مسدار سبعة .... للفرجوني ... مُهدى لود عشمان لإعرابه

برْقـَاً في الدُّجَنْ رَفَّ وْكِتِرْ لُفيْحُو
عَوَّدْ قـَلْبِيِ لـ حَالـُو الْ مَضَيَ وْصُلْفيْحُو
فـَرْعْ المَرْمَرِيِ الْ نسَّامُو قـَادْ تـُفـّيْحُو
جَمْرُو الْ في الضمَّيِرْ كَامِنْ نترْ نُفـّيْحُو

بـَصَرِي الْ لجَّ بسَّامْ الهِجُوُعْ مَا بـْرِيحُو
ضَبَحَنْ قَلْبِيِ نَسَّامُو وْلَوَافِحْ رِيِحُو
يِبْقَيَ الْ فَقْدُوُ فَتَّقْ لِيِ البَرِقْ تَجْرِيِحُو
بَهَلْ الدِّيِسْ ؤحَضَّرْ مُنْضَرَةْ تَسْرِيِحُو؟

يَانسَّامْ بِريْقـَاً فَي السَّحَرْ رَفـَّافْ
بَاسْمَكْ لامْعُو لـ دَمْ الكَبِدْ جَفـَّافْ
عَاشْقِيِ الْ غيـُّو شَاوِيِنِيِ وْطَبَايْعُو عْفـَافْ
نـَاسَبْ لوْنـُو ضَوْ الحِفـْلـَةْ وَالشَّفـَافْ

سَاهَرْلِيِ البَرِقْ وَاسْهَرْ حَلَفْ ما يمُوت
رَفـَّعْ سِحْبُو وِاتـْنَازَلْ صَبِيِبُو خْيُوُط
ألِجْ، وَاتْنَاسَيَ،وَاتْنَاوَمْ، بَدُوُرُو يْفـُوُتْ
يِلِحْ،يِتـْحَايَيَ، يِتـْكَاتـَحْ عُقـُبْ ؤيْلـُوُتْ

بَرْقـَاً فـَكَّ نسَّامُو الْ بِجِيِنِيِ مْهَيِّفْ
مِنـُّوضَمِيِرِيِ في العِيَنْ الْ رَوَايَا مْصيِّفْ
فَقـَّدْ نَفـْسِيِ مَرْيُوُدِيِ الْ جَمَالُو يْكَيِّفْ
شَرَّدْ نوْمِيِ صَبَّحْ قلـبِيِ مِنِّيِ مْرَيِّفْ

ألبَرْقْ الْ طَلَقْ نَاسِمْ نَدَاهُ مْزَيِّفْ
فَقَّدنِيِ السَّحِيِ الْ ماقالوا طبعو خْفيِّفْ
أصِيِلْ القـُوُدْعِرِفنِيِ الْليلة قلبي مسيـِّف
عَرَضْ في شَايْتـُوُ طَرْبَانْ الْ سِنَابُو مَقَيِّفْ

ويْنْ يَا السّيْدَحْ ،السَّمِحْ الْ بُعَادْ ارْدَادُو
مُوُ في الرِّدَّةْ حَيَّاً حُكْمُو فوقْ انْدَادُو
زولاً قاسي ليم شخصو وعزيز في ودادو
نَافِجْ قَلْبِيِ بـ فَرْدُو وْ وَنفِضْ قَـَدَّادو

عيْنِيِ الْ لاجَّة مِنْ كَتحْ البِرُوُقْ بِتسَاهِرْ
عَارْفة عْلاَجْهَا في كْفـُوُفْ الطَّبِيِبْ المَاهِرْ
قـُلْتْ لـ سَيْدَحْ الغَنَمْ الْ بَقـُوُدِهْنْ قـَاهِرْ
ويْنْ الْ خَدُّو بِقـْدَحْ في الحَوَالِكْ جَاهِرْ

نَويْتْ السـَّفرَة بـ إذنْ الكَرِيِمْ في سِرِّيِ
لـ الْ كُمّيْعُوُ بِبْرِدْ حَرْ لَهِيِبِي وْحَرِّي
عَاشْقِيِ الْ بيْنْ كِفوُفو نعِيِمْ حَيَاتِيِ وْشَرِّيِ
فرْ بَاسْمَاهُ حَبَّاً في الفوَاطِرْ دُرِّيِ

مَا يْقِيِ لَجُوُجْ يَقِيِنِيِ مِنْ الصَّبُرْ مِتعَرِّيِ
فاقد الْ قاوَدُوُالنَّسَّامْ رُخُصْ مُوُ مْشَرِّيِ
وَآ أسَفَايَ مِنْ الدِّنْيَا كَانْ تـَنـْترِّيِ
غيْرْمَا الاقِي يَا نَفْسِيِ الهَنَا، وْتَنْسَرِّيِ

عِنْدِيِ الْ مَانِعْ الْ شَافِيِ وْصُمَامْ ضِرْعَاتو
بِدْنِيِ الْ فوقـُو مِتـْبَهِّلْ دَفِيِقْ بَرْعَاتوُ
عَسَلا في الشِّنَانْ هَيَّفْ لَذِيِذ جُرْعَاتو
عَوَدْ قـَلبِيِ لـ حَرْ الغـُنَا وْلَسْعَاتـُو

بَتْقَلَّبْ مَعَ الغُنَا وَالقَوَافِيِ وْنَارْهِنْ
انْقُدْ مِنَّهِنْ دُرْ القَصِيِدْ وَاشْعَارْهِنْ
وَزَرِيِ السَّاجِعَاتْ الْ في الفِرُوُعْ اسْحَارْهِنْ
جَدَعَنْ نَمَّهِنْ جَرَّنْ طَلِيِقْ مُسْدَارْهِنْ

عُقُبْ البَرْقْ شَلَعْ بيْنْ السَّحَرْ وَالفَجْرِيِ
مَايَاً زَاكِيِ صَبَّحْ بُهْ المَدَالِك تَجْرِيِ
بَاكِرْ بَدْرِيِ بَصْبَاهُ الْ بِعَالِجْ هَجْرِيِ
خُفْتْ يَا كَبْدِيِ مِنـِّكْ بالغُلُبْ تنفجْرِيِ

مَلـَّل بـِيِ الفـُرَاشْ عيْنِيِ المَنَامْ جَافـْيَاهُ
نَفْسِيِ سَنُو الكَمَايِنْ بالصَّبُرْ خَافـْيَاهُ
صَافِيِ الفوْترِيِتْ الْ وَالَفَ مَعَافـْيَاهُ
تيْسِيِ الْ دَارْ شَيومْ الْ غَيَّنَا مْكَافـَيَاهُ

مَابِيِ البَرْكَةْ طُوُلْ ليْلُو الطَّوِيِلْ عَدَّاهُ
فوقْ رَاحَاتـُو هَجَّانِيِ الْ بِقـُوُدُو نَدَاهُ
جَمَلِيِ الْ قجْ ؤمِتحَنِّيِ وْطَوِيِلْ مَسْدَاهُ
طَرَبِيِ وْطَرَبُو أُنْسْ الْ الدَّلالْ عَابْدَاهُ

يا شوْحْ الجُمَالْ مَاكُنْتْ مِرَوِّقْ ؤرَايِقْ
مَالَكْ في الرُّبَاطْ هسَّع بقيت مِتْضَايِقْ
قَالْ لِيِ الْزِّيِفْ هدا وهَادا الْ بِقَلـِّعْ ؤسَايِقْ
حَقِّيِ شَيومُو وِاتْ حَقَّكْ جِلُوُسْ الرَّايِقْ

يَا البَرْقْ الْ بِتَلْعَبْ فوقْ سِحَابَكْ فَايِقْ
فَرَّكْ بَاسَمْ الادْعَجْ كَحِيِلْ المَايِقْ
مَرَّة تـفِرْ ؤمَرَّة مِنْ السِّحَابَةْ تـوَ اِيْقْ
مَاكْ دَارِيِ الْ جَحِيِمَكْ خَلـَّيَ نومُو دَقَايِقْ

