عريس بالنت

‏ما أن تعود (مها) من (الجامعه) حتى تجلس على جهاز
الكمبيوتر الذى قام بإرساله لها شقيقها (محمد) الذى يعمل بإحدى دول الخليج...ثم
تتجول فى (الإنترنت) بالساعات الطوال لا تتحرك من أمام جهاز الكمبيوتر إلا فى
الظروف الإضطراريه والذى أصبح (الأكل) وتناول الوجبات ليست أحداها إذ انها مؤخراً
أصبحت تتناول وجباتها بيد بينما تمسك (الماوس) باليد الأخرى ، بينما كانت تجلس
(مها) أمام الكمبيوتر فى ذلك اليوم بعد عودتها من الجامعه إنتفضت واقفه وهى تصرخ
بصوت عال وهى تخاطب والتها التى كانت تجلس فى الحجرة المجاورة
:
-يمة..يمة..
- شنو يا بت فرحانه وقاعده تنططى مالك؟ كسبتى الكورولا ؟
-
(كورلت) شنو يا ماما ؟ باركى ليا دى حاجه أحسن بى كتير
خلاص تكون النتيجه طلعت
وجبتى 55% ودخلت هندسة ؟
- نتيجة شنو يا ماما إنتى ناسية إنو أنا إمتحنت زمان
وجبت 40% ودخلت طب
- طيب مالك فرحانه كده والوسيعه ضايقه بيكى
- (علاء) يا
ماما علاء !
- (فى إندهاش) : علاء منو يا بت
- (علاء) يا ماما.. صاحبى الفى
(الشات)؟
- شات شنو يا بت؟ إنتو كمان بتشوتو على وين؟
- (فى فرح وهى تنطط) :
يا ماما (علاء) خلاص قرر يتقدم ليا..
- (الأم غير مصدقه للخبر) : عاوز يعنى
يعرسك؟
- أيوة يا ماما
- (فى تأكيد للسؤال) : قال ليكى عاوز يتقدم ليكى؟
-
أيوة يا ماما.. (وهى تنطط).. عريس.. عريس
- (الأم تضع كوب العصير الذى كانت تمسك
به وتطلق زغروده) : اليويو يوى يوى يوى يوووووى !!
- (بعد دقيقه واحده من
الزغرودة تجلس الأم على الكرسى وتشيل ليها نفس) : وما كلمتينى يا بت يا غتيته مالك
مما جيتى من الجامعه وساكته على الموضوع؟
- أكلمك كيف يا ماما وأنا يا دوبك عرفت
هسه !
- (فى إستغراب) : عرفتى هسع كيف وإنتى مما جيتى من الجامعه قاعده فى
الكمبيوتر ما طلعتى أى حته؟
- ما أصلو يا ماما أنا عرفت من (النت)
- (تنظر
إليها فى بلاهة وإندهاش) : والنت دى وين ؟
- كيف يعنى وين؟
- بعيده من هنا
يعنى؟ أوعك تقولى ليا قدام (المنشية) والحتات (الهاى لايف) دى !
- (ضاحكة) :
منشيت شنو وهاى لايف شنو يا ماما بقول ليكى من النت.. النتتتتت
- ما خلاص
عرفناهو (القشر) ده لكن هو وين؟ فى ياتو حته؟
- يا ماما إنتى أصلو قاعدة وين ؟
ما عارفا النت يعنى شنو؟
- يعمينى ويطرشنى ؟
- النت ده يا ماما عبارة عن
كومبيوترات ذى الكمبيوتر بتاعى الشايفاهو ده.. موجوده فى كل العالم وموصلة مع بعض
وأى زول ممكن يخش جواها ويتصل بيها
- وده دخلو شنو فى الولد القلتى عاوز يتقدم
ليكى ده
- ما أصلو هو إتقدم ليا عن طريق النت ده ذاتو
- (فى حزم مصطنع) :
كيفن ده يا بت ؟ أنا ما فاهمة !!
- أنا أصلى شوفتو مرة فى (الشات) وإتكلمت معاهو
وبقينا نتقابل طوااالى
- (تدق على صدرها) سجم امى ؟ بتقابلى الأولاد كمان يا
مفعوصة؟
- وبنقعد أنا وهو ساعات كمان
- (قى إستغراب) : وكمان ساعات؟ ونحنا
قاعدين وين
- يا ماما ما قلت ليك الكلام ده كلو (بالنت) يعنى
بالكمبيوووووتر
- بالنت ما بالنت
بالكمبيوتر بى سجم الرماد بس أنا عايزة أعرف الولد ده ولد منو ؟ وشغال شنو وساكنين
وين
- إسمو علاء يا ماما طالب بيقرأ كمبيوتر فى جامعة (جيب وتعال) !
- وإنتى
من قبيل تنططى وفرحانه عايزة تطيرى جايبه ليكى طالب ؟
- لا ما خلاص قرب يتخرج؟
فضل ليهو (سنتين) بس ويتخرج
- سنتين.. تلاته.. ولا عشرة هو الإتخرجو عملو شنو
يعنى؟ أنا غايتو ما عندى شغلة بالمواضيع دى وما بعرفا إنتظرى أبوكى لمن يجى وكلميهو
وإلا أقول ليكى كدى أضربى ليهو بى موبايلك ده وأدينى النكلمو
وكلموهو :
- بتك
جاها عريس
وإنت قاعد ليا مع بتاعين الضمنة ديل؟
- جاها شنو؟
- عرييييس عريس عريس
- جاها
منو؟
- قلت ليك عريس.. عريس بالنت
- بى
شنو؟
- عريس بالنت
- يعنى دى
ذى شاى باللبن ؟
- يا راجل لبن شنو إنت بس تعال
- كدى قبل ما أجى فهمينى شنو
جاها بالنت دى ؟
- يعنى
أنا كنت فاهمة لامن أفهمك؟ إنت كدى
تعال

