مسدار .. مرثية الفرجوني للحاج علي حميدة
3 مشترك
صفحة 1 من اصل 1
مسدار .. مرثية الفرجوني للحاج علي حميدة
من طرف أزهرى الحاج البشير 13th أكتوبر 2012, 10:43
مرثية الفرجوني للحاج علي حميدة
1 خـَيِّرْنـَا الْ بـِشُوُرْ يوْمُو الرَّحَلْ مَا شَارْنَا
خَلـَّي العينْ مِجَدْوِلَة والدِّمُوعْ مِتـْـقَـارْنـَة
مَصْحَفـْنـَا وْ هُدَانـَا الْ بيهُ رَحْمَة دَارْنـَا
من يوموالْ خـَتـَرحُسْنْ الصَّبُرْ ما زَارْنَـا
2 نـَبْكِي بـِكـَيَ المِطُوُرْ وَكْتيْنْ تـَسُوُقْ السّيْلْ
فـَاقْـدِيِنْ ذَاتـَـكْ الطـَّيبَة وْتـِلاوْة الليل
صَدَقُواالْ قـَالـُوا يومْ رَحَلُواالْ بِعَدْلُوا الميْلْ
إنـْكَسَرْ المِرِقْ وِاتـْشَـتـَّتْ الضَّانـْقيْلْ
3 فـَاقـْدِنـَّكْ كَتِيِرْ فـَقـْدَاً بَلا مَحَدُوُدْ
يا تـَالِي الكِتَـابْ وكْتْ الضَّلامْ مَمْدُوُدْ
كَمْ سَنـَّدْتَ واقِعاً بالضُّعُفْ مَهَدُوُدْ
ؤكَمْ حَليْتْ قَوَاسِي وْ دَرْبَهِنْ مَسْدُوُدْ
4 نـَفْسَكْ طَيْبَة والتـَّقـْوي المَكَمَّـلَة زَادَكْ
كَمْ أصْلَحْتَ كَمْ أفـْلَحْتَ بـ إرشَادَكْ
الصَّلاة والتـِّلاوَة الْ في الهِجُوُعْ واوْرَادَكْ
في قـَبْرَكْ مَعَاكْ بِتـْوَنـَّسَنْ في رْقـَادَكْ
5 نـَبْكِي بِكَيَ المِطُوُرْ فـَاقـْدِينْ وِجُوُدَكْ بيْنـَّا
يا ضَوْ الصَّبَاحْ الْ كَانْ بِنـَوِّرْ عيْنـَّا
كَبـِيرْنـَا الْ بـ حنـَانـُو بـْسِدْ مَحَلْ وَالديْنـَّا
نـَبْكِيِكْ بالدِّمُوُعْ مِتـْحَزِّنِـيِنْ يَا زينـَّا
6 نـَبْكِيِكْ بالدَّمُوُعْ يا فيْضْ بَحَرْنَا الصَّافِي
نـَبْكِيِكْ بالقِلـُوبْ ؤبِكَيَ القِلُوبْ مُوُ كَافِيِ
نـَبْكِيِكْ يا الْ بِتـَفزَعْ للمِضِيِقْ مِتـْـلافي
نـَبْكِيِكْ يا الْ بِتـَصْلِحْ كُلَّ يومْ ؤتـْعَافِي
7 نـَبْكِيِكْ البِكَا الْ ما بْجِيـِبْ غَضَبْ خَالِقـْنـَا
نـَبْكِيِكْ بالصَّبُر وَالوَجْعَة مَا تـْفـَارقـْنـَّا
نـَبْكْيِكْ يا الْ فـُرَاقـَكْ في القـِلـُوبْ حَارِقـْنـَا
يابـيـْتـْنـَا الْ بـِلِمْ ويِجْمَعْنـَا ما بـْفـَرِّقـْنـَا
8 نـَبْكِيِكْ يا الْ مِثـَالَكْ في الرِّجَالْ مَعَدُوُمْ
يا الْ بالتـَّـقـْوَيَ سَوَّيت الفـَضَالَة هْدُوُمْ
