العيد كان رائع

الاحباب الاعزاء
قرمان ليكم حار و لينا طوله و اتمني ان تكونوا قضيتم عطلة العيد و انتم مبسوطين .. انا غايتو استمتعت بالجد بهذه المناسبه وسط الاحباب و الاصدقاء بعاصمة النور باريس .. اليوم الاول الاخ سيف الدين دوتم ضبح لينا خروف و ضربنا الشواشو بحضور عدد من الاصدقاء حضروا من مختلف المدن الفرنسيه .. اليوم التاني الاخ مولانا محمد علي ضبح لينا عتوت و و بقية اليوم مشينا زياره للاخ محمد شفا .. اما بقية الايام الاخيره تجولنا حول باريس و مدينة نانسي التي تبعد حوالي 300 كيلو ..

الاخ ابوهريره .. الاخوه سيف الدين دوتم و الاخ محمد شفا يبلغوك عاطر التحايا و قالوا ليك كل سنه و انت طيب و هم بباريس ..
الاخت سهاد ..
انشاءالله العيديه بتاعتي ما اكلتوها ..
مجددا الاخوه الاعزاء نتمني لكم التوفيق و الله يدي كل واحد فيكم الفي مرادو و الله يخضر ضراعكم و انشاء الله كل سنه معيدين ..

لكم التقدير

اخى ابراهيم عشمان والله ناس المنتدى كلهم قرمانين ليك حار .
وكل عام انت وناس شفا ودوتم بخير وياريت لو مديتنى بايميلاتهم وتلفوناتهم فى الخاص .
والجماعة بسالو منك شديد خاصة صاحبك عبد الحافظ واديته ايميلك وكمان جنابو الضكير .

قلت لى سيف ضبح ليكم خروف مايكون كديس

العزيز ابوهريره
كل التحايا و الاشواق .. الاخ محمد شفا لو شفتو ما ح تعرفو مشاء الله تبارك الله انت لو صارعتو معه يرميك و انا متأكد ح يفقشك عشرين فقشه الان عامل رجيم ووزنو نزل حوالي 143 كيلو يعني تحسن كتير ..
يا سلام بالله كيف اخبار الاخ عبدالحافظ والله لي زمن ما سمعت عنه ..

يا زول كديس شنو كمان اسأل الدكتوره المشت الصين اوع يكونو الجماعه ضحو لها ببعشوم كمان هي الزوله دي بتسوي شنو في الصين خليها تمرق من الجماعه ديل ههههههه ..
حا ارسل لك تلفوناتهم انشاءالله

عيدكم مبارك اخي ودعشمان وابوهريرة "اخو النقر"زي ما بقولوا ناس بيتنا
وربنا يحقق كل امانيكم يا رب
ويا ود عشمان عازمنك "جريو" حليوني هههههههههههههههههه باقي معلقات في الشوايه ولحمه غالي بالحيل يعني بتمن خروفين في البلد
وابوهريرة ما وصلني في بكاني انا زعلانه منه امكن خاف نذبح ليه "حمار" لانه بكانا ده فوقه مطاعم متخصصه حمير هههههههههههه
وكل عام وانتم بخير

تسلم يا ود عشمان
ومين زيك
العيد عندك
واخر بسطه
ربنا يديمها عليك يا رب
ويا سيدى عيديتك قاعده منتظراك
بس ابقى مارق
اخيتى الدكتوره يديكى العافيه
وانت كمان عيدك بسط ربنا يديمه
وتحياتى الى ايمان
وقولى ليها لقيت لحم الجريو كيف
الله يستر ما ترجع
وتقول لى الجماعه
الصنين قالو فيه علاج من كده وكده
والجماعه يبقو يطاردو فى الكلاب
واهم ما فى الموضوع
انها لحمه بلاش
بلا مليون للخروف
والله كريم لتعابا