‏قام المعلم عوض بقفل الموبايل وبدأ فى مخاطبت نفسه
:
- يكون (النت) القالتو المرا ده حاجه ذى (الزواج الجماعى) يا ربى؟
- ( ثم
وهو يسال الأسطى كامل النجار الذى يلاعبه الطاولة) : إنت تعال يا كامل الشئ الإسمو
(النت) ده يطلع شنو؟
- (يخاطبه فى زهو) : معقولا باشمهندز زول زيك كده ما يعرف
النت شنو؟ وعامل لينا فيها (مثقف) وبتسمع (البى بى سى) وتشوف (السي إن إن)
-
خلاااص ورينى إنت يا نجار يا (مثقف) !!
- شوف يا باشمهندز النت ده إسم الدلع
بتاع حاجه إسمها (الإنترجت) وهى حاجه كده والله يعلم ذى (التلفزيون).. بيعرضو عليها
الجرايد والمجلات (فى تهكم) :
- عرفت يا مكانيكى !!
- خلاااص يعنى شرحت ليا ؟
إنتا قايل المسألة فيها (ضلف) وغراء ومسامير؟
- كمان عشان أزيدك علم الناس الفى
(الإنترجت) ديل كلهم بتاعين جرايد وصحفيين
- (يتدخل أستاذ صلاح الذى كان يستمع
للحوار): يا عم كامل إسمو الإنترنت ما الإنترجت !!

- إنترنت إنترجت ما كلها
تلفزيونات !! -ثم مخاطباً الأسطى عوض) - ألعب خلينا من قصصك دى ؟
- (عوض يرمى
الزهر ثم يصيح مداعبا كامل ) : دش.. كده الليلة واخد ليك عشرتين يا نجار يا مهزلة
!!