نـَبْكِيِكْ البِكَا الْ مَا بِكْرَهُو القـَيُّومْ
نـَبْكِيِكْ بالصَّبـُر لكِنْ حُزُنـَّا يْدُوُمْ
9 يانـِسـلْ الرِّجَالْ أهَلْ الدِّرُوُعْ وَالخيْلْ
يا تـَالِي الصَّحَايِفْ في هَزَايْعْ اللّيْلْ
فـِيِكْ نـِسْتـَغْفـِر اللَهْ وْبينـَا كَتـِرْ المـيـْلْ
يا المهَلْ الْ بـِبَلـِّجْ مِنْ ضِهُوُرْنا الشّيْلْ
10 يا الْ بِتـْصَادِفْ المِسْكِيِنْ بِتَكْشِفْ ضُرو
ليـْشْ في قـْلـُوبْنـَا سكَّنـْتْ الحُزُنْ بـ حَرُّو
يا ودْ الْ مُحًالْ فوقْ فـَارغـَة ما بـِنـْجَرُّوا
حـُزْنـَا صَادْنـَا بالطـُّوُلَة الزَّمـَانْ ما بفِرُّو
11 ما ودَّعْتـَنـَا وْسَافـَرْتَ غير مَا تـْشُوُرْنـَا
حُزْنـَاً صَادْنـَا مِنـَّكْ حَدُّو بـِبـْقـَي قـْبُوُرْنـَا
نِتـْلفـَّتْ نـَعَايِنْ وَيْنْ ضِيَانـَا وْنـُوُرْنـَا
نـَلقَ الحَالْ كَعَبْ وَالعَبـْرَة خَانـْقـَة صَبُوُرْنـَا
12 ما استـَنـّيْتْ (عُـمَرْ) بَارَكْتْ ليهُ الحَجْ
خَلـّيْتْ ليهُ حُزْنـَاً ذَاتـُو مَا بِنـْفـَجْ
في وَسْطْ الوُفُودْ الْ جَايـَة مِنْ كـُلْ فـَجْ
خـَبـَرَكْ جـَاهُـ فجَّ ضَمِـيـِرُو مـِيـَّة فـَجْ
13 الجَفـَا مَاهُـ طَبـْعَكْْ يَا حَسِيـِنْ الطَّبْعَة
ليْشْ سَوّيـْتـُو خَلـّيْتْ الدِّمـُوُعْ مِتـَّبْعـَة
حَدْ ما يْدَوَّرَنْ فوقـْنـَا اللَّيَالِي السـَّبْعَة
فـَاقـْدنـَّكْ كَتـِِيرْ يا الخيْرْ حَسِيِنْ الرُّبْعَة
14 الفـَقـْدْ الكَبـِيـِرْ فـَقـْدْ التـَّقِي وصَوَّامْ
سَجَّادْ اللَّيَالِي الْ في السَّحَرْ قـَوَّامْ
نـَفـْساً طَيـْبَة عَابـْدَة الوَاحِدْ الدَّوَّامْ
ؤقـَلـْبـَاً مِنْ عـِبـَادَة رَبُّو مُو نـَوَّام
15 حَزْنـَانـَاتْ قـِلُوبْنـَا وْحـُزْنـَهِنْ إيـِمَانْ
رَاضْيـَاتْ بالكِتـَابْ الْ أنـْزَلـُو الرَّحْمَنْ
يا حِزْبْ الرِّضَا الْ لـ دَارْنـَا كُنـْتَ أمَانْ
مَفـْقـُوُدْ بالكَتيـِرْ لـ مـُدَّة الأزْمَانْ
16 منـَادِيـِكْ نـَادَيَ يومْ جِمْعَة وْنـِهَارْ يومْ عِيـِد
نـَزَلـْتَ جْوَارْ كَـرِيمْ رَبـَّاً عَظَّيـِمْ ؤمَجِيـِد
بـِجَرِّحْ قـَلـْبِي كَوْنـَكْ تـَبْقَ مِنـِّي بَعيد
ويفـَرِّحْ قـَلبي كَونـَك في جِوَارُو سَعِيـِد
