النيجيرى قودوين يدخل حسابات المريخ بقوه بديلا لايداهور

كفر و وتر / خاص /
علمت (كفر و وتر) ان اتجاها قوياً قد برز داخل مجلس ادارة نادي المريخ لتسجيل اللاعب النيجيري قودويين ندبينسي مكان الراحل ايداهور الذي حدثت وفاته في مباراة فريقه في الاسبوع الثالث من الدوري الممتاز امام فريق الامل .
ويقود الجناح الداعي لتسجيل قودويين احد ابرز اعضاء المجلس (الداعمين) تأثيرا باعتبار ان اللاعب يعرف الملاعب السودانية جيدا وسبق ان خاض تجربة ناجحة مع الغريم التقليدي الهلال ، وتتيح لوائح الفيفا للمريخ تسجيل اللاعب قودوين مكان الراحل ايداهور بنص القانون الا ان المشكلة الاكبر التي قد تواجه النادي هي لوائح الاتحاد الرياضي السوداني التي تمنع تسجيل اجانب في منتصف الموسم خاصة وان الراحل ايداهور مقيد في كشوفات المريخ على انه لاعب وطني وهو ما يعني ان النادي ربما فكر في تجنيس قودويين وتقييده كلاعب سوداني ، وتشير مصادرنا الى ان اللاعب قودويين الذي يلعب حاليا في نادي النصر الليبي رحب بفكرة اللعب لنادي المريخ واكد لمقربين منه انه اشتاق للعب امام الجمهور السوداني والعودة مجددا للعب في البطولات الافريقية ، وربما كشفت الايام المقبلة مزيدا من التفاصيل حول هذا الامر .
ويعول الجناح الذي تبنى تسجيل قودويين داخل مجلس الادارة على تاجيل تسجيل الدافي الذي وقع عقدا رسميا مع المريخ الى شهر ديسمبر المقبل خلال فترة التسجيلات الرسمية حيث ان الدافي لاعب النادي بحكم القانون ويمكن للنادي تاجيل تسجيله اذا ما دعت الضرورة لذلك خاصة وان الدافي نفسه لم يحصل على الجنسية السودانية .
الى ذلك تغادر بعثة فريق المريخ الاول لكرة القدم الخميس الى انجمينا لملاقاة بطل تشاد في دور الـ 32 من البطولة الافريقية ، ويترأس بعثة النادي الباشمهندس همد مساعد رئيس النادي اضافة الى 19 لاعبا بقيادة العجب والسعودي وطمبل والنيجيريان كلتشي وورغو ، الى ذلك اعدت السفارة السودانية بتشاد استقبالا جيدا لبعثة المريخ واستنفرت كافة السودانين في العاصمة انجمينا والمدن التي تجاورها لتشجيع المريخ في مباراته المهمة امام فريق الغزالة التشادي .

صباح الخير ابوابراهيم ماعندي فكرة عن قودوين هل مستواه جيد لكن اخاف يكون راكوبة بدل ماسورة افضل لاعب معروف وخطير

صباح الخير ود النو.
طبعا الموضوع لو أخد طابع الجديه لازم يخضع لدراسه ومتابعه فيما يخص المستوى الفنى للاعب قبل الشروع فى عملية التسجيل .... وانت طبعا عارف الوالى بتعامل بالعقل أكثر من العاطفه.
على كل حال نحن ننتظر اليومين الجايات ونشوف البيحصل شنو.....
طبعا الوالى هسه فى الامارات بخصوص المباراة الخيريه المقترحه بين المريخ والنصر الاماراتى لصالح أسرة ايداهور.

شكرا عوض ونوية
جماهير المريخ لا تقبل بلاعب اقل من ايداهور ابدااوفقك الرائي في الدراسة وتفحص مستوى الاعب

سلام صفوة
(خبرك زين هوايه عمو عوض)
قودوين...بارجة ونفاثة لا يقل عن الراحل ايداهور ولكنى كنت استبعد موافقته للحضور الى السودان..اما اذا وافق فهو خير بديل للراحل..قودين كان بالسودان وقد قاد الهلال الى مراحل متقدمة فى البطولة الافريقية ولكن سوء الفهم بينه والارباب عجل برحيله..منافح من يقدح فى امكانيات هذا الفتى النيجيرى... وعدم نجاحه فى الدورى الاماراتى (النصر) او السعودى (الاهلى ) يعود لاسباب نفسية وعدم تاقلم على تلك الدوريات ..ابدا فشله مع هذين النادين لم يكن لاسباب فنيه..انه خير بديل ولاسيما انه نيجيرى سوف يساعد فى استقرار وارغو وكلتشى..
الله يخليك يا والى........ دايما حلال عقد

