: خدعه أو سخر منه واحتال به ، قال إبن أبي حجلة :
وإذا بدا لك ثقره متبسماً فاضحك على ذقن العزول وقهقه

* طار إليه: نقول في عاميتنا فلان طار إلى بيته أي أسرع إليه ، ونفس المعنى في المعجم 0 وقال الشاعر :
قوم إذا الشر أبدى ناجذيه لهم طاروا إليه زرافات ووحدانا

• طار بها فرحاً: نقول في العامية فلان طار من الفرح أي فرح فرحا شديدا، وفي المعجم كناية عمن أصيب بموجة من الفرح الشديد جعلته يشعر كأن له جناحين يطير بهما0 قال الشاعر :
إن يسمعوا هيعة طاروا بها فرحاً مني وما سمعوا من صالح دفنوا

* طار النوم من عيني: نقول في عاميتنا عند الأرق وعدم القدرة على النوم0 قال أبو العتاهية:
أرقت وطار عن عيني النعاس ونام السامرون ولم يؤاسو

تسلمواعلى المرور الجميل
الفاتح اخوي كيفنك والوليدات؟
كتر خيرك على الاضافة الجميلة

اقبال كيف حالك....
وليداتك وأبوهم سلامي ليهم جمين
وازيدك من الشعر بيت ........

حيص بيص: نقول في عاميتنا فلان دخل في حيص بيص كناية عن المأزق الذي لا مخرج منه ، وفي المعجم وقع القوم في حيص بيص أي سقطوا في ضيق وشدة لا مخرج منها0 قال الشاعر :
صارت عليه الأرض حيصي بيصي حتى يلف عيصه بعيصي

*زيطة:في عاميتنا نقول الجماعة عاملين زيطة أي ضجة، وفي القاموس زاط: صاح والزياط : المنازعة وإختلاف الأصوات0

*المطمورة:في عاميتنا تعني الحفرة العميقة التي تحفظ فيها الغلال، وفي القاموس المطمورة:ملأها بالطعام أو غيره ، وأصلها من طمر في الأرض واستخفى أي ستره حيث لا يدرى ولايرى0

*الهذر :سقط الكلام0 في السودان تنطق ( الهذار ) أو الهظار و يقال: فلان هاذر مع فلان أي مازحه0

تقبلي تحايا الوليدات وأمهم

من طرف **shazli** 11th يونيو 2012, 14:44

اقبال عبد اللطيف لينا طوله شديد سلامي ليك وبعلك شيخ ماهل تحياتي له البوست جميل اوي اظن رسلت مشاركتي في موضوع جديد انا اسف جدا حقك محفوظ لك العتبي علي هزة القرصنه الغير مقصودة المفرض استاز الفاتح محمد توم يراجعني

م

سلام عزيزي الغالي الشــاذلي ....
رجعنــالك .... ودمجنا مداخلتك يا فردة

مفردات تلازمك في الكلام

مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

عبارات تلازمك في كلامك

رد: مفردات تلازمك في الكلام

رد: مفردات تلازمك في الكلام

رد: مفردات تلازمك في الكلام

عبارت تلازمك في الكلام

رد: مفردات تلازمك في الكلام