يَا البَرْقْ الْ مِسَاهِرْ سِحُّو رَايِقْ دَرَّكْ
أسْقِيِ الْ رَيْدُو في صَفْحَةْ ضَمِيِرِيِ اتمَرَّكْ
مِنْ مَا رَفَّ فوقْ سِهَمْ الْ بَطَايِنْ فـرَّكْ
قُلْتْ لـ قَلْبِيِ عَادْ ليْكْ الْ تِقِرْبِنْ ؤحَرَّكْ

قـُلْتْ يَا سيْدَحْ الرِّيِلْ الْ مِسَادِرْ
غـُرَّكْ قـَلْبَكْ قـُلْ لُهْ يَقـِّنْ لـ عَذَابَكْ ؤمُرَّكْ
السَّفـَرْ الْقرِيِبْ وَابْتـَرْ قـَبُلْ لا يْغُرَّكْ
فـَنْقْ ؤبَقوْنْ ؤشَقـَّاقـَا ًسَوَامُو بْضُرَّكْ

صَغَا لـ قوْلِي سَمَّاعُو الرَّقِيِقْ اتـْحَرَّكْ
نَفَيِ شَنْشُوُنُو وِانْصَقَلْ الْ مِعِدْ ؤمَعَرَّكْ
قَالْ لِيِ ؤنَفـَّي جُنْحيْهُ الْ رُبُدْ وِاتعَرَّكْ
كَفِّيِ هَمِيِمْ ؤعِنْدِيِ صَمِيِمْ فِعَالاً يِسُرَّكْ

دَنيْتْ مَخَلُوُفتـُوُ مِنْ مَا شَافهَا حيْلُواتشَمَّكْ
قـُلْتْ لُهْ سْلِمْتَ يَاالْ مِتلْ المَنَاضِرْ
دَمَّكْ طَايِعْ ؤرَاسِيِ مُوُ كَبّورِيِ هَاجْ واتـْزَمَّكْ
قـُلْتْ لُهْ ادْنِيِلِيِ لـ شَبَّالْ دَرِعْتـُو مَزَمَّكْ

بَعِيِدَةْ بْلُوُدَكْ آ الْ مِتْلْ المِزَرْقـِنْ فـَمَّكْ
ؤأحْلَيَ مِنْ الرَّوَايِحْ ؤطِيِبْ عَبِيِرْهِنْ شَمَّكْ
قُلْتْ لـ قَلْبِيِ هَا الْ مَجْرُوُحْ بِمَتِّرْ دَمَّكْ
ابْشِرْ بـ نَظِرْة الْ شوفـْتـُو تـَفرِجْ هَمَّكْ

سيْدَحْ سَرْجِيِ هَا المَهَلْ الوِسَادَة مَشَدَّكْ
بيْنَكْ ؤبيْنُو عَتْمُوُرَاً خَلاَهُ بْهِدَّكْ
سَرْجَكْ لاعْبُو غَانِيِلِيِ الجَوَالِسْ ؤقِدَّكْ
آالقَنْجَرْ مِنْ الحَرَكَةْ امْ زَوَايِلْ رِدَّكْ

هَا المِتقـَدِّرْ الْ في الضِّرْعَةْ جَايِرْ مِدَّكْ
في النـَّفـَّارَةْ خَالَكْ ؤفيهَا عَمَّكْ ؤجَدَّكْ
قـُوُلْ لـ قـَلبَنَا الْ مِتهَلـِّكْ الزَمْ حَدَّكْ
ارْمَاحُو بْتصِيِبَكْ ؤسيْفْ عِيُوُنُو بْحِدَّكْ

ياالْ في (سَبْعَةْ) زَايِدْ بالسَّمَاحْ فوقْ نِدَّكْ
لا(عِبْدِلاَهْ) يِشْلَعْ ضَاوِيِ نَوَّرْ خَدَّكْ
ذوقـَكْ عَالِي حَالِيْ مَعَ الْ بَخَاطْبَكْ رَدَّكْ
ؤجِسْمَاً ليْكْ رَطِيِبَاً مِنـُّو فـَوَّحْ نـَدَّكْ

يَاالظـَّبْيْ الْ عَلي قـَفـْرْ البُطَانَةْ مَرَدَّكْ
ذِكْرَكْ بالعَفـَافْ في قـْلـُوُبْنَا عَمَّرْ وُدَّكْ
دِيِسَكْ قـُوُلْ لُهْ كَرَّعْ في ا لمَتانِيِ مَهَدَّكْ
ؤطَرْفـَكْ قـُوُلْ لُهْ آذيْتْ القِلـُوُبْ بـ حَدَّكْ

شَتـْلاً ضِيِرْ سَوَاقِيِهُ وْهَبَابْ مَا فـَرَّكْ
ريْدُو سَلَبْ يَقِيِنِي وْعُمْرِيِ مِنـُّو اتْدَرَّكْ
يَا ظْبَيَّاً تِبِعْ نِيِلْ المَهَاوِيِ مَجَرَّكْ
الْلَهْ بَرَاهُ يِتوَلـَّيَ القِلُوُبْ مِنْ شَرَّكْ

العَاصِيِ الْ بِجُرْ رَسَنْ المَرِيِدْ وِيمْغَاهُ
دَالِعْ قـَلبُو وَالمَغسُولْ عُقـُبْ طَغـَّاهُ
رَبُّو الْ خَاْلُقو مِنْ شـَرْالعِيُوُنْ وَقـَّاهُ
حَنـَّيَ وْقـَجَّ فرَّ قو قـَعَّدُو وْشَغـَّاهُ

هَجِيِنْ سَرْجِيِ الْ طَوِيِلْ غَارْبُو وْجِنَاحُوُ انْفجَّ
جِبْتـُو حَنَاسَةْ بَرَّكْتُوالْ ضَمَرْ وَاْنقـَجَّ
عَقَلْتُوالشَّافِيِ نَفـَّايْ العَدَارْ الْ لِجَّةْ
دُرْتْ بُهْ شَيوْمْ عَلي سَمْحَةْ امْ عَشُوُقَاً عَجَّ

رَفَعْتْ سَرْجُوُ ولشَغتْ طُوَفو وْجَبَدْلوقْشَاطو
وَاْنلب وَانْحَقَبْ جَمَلِيِ الْ وُشَاكْ ضِرْعَاتو
شَبَهْ الْ في العُقَدْ شَتـَّيَ وْ مَرِيَّةْ وَطَاتو
قَصْدِيِ هْجُوُمُو بـ الْ مِتلْ السَّفِيِنَة وَهَاطُو

كَتَلْتْ طَرَفِيِ وْدَرَعْتْ سيْفِيِ وْطَبَقـْتْ دَرَّاعُو
فَرَشْتْ فَرْشِيِ وْقَبَضَتْ زَمُّو وْطَلَقـْلوضراعو
حَبَشِيِ المَدْلَكْ الْ لاحَضْ زَوَلْ شَرَّاعُو
نَوَيَ لـ تـْهِجِّمْ الْ هَدَلْ الثـِّمَارْ فَرَّاعُو

غَفَلتو وْرَبَّعْ القوْمَةْ الطِّريْفِيِ الكَاسِرْ
جَرَيَ بالمَصْرَفْ الْ قَلَدُو الدَّريْبْ مَتيَاسِرْ
عَامْ بزْماَموُ مَابِيِ الهُدْنَةْ لَيَّ مْعَاسِرْ
قَطَعْ الكُبْرِيِ شَرْقَانْ الْ مِدَلَّعْ ؤجَاسِرْ

أدْرَعْ نُفـَّرْ ال بالصي الْ مُرَاحِنْ ليْلَة
عَقَبْ ابْ دوْمَةْ وَالوَادِيِ الْ زِرَاعْتو قليلة
جَفَلْ ابُولَبَّةْ عَارِفْ سِيِدُو نَفْسُو عَلِيِلَةْ
فقدُوالْ في تَقانْتْ المَنْقةْ دابها شتيلة