17 بَعَزِّيِ الكُمـَّل الطـَّيْبـِيـِنْ مِلـُوُكْ النـَّاسْ
عِيَالْ بَطْحَانْ قِلـُوبـْهُنْ عَامْرَةْ بالإخْلاصْ
بَعَزِّيِ الْ فِيِهُنْ الجُوُدْ وَالكَرَمْ والبـَاسْ
لِبَابْ عَدْنـَانْ سُلالـَة حَمـْزَة وَالعَبـَّاسْ
18 بَعَزِّيـِهُنْ عَزَا الحَزْنـَانْ ؤحـَامْدْ الرَّبْ
عَزَاالْ وَدْعيْنـُو طَافـْرَة الدَّمْعَة مِنـُّو تـَرَبْ
أقـُولْ لـ قـَلبْي أصْبُرْ أوْعَـي تِتـْخَرَّبْ
جَزَعْ مَا بْجِيـِبْ، جـِرَاحَكْ قـُولْ عـليْهِنْ كَبْ
19 العَزَا للمِلـُوكْ فـِرْسَانْ عَوَاتـِي الخيْلْ
مَرَاكْزْ الخيْرْ ؤأقـْمَارْ الهِجُوعْ وَ اللَّيل
صَنـَادِيدَاً بِصَادْمواالموْتْ وِيصُدُّواالخيْل
واجَاوِيِدَاً بـِفـُوقـُوا عَلي المِطُوُرْ والسّيْلْ
20 العَـزَا للبَطَاحِيـِنْ جـُمْلـَة دُوُنْ تـَحْدِيـِدْ
رَقـَدْ فـَارِسْنـَا طـَاهْرْ الكَفْ ؤطـَايلْ الإيـِدْ
رَقـَدْ الْ كُلـُّو يومْ كَانْ في الفَضَالَةْ بْزيـْد
رَحَلْ,ؤرَحِيـلـُو رَحَّلْ مِنْ قـِلـُوبْنـَا العِيـِدْ
21 بَعَزِّيـِكُنْ جَمِيـِعْ ؤبَعـَزِّي نـَفْسِي كَمَانْ
وَاقُوُلْ الموْتْ فـَرِضْ مُنـْزَلْ منْ الرَّحْمَنْ
طَوِيلْ عُمْرَكْ قـَصِيرْ، وآخْرْ النـِّهَايَة ضَمَانْ
دِريْبـَاً مَاشْ جِدُوُدْنـَا اتـَّاَبَعوْبُو زَمَانْ
22 بَعَزِّيِ الكَافـَّة أهَلْ الجُوُدْ ؤأهَلْ الخيْرْ
بَعَزِّي الكُمـَّلْ الْ لـ اللَهْ جَـدُّوا السيْـرْ
بَعَزِّي الْ في هَوَايْدْ اللّيْلْ قـِلـُوبُنْ طيْرْ
بعَزِّي الْ بـِصْلِحُوا الأمَّة وْبـِزِيلـُوا الضّيْرْ
23 بـَعَزِّي الْ خَافـُوا رَبْ النـَّاسْ إلـَهْ الكوْنْ
بَعَزِّي الْ في المَرَاتـْبْ العُلـْيَا مَاهُنْ دُوُنْ
بَعَزِّي الْ عِنـْدَهُنْ كُلَّ القـَوَاسِي تـْهُوُنْ
بَعَزِّي الْ بِسْنِدُواالمِسْكِيِنْ مَحَلْ مَا يْكُوُنْ
1 خـَيِّرْنـَا الْ بـِشُوُرْ يوْمُو الرَّحَلْ مَا شَارْنَا
خَلـَّي العينْ مِجَدْوِلَة والدِّمُوعْ مِتـْـقَـارْنـَة
مَصْحَفـْنـَا وْ هُدَانـَا الْ بيهُ رَحْمَة دَارْنـَا
من يوموالْ خـَتـَرحُسْنْ الصَّبُرْ ما زَارْنَـا
2 نـَبْكِي بـِكـَيَ المِطُوُرْ وَكْتيْنْ تـَسُوُقْ السّيْلْ
