استاز نجيب واستاز روبرت

ديل حكايتان متشابهات00 الاولى 00كنت طالب فى اولى ثانوى وكان لنا استاز ايرلندى يدعى روبرت (طبعا جاء يقضى الزاميه)وكان هذا الروبرت جارنا فى الحله يسكن عزابى جمبنا وكان عنده لبن انا بشيلو بودى البيت عشان يسخنو ليه فى يوم كده كنت جاى من التمرين ومشيت البير وجبت لى مويه لزوم الحمام ووقت لبن روبرت جاء وانا فى الحمام وصاحبك جاء داخل البيت توووووش بحوش العوين وعمتنا بت سلمان قالت ليه (هيى تور دا محل بتاع نسوان محل بتاع تور بقادى وبتشير للخلوه وصاحبك بقول ليها ورز مستر قييرى ورز ماى ملك)وانا فى الحمام اشاهد هذا الحوار بفوق لحوش الحمام وميت من الضحك حتى مامويتى انكشحت 000بت سلمان مفتكراه جنقاى0000الحكايه التانيه0000دى كانت فى بغدادفى اواخر التمانيينات00جاءنا اخونا الاستاز نجيب عبدالقادروهو من اولاد كلوقى ودرسنا فى المتوسطه0كعادت السودانيين فى المهجر استقبلناه كويس وبحكم استازيته على لابد من اقوم ببعض المهام التى تخصه وعمل هويه له وبعض اجرات الاقامه وكنا نتحرك معه بالمواصلات مره راكبيين حافله واستاز نجيب راكب فى مقاعد النص وراكب وراه واحد عراقى والحافله اتحركت 00العراقى قام سال نجيب باللهجه العراقيه قال ليه(عينى اشقيت الكروه 000دا اقولك يامعود اشقيت الكروه)وبعد الحاح من العراقى نجيب قال ليه000000000(انا ما نعرف كلام بتاع انت)انا قدام والضحك ماليينى قلت ليه يانجيب انت قايلو جنقاى000طبعا سؤال العراقى 000كم الاجره

والله يا غريق كتلت اخوك بالضحك بس الحمد لله قاعد براى.... بت سلمان دى كان ما خاتيه يوم واحد شافت ليها جنقاى أبيض.
أستاذ نجيب مافى رجل خلوق جدا وهو من الذين تربت بينى وبينهم أخوه أعتز بها..... عركته الايام..... عرفت من الاخ عبد الباقى(وكيل ترحيلات مكه بالسوق الشعبى امدرمان) أنه تزوج زوجه أخرى غير أم أولاده بنت الشيخ دفع الله وهو الان مستقر بالخرطوم.
أما روبرت الاستاذ الطويل كان صديقنا بمشى معنا خور البطحه نحن نذاكر وهو يتمشى فى الجناين الحوالى الخور وما قصرنا معاهو علمنا التمباك.
أطلع حاجه تانى يا غريق

ده كلو هين .......... وين لبن الراجل.

انت عارف يا ابو الزهور الراجل دا تعبنى جنس تعب بى لبنو دا وعارف مره قوم يالبن انكشح وروبرت بفوق للحوش (هاى قيرى ذ ملك 00ورز ماى ملك )وطبعا انا ماعندى تانى لبن والكواسيات رجعن المرحوم عمى عبدالرحمن ادم قال لى نادى خواجيك دا خلى يتعشى معانا 00تنفست الصعداء والخواجه جاء واتعشى بالشعيريه والرز بالبن ونسى اللبن وراح طبعا دا اول خواجى انا شفتو بسف الصعود

رحم الله عمنا عبدالرحمن آدم غريق ... هدوء وسكينة ووقار.

التحيه ليك يا ابوالزهور ذلك جيل العمالقه والناس البعرفو الاصول والعشره 00عمنا عبد الرحمن ادم يرحمه الله فى25يناير الماضى مضت على وفاته21سنه ولاذالت بصماته محفوره فى ذاكرة الحباكين 00له الرحمه ولجيل النبلاءوالاستاز نجيب عبد القادر درسنا فى المتوسطه وزاملته فى الغربه وفى ديوان الزكاه نعم المعلم والصديق وهو رجل خلوق

المصريين كانو يوفدوا للسودان لتدريس المواد العلميه والرياضيات وكمان الانجليز لللقه الإنجليزيه وين الجماعه ديل راحو

أخي غريق ...أنت مكانتك دائماً كبيرة في نظري ... ولكن اليوم زادت علواً وشموخاً أسمي بل زادت حبتين إثنين .... تعرف القصة بالجد حلوة ورائعة ...ولكن كنت أبحث فيها عن شخصك عن طيبتك ...وعن وضوحك ... عن صدقك بل وعن تواضعك الجم ...وقد تابعت فيها :-

وكان هذا الروبرت جارنا فى الحله يسكن عزابى جمبنا وكان عنده لبن انا بشيلو بودى البيت عشان يسخنو ليه فى يوم كده كنت جاى من التمرين ((ومشيت البير وجبت لى مويه لزوم الحمام ))ووقت لبن روبرت جاء وانا فى الحمام وصاحبك جاء(( داخل البيت توووووش بحوش العوين وعمتنا بت سلمان قالت ليه (هيى تور دا محل بتاع نسوان محل بتاع تور بقادى )) وبتشير للخلوه وصاحبك بقول ليها ورز مستر قييرى ورز ماى ملك)((وانا فى الحمام اشاهد هذا الحوار بفوق لحوش الحمام)) وميت من الضحك حتى الموية انكشحت 000بت سلمان مفتكراه جنقاى.... ما هذا الوضوح ما هذه السماحة والبساطة ... شكراً لك أيها الإنسان الراقي دائماً ..وشكراً لعمتنا بت سلمان ..هذه المرأة العفوية الطيبة والتي تحافظ على سماحة تقاليدنا وعاداتنا ...وفعلاً مكان الرجل الخلوة ...وتسلم أخي غريق ...وربنا يحفظك لينا ويسكنك الجنينة ...محبتي

ابو علياء يا متالق دائما لك الشكر عزيزى على هذا الإطراء محبتى

يديك العافية اخى غريق لم يترك لنا ابو علياء نعتا فأنت حباكى اصيل..
روبرت كان مستمتع ((بالملك الفريش))بدون اسمدة..طبعا بقى كديسة..وقت لبنها ..تتمسح فى سفنجة الكواسية..

رحم الله عمنا عبدالرحمن..والتحية لاستاذ نجيب..والتحايا الصادقة للمرور..ودابو ابراهيم عوض..واخى الهمام ابو الزهور اخى ابو علياء الإجازة قربت..سوق البطحة قطع وسطك الله يقويك ويحفظك