طَارْ الفَنْقْ ؤقَنْجَرْ لاعَرَبْ لا حْليْلَةْ
وَالعَنَّافِي زَاعْ السَّفرَةْ عَاجْبُو دَلِيِلاَ
عَلي السَّمِحْة امْ سَمَاحَاً فِيِهُ قـُدْرَةْ جلِيِلَةْ
دِرْوِيِشَاً سِمِعْ نوْبَاتـُو شَالْ تـَهْلِيِلاَ

(أبُوزْمَيِّمْ) حَفَايْرُو اتزَلـَّفنْ في النـَّافلَةْ
أربَدْ ؤتومْتُو وَلـَّتْ مِنْ سَبَايْكْ جافلة
قَاصِدْ الْ مِنْ مَجَاوَبْتْ الاسَافِلْ قَافـْلَة
ظَبْيَةْ كَحِيِلَةْ ضَامْرَةْ وَحِيِلَةْ تَابْرَةْ وحافلة

عِنْدْ خَشُم الشَّدَرْ جَاتُو (الجِويْلَبَةْ)
حفيرا زَادْ وِاتْعوْلَيَ تِدْرِيِ الْ بالنِّدَوْ قـُقيْرَا
عَلي الفارِطْ جَمَالْهَا وذوْقْهَا زَادْ وُفـيْرا
خَفْ عَسَرَاتو كَتَّرْ بالحَدَبْ طُفّيْرا

شَافْ (عُقَدْ الخَوَالْدَة) اتـنابَطَنْ في شْمَالُو
نـَوَيَ لـ الكَوْكَبْ الْ بِجْهَرْ عِيُوُنَّا جَمَالُو
فَارْط القدَّرْ الْ مَرَقـَنـُّو دوْرْ اهَمَالـو
سَاقْ دوْلاَبُودَوْدَوْ في السَّفَرْ بـ كَمَالُو

دَاكْ سَهَلْ(المِليْقـْطَة) وْديْكْ مَشَارِيِعْ (بلـَّة)
رَسْرَسْ عِنْدَهِنْ جِيِبْ الزِّبيْدِيِ الْ وَلـَّيَ
الْ مُدْهِشْ مَشِيِهَا وْفِيِهَا قوْدَة وْتَلـَّةْ
غيْرْمَااشُوُفْهَا عُقـْدَةْ نَفْسِيِ مَا بْتَنْحَلَّ

طَلَقْ الدَّرْبْ ؤقبَّضْ للحَفِيِرْ وْاتفَازَزْ
ؤكَوَّشْ عِنْدْ (قِريْعَا) ومِنْ حُجَارْهَا اتخَازَزْ
الْ في جَوْفِي نيْرَانْ قُنْبُلُو بْتترَازَزْ
دُوُبُو هَجِيِنُو حِتـّيْنْ جَمْ قـَفَاهُ اتنَاززْ

قَطَعْ مَهَوَيَ(الحِنيْكْ) جَنـُّو العَوَالِيِ اتسَنـَّدْ
(ضَمْرَانْ) الْ سَلُوُقِيِ الْ للرَّوَايِنْ فَنَّدْ
هَجِيِنْ حَاقْ الغُنَاالْ تَوْصِيِفُو عِنْدِيِ مَبَنَّدْ
مَصَعْ الْ مِقـْدِرْ العَابِيِ وضُرُاعُو مَزَنـَّدْ

لازِمْ سَرْجِيِ لـ الْ عَالِيِ العِطُورْ رَشَّالُو
صَفْ مِنْ(العَفَايَةْ) وابْ (قـَنَافِدْ) شَالُو
علي السَّمِحْ الْ صَمِيِمْ عَزَمْ القـُوُيِ انْهَشَّالُو
لَبَعْ الوَادِيِ فْوقْ هَكَرُو وْدَبِيبُو مَشَالُو

مَرَقْ عَارْقْ (الفِوِيِلْ) قِطَعْ (ابْ مَطَارَقْ) ؤفَاقَرْ
خَلَّيِ السَّرْجْ يصِيِحْ لـ الفـَزْعَة قِدُّو اتـْزَاقَرْ
ابْ قَـَنَفَة الْ نَجَعْ مِنْ الشِّتـَايَةْ ومَاقـَرْ
رَفَّ وَقفَّ قَاصْدْ الْ نُوُرُو مَا بِتـوَاقَرْ

شَرَفْ فوقْ (ابْ جَرَادْ)عِنـْدْ الحَفِيِرْ اتـْعَدَّيَ
قَاصْدْ الْ مِدْرِعَةْ وْتابْرَةْ خِيُوُلْ ؤمْعِدَّةْ
يَافريْخْة الْ بُطَانهُنْ بـ الرَّهِيِفْ ابْ حِدَّةْ
ضَرْبِكْ للمَكَاتِلْ بِنْفُضِنْ بـ شِدَّةْ

فَاتْ(وَادِيِ الحُمَارْ) بـ فَزَّتـُوالْ مَفرُوُقَةْ
عَقَبْ (البُرْصْ) مِخَاسِرْنِيِ وْمِحَارْبْ الرّوْقَة
قـُلْتْ لُهْ لَتيْبَةْ الطَّرْفَةْ الْ رَوَاسِيِ بْرُوُقَا
بينك ؤبينها صقـُّوعا قواسي فروقَا

شُوُفْ دَاكْ (السُّبَاغ) الْ عِدُّو زَاكِيِ شَرَابُو
مَا بْنَغَشَاهُ يَا ابْ سَرْجَاً نَبَحْ كَرَّاُبو
رُدْالسُّنُّةْ لـ (ابْ صُرَّةْ) وْعُزَازْ (نُورَابُو)
أهَلْ الْ مَرْجَلَةْ الْ بِتـْزَابُو فوْقْ أغَرَابُو

شُوُفْ دَاكْ السُّبَاغْ سُوُقُو وْتِجَارُو يْجُوطُو
عَمِّمُو بالسَّلاَمْ حَتَّيْ الحُجَارْ ؤبْيُوُتو
خَصِّصْ بـ اعْتِذَارْأهَلُو وْسِمُوحْ بَنُوتو
كَانْ ماالظَّرْفْ سَفَرْمَا كَنَّا نْحْنَ نْفُوُتُو

(يَاالحَانْدوْقِيِ) يَا(سيْدَحْ) شَوُافِيْ القُوُدْ
طَوَّلْ نوْمِيِ وَدَّعْ وَالصَّبُرْ مَفقـُوُدْ
مَا دَامْ هَوِّيِ في سَمْحْ الطَّبِعْ مَعَقُوُدْ
كيْفْ مَا تـْرِحْ ؤتَمْرَحْ بـ الصِّقِيِعْ ؤتـْقوُدْ

القَلْعَةْ (الهَمَايِيِبْ) الْ بَدَتْ مِتـْيَامْنَة
كَمْ غَنَّالْهَا كَانْ (شيْخ العْرَبْ) قِدَّامْنَا
(زَمَنْ توْتَالْ فَرِيِقْهَا وْنَزْلَتَا الْ مِتْيَامْنَةْ
كَانْ بِتْضَّلِّيِ ضَاقَتْ حَلَّقَتْ اقْدَامْنَا)

يَاقَلَعْ (الهَمَايِيِبْ ليْكَ الْفِ سَلاَمْنَا
حِليْلْ وَكْتَاً قِبيْلْ أيَّامْ سِكُوُنْ نَاسْ آمْنَةْ)
قَضيْنَا الوَاجْبَةْ فِيِكْ شيْخْ العَرَبْ مَالامْنَا
دُوُنَكْ سَبْعَةْ فَازَتْ بـ سِمُوُحْ ايَّامْنَا

يَاقـَارْحْ الدَّوَاوِيِرْ الْ مِلَوِّحْ بَرْقـَكْ
في(ابُوصْريْصْرِيِ) تـَلـَّبْ وِانـْسَنـَدْ بَكْ طَرْقـَكْ
رَاسَكْ قِلـُّو وَقـِّلْ في كَوَاكِبْ شَرْقَكْ
(رَانْفَيْ) قـُوْلْ لُهْ جَاوَرْتْ امْ لَهِيِبْ بِتـْحَرْقـَكْ