فـَاقْـدِيِنْ ذَاتـَـكْ الطـَّيبَة وْتـِلاوْة الليل
صَدَقُواالْ قـَالـُوا يومْ رَحَلُواالْ بِعَدْلُوا الميْلْ
إنـْكَسَرْ المِرِقْ وِاتـْشَـتـَّتْ الضَّانـْقيْلْ
3 فـَاقـْدِنـَّكْ كَتِيِرْ فـَقـْدَاً بَلا مَحَدُوُدْ
يا تـَالِي الكِتَـابْ وكْتْ الضَّلامْ مَمْدُوُدْ
كَمْ سَنـَّدْتَ واقِعاً بالضُّعُفْ مَهَدُوُدْ
ؤكَمْ حَليْتْ قَوَاسِي وْ دَرْبَهِنْ مَسْدُوُدْ
4 نـَفْسَكْ طَيْبَة والتـَّقـْوي المَكَمَّـلَة زَادَكْ
كَمْ أصْلَحْتَ كَمْ أفـْلَحْتَ بـ إرشَادَكْ
الصَّلاة والتـِّلاوَة الْ في الهِجُوُعْ واوْرَادَكْ
في قـَبْرَكْ مَعَاكْ بِتـْوَنـَّسَنْ في رْقـَادَكْ
5 نـَبْكِي بِكَيَ المِطُوُرْ فـَاقـْدِينْ وِجُوُدَكْ بيْنـَّا
يا ضَوْ الصَّبَاحْ الْ كَانْ بِنـَوِّرْ عيْنـَّا
كَبـِيرْنـَا الْ بـ حنـَانـُو بـْسِدْ مَحَلْ وَالديْنـَّا
نـَبْكِيِكْ بالدِّمُوُعْ مِتـْحَزِّنِـيِنْ يَا زينـَّا
6 نـَبْكِيِكْ بالدَّمُوُعْ يا فيْضْ بَحَرْنَا الصَّافِي
نـَبْكِيِكْ بالقِلـُوبْ ؤبِكَيَ القِلُوبْ مُوُ كَافِيِ
نـَبْكِيِكْ يا الْ بِتـَفزَعْ للمِضِيِقْ مِتـْـلافي
نـَبْكِيِكْ يا الْ بِتـَصْلِحْ كُلَّ يومْ ؤتـْعَافِي
7 نـَبْكِيِكْ البِكَا الْ ما بْجِيـِبْ غَضَبْ خَالِقـْنـَا
نـَبْكِيِكْ بالصَّبُر وَالوَجْعَة مَا تـْفـَارقـْنـَّا
نـَبْكْيِكْ يا الْ فـُرَاقـَكْ في القـِلـُوبْ حَارِقـْنـَا
يابـيـْتـْنـَا الْ بـِلِمْ ويِجْمَعْنـَا ما بـْفـَرِّقـْنـَا
8 نـَبْكِيِكْ يا الْ مِثـَالَكْ في الرِّجَالْ مَعَدُوُمْ
يا الْ بالتـَّـقـْوَيَ سَوَّيت الفـَضَالَة هْدُوُمْ
نـَبْكِيِكْ البِكَا الْ مَا بِكْرَهُو القـَيُّومْ
نـَبْكِيِكْ بالصَّبـُر لكِنْ حُزُنـَّا يْدُوُمْ
9 يانـِسـلْ الرِّجَالْ أهَلْ الدِّرُوُعْ وَالخيْلْ
يا تـَالِي الصَّحَايِفْ في هَزَايْعْ اللّيْلْ
فـِيِكْ نـِسْتـَغْفـِر اللَهْ وْبينـَا كَتـِرْ المـيـْلْ
يا المهَلْ الْ بـِبَلـِّجْ مِنْ ضِهُوُرْنا الشّيْلْ
10 يا الْ بِتـْصَادِفْ المِسْكِيِنْ بِتَكْشِفْ ضُرو
ليـْشْ في قـْلـُوبْنـَا سكَّنـْتْ الحُزُنْ بـ حَرُّو
يا ودْ الْ مُحًالْ فوقْ فـَارغـَة ما بـِنـْجَرُّوا