الدكتوره .. و انتي كمان الله يديك الفي نيتك و يحقق امانيك .. قلتي لي جريو ههههه انتي شكلك اتخصصتي في لحم الجريوات و الكدايس و قالوا الجرو غالي خلاص و بالمناسبه انتي الجماعه ديل بتتفاهمي معاهم كيف ؟؟ من الطرائف عندي اخوي ودا له شحنه بتاعت انابيب بترول الي منطقة هجليج و اول ما وصلو لقي واحد صيني في قدامو قالوا له دا ورق الشحنه و ادني قروش الشحنه الصيني شال الورق و دخل به المكتب و بعد اكتر من ساعتين قالوا كده نشوف الزول دا مالو اتأخر لقي واحد قال له يا اخونا اديني قروشنا خلي نمرق قال له الورق بتاعك وينو ؟ قال له ما اديتك له قبل شويه قال له انت ما اديتني اي ورق شاف واحد جنبو قال له خلاص اديتو للزول الجنبك دا برضو قال له ما اديتني اي ورق .. اخوي نادي المساعد بتاعو قال له الورق ادينا لمنو في الجماعه ديل المساعد شاف واحد تاني جاي داخل قال له ادينا للزول دا برضو قال لهم ما اديتوني اي ورق يا اخوانا الحكايه شنو قال للمدير كده جيب لينا ناسك ديل كلهم بقو يشوفو اي واحد يقول دا لا ما دا اظنو داك ابو عوينات داك في نهاية المطاف و بعد نهاية الدوام جاء واحد داخل قال لهم تعالوا نديكم قروشكم و قالوا له انت كنت وين قال لهم معليش انا طلعت لتصليح عطل في المصفي اخوي قال له يخرب بيتك خليتنا نشوف اي واحد نقول ياهو ..

سهاد ..
قالوا لي الفنان عمر احساس كانت عندو حفله مدينة بيرمينجهام انشاءالله حضرتيها

ابوهريره ..
انت حقو تسفر اخوك البعرف اللغه الصينيه عشان يلحق بالدكتوره و يكونوا رابطة ابناء ابوجبيهه بالصين ..

لكم التقدير

كل سنه وانت طيب وعودا حميدا

شكرا اخي الكريم عوض السيد مع عاطر التمنيات لك بالتوفيق ..

يادكتورة والله النقر اخوى جدوصديقى لكن بقينا ناس جرى ومعايش وياحليل زمان لمن نمشى جبل المحلج وناكل ساطة التبلدى .
وكمان ابوى عبدالرازق مع الوالد اخوان واصحاب من زمان ودى انا ذاتى ماكنت اعرفها الا قريب.
فى عيد رمضان مشيت ابوجبيهة اخذت صورة لبيتكم فى المحلج ورستلتها للنقر والحاج وصالح وان شاءالله ارسلها ليكى تشوفيها.
وبعدين والله انا من ما جيت بقول ياجماعة احسان دى وين ودونى ليها قالولى مسافتها بعيدة تجى من حلفا لى نمولى ما بمشوليها الابالطيارة ولا القطرالجراى داك السرعتة 400 ك /س داير ليه ضحوة وسربة حتى يصل خلاص سكت وقعدت قبلى .
بعدين هنا طبعا مشكلة اللغة انا الا بقودنى قوادة مرة عبدالسلام سافر ايو وخلانى فى بكين بمشى المطعم بوصف البدونى ليه بدوسه وبجى انوم ولا الف قريب قريب .
حسى ايمان دى كيف معاك انا كنت دايما بجنن عبدالسلام وداير يترجمو لى كل كبيرة وصغيرة لحدى مانتشاكل عديل واحرد ليه .
اما بالنسبة للحمير عندك زميلك على الزيان قريب من محل سكنة مطعم متخصص فى الحمير وعندهم حمارين داراويات محنطات قدام المطعم قال عشان يورا الناس انونحن بنضبح حمير كيف .

لكم وافر الشكر والتقدير وكلسنة انتو طيبن وان شاءاللة تجونا بالسلامة.

ابراهيم عشمان والله ضحكتنى ضحك بحكاية الصينين دى ’ انت زول رائع وكتر خير اختنا سهاد الجابتك لينا .

بعدين شفا دة لقى الراحات هناك ولا شنو انبهل كدة قول الانجيبك السودان تاكل قرع ورجلة (بعدين شفا كان ركب المواصلات ودفع نصف التذكرة طالب وكان مالى محل نفرين براهو الكمسارى قال ليهو مالى محل اثنين وتدفع طالب قام ادى الكمسارى كف ).

لك كل الود وماتنقطع لو انقطعت نرسل سهاد تجيبك.

تسلم يا ابوهريره يا اخوى
وزولك ده
تانى يحله منى الحله بله
وما تقول جانى قريب
معاى فى لندن
خلاص اكلها
شوكة حوت
تانى
ان غاب خلو على
وكل عام وانتم بالف خير

العزيز الفاتح محمد التوم
مشرف المنتدي العام .. كل التحايا و الاحترام و العيج مبروك و الله يخضر ضراعاك و يديك الفي نيتك ة انشاءالله لامين ما نقاصين .. و بعدين يا اخوي الاخت صباح حسن دي الفريق بتاعهم وين و اذل لقيتها سلم عليها حار و قول لها نحن فريقنا جنب حجر رشاد ..
اخي ضحكتني بالنيفه لي طوله منها لكن بمشي ل صباح احتمال يضبحو لي عتوت ههههه.. لك التقدير و الاحترام