جَفَلْ عِنْدْ(الفِرُوُشْ) تـَقـَّلـْتـُوعَامْ بـ لَبـُّو
زَاعْ بـ زْمَامُو شَارْعُو الْ وَتـَّرْ اتسَلـَّبـُّو
(إتْنيْنْ)(سَبْعَةْ) جَمْرَاً في الضَّمِيِرْعَلـَّبُّو
مِنِّيِ بْشِيِلـُو وَلاَّ بْفـُوُتـْنِيِ بَتـْغَلـَّبـُّو

زَاكْيَةْ مِسْكَةْ الْ لَبَعْ الدَّمِيِرْ بـ هُوُبْتـُو
قَبْلِيِ مْفَكِّكّةْ(العَاقِبْ) صَلاتـُو وْتـوْبْتـُو
هَجِيِنِيِ عَليْهَا حَاكَيَ الْ بَالكَوَاتِلْ لوبتو
وَلاَّ ابْ لَبَّةْ (عَنَّافْ) الْ جَبَد مَنْهُوُبْتـُو

طِريْفـِيِ امَّاتْ حَقِيِبَة الْ بالضِّهُوُرْ رَفـَّافْ
رَقِيِقـَاً غَرْدُو جَايِلْ مُو بَدِيِنْ نـَفـَّافْ
عَلي امْ ظَرْفَاً بِيَاخْدْ الكَبْدَةْ وَالرَّفـَّافْ
خِويْرَاتْ (السِّليْمْ) جَاهِنْ كُفُـُوفـُوخْفَافْ

(مَنْعُوُلَةْ)الْحَفِيِر جَاهَا ابْ عِبِرْةً فَاجْرَة
تَرْدَحْ بالدَّرِبْ كَفّـُو وْمِصَابْقْ الهَاجْرَة
الْ عَرْضِيَّة غَايَة وْمِي الْ شَفـُوُقَةْ وْتـَاجْرَةْ
كَمْ جَدَعَتْ سِلُوُبْ مِكَنَاً تِجَارْ ؤمهاجرة

هَادِيِ (السَّادَّة) غَشِّيِنَا (الخَلِيِفَةْ) نْزُوُرُو
نَشْرَبْ بُنْ ؤنِتـْبَرَّكْ تـَمَامْ بـ نورو
فَرِيِقْ (العَاجْبَةْ) رَدّيْنَا السَّلاَمْ لـ حُوُرُو
في وْدَاعْةْ الْلَهْ عَبَكَنْ فوقْ كِفُوُفْنَا عْطُوُرُو

وَدَّعْنَا (الخَلِيِفَةْ) وَاخَدْنَا فَاتـْحَةْ غَلِيِدَة
قَاصْدِيِنْ الْ نَبِيِهَةْ وْفَاهْمَةْ مَاهَا بَلِيِدَة
الْ انْعَمْ مِنْ الْ نَافْشَةْ الحَرِيِرِيِ جْليْدَا
النَّارْ وَالجِنَانْ بِتْضَّوِّ قِنْ لـ قـَلِيِدَا

وَخـَّرْنـَا(القَوَادِيِسَةْ)(الصِّفـَيَّاتْ) طَارَنْ
(السَّيْدَحْ) جَبَدْرَسَنـُو وْكُفـُوُفـُو اتـْبَارَنْ
نَجَعْ الْ بـ هَوِيِدْ الصَّيْ رَوَايْنُو انْغارَّنْ
قَصْدُو يْهَجِّمْ النَّجَفَةْ امْ خِدُوُدَاً نَارَن

عِنْدْ سِهَمْ (الضِّكيْرْ) سَوَّالُو لَعْبَةْ وْخَزَّ
عَلـَّقْ رَاسُو عِنْدِيِ ؤبَالمَضَابِحْ فَزَّ
ديفـْةْ الْ عِنقـَهِنْ رِقـَّاً دُقـَاقْ مَا انـْجَزَّ
مَا خَلـَّتـْنِيِ اضُوُقْ للدِّنـْيَا مُتـْعَةْ وْلَذَّةْ

في (المُصْرَانْ) هَجَرْتـُو ؤقـُلتْ لُهْ رُوُقْ اتـْمَهَّلْ
حِبْرَكْ نَابْعُو مِنْ جُمَّامْ قـَفـَاكْ اتـْبَهَّلْ
الْ خَلَّتْ عَزِيِزْ النَّاسْ خَفِيِفْ ؤمَجَهَّلْ
غَالْيَةْ وْحَالْيَةْ لـ الْ مَا بِسْوَيِ مَا بْتِتْسَهَّلْ

(دِمْيَاتْ) وَخِّرِنْ وِاتـْعَلَّيَ فوقْ اسْيَاحِهنْ
أهَجْمْ الْ مِنُّو آلآمْ الٌقِلُوُبْ ؤجْرَاحِهنْ
رِيِلْ سَبْعَةْ الْ مِقَفِّرْ( بالنِّدَوْ) مُرْيَاحْهِنْ
شوْفهِنْ حُوُرْ ؤزَيْ طِيِبْ الجِنَانْ ارْيَاحِهِنْ

(تَلاَتَةْ تَلاَتَةْ)(سِتـَّةْ) عَلاَمَتِنْ بِنـْشُوُفَا
ؤهَادِيِكْ(سَبْعَةْ) ياالعَنـَّاِفِي بارْزَةْ شروفا
الْ حَقَّتْ تَعَبْنَا وْعِنْدِيِ كُلَّ وْصُوُفَا
حُلْوَةْ ؤْسَمْحَةْ هَادْيَةْ وْرَاسْيَةْ مِيِ مَغَرُوُفـَة

سِتْ ريْدِيِ الْ مَخَصَّصَةْ بالأدَبْ مَعَرُوُفة
هَادِىِ دْيَارْهَا خلينا ال نحج ؤنطوفا
أسِرْقْ البَرْكَةْ عِنْدْ دُرَّةْ مِلُوُكْ الكُوُفَةْ
رِيِلَةْ وْديْفَةْ مُهْرَةْ مَعَبَّدةْ ومَكْلُوُفَةْ

جَاتْ مَارْقـَ امْ جِسيْمَاً ضوُّهْ فَاقْ لـ شْفـوُفـَا
شَتْلَةْ مَرَتـَّبَةْ وْخُوُلِيِهَا طَافْ بـ جْرُوُفَا
فَرَّتْ بَاسْمَةْ ليْنَا وْفِيِنَا غَزَّتْ شوْفَا
أوَّلْ نَظْرَةْ بَاتَنْ في فَوَادِيِ ظْرُوُفَا

لوْناً ضَوَّا زَيْ حِفَلْ الدَّهَبْ في رْفُوُفَا
قَامْةً عُوُدْهَا صَبْ مِعْتَدْلَةْ مِي مَلْفُوُفَة
لَيِّنْ فَرْعَهَا وْيَمَنِيَّةْ مِي مَحَفُوُفَةْ
يَحْيِي الْ في القـُبوُرْهيْفْ النـَّديَ الْ في كْفُوُفَا

سَمْحَةْ وْكَاسْيَةْ بَالحَيَاوَالعفـَافْ والروْقـَة
زَيْ شَمْشْ الخـَرِيِفْ يومْ النَّدَايَةْ مْرُوُقـَا
فَرَّتْ سِنَّهَا الْ جَهَرَنْ عِيُوُنِي بْرُوُقـَا
مَدَّتْ كـَفـَّهَا الْ ألْيَنْ عَلي المَطـْرُوُقـَة

قَارْحْ المِحْرِبَاتْ سِهَمْ الانِيِسْ وَارْدَادُو
تَسْلَمْ يـَا هَجِيِنْ نُوُرْ السِّمُوُحْ أنـَدَادُو
نَادوْلُو الدَّرِيِ الْ حَلْحَلْ سِيُوُرْ شَدَّادُو
نزَّلُو بـ هَدَاوَةْ وْمَايَزِنْ عَدَّادُو

