نصائح الحبوبه

بسم الله الرحمن الرحيم
مشاحنات

ازيكم يا وليداتي وبنياتي إنشاء الله كويسين وما عندكم عوجه . اها بدور الليلة أتكلم معاكم في موضع بالحيل مهم والله يا بناتي أنا ما شيالت حال لكن الحاصل ده واجعني شديد كدي الندخل ليكم في الموضوع طوالي
عندي جارتي الساكنة جنبي هي وراجله طوالي مشاكلين وصوتم أجيب الرايح بالله المرة تلاقيها في الشارع تقول زيها مافي في الحلة وكمان الراجل. بس ما ادخلوا بيتهم العوه تقوم، وفي يوم كنا خاتين صينية الغده أنا وأبو وليداتي وقامت ديك يا الشكلة لمن الغده طار لينا من راسنا وقمت قلت بيني وبين نفسي أنا بكرة بعد الرجال ديل امشوا الشغل إلا امشي أشوف الحاصل شنو.
اها قمت بكرة من الصباح وخدمت أكلي و نضفت بيتي واستحميت ولبست توب الجيران ودخلت على جارتي :
دقيت الباب ..... ودخلت سلام ناس البيت إنشاء الله طيبين
الجارة: طيبين الحمد الله اتفضلي ادخلي
الحبوبة: اها دخلت البيت لقيتو نضيف ومنظم وكل شئ في محلو
الجارة: اتفضلي اقعدي عليك الله
الحبوبة : سمح قعدت، ودخلت الجارة المطبخ أظنها مشت تعمل لي شربات وقلت لنفسي هسع الراجل ده مالو على المرة دي ما نضيفة وسمحة، وبعد شوية جات الجارة شايلة لي قزازة البيبسى وقلت مالا الشربات غايتو بنات الزمن ده كسلانات هسع الشربات ما اخير من ده
الجارة : اتفضلي اشربي
الحبوبة بشرب يا بنيتي وبقيت اشرب وما عارفة أقول شنو اها بقيت أسال مره من الأولاد وقرايتهم وشوية أتكلم في العيشة وغلاها لمن حسيت بجارتي بدت تزهج قلت احسن اخش في الموضوع وتوكلت علي الله وبديت
الحبوبة : يا بنيتي بدور اسالك سؤال بس طلبتك بالله ما تفهمني غلط وتقولي علي بتاعت شمارات زي ما بقولوا بنات الزمن ده
الجارة : لا والله ما ح أفهمك غلط
الحبوبة : والله يا بنيتي أنا بدور مصلحتك فشان كده أنا جيتك... يا ختي انتي مالك مع أبو وليداتك ده طوالي صوتكم عالي ومتشاكلين؟ الجارة اتهجمت وعاينت لي شديد قمت قلت ليها انا يا بنيتي لو ما ختيتك في محل بناتي ما بجيك وما دايره ليك خراب البيت. اها بعد ما قلت كلامي ده البنية شوية قليبة رقد وبدت تحكي:ـ
الجارة: والله يا حبوبة غلبني البسويهو انا ما مقصرة من الراجل ده وكل واجباتي قايمة بيها وبرضو ما عاجبو
الحبوبة: لكن يا بتي الراجل ما واجباته كتيرة انتي بتقصدي شنو بواجباتو دي
الجارة: والله انا بنضف البيت وبعمل الأكل واقري الأولاد واحميهم ومهتمة بنفسي والله غلبني البعملو له
الحبوبة: بعد ما سمعت كلامها ده قلته ليها ده بالحيل كلام سمح لكن بس دي هي طلبات الراجل قامت عاينت لي وقالت طيب هو بعد ده كلوا عاوز شنو
الحبوبة: قمت قلت لها اسمعي يا بنتي نصحتي دي وابقي عليها عشرة تب ما بجيك عوجة
انتن يا بنات الزمن ده ما زينا زمان نحن زمان الواحدة من تسمع صوت راجلها في باب الشارع تتقنع بتوبها وتجري على المطبخ لكن هسع الواحدة فيكن تسمع صوت الراجل أنادى فيها وهي قاعدة قدام التلفزيون شايلة الداهي ده (الريموت ) وماشغاله به اها ده غلط ولا ما غلط