حـُزْنـَا صَادْنـَا بالطـُّوُلَة الزَّمـَانْ ما بفِرُّو
11 ما ودَّعْتـَنـَا وْسَافـَرْتَ غير مَا تـْشُوُرْنـَا
حُزْنـَاً صَادْنـَا مِنـَّكْ حَدُّو بـِبـْقـَي قـْبُوُرْنـَا
نِتـْلفـَّتْ نـَعَايِنْ وَيْنْ ضِيَانـَا وْنـُوُرْنـَا
نـَلقَ الحَالْ كَعَبْ وَالعَبـْرَة خَانـْقـَة صَبُوُرْنـَا
12 ما استـَنـّيْتْ (عُـمَرْ) بَارَكْتْ ليهُ الحَجْ
خَلـّيْتْ ليهُ حُزْنـَاً ذَاتـُو مَا بِنـْفـَجْ
في وَسْطْ الوُفُودْ الْ جَايـَة مِنْ كـُلْ فـَجْ
خـَبـَرَكْ جـَاهُـ فجَّ ضَمِـيـِرُو مـِيـَّة فـَجْ
13 الجَفـَا مَاهُـ طَبـْعَكْْ يَا حَسِيـِنْ الطَّبْعَة
ليْشْ سَوّيـْتـُو خَلـّيْتْ الدِّمـُوُعْ مِتـَّبْعـَة
حَدْ ما يْدَوَّرَنْ فوقـْنـَا اللَّيَالِي السـَّبْعَة
فـَاقـْدنـَّكْ كَتـِِيرْ يا الخيْرْ حَسِيِنْ الرُّبْعَة
14 الفـَقـْدْ الكَبـِيـِرْ فـَقـْدْ التـَّقِي وصَوَّامْ
سَجَّادْ اللَّيَالِي الْ في السَّحَرْ قـَوَّامْ
نـَفـْساً طَيـْبَة عَابـْدَة الوَاحِدْ الدَّوَّامْ
ؤقـَلـْبـَاً مِنْ عـِبـَادَة رَبُّو مُو نـَوَّام
15 حَزْنـَانـَاتْ قـِلُوبْنـَا وْحـُزْنـَهِنْ إيـِمَانْ
رَاضْيـَاتْ بالكِتـَابْ الْ أنـْزَلـُو الرَّحْمَنْ
يا حِزْبْ الرِّضَا الْ لـ دَارْنـَا كُنـْتَ أمَانْ
مَفـْقـُوُدْ بالكَتيـِرْ لـ مـُدَّة الأزْمَانْ
16 منـَادِيـِكْ نـَادَيَ يومْ جِمْعَة وْنـِهَارْ يومْ عِيـِد
نـَزَلـْتَ جْوَارْ كَـرِيمْ رَبـَّاً عَظَّيـِمْ ؤمَجِيـِد
بـِجَرِّحْ قـَلـْبِي كَوْنـَكْ تـَبْقَ مِنـِّي بَعيد
ويفـَرِّحْ قـَلبي كَونـَك في جِوَارُو سَعِيـِد
17 بَعَزِّيِ الكُمـَّل الطـَّيْبـِيـِنْ مِلـُوُكْ النـَّاسْ
عِيَالْ بَطْحَانْ قِلـُوبـْهُنْ عَامْرَةْ بالإخْلاصْ
بَعَزِّيِ الْ فِيِهُنْ الجُوُدْ وَالكَرَمْ والبـَاسْ
لِبَابْ عَدْنـَانْ سُلالـَة حَمـْزَة وَالعَبـَّاسْ
18 بَعَزِّيـِهُنْ عَزَا الحَزْنـَانْ ؤحـَامْدْ الرَّبْ
عَزَاالْ وَدْعيْنـُو طَافـْرَة الدَّمْعَة مِنـُّو تـَرَبْ
أقـُولْ لـ قـَلبْي أصْبُرْ أوْعَـي تِتـْخَرَّبْ
جَزَعْ مَا بْجِيـِبْ، جـِرَاحَكْ قـُولْ عـليْهِنْ كَبْ
19 العَزَا للمِلـُوكْ فـِرْسَانْ عَوَاتـِي الخيْلْ