‏قبل حضور عوض :
لا زالت والدة (مها) تجلس مع إبنتها
:
- يا ماما افهيني ما تصعبى الأمور وخلى بابا يوافق عشان العريس دة لقطة ومافيش
زيو في (النت)! إنتى ما شوفتيهو بيكتب كيف ؟ ما شوفتى أسلوبو !
- أسلوب شنو ؟ هو
مؤلف؟!
- لا يعنى مش مؤلف (خالص) لكن بيكتب على النت!
- تطير عيشتنا مع
(القشر) ده !! أى حاجه البت تقول ليك النت النت - ثم فى حزم-
- اسمعي يا بت أنا
لا بعرف نت لا بعرف كتابات لا بعرف شنو داك أبوكى جاى فى السكة إتكلمى معاهو
-
(في سرها) : يعنى هو الماشى يفهم ليا نت يعنى شنو؟!
ما أن دخل المعلم عوض حتى
خلطبته (والدة مها) :
- تعال شوف ليكا صرفه مع بتك دى ؟
- (ينظر لمها) : خير
يا بنت فى شنو؟
- أبدا يا يا بوى.. مافى حاجه..
- كيف مافى حاجه شنو حكايت
النت والعرس والكلام القالتو ليا أمك فى التلفون ده ؟
- (تصمت برهه ثم تتحدث) :
مش إنتوا يا بوى قلتو عرس أصبح مافى ؟ والعرس الجماعى ذاتو سابوهو ؟
- أأى الناس
تعرس بى شنو؟ هو خلو ليهم حاجه يعرسو بيها ؟ ولا خلاص الوظائف راقده !! ما الشباب
كلو بقى قاعد مفلس وعاطل يكلم فى روحو
- خلاص يا بوى أنا جانى عريس وعاوز يتقدم
ليا لكن
- لكن شنو؟
- لكن ما عاجب ماما
أمك دى اصلو من زمان لا بيعجبا
العجب لا الصيام فى رجب سيبك منها كدى وأحكى ليا القصة شنو؟
- أصلو يا بوى القصة
إنو فى واحد طلب إيدى عن طريق النت وقال ليا إنو جادي فى طلبو ومستعد ييجى لحدت
البيت ويطلبنى منك فى أى وقت
- لا جميل وبعدين؟
- يعنى شنو ؟ انت ما رضيان يا
بوى ؟ إنت معارض !!
- معارض شنو هو أصلو انا عبدالواحد !! أعارض ليه بس ؟
-
(فى فرح) :طيب أنا هسه أرد عليو أقول ليهو شنو يعنى؟
- على عبدالواحد
- واحد
منو يابوى ؟ على علاء علااااء
- (بصوت خشن): علاء منووو؟
- الزول العاوز
يتقدم ليا يا بابا !
- أيواا طيب ما تقولى كده من الصباح ؟ هو بيكتب وين ؟ فى
السودانى وإلا الرأى العام وإلا حكايات وإلأ..
- (مقاطعة) : يابوى هو ما بيكتب
فى الجرائد ؟
- شنو بيكتب فى المجلات يعنى؟
- ولا فى المجلات (علاء) ده بيكتب
فى المنتديات
- يعنى صحفى مشهور كده ذى ناس (عثمان ميرغنى) و(زهير السراج) كده
الناس كلها بتعرفو؟
- يا بوى هو ما صحفى... ما بيكتب فى الجرائد
- مال بيكتب
وين؟
- قلت ليكا بيكتب فى المنتديات
- (فى إندهاش) : بيكتب وين؟
- فى
المنتديات يا بوى
- والمنتديات دى شنو تطلع ؟
- دى يا بوى صفحات فى (النت)
الناس بتكتب فيها الحاجه العاوزا تناقشا
- يابت أنا كلامك ده ما فاهمو كدى أشرحى
ليا شويه شويه
- شفت يا بوى المنتديات دى حاجه كده زى قعدت (الطاوله) بتاعتكم دى
الناس بتجى تجتمع مع بعض
وكل ناس براهم عندهم موضوع بيتكلمو فيهو
- يعنى هسه
لو عاوز اسال زول عن العمرة بتاعت (الهايلوكس) الواقف بره ده بتكلف كم ح
يكلمونى؟
- يابوى هايلوكس شنو ؟ ده فى المنطقه الصناعية فى المنتديات الناس
بتتكلم عن حاجات تانية خالص
- وزولك ده يعنى بيتكلم عن شنو؟
- علاء ده يا بوى
بيتكلم عن أى حاجه سياسة ادب إجتماع رياضة
- طيب أها قولى ليا عرفك من وين؟
-
(وقد شعرت بالرعب من السؤال) : لا يا بوى اوعى تفهمنى غلط؟ والله لحدت هسه ما شافنى
ولا شوفتو !
- شنو يعنى عاوز يعرسك (على المغطى) ؟ زى ما أنا زمااان عرست أمك
كده وطلعت البطيخة بيضا
- (الأم) : بيضا مش أحسن مما تكون اليوم كلو مليانه (زيت
مكنة) ؟
- أها وبعدين... أها ما شافك !!
- إن شاء الله يا بوى لو وافقتوا ح
ييجى يتقدم ليا طوالى
- ومالو لو طلع ود ناس نوافق طوالى !! مش أحسن ليكى مما
تقعدى تصاقرى أمك دى ؟
- طيب أقول ليهو يجى يقابلك متين؟
- قولى ليهو يجى يوم
الجمعة بعد صلاة المغرب
- (وهى تطير من الفرح) : حاااضر يا بوى أكلمو هسه دى -
تدخل إلى حجرتها مسرعة بينما يتعجب المعلم (عوض) ويسألها
- إنتى يا بت ح تعملى
شنو؟؟!
- ح أقول ليهو ابوى قال ليك تعال قابلو يوم الجمعه بعد صلاة المغرب
-
إنتى يا بت عملتى ليكى موبايل ولا شنو؟
- لا يا بوى إنت مش قلت ليا قبل كده ما
اشيل موبايل؟
- طيب ح تكلميهو كيف؟
- ح ارسل ليهو ( إيميل) ؟
- (فى صوت
عالى منزعج) : منو كمان الود (إيميل) ده الح ترسليهو يا بت يا مفعوصة؟
- يا بوى
ما تنفعل ساكت أنا أقصد يعنى ح أبعت ليهو جواب رساله يعنى على
النت!