سَرَّبُو بـ مَهَلْ هَبَرْ الْ أزِمَّةْ وَقـَادُو
قّيْدْ ؤرْبَاطْ عَمَلْهِنْ للـ بِعُوُمْ عَقَّادُو
دُرَّاً في الجَوَاهِرْ عَازِلِنْ نَقـَّادُو
قال مَرْحَبنا بـ ابْ بَصَرَاً سِهِرْ سَقـَّادُو

رَجَعَتْ مِنِّيِ حَاضِرْ بَالْهَا مُو مِتْوَدِّرْ
عَزَمَتْ تَنْصِفْ الحَبَشِيِ الْ رُشَاشُوُ مْبَدِّرْ
بَعَدْ مَا جَيَّهْ ابْ قَنَفَةْ الْ صَبِيِ وْمِتْقَدِّرْ
عَاوَدْنِيِ الْ بَسِيِطْ ؤصَرَاحِيِ مُو مِتـْكَدِّرْ

حَمَّامْنَا وْغِيَارْنَا وْكُلَّ مَا مِنْ وَاجِبْ
آمَرْ بيْهِنْ المَكْحُوُلْ جَمِيِلْ الحَاجِبْ
فوقْ البِكْرِيِ آنَسْنِيِ ابْ سَمَاحَاً عَاجِبْ
قـُلتْ ليْهْ بَدْرِيِ مِنـَّكْ ليْنَا حَظَّنَا حَاجِبْ

قَالْ لَيْ سيْدَحَكْ فَارْطْ الشَّيوْمْ ؤلَزُوُمُو
كيْفْ دَانَيَ بَكْ البَلَدْ البَعِيِدْ في يومُو
قُلْتْ ليْهَا الْسَّخي ال بِطَوِي الصَّقِيع ؤ بْعُومُو
ويْنْ مَا شَافْلُو شَرْفْ بِـِلـْوِيهُ كَارِبْ زُوُمُو

رَسَّلْ لـلبِلِيِقْ ليْنَا وْبِعَرْفْ السَّالِفْ
نَادَيَ اخْوَانْ طَرَبْ ليْهُنْ قَلِبْنَا مْوَالِفْ
فوقْ جَبَنَةْ وْغُنُا وْأنْسَاً لَذِيِذْ ؤسَوَالِفْ
تَفِقْ مَجْلِسْنَا سَالِمْ مِنْ عَنِيِدْ ؤمْخَالِفْ

فوقْنَا البيْتْ مِنوِّرْ بـ كَهَارْبَاً ضَاوْيَةْ
تتـْفـَاوَحْ عُطُوُرُو الْ لـ نَسِيِمْهَا مْكَاوْيَةْ
مْلْكَةْ عَصْرَهَا وْمَاضِيِ الْ عُصُوُرْ وَالجَايَة
بُهْرَةْ خَدَّهَا وْضَوْ الرَّتِيِنْ مِتْسَاوْيَةْ

بُنْ القـَلـْوَة - يِتـْكَاتـَحْ نـَسِيِمُو- يْفـَوِّحْ
وَالوَتـَرْ المَشَقـْلَبْ في الرَّبَابَةْ يْنَوِّحْ
الْ مَفـْدُوُعْ وَرِيِدُو وْبـ دَهِيِنُو يْمُوِّحْ
سيْفْ امْيَاقـُو يِلْصِفْ ؤبـ بِرُوُقـُو يْلَوِّحْ

النـّوْمْ خـَلـُّو فَاقـَرْ لـ عِيُوُنـَّا مْحَارِبْ
وَالمَجْلِسْ مَنَظَّمْ وَالمَجَازْ مِتْقَارِبْ
الفُنـْجَانْ مِدَوِّرْ بالكِيُوُفْ للشَّارِبْ
فوقْ ربَقِيِ وْرَبَابَةْ وْصوْتْ نَمِيِمَاً ضَارِبْ

مِنْ فوْتْ الطَّرَبْ زَيْ الغُصُوُنْ نهْتَزَّ
فوقْ شَبَّالْ ؤعَرْضَةْ مَعَ الرَّباَبَةْ وْهَزَّة
حَافْظِيِنْ الأدَبْ مَا فِيِنَا وَاحْدَاً شَذَّ
مُمْتَازْ الْ مَجَالْ ضُقـْنَالُو مِيِزَة وْلَذَّ

نَامِنْ ليْلْنَا رّوَّحْ ؤكُلُّ حَيْ فَارَقْنَا
دَاكْ حَالاً جَدِيِدْ فِقـْنَا لُهْ هَسَّعْ رُقـْنَا
جَرّيْنَا الْحَدِيِثْ في الْوَاقِعْ إتـْطـَّارَقـْنَا
لا اتـْمَتـَّعْنَا لا اتـْقـَمَّحْنـَا مِنـُّو مَرَقـْنَا

مُخْتـَارْ الطَّبِيِبْ اهْمَلـْنـَا أوْ عَالَجْنَا
فَاهِمْ نَفـْسُو بـ سيْفْ الغَرَامْ دَهَّجْنَا
الْ عَمَّرْ(بِريْنُو) وْفي الضـَّلَعْ نَفـَّجْنَا
ظُرْفـُوشَدِيِدْ ؤذوْقـُو عَدِيِدْ ؤنَايِرْوَجْنَةْ

سَلاَّمَةْ وْعَرِيِبْ وْالخَيْزُرَانْ ؤتَوَدُّدْ
فَايْقـَةْ عَليْهِنْ اتنيْنْ سَبْعَةْ غَيْرَ تَرَدُّدْ
أحْمَدْ قوُلْ لُهْ جَرْحَاً جَابْ مَعَانَا تَجَدُّدْ
بـ حَسَسُو النـِّفـُوُسْ حَكَّمْ عَليْها تـَهَدُّدْ

نـَايِرْ في الرُّبَاط ْ حَوَّمْ بُهْ عَاصْقيْلْ سِيِسُو
ضَرَّاعْ النـَّقيْبْ الْ كَالنـِّعَامَةْ رّسِيِسُو
حَاقْ تَعَبْ الشّيوْمْ الْ بالذِّكَرْ تَخْصِيِصُو
رَدَفْ الحِفـْلَة لـ ابْ طوْقْ الْ نَبَعْ دِمْسِيِسُو

فـَرْعْ المَرْمَرِيِ الْ جَمَعْ السَّمَاحَاتْ زَيُّو
مِنْ بَحَرْ الدَّمِيِرْ حَبَلَنْ جَدَاوِلْ رَيُّو
الْ البَرْقْ شَبَكْ مِزْرْ السِّحَابْ فوقْ نَيُّو
حَاقـُّو شَيوْمْ طِرَيْفِيِ المُنْدَرَة وْسِيِدْ غَيُّو

سِيِدْ ريْدِيِ ابْ مَرَادْةً في الضَّمِيِرْ شَاوْيَانَا
سِيِدْ روْقـَةْ وْتـَدَلـُّلْ ؤلَفظةً تَوْيَانَةْ
جَابْ للشوْحْ قِلاَدْة ً بالخُمَرْ رَوْيَانَةْ
قَالْ حِفـْلةْ وَرِيِدْ ابُو غُرْدَة هَوْيَانَةْ

مُخْتَارْ الْلَهْ يَا الْ قـَفـَّرْتِيِ بـ وَاقـُوُقِكْ
يَاالْ قَصَبَةْ الْ بِلاَعْبَنْ في السِّحَابَةْ بْرُوُقِكْ
الْ جَمَعْ المَحَاسِنْ وَالمَحَامِدْ فوقِكْ
الظُّرْفْ وَالذَّكَا وْفَارْطْ السَّمَاحَةْ وْذوْقِكْ

يَاالشَّتِلْ الْ عَليْكْ صَبْرْ العَشُوقْ انْهَدَّ
كُنْتْ مِنْ بَدْرِيِ سَامِعْ بـ سَمَاحَكْ مُدَّة
هَسَّعْ عيْنِيِ شَافَتْ ؤغَيِّيِ فِيِكْ اشْتَدَّ
وِانْتْ اسْمَحْ كَتِيِرْمِنْ الوِصُوُفْ العُدَّةْ