مَرَاكْزْ الخيْرْ ؤأقـْمَارْ الهِجُوعْ وَ اللَّيل
صَنـَادِيدَاً بِصَادْمواالموْتْ وِيصُدُّواالخيْل
واجَاوِيِدَاً بـِفـُوقـُوا عَلي المِطُوُرْ والسّيْلْ
20 العَـزَا للبَطَاحِيـِنْ جـُمْلـَة دُوُنْ تـَحْدِيـِدْ
رَقـَدْ فـَارِسْنـَا طـَاهْرْ الكَفْ ؤطـَايلْ الإيـِدْ
رَقـَدْ الْ كُلـُّو يومْ كَانْ في الفَضَالَةْ بْزيـْد
رَحَلْ,ؤرَحِيـلـُو رَحَّلْ مِنْ قـِلـُوبْنـَا العِيـِدْ
21 بَعَزِّيـِكُنْ جَمِيـِعْ ؤبَعـَزِّي نـَفْسِي كَمَانْ
وَاقُوُلْ الموْتْ فـَرِضْ مُنـْزَلْ منْ الرَّحْمَنْ
طَوِيلْ عُمْرَكْ قـَصِيرْ، وآخْرْ النـِّهَايَة ضَمَانْ
دِريْبـَاً مَاشْ جِدُوُدْنـَا اتـَّاَبَعوْبُو زَمَانْ
22 بَعَزِّيِ الكَافـَّة أهَلْ الجُوُدْ ؤأهَلْ الخيْرْ
بَعَزِّي الكُمـَّلْ الْ لـ اللَهْ جَـدُّوا السيْـرْ
بَعَزِّي الْ في هَوَايْدْ اللّيْلْ قـِلـُوبُنْ طيْرْ
بعَزِّي الْ بـِصْلِحُوا الأمَّة وْبـِزِيلـُوا الضّيْرْ
23 بـَعَزِّي الْ خَافـُوا رَبْ النـَّاسْ إلـَهْ الكوْنْ
بَعَزِّي الْ في المَرَاتـْبْ العُلـْيَا مَاهُنْ دُوُنْ
بَعَزِّي الْ عِنـْدَهُنْ كُلَّ القـَوَاسِي تـْهُوُنْ
بَعَزِّي الْ بِسْنِدُواالمِسْكِيِنْ مَحَلْ مَا يْكُوُنْ
أزهرى الحاج البشير- مشرف عام
رد: مسدار .. مرثية الفرجوني للحاج علي حميدة
من طرف Suhad Abduelgfaar 16th أكتوبر 2012, 11:34
16 منـَادِيـِكْ نـَادَيَ يومْ جِمْعَة وْنـِهَارْ يومْ عِيـِد
نـَزَلـْتَ جْوَارْ كَـرِيمْ رَبـَّاً عَظَّيـِمْ ؤمَجِيـِد
بـِجَرِّحْ قـَلـْبِي كَوْنـَكْ تـَبْقَ مِنـِّي بَعيد
ويفـَرِّحْ قـَلبي كَونـَك في جِوَارُو سَعِيـد.
انه الفراق الابدى المؤلم
كلام يقطع القلب
لكن ما علينا ان نقول (انالله وانا اليه راجعون )
لك الرحمة الحاج على حميدة .
ربنا يديك الصحة والعافية استاذى
ازهرى
نـَزَلـْتَ جْوَارْ كَـرِيمْ رَبـَّاً عَظَّيـِمْ ؤمَجِيـِد
بـِجَرِّحْ قـَلـْبِي كَوْنـَكْ تـَبْقَ مِنـِّي بَعيد
ويفـَرِّحْ قـَلبي كَونـَك في جِوَارُو سَعِيـد.
انه الفراق الابدى المؤلم
كلام يقطع القلب
لكن ما علينا ان نقول (انالله وانا اليه راجعون )
لك الرحمة الحاج على حميدة .