انتو عارفين بكرة لو الملحناتي سمع نحنا دايرن قودوين دا بجي بخش في الصفقة هو قول لي بقدر علي المبلغ بتاعو ؟ناس الفنادق ماراجنو وقبل كدة ماكان معاهو وفرض فيهو ؛نرجو ان يتخلي الملحناتي عن حاكو حاكو دي

دى يا محمد الملحناتى ما بيدخل فيها ومش عشان المبالغ ..... دى حتكون فيها شماته كبيره على أشرف سيد أحمد(الكاردينال) الذى راهن فى يوم من الايام بتطويع المستحيل واحضار قودوين الى المقبره حيث كان يربط نجاحه فى هذه الصفقه بازاحة الأرباب من الرئاسه ويحل محله لأنه كان سيتربع على قلوب الأهله وقتها..... لما كترت القريشات هاك يا زوغه

عندما كان بيلعب في الهلال قلتوا ماعندوا حاجة الان بقي لعاب دي مشكلتكم ماعندكم كشافين بس الكان بيلعب في الهلال هو لعاب الله يكون في عونكم(غزالة اجاوزت)سلام سلام همت سلام

. .أبو إبراهيم و ول نوية تحياتي ...والله نحن كنا راخين منكم شوية عشان الظروف التي مرت بالوصيف!!!...لكن شايفكم رجعتوا مسخنين وشادين على سيد البلد؟؟

حلال عليكم قودوين ..لاعب واقف من اللعب قرابة الـ 3 سنوات ...وبعدين إنتو شغالبن بينا كدة مالكم وبالارباب وبعد دا كلو ومشاكلنا الكتيرة دي ؟؟؟ ما زلنا متربعين على صدارة الدوري ..أها امس الأرباب سدد كل مستحقات اللاعبين وكل فواتير الفنادق ..حقو تركزوا مع غزالة تشاد ؟؟ ما تقوم تعملا فيكم ؟؟؟ قالو غزال صحراء تشاد دا عندو 4 قرون وديل طيروا بطل نيجيريا ؟؟؟ أعملوا حسابكم مع فريقكم البقى يلعب شوط واحد ويقطع في الشوط التاني يقوموا بقرونهم الـ 4 يلصقوا ليكم 4 مع ناس كاسروكا ديل؟؟ ...

نحن يا ابو الشوش رفعنا شعار احراز كاس افريقيا واهدائه لاسرة ايداهور تانى مافى كلام.
بعدين يا فلس نحن ما حصل قلنا قودوين ما عندو حاجه .... والله قودوين لما يكون لاعب هلال مريخ انا قلبى بقيف من الخوف.
هو بينى وبينك كان الود دا بقى ولدنا حتكون ضربة معلم

مثلما رقصكم سيد البلد بتلك الثلاثية الأفريقية التاريخية وأعقبتها ترقيصة سادومبا الثنائية لي سي أكرم ..

بيني وبينك ياابوابراهيم قودوين بيكون زي زمان(بيكون فات فيه الفوات وغنايو مات)يعني الفيه اتعرفت
بيكون كمل كملت ملاح حلو

انتو بس يا فلس يا اخوى قولو امين لممثل البلد الشرعى الوحيد فى الادوار الهائيه لكأس الانديه الابطال باذن الواحد الأحد.
والله يدينا الفى مرادنا

يا احباب قودوين لاعب خطير وقوي اتمني فشل هذه الصفقة معليش ول نويه وعوض السيد وباقي العقد الفريد من المريخاب

ول نويه لك التحية والود ياخي انتو ماشين وين؟ كلتشي والنفطي وكمان قودوين

اول مرة اسمع لي بوالي بتعامل بعقل قال هو واليكم دة سيئته لسع ما اتغفرت تجو تتحايلوا على القانون وتجنسو الوهم ده عشان يجيب ليكم كاس تهدوه لروح ايداهور