لوْنِكْ جِنـْسُو مَافِيِشْ وَالوَصِفْ لابُد
حُوُرِيْةً مَوَشَّحَةْ بـ جَوَاهِرْ ؤفُضَّةْ
بيْنْ خَدّيْكِ وَالشَّعَرْ الْ دَهِيِنُو اسودَّ
كَمْ انْفُسْ مَهَلَّكَةْ لا طَنَا وْلا سَدَّة

شَعَرَكْ لـ عَذَابْ العَاشِقِيِنْ امْتَدَّ
جَارْيَةْ عْطُوُرُو سَاتِرْلا مَحَازْمَكْ سَدَّ
خَدِّكْ مِنْ ضِيَاهُ القَمْرَا تـَاخُدْ صَدَّةْ
جِسْمِكْ نُوُرْ ؤمِنْ بَهْجَةْ سَمَاحِكْ نـَدَّي

حُسْنِكْ فَاقْ عَلي لَيْلَيَ وْزُبَيْدَةْ اتـَعَدَّي
لُبْنَيَ وْعَزَّةْ وَالبَلقِيِسْ عَليْهَا اتـْبَدَّا
مَجْبُوُرْ قَلْبِيِ في مَغَرَق بِحُوُرَكْ هَدَّ
وَلاَّ رَجَعْ لِيِ وَلاَّخَتـَرْبُو دَرْبَاً وديْ

طَالْبَكْ قـُوُلْ لـي يَا(رَانـْفَيْ) بِغـَيْرِ دَسِيِسَةْ
كيْفْ بِتجَاوَرْالْ نيْرَانـُو صَادْنِيِ هَسِيِسَا
رَمَضْ الْ السَّمُوُمْ يَبَّسْ كَبِدْتـُونَسِيِسَا
جَامِرْ قَلْبِيِ فوق عَطَشَا ً لْهَاتـُي بَسِيِسَة

قَلْبِيِ الْ كَانْ مِحَضِّرْ صَادَتـُوُ الحَقـَّاصَة
وَافْكَارْ ذِهْنِيِ يَا(العَاقِبْ) بَدَالِيِ نـَقَاصَةْ
ألْ كَاتْلاَنِيِ بَكْرَةْ وْفي الزُّمَامْ رَقـَّاَصَةْ
مَايْقْ الْ في الرَّشَايِمْ طَارَدَتْ حَقـَّاصَا

وَدْ حَسَّانْ مِلَوِّمُو مَا اسْتـَهَمْ بـ هَمِّيِ
مَا حَذَّرْنِيِ مِنْ زوْلاً سِلاَحُو مْدَمِّي
قـُوُلْ ليْهُ الْ كَتـَلْنِيِ وْمَا انـَّشَدْ مِنْ دَمِّيِ
عَاطِفْ ؤلوْنُو خَاطِفْ ؤبالعَفِيِفْ مِتْسَمِّيِ

الليلة آآآآ ودعشمان أبو الزهور ليكا عامر سوقو
مسدار سبعة للفرجوني شرحاً وراهو تسوقو
أعربو وانستر فسر ليهو واروي عروقو
جيب القول عدييييل وخلي العزول يموت بي شوقو
******.....******

تسلم استاذنا

أحم أحم

اللليلة يا ود عشمان شن بخارجك من الدرعه

عيال الحباك كلهم جوه دارت الصرعه

ود التوم سبارى خمسة نجوم ليكا واقف صخرة

و ازهرى بسلاح اللغة و الخبرة ليك اتصده

خليكى من الزوغان و ابقى مارق بره

ما تشمت العيين فوقك و تخسر الزغرودة

ورينا الشطارة من بلاد الترك و خلى ول كوكو يجلب بره

ههههههههههههههههههههها

تسلم يا ابونوال

يا جماعة زولكو يين ؟؟

ود عشمان سلام .....الليلة جاتك تارة
قصدوك الشباب ......بالحيل خشومم حارة
قايلنك غشيم........ حالفين يمين تنزرة
ازهري منتظر.... ود التوم هناك بتحرى
وريهم فصاحتك.......والعلم المؤصل برة
الشدة ام سكون...واو المد وما بتتجره
يافيصل خليل........ سيب الشعر لي اهلو
ود عشمان فهيم شارب..... العلم من اصلو
وفي بلد العجم ..... فرتاق صفوف البصلو

من طرف **nashi** 14th أكتوبر 2012, 13:31

القصيدة ابدااااااااع Very Happy

يا حليلنا منها الزايله

محمود ابوى انا للشعر سبارى

مانى زول حديد و وراء التواميس جارى

بعد الكوارو بقيت زولا للعوين انصارى

ودعشمان اقيف راجع حكاية الكارو

و خليك حريف ما تسمع كلا الفرو

ههههههههههههههههههههههها

ههههههههههههههههههههههههها

هويا محمود خلي الوريف يروينا الكلام وللخلوق يتجلّى
موسوعة,, تاريخ سياسة وشعر وبالصلع والشيب لعب واتسلّى
فتش لينا ودعشــمان وقول ليهو منتظراك الجوازم وكل حروف العلة...
آآآودعشمان خايفك ترقع ولو حفظتا المعاجم جملة

يا وريف عفوا للتعديل إن كان يستقيم وأنا ما زول عروض و بحور

ماقصرتا تب يالأسد النتر حارس حماهو بهاجم
جيت بالصحيح مرجعيتك ذكر قرآن ومعاجم
بلاغة فصاحة من حد الجدود ماعايزه ليها تراجم
لو كحل محمود عومك !! يجيك من طولو رب كاضم

يا الفاتح اخوي سيب الكلام الزايد

ود عشمان حلف الليلة قبل عايد

مسلح بالعلوم وسالي سيفو المايد

عارف ود خليل وفي الحلة كانو ندايد

بتفاصح كتير وفي العكرة دايما صايد

ان درت الثقافه بملاك صحف وجرايد

وان درت الفراسة سليل عمد وعمايد

كلاااااااااام في كلااااااااام يا عوض دكام

سنتر الخرطوم .. يا فيصل خليل .. كلااااام في كلاااااام يا ود منصور .. شوفو ناس الفاتح .. يا عوض دكام .. شوفو ناس ناشي .. يا عوض دكام ..

كلاااام في كلاااااام يا ازهري الحاج .. دا شعر رائع يا رائع ..

شكرا يا جميلين ..

طبعا انا زول (( هدَاي )) يعني بتاع ( ام كيكيي ) الان بنظم لي في كلام عشان امدحكم فيه ..

تحايا قلبيه صادقه يا ابناء الحباك .. نحن ما دم و لحم ..

ودعشمان مساك بالخير وجيتا جيت حبابك ميه
زي همسة نسيم كلام في كلام ,,,لبستنا الطاقيه
لهيجك نقي ومعســول أديتنا فيهو وصيه
بالحيل مننا ,,دم ولحم ما جيتنا بالزنديه
***...***
وفي شان حنّك ,,,وطيب نفسك ,,,ياصافي النيه
مكتوبي بقدمو لأبوالزهور ,,العينو ديمه رضيه
مسدار السبعة للفرجوني يعتبرو ليكا هديه
يعفيكا من إعرابو ,,ولوري شيخ محمود يسلموالدوريه

تنازلنا يا شيخنا الفاتح عن الإعراب بشرط أن يجّود ود عشمان قراءته ولا يلُحن في ذلك

شدوا لك ركب فوق مهرك الجماح
ضرغام الرجال ازهري الحاج الفارس الجحجاح

بابك ما انقفل ونارك تجيب اللم
وما بتحلف تقول غير استريح حرم

شدوا لك ركب فوق مهرك الجماح
ضرغام الرجال محمود منصور الفارس الجحجاح
تمساح الدميرة الما بيصده سلاح
المال ما بيهمك إن كتر وإن راح
***
الفاتح ود التوم

البطن الجابتك والله ما بتندم
ويا أسد الكداد الفي خلاك رزم
ويا رعد الخريف الفوق سماك دمدم
***

بابك ما انقفل ونارك تجيب اللم
وما بتحلف تقول غير استريح حرم

***
احسان أبواتك جبير بيسدوا للعوجات
ومطمورتك تكيل للخالة والعمات
وفي الجود والكرم إيديك دوام بارزات

***
فيصل خليل صدرك للصعاب دايماً بعرف العوم
وفي وسط الفريق في الفارغة ما بتحوم
لا تتلام ولا بتعرف تجيب اللوم
تفخر بيك بنات ابوجبيهه و الخرطوم

يا عمي ازهري ..