ربنا يديك الصحة والعافية استاذى
ازهرى
Suhad Abduelgfaar- مشرف حكاوي المهجر
والله هذا الفرجوني " شـــكّار " ......... بحثت ووجدت له أيضــــاً ...............
من طرف الفاتح محمد التوم 16th أكتوبر 2012, 17:11
الرثاء غرض من اغراض الشعر والفرجوني له باع طويل في في شتي اغراض الشعر ,,,,ومن شعرة في الرثاء قصيدة يرثي فيها حسان ابوعاقلة ابوسن قصيدة قوية ومؤثرة تحس فيها صدق الشاعر ومكانة الفقيد وهذة هي القصيدة
***
,مفقود يا خَرِيفْ دَارْنَا ال... بمِهل النَّجعة
ببكي عليك بكاياً فِيه كمِيَّن وجَعة
آخرهن فُراقاً لا خبَر لا رجْعة
وأولهِن رحِيلاً سَيتُو مِننا فَجْعَة
* * *
ببكِي عليك بُكاياً في ضَمايري جرُوحُو
بي حُزناً كتير غَلَبَن لِسَاني شروحو
درَّاج الضَّعيف ال... خيرُو مُو دُوب رُوحو
مَفقودَاً بشاشُولُو الضُعَاف وبنُوحُو
***
ود أبْ سن وكاملَ الحِن رَحَل فَارقْنَا
ماهل الدَّار وراحة الجار ، رحيلو حَرَقنَا
قَمر اللِّيل ، وصَمَد الخيل ،كفوفو دَرَقنا
مُونَتنَا وخَريف عَامُنا العَليهُو مَرَقْنا
* * *
تبكي عَليهُو أرض أجدادُو تبكي بَطاينُو
يبكي عليهُو جُوُداً مِنْ جِدُودُو مداينُو
ببكيهُ العَشِير ال..كَابِي فوقُو وصَايْنُو
ببكوهُ الضُّعَاف ال.. لي بَشَايرُو بعاينُو
****
ببكنُّو الصِّدِي ال.. فوقهِن حَديدهِن شَكْ
ببكنُّو السِّيُوف ال..ضَرِبَهن لا شَك
ببكيهُ القُطَابي ال.. فُوق مَجسَّفُو رَك
تَبكي بُطَانْة ابُوه ال.. مَا اندنت لي مك
* * *
فَارِس الصَّف ، وطاهر الكَف خبارُو اللَّيلة
ما لاقَانَا بِتبسمْ لَزوم الشيلَة
أبكن يا البُروق كُبَّن دُمُوعكَن سيْلة
رَقَد ال.. بسنِد الهَاكعَة وبِعَادْلَ الميلَة
***
رَقَدْ ال..مَسمِي فوق جَد جدو فُوق حَسَّان
وَدْ ال..لي مَحافل أُمَّات دِرُوع عِرسانْ
رَقَدْ ال.. في النَّشيد فايق علي حَسَّان
رقدْ ال .. وصَفُو في قُصر الكَلام إنسان
* * *
تبكي عليك بُطانتَك بالبروق ال.. لَحَّنْ
ويبكنَّك نَقَاقِير الِجِدود ال.. قحَّنْ
يبكنَّك سيوفاً يُوم طَنَاهِن صَحَّنْ
يبكُوك الضُّعاف وَكتْ المواجيد شَحَّنْ
****
يا فَارسَ النَّقَاقِير ال.. مَحَنضَل رُوزَكْ
الخَيل رَوَّقن يوم مَعركِيبهِن فَوزَكْ
ببكنَّك ودَيَّن كُلَّهِن في حُوزَكْ
ببكيك أبْ علي الجَدْ ال.. عَلَيهُ ركُوزَكْ
* * *
وافر الكَيل،وتِلَب الشيْل وخير العامَّة
صادق القُول ، ومينةَ العُول، ونُوم الهَامَّة
حليلْ حَسَّان حليل ذَاتُو ونَفَايلُو التَّامَّة
حَلحَال عُقدة الحجن الورَاهِنْ طامَّة
****
ما تَبكيهُ يا عَينْ بالدِّمُوع وخلاس