فى اليوم المحدد بدأت مها الإستعدادات مبكراً حيث قامت بلم (مخلفات العربات
القديمة) وعلب (الزيوت) واللساتك من (حوش) المنزل ومضايرتها وقامت بكنس (الحوش)
وأخراج (السراير الخشب) وفرشها بالملايات (الجديده) كما قامت بوضع طقم الجلوس
الخشبى ووضع (فازة ورد صناعى) تتوسط تربيزته المستطيله ! التى تحتوى على (سلة)
كبيرة ملئت ببعض الأنواع المختلفة من الفاكهه.
بعد صلاة المغرب مباشرة دق باب
الشارع دقات خفيفه.. هتفت والدة (مها) :
- يا أبو محمد أمشى أفتح الباب الظاهر
الجماعه ديل جو
أسرعت مها لفتح الباب ولكن والدها أوقفها وأخبرها أن تلزم غرفتها
حتى ينادى عليها ثم فتح هو الباب بعد أن نهض رقدته متثاقلاً ليفاجأ بشاب أنيق
الهندام يفوح منه رائحة عطر طيب يحمل كيساً وكانت المفاجأة الكبرى أنه قد جاء
بمفرده وأن أحداً لم يأت معه كما توقع الجميع !! فدعاه للدخول ثم ما لبث أن مد رأسه
خارج الباب يستكشف الشارع آملاً فى وجود أشخاص آخرين لكنه سرعان ما تعجب لعدم وجود
أحد معه فأغلق الباب خلفه فى عنف وتغيرت ملامح وجهه وهو يخاطبه قائلاً :
-
أهلا!
- أهلا بيك يا عم عوض
- (وهو يشير له إلى أحد الكراسى) : إتفضل
يبنى
- (فى قلق): هى الآنسة مها ما قالت ليكم إنى جاى ولا شنو؟
- هى قالت
لينا بس ما قالت لينا إنك جاى براك كده
- لا ياعم عوض أنا ما جاى براى - وهو يمد
له الكيس- جايب معاى علبت حلاوة بقرة!
- لا جميل والله - ينظر إليه- علبة حلاوة
!! وكمان بقرة !!
- (فى خجل مصطنع) : الحقيقه يا عم عوض أنا عاوز
- عاوز أيه
يا إبنى قول وخلصنا
- فى الحقيقه.. أصلو.. يعنى.. الحكايه
- إنت يبنى ح تقدم
برنامج ؟ ما تقول وتخلصنا - مستدركا- ثم ليه ما جبت معاك والدك ولا والدتك ولا عمك
ولا خالك ولا أى زول تانى ؟!
- ما مشكلة يا عم عوض إن شاء الله الجماعة القلتهم
ديل كلهم تشوفوهم فى الفرح
- (يقف هائجا) : فى أيه يا إبنى ؟
- (خائفا يرتعد)
: كدى يا حاج أقعد اهدأ أنا ح أفهمك على كل حاجة
- أها قعدت.. الله يطولك يا
رووووح.. اتفضل فهمنى يلا !
- أنا ياعمى اسمى (علاء هاشم) عمرى 24 سنه
- (أم
مها مقاطعه) أربعه وعشرين سنه وطالب بتقرأ لسعه؟ أصلك بتقرأ فى شنو؟
- (يقف