لو دايرني اعرب لك مسدار الفرجوني هذا الا اخلي الشقل لمدة ثلاثة شهور عشان اتفرغ للمعاجم و كتب البلاغة ..

تحايا قلبيه صادقة ..

مسدار الفرجوني والله رهيب .... ومحمود منصور خلى فيصل ماراح قديمو وبانتلو جدايد

ودعشمان قبل اليوم سرق من ناهد عبيد كلام و ناهد زعلانه لى اسع

ياخى نصحتك و قلت ليك عليك بالاجتهاد و بطل ( كوبى أند بيست ) لانها ممكن توديك فى ستين داهية

اسع الكلام دا جيبتو من وين؟

هههههههههههههههههههههههههههههههههههههها

انت فعلا بتاع ام كيكى

ابدعتو والله ...واستمتعت جدا بالمجادعه المنظومه.
بوست جميل ...لقيتا ياود عشمان.

الفاتح محمد التوم كتب:
...
آآآودعشمان خايفك ترقع ولو حفظتا المعاجم جملة

ودعشمان مساء الخير لكن مابســألك !!!!! انيراش وانبطاح شديد خالص خالص .... تلاتة شهور عشان تعرب المسدار
ومال أكان دخلوك في أبو الشيص ...حتجيب كتب العصر العباسي ؟؟؟
هههههههههههههههههههههههههههههه
عشان تقنع فيصل واقبال ...................
حلفتك وخصمتك تفسر لينـــا ............... " ترقّــــــــــع " معناها شنو ؟؟؟؟؟؟

خالص الود حبيبنا ............

أمانة ما وقع زول ..... الشهادة السودانية

ول حتيله ..

الجماعه الشربكو فيني .. حلحل ..

دا قال يعربو له المعلقه كامله .. و دا قال يشرحو له المعلقه كما هي .. لكن الجماعة ديل قصدوني ..

طيب يا اخوانا لو اعطوني ثلاثة وسائل مساعده سوف استعملها برمتها للمخارجة من الورطة التي وقعت فيها مع الفاتح ود التوم ..

فلنفترط جدلا الوسيله المساعده الاولي للسيده اقبال عبداللطيف .. نجد ان المشكله اقبال لا بتحل و لا بتربط ( مافي داعي )

الوسيله الثانية للمساعده لو اعطيتها للسيد محمود منصور .. نجده انه مشقول مع بتجارة اللواري ..

طيب بقية وسيله مساعده واحده .. الو .. الو ..الو الشاعر ياسر ابورفاس .. هذا الرقم لا يمكن الوصول اليه حاليا ..

طيب نتوكل علي بركة الله و نحاول نشوف معني كلمة " ترقّــــــــــع "

طيب يا عزيز الفاتح ..

المعني الاول ,, ادخله لك في جملة مفيده : رقعً الترزي الجلباب اي اصلحه .

المعني الثاني : ترقعً اي بمعني تكسب الشي او الاستفاده منه في المستقبل ..

المعني الثالث : ترقعً فلان مكان فلان اي ابدله ,, علي سبيل المثال .. تقول العرب ترقعً محمود منصور مشرفا للمنتدي العام اي بدلا للاستاذ الفاتح محمد التوم.

اما المعني المراد فيما تفضلت به : الاستفاده من المعاجم جملة .. او هكذا علي ما يبدو لي ..

اتمني اكون قد وفقت حتي لا اعود الي المرحلة قبل الجامعية ( خورطقت الثانوية )

الظاهر إنك حتقعد في خورطقت دي لمّن ترقع شهادتك ....

الوسيله الثانية للمساعده لو اعطيتها للسيد محمود منصور .. نجده انه مشقول مع بتجارة اللواري

المعني الثالث : ترقعً فلان مكان فلان اي ابدله ,, علي سبيل المثال .. تقول العرب ترقعً محمود منصور مشرفا للمنتدي العام اي بدلا للاستاذ الفاتح محمد التوم..

يعني انت لازم تحشر محمود منصور في اي موضوع؟؟؟

لو ما عرفت تجاوب السؤال المفروض على طول تستعين بابو هريرة لانو رجل فاهم ومتمكن ومشرف المنتدى الاسلامي

أزهرى الحاج البشير كتب:الظاهر إنك حتقعد في خورطقت دي لمّن ترقع شهادتك ....

يا ودعشمان الجملة المفيده أداك ليها عمنا أبو الزهور...في المداخلة الأولى والتانية....أنا كررتها ليك ..(ركز على ماتحته خط) ....

هههه هههه
يطول في عمركم
ياجماعه الامتحان ما عندو مراقب؟هههه

يا حباكيين ســـــلام والله جد فرحــان
من بوست أزهري الزانقبو ود عشمان
ود التـــوم ظهر ســـباري في الميدان
بالنية الســـــــليمة يحمش في النيران
****
ود منصور سلام والله جد أبدعت
البنظم السليم على بوستنا إجدعت
يا فيصل اخــــوي ياللنظم حاولت
آتاريك لــيك باع والله ما قصرت
****
ودعشمان أخوي عزازنا ضغطو عليكا
بــس ما مهــــم أنا ديما واثــــــق فيكا
قصدم شنــو بي ترقيع شهادتك ديكا؟؟
وإت زول فهيـــــم والعــــلم فاخر بيكا

شرف الدين سلام من مكة برسلو ليكا

انت عارف فيصل لايوق لياقة الويكة

ود عشمان حريف وراوغ تقول كاريكا

شارب العلم شربوت ومن بلد العلم يديكا

ان درت السياسة حرم يجهجه فيكا

وان درت الشعر خد منو بالمزيكا

وان درت الدواس في الحال يطب جايكا

روعه البوست
بس مشكاركو لودعشمان دا وجعني حار
هههههه
ود منصور انقرع الول دا مابشكر
الول ما لفيف دخل القلوب واتحكر
لسانو السليط ساليهو وفوقنا يتبختر
اتنين غلبونا ودعشمان وحكم العسكر

بتجيد الكلام أسد امبرمبيطة الزام
هزيت البلد من رشاد لبرام
سيفك للخصوم حكام
*********
***********
الرعد النتر بى جيهة الامطار
لمولو الاورط شايلين سلاح النار
ود عشمان قام ورتب الأنصار
في ابجبيهي ديك كم شبعن صقار
***********
الباسبورت صدر واتلمت المخلوق
بى عيني بشوف أب هريرة حايم فوق
كان جات بالمراد و فيصل خليل حيروق
ما كان بشتغل ود عشمان في السوق
***********
الباسبورت صدر واتلمت الحلال
سرجولو الجمل واتكرنف الخيال
قدر الله الحصل و الزمان ميال
منسول من أبوك ماك ود حرام دجال
***********
بتكلم بقول بوريك شن حسبوا
نايبو السنين منّو الرجال حسبو
كل الخاصموك في الآخرة ما كسبوا
التبعوك جنود لله ما انتسبوا
***********

الاعزاء :

علي ول ابوي احمد شرفالدين

اقبال بت ابوي عد اللطيف

محمود ول جدي منصور

ابشرو بالخير اتكلمو ساي عوجه مافي ..

يا اخوانا ..

دا كلو كوم تعالوا نشتغل شقل جماعي عشان نخرج من الورطة الوقعنا فيها من قبل الفاتح و عمنا ازهري ..

انا بكل صراحة اتصلت لواحد صحفي و قلت له ترقع معناة شنو ؟؟ بعد ان صمت قليلا قال لي ادخلها في جملة مفيده و قلت له :

"ودعشمان خايفك ترقع ولو حفظتا المعاجم جملة"

رد قائلا : هذه كلمة من اللغة العربية القديمة .