ابكي الدَّم على ال ..شَلَبي وسَخي وْوَد نَاسْ
خيراً عِندو ما كنَّاه للخُنَّاس
مُشرَع للضُّعَاف من كافَّة الأجناس
* * *
سَرَف القَيفْ ، وبَطَر الضِّيف ، ووارْث ابْواتُو
تَامَّ الكَيف ، ونِيل الهَيف ، خريف أوكَاتُو
زايلَة وهَلاَّ يا حليلُو ال.. نَبيهَة صِِفاتُو
يا حليلُو ال ... بِعيش مَرمِي القبيلَة شتاتُو
****
بِبكُوا الناس عَلى النَّاس بالدِّموعْ الجَاريَة
ويبكنَّك نَفَايلاً للمَكَارِم حَارْية
مَغبُونْ السحَابْ تكتُل بِروقُو الفارْية
هَادِي دمُوعُو نَزَلتْ فوقْ بُطانتك سَاريَة
* * *
يبكيك أب علي وحَسَّان ولا كاكُوم
ويتْرزَّم نحاس اجدادَك المَعَلُوم
يا المهَل ال... على ضَهَرُو الولايا تنوم
يبكنَّك خُيولَك عْْْْْْنْ مَلاقِي القُوم ?
* * *
يبكنَّك سِيوف أجدادك القطَّاع
ويبكيك أب عَلي ال..صَدَّ الهَمج مَا طاع
جَنسك مُو مَلَمْلِم بُرقة مُو لُطّاع
نُور في نُور كواكبَك كُلهِن سُطَّاع
****
يبكنَّك نقاقِير القَبيلة ال.. رَزّنْ
?يبكنك سِيوفاً فوق نحاسك هَزَّنْ
?تبكيك الخيول يُوم الرُّقاب ينجزّنْ
?يبكنَّك بطاينَا بي مِطُورهِن عزَّنْ
***
يبكيك الكَرم وايضاً فعايل السَّمْتَة
يبكنَّك همايلاً بي لِزومهِن قُمتَ
ما قَفَّلت بَابَك مِن مِجاورَك ونمتَ
شِلت الشيلْ مَطَبقْ ، للعشير مَا لمتَ
* * *
لا قاني القُطابي ، وقال حَلَفت قَسَمتَ
طرْ في الجو على سَابع القبايل حُمتَ
رَحلوا ال..بشبعُونِي وبي قفاهُم صُمتَ
فاتُو وماتُو هَجُواتي الكِتالِهُن غَمتَه
***
لا قاني القُطابي ، وقال لِي طِر في جَوِّي
حُمتَ وعُمتَ ما لِقيتْ مِنْ وَقَع في هَوِّي
الدُّغُم الكتالهُن بالحديد القوِّي
وكت اتنقُّو مِينْ تَاني ال..بجيبني مخوِّي
* * *
في ودَاعة الله ياحسّان حَسين الخلَّة
نَعَشَك مِنُو فوق أرض الجِنان تَدلي
عَاشرتَك سِنين عُمرَك مِنَافِي الذَّلة
رَادمُو عَلى قَفاك حمل الضَّعيف الكَلَّ
****
وهي مرثية طويلة ....... قطعتها من نصها ......
أكيد للفرجوني روائع ............ الوصف والغزل والهجاء
تسلم استاذنا
الفاتح محمد التوم- مشرف المنتدى السياسى
أزهرى الحاج البشير- مشرف عام
مواضيع مماثلة» مسدار ...مرثية المراد لناظر المجانين ( جمعة ســـهل )
» مرثية مالك الحزين العراقية
» مسدار الخليج - عبدالقادر الكتيابى
» مرثية لى ود ابقرن فى شهره الاول
» شارع يضحك فى سره.
» مرثية مالك الحزين العراقية
» مسدار الخليج - عبدالقادر الكتيابى
» مرثية لى ود ابقرن فى شهره الاول
» شارع يضحك فى سره.
صفحة 1 من اصل 1
صلاحيات هذا المنتدى:
لاتستطيع الرد على المواضيع في هذا المنتدى