هائجا مرة أخرى) : جاااى برااك وشايل ليكا علبة حلاوة تتلولح وكمان طالب!! - ينده
على مها-
- تعالى يا بت هنا إنتى مش قلتى الولد ده صحفى ؟
- (فى تلعثم) : لا
يا بوى أنا قلت ليكا بيكتب فى المنتديات بس !!
- يعنى ما بيكتب فى الجرائد؟
-
لا يا بوى ما قلت ليك المنتديات دى يا بوى حاجه كده ذى قعدتكم بتاعت الضمنة البرة
دى؟
- أيوااا جايبا ليا كمان (كاتب ضمنة) وبتتفاصحى !
- لا يا عمى أنا بكتب
فى منتديات راقيه.. ما فيها ضمنة وكلام ذى ده
- والضمنه مالا؟ عيبا ليا ؟
-
لا أنا ما قلت فيها حاجه لكن بس...
- بس شنو
- بس الحقيقه أنا جاى أطلب إيد
الآنسة مها على سنة الله ورسولو وكده
- (مواصلا) طبعا أنا عارف إنكم مستغربين
إنى جيت براى وما معاى زول من ناس البيت
- طبعا مستغربين فى حد جاى يتقدم لى بت
ناس يجى براهو ومعاهو علبة حلاوة ؟ وين أبوك ؟ وين أمك؟
- والله بى صراحة كدة
ياعم عوض الحاج والحاجة ما مقنتعين بحكاية إنى أعرس من النت دى
- ومنو ال ح يعرس
من النت هسع إنت ولا نحنا؟!
- نحنا الإثنين طبعا!
- (فى حزم) : كدى يا وليه
نادى ليا البت دى
- تحضر مها بسرعة ووالدها يرمقها بغضب بينما علاء يستعدل فى
الكرسى مبتسما وهو يخاطب مها :
- أهلا يا آنسة مها
- أهلا بيك يا أستاذ
علاء!
- تعالى هنا يا بت شوفى المصيبه الجايباها لينا دى !!!!
- مصيبة شنو يا
بوى
- الأستاذ بيقول إنو لسه طالب!
- أيوه يا بوى فضل ليهو بس سنتين ويتخرج -
مواصلة- كمان والله يا بوى علاء ده كتاب جنس كتابه
مافى منتدى يدخل فيهو إلا
الناس دى كلها الفى النت تدخلو
- أنا قصة النت دى ما ح أفهما وما ح تدخل ليا
راسى كدى هسع ورينا أبوك وأمك ما جو ليه معاك ؟ هم ما موافقين ليه؟ قايليننا ناس أى
كلام ولا شنو؟
- لا العفو يا حاج العفو ده شرف ليهم إنهم يناسبوكم والله
-
طيب لمن شرف ليهم ما موافقين ليه ومعترضين؟!
- هو يقصد يا بوى إنهم معترضين بس
على الطريقه بتاعت العرس وإنو عن طريق النت لكن ما معترضين على العرس ذاااتو
-
طيب ليه ما موافقين مش ده زواج على سنة الله ورسوله؟
- أكيد يا عم عوض.. بس هم
شويه فى الحته دى متخلفين !
- طيب ممكن تورينى البت دى عجبتك كيفن بدون ما
تشوفها ؟ يعنى عاوز تتقدم ليها بناء على شنو يعنى؟