لذا يا اخوانا نحن بنقول لي احبابنا الفاتح و ازهري ادونا مدة يومين زياده عشان نشوف حل للشقلانيه دي ..

اقترح اي زول يكتب المعني الذي يعرفه و انا شرحتها بثلاثة طرق مختلفة لكن لم يكن المعني المطلوب و عندي شرح رابع و هو :

ترقَع : بمعني تزهد في الشئ

يلا يا اقبال سيبي الفصاحة و اعطيني المعني المطلوب ..

يا ودعشمان ماجبتا لينا المعنى ,ومطلبنا ما لقيناهو
ترقيع الشهادة مفهوم قديم في الزمن الجميل شفناهو
الطالب إن رسب في مادة يقعدبيها ,, للقابله تستناهو
يمتحنها وإن نجح , يلحق بيــها الفاتــومن زملاهو

الفاتح ..

ما تغلق نحن عاملين نفير عشان نشرح لكم معني الكلمة .. بس ادوني يومين زياده ..

أجي ... يا بنات أمي ؟؟؟؟؟
والمربع الفوق ده .... أغنية " قمنبله ولاّ النبق النبق "

آآآآودعشمان !! سامحناك تسوينا كوره تلعب بينا؟؟
ترقيع الشهادة شرحناهو عديييل لازغنـا لا اتضارينا
ود منصور ماقصّر ...شكّرك وسواكا لينا رتينة
آآآآمحمود هجاي جاييك .حلف في إيديكا أربطو كتينة

ياشين حديثك الليلة آآآآمحمامود,, كترتا فيهو العـــــــــّوه
دخرناك ياقمرنا,, ,,عشا البايتات شيال البعيد والجـــــّوة
طلعتا بوشـين ,,, طعنــتا قلوبنـــا,,وشابيت على الترقوه
اتحمّـــل مننا الجايــاك , يا بياع العِشـــــــــــرة والخـوّة

******

صدق الوريف ,نزلتا صورتك ونسيت اللوري و الكراكا
ودعشمان شبّعتا فينا صقورو,, هلكتنا وعدمتـّنا المرحاكا
ياقاضي البلد ,أحكم في ودمنصور وعناية الكريم تبراكــا
لا أهلية لاباسبورت ,,نفياً عديييييل صعيد جبال التـــــاكا

لا اهلية لا باسبورت نفيا عدييييل صعيد جبال التاكا
ايووووي يوووووي ..

محمود ..

صعيد جبال التاكا دي الحبشه .. جاتك في طبق من ذهب .. امش ازوج طوالي من الجماعه ديل .. و اقبال زغرطة ..

أبو الزهور سلام زريت عشمان فى حته
يكفيه الصقيع والغربه ضيّقت عليه البّته
صاح هو فصيّيح ولسانو بس كرفته
لكن كمان مسدارك عطل حواسو السته
*****
ود محمود أخوى زولك طلع لى فاره
(رقعوه) بى كلام جاب لينا ردو نشاره
يكسر فى التلج وماكنت قليلو كساره
يفتش أخوك ظنو يلقى منى دباره
***
عشمان ياخوى لسانك لمو عليك
بكره لمن ينقد مابتلقى البرقعو ليك
عصروك بالعلم وزرزروك لمن سعنا الظيطه
ياريت يبقالك درس شان تبقى جم الحيطه

ود عشمان أخوي ود البطاح والوادي
فوح اسمك مرق من دار تُرك لي غادي
كان قتل النمر ماهو عندك عادي
وذمنك في القنيص كمل جداد الوادي
*************
ودعشمان أخوي السبحتك ما ميه
سبحة عشر تلاف والنية ميه الميه
وكان جاك البعيد نارك فجر وعشية
وكان قصدك فقير تورك تراهو هدية
*************
ودعشمان أخوي أركز حباب مثواك
وقرت الكبير والصغر كانو جناك
وفي نضم الترك تراك أنت براك
وكان قلت الفهم كملتو ومافي وراك
***********
ود عشمان أخوي ود المفازة وغابة
كملت الحطب في نارك التقابة
وجفلت الرجال لمن دخلت حرابة
لاجرت سجار لاسفة من التابة

وكان قصدك فقير تورك تراهو هدية
آآآح سخيل بس !!! آل عتوت آل

يا حسن عشمان ..

يا محمد عشمان ..

لو سمعتو ساي عمكم ازهري في طريقو الي ابوجبيهه .. انتم في امبرمبيطة اضبحو تلاته من الفي الزريبه ..و اذا جاكم في امبرمبيطة اضبحو له سبعة و اعطوه بقية المراح ..

ياسر ابو فراس ..

كلامك دا مدح و لا تشبيه المدح بما يشبه الزم ..

استازنا الكبير الطيب كنده ( نيوتن)

مهما يكن من شئ انت شاعر ..

اجمل المني ..

أخوتي ياسر .... ونيوتن
نحمد الله على مروركم ماقصرتو
أخيراً نطق ودعشمان دون أن يلحن ....

محمود ابوى الليلة وينك انت

خليت الدواس و هربت من الحته

عزرك كان الحجيج رب العباد ليهم غطا

بطل دغمسه و و اجه مصيرك اسا

ودعشمان اخوك الليلة شمه العافيه

بعد الهروب فى البحث عن القافية

يامحمود أبو قالولنا جبت لواري
تنقل في الحجيج تقطع جسور وكباري
ونجدت أخوك (غريق) من مشية الكداري
إلا وين كلاشك وحجبات ول أم بتاري
*****
يامحمود أبوي ساكن مدينة الخير
ود عشمان بعيد في بلد عجمي الطير
اديهو الدعا قبال يزورنا نكير
ننعم بالجنان ومايفوتنا كتير
***********
يامحومود أخوي فيصل بنط الحيطة
ايدى النقار عصا ويملا القبايل عيطة
وهريرة الكتب ألفين ومية عريضة
راجينك تعود وتملا الميادين زيطة
*****
ود عشمان أخوي طرق حرابك ساي
والعمدة الزبير اليضرب الروراي
وقول لأبو الزهور يكتر الدوباي
واركز ل(أب لواري) مايغرك البوباي

يالطيب كفاك ما تحمش النيران

الشر ان وقع ما بنفع البكيان

ود عشمان فحل ما بخلعو البنبان

كايس للعلم بمشيلو وين ما كان

صنديد المحاصة وهاك من الصراع الوان

رابط في الخلا و حتى الفريق سمعان

مشرف منتدى التعريف لولاه يوم ماكان

عمدة ولد عمد حازمي واصيل بطران

معروفين الحوازمة اصحاب كرم شجعان

تسلم يا ود اسحق
هدية لإقبــــال بت أمي ........................
سمح اللزوم وكتين عدوه يريدو
وسمح البلحق في المكارم ايدو
سمح المقرم في المحاصه حديدو
وسمح البوسع في المجاعه مسيدو
*****
كعب التداخلو ويبقي ماد قدومو
وكعب الدليب وكتين يصيح بومو
عريان العروض مابسترنو هدومو
وحدبو الضمير في الشينه كبر كومو
*****
كعب البقودك من قفاك للنيه
وماشكروه السوي للناس سيه
القاصدك عديل وبدور معاك الديه
إلقاك ابكريق من مدو حارس الليه
*****
سمح البناصحك وإت براك وحيد
وسمح البراحمك وإنتي منو بعيد
سمح البذكر بي رقيب وعتيد
وسمح البباشرك زي قبايل العيد
******
سمح المن قام صغير شــــــــــاد حيلو
وسمح الفي المحاص يقدلن خيلـــــــو
وسمح الفي الغضب دايما مهدل حيلو
وسمح القام فجر يضبح كرم لي ليلو
******
كعب الزول صحيح ان اباك بوشـــــــــاية
وكعب الماعندو منطق ولسانو نـار شرابة
كعب عوس الرجال وكتين يكوسو محاية
وكعب لمن كعب ,, الباعلو فوق مصلايـــة

وكعب لمن كعب ,, الباعلو فوق مصلايـــة

صحة لسانك يا ود التوم

تحياتي