تاني حاجة وديناكن المدارس وعلمناكن قلنا تبقوا احسن مننا تمسكن بيوتكن وتحافظوا عليها جيتو قلتوا لا انتن والرجال واحد ما في فرق بقيتن تناقشن وتجادلن وتعلن صوتكم نحن زمان الواحدة فينا الكلام البقولوا لها راجلها هو البمشي وما بتعلي صوتها عليهو والله نحن بندور تعليمكن بس دايرنو انفعكن في حياتكن وفي تربية عيالكن أكون أسلوبكن في النقاش كويس صاح ولا لا.
نحن زمان الواحدة فينا لو ماشة ليها عرس ما عندها شئ غير تمشط شعرها وتدهنو بالكركار وتمسح جسمها بحتت زيت مر هيهي من عرس الزمن ده وكلاموا الكثير الواحدة فيكن ما بتعذر راجلها دايرة زي ما فلانة ديك راجلها جاب ليها وجاب هي كمان دايرة زيها وعاد يا بناتي جيب الزمن ده امانه كلامو ما كتير بالحيل الواحدة دايرة من التوب والشبشب وده غير البلبسوا جو التوب والمسكين داك ما عليهو إلا ادفع كسر رقبة ادفع. ده غلط ولا ما غلط
انتن يا بناتي حظكن احسن مننا قمتو لقيتو كل شئ ساهل ما زينا زمان الواحدة فينا عشان تعمل لها حلت ملاح وطبق كسرة امانه ما بتتعب تعب شديد تقوم من الصباح وتوقد النار وتحش البصل وتقطع اللحم وترفع الحلة في النار وتقوم تمشي على الصاج وده كمان كلامو تاني وتعوس الكسرة وبعد ده حياتنا سمحة وما فيها أي مشاكل هسع انتن جيتن لقيتن كل شئ البوتجاز والتلاجة وكمان اليومين دي في موضة جديدة سموها الحبشية سجم خشمكن يا المغفلات احسن تعملن حسابكن منها انتن شايفنها تقليعة جديدة مخير الله وبعد ده تنقنقن . غلط ولا ما غلط
عاد جارتي بقت تعاين لي ساى وشها اودي لون واجيب لون ما بعرف ده من شنو أكون كلامي عجبها ولا لا بس قلت احسن أتم كلامي للنهاية اصلوا المثل بقول البتبلبل بعوم
وكمان يا بنيتي البقللوا الموبايل ده خلى ما عندكن عقل الواحدة فيكن من ارن تنسى أي شئ وتجري عليهو أكان عندها حلة فوق النار تحرق وكان عندها شغل تاني في البيت تنساهو لمن مواعد الراجل تجي وهي ما تكون عملت شئ وتبدا تجري اها ده ما بزعل الرجال
في شئ مهم بالحيل بدور اقولوا ليك مناقشتكن للمشاكل مع الراجل ما بتختارن ليها الوقت المناسب. الراجل أكون جاي من الشغل زهجان وتعبان وعرقوا انقط وانتي أكون عندك شئ في رأسك وحارسهو متين اجي البيت ودخلتو كدي تبدى تكوركي الولدك فعل الأنا تعبت والانت ماجايب خبر للبحصل أستغفر الله عاد ده كلام شنو يا بنيتي شهدي بالأول واختاري الوقت المناسب وكل شئ بتحل بس طولن بالكن وكل مشكلة وليها حل.
الحبوبة: لمن شفت كلامي كتر على البنية قلت في نفسي لحدي كده كفاية فيشان البنت ما تزعل مني وقمت قلت ليها ختي يا بتي كلامي ده في رأسك وفكري فيهو وابقي على بيتك وأولادك عشرة وما تزعلي مني أنا بدور مصلحتك وسترتك
الجارة: شكرا يا حبوبة ما بزعل منك ودي نصيحة غالية إنشاء الله ربنا أيقدرني واعمل بيها.
الحبوبة: إنشاء الله يا بنيتي ربنا اوفقك... اها يا بنيتي النقوم امش بعد كده أبو وليداتي قرب اجي وبدور أجهز ليهو الغده وهو اصلوا ما بدور اجي والقاني مافي البيت ودعتك الله والرسول

أنا ما عندي مشكلة مع التكنلوجيا أو أسماء الحبوبات بس ( سمح القول في خشيم سيدو )