(علاء ينظر إلى مها) والله عجبتنى مشاركاتها يا عمى ! والمواضيع القاعدة تكتبا
وكمان الردود بتاعتا غايه فى الفهم قابلتها أول مرة فى موضوع عن (الأغانى الهابطة)
وأقنعتنى بى الكلام القالتو بكلامها وهو إنو الهبوط مش فى الأغانى إنما فى (الذوق
العام) ! والموضوع التانى العملت ليا فيهو مداخلة كان عن (الشباب والضياع)! كلامها
لفت نظرى عشان لخصت الموضوع تلخيص منطقى وقالت إنو الشباب ما يكون ضايع ليه إذا
(الشعب) كلو ضائع و(الشباب) جزؤ من (الشعب)
- كمان يابت بتتكلمى فى السياسة من
ورانا !
- والله يا عمى كلامها كان ده شدت ما سخن لمن (الموديراتور) شال
(البوست) بتاعا ده
- (مقاطعا) : منو الشال الما بعرف شنو دا؟
-
الموديراتور!
- ويطلع منو (الموتور) دة كمان ؟!!!!
- يقصد يا بوى المشرف
القاعد ينظم الحته يعنى
- المهم يا عمى بتكم دى عجبتنى شديد وفضلت أتابع أى حاجه
قاعده تكتبا ومن ديك وعيييك
- (فى إستهجان) : من ديك وشنو؟
- لا يا بوى هو
بيقصد يعنى دى كانت بداية تعارفنا
- أيوااا... جابت ليها (عيييك) كمان؟
هنا
خاطبت (مها) علاء وهى تبتسم بينما كان عم عوض وزوجته (ما ناقشين) حاجه من كلام علاء
ومها المصطلحات التى يستخدمانها
- بس أنا عاوزة أعرف إنت يا علاء عرفت (إيميلى)
كيف؟!
- ما ح أوريكى إنتى ناسية إنى بقرا هندسة كمبيوتر ولا شنو؟ -يلتفت للمعلم
عوض- خلاص يا عم عوض إنت موافق مش كده؟
- (والدة مها) : يوافق على شنو يا ولد
إنت هو هسه إنت قلت حاجه ؟
- ما قلت حاجه كيف؟ ما طلبت يد بتكم مها دى!
-
يعنى عاوزنا نعرسا ليك بدون ما تجيب لينا ابوك ولا أمك و نتفاهم على التفاصيل!
-
وفيها شنو يا عمى أصلو الح يعرس منو أنا ولا هم ؟!
- (وقد فاض به الكيل) : اسمع
هنا يا ولد أنا صابر عليك من الصباح وإنت تتكلم كلامك الفارغ ده.. وجريك وراء البت
دى من منتدى لى منتدى لحدت ما جبت خبرا وجيت اتقدمت لها شايل علبة حلاوتك دى.. شوف
لو عاوز تخطب البت دى تجيب ليا أبوك وامك عشان نتفاهم غير كدة أمشى شوف ليك (نت)
أدخلو
- خلاص كفايه يا بوى علاء ده ما بستحمل الكلام ده !
- ما بستحمل شنو ؟
اسكتى يا بت إنتى وخشى جوة!
ماهو ياعمى أنا كنت أصلو ناوى
- (مقاطعا) ناوى
شنو؟ ليكا ساعتين ونص وإنت شابكنى ناوى... ناوى.. إنت عاوز تعرس بالنيه؟
أمشى
شاور أهلك والمرة الجاية لو فى مرة جايه جيبهم معاك !
- طيب يا عمى ممكن
-
(مقاطعا) بقول ليك شنو؟ أنا عندى عربية عاوز أقوم (أفكفك مكنتا) هسه يلا أدينا عرض
أكتافك !!!!
قبل ما أفك ليك (صواميلك) !
- (يقف خائفا) : لا لا كل حاجه ولا
(الصواميل) دى يا عمو خلاص انا ماشى... السلامو عليكم
- وعليكم السلام... قال
أيه ناوى... ناوى !
- (يلتفت نحو مها) : قال عريس من النت قال!!! شوية شوية كمان
تجيبيى لينا عريس
من (الإنترنت)

عريس بالنت

عريس بالنت

رد: عريس بالنت

رد: عريس بالنت

رد: عريس بالنت

رد: عريس بالنت