إفتتاح المرحلة الأولى من طريق أم روابة أبوجبيهة بطول 50 كلم

العباسية 21/12/2010(سونا) افتتح المهندس عبدالوهاب عثمان وزير الطرق و الجسور و مولانا أحمد محمد هارون والي جنوب كردفان و الأستاذ معتصم ميرغني حسين زاكي الدين والي شمال كردفان اليوم بمنطقة العباسية المرحلة الاولى من طريق أم روابة أبوجبيهة بطول 50 كلم بتكلفة تبلغ 27 مليون و 227 ألف جنيها

ويعتبر هذا القطاع ضمن قطاعات الطريق الدائري ويمثل المدخل الرئيس والوحيد لولاية جنوب كردفان من الجهة الشرقية وجزءا رئيسيا من الطريق الذي يربط بين الشمال والجنوب من أم روابة حتى ملكال

ويعمل الطريق على ربط مناطق الإنتاج بمناطق الاستهلاك و يسهل انسياب حركة الركاب و البضائع و يسهم في تخفيف نفقات المعيشة و تقليل تكاليف النقل

و قامت شركة سودان بايل للطرق و الجسور بتشييد الطريق الذي يتم تمويله من وزارة المالية و الاقتصاد الوطني

عقبال رشاد العباسية أسوأ منطقة في الطريق

الاخ الكريم ياسر

متعك الله بالصحة و العافية

يا عزيز دا احلي خبر في خلال عام 2010 .. تعبنا خلاص من تسكسك اللواري و الخيران و بعدين قول الوحلان مساعدية اللواري بعد دا يتنفسوا الصعداء من حفر المجاري ..
في احدي المرات كنا مسافرين من ام روابه الي رشاد تمينا يومين و نصف في الطريق وصلنا ريشاد غبش زي الكداريك ..

كل الامنيات بان الشارع دا يوصل حتي تلودي و بعدين من ؤشاد اذا عملو لينا شارع صغير بدخل تجاه الفيض ام عبدالله مرورا بخورالدليب و ام برمبيطة و دلامي حتي الدلنج يكون مولانا احمد هرون ما قصر معنا كلو كلو و دايرين لينا كباري للخيران كمان ما تنسوا ..

لك التقدير اخي ياسر للخبر الجميل ..

الله يبشرك بالخير كمان وكمان الاخ العزيز ياسر
ونتمني اكمال كل المراحل
وربنا يكفينا شر السرعة يارب
تسلم

الله اكبر
احلى خبر والله
والله يكفينا شر السرعة والتهور زى ما قال الفاتح وعقبال رشاد وكل الطريق الدائرى حتى كادقلى وطريق امبرمبيطة .

وياعشمان انت وصلت فى يومين ونص انا سافرت بترتر سنقل من ابوجبيهة الى الليرى وصلت فى اسبوع وكانت الوقت خريف شهر 9 لكن كملنا الجداد والارانب .

ابوهريره كتب :
وكان الوقت خريف شهر 9 لكن كملنا الجداد والارانب

لكن ضحكتني طبعا احر حاجه تسافر بترتر سنقل او لوري شاحن قرع في الخريف .. مره من المرات سافرنا بلوري شاحن قرع من ابوكرشولا الي الرهد و احر حاجه تكون قاعد في قرع .. بعدين في عمك واحد من البقاره راكب معنا زول كلامو كتير ما بسكت لو شاف اي رواعيه داير يسالهم اولاد منو و فريقهم وين .. و انا كنت راكب جنبو .. الزول اتململ يمين و شمال قال الكرجقوليه مالها بقت لي حقنه ..

لكم التقدير

غايتو زلطكو ده كِن ما شفته قُدام حوش جدي الفكي ما عندي ليكو كلام تب
شكراً ياسر

مشكور ياسر على الخب الجميل 50 كيلو جيدة لكنها تساوي ربع المسافة بين ابوجبيهة امروابة يعني بحساب هذا الجزء استقرق 25 سنة حتى اكتمل يعني اكتمال الطريق الى ابوجبيهة يحتاج 75 سنة يعني الطريق محتاج لـ 100 سنة اي قرن كامل بداية الطريق ابوجبيهة في عام 1985 تقريبا وانتهى العمل فيه من ردميات وطبقات وجسور ولكن سقوط الحكومة الديمقراطية هو السبب الرئيسي وراء توقف الطريق وتحويل الاليات و المعدات بامر من الحكومة وتم تعطيل العمل فيه لكن بعض الناس قالوا السبب هو موت مالك الشركة حسين موسى

اتمنى ان يكتمل الطريق في اقرب فرصة ممكنة حتى يحل مشاكل السفر والمتاعب .

الكارجقلاية ما خلت عمك يكمل كلامة سفر متعب جدا

يا رب تهون على الطريق ويكتمل
ويا اخيتى الدكتوره شكلنا كده
حنصل معاك لى بيت جدنا الفكى
ونعمل كرامة
التخريج ونرجع تانى بطريقنا
قولو امين
اخوى الافكاتو
كملتو علينا كل الجداد والارانب
يا ربى
كان مشينا بنقلى فضلت حاجه

اها عاد عايزنكم انت وود عشمان
تحكو لينا بسفرياتكم
زى اخونا غريق
لقايت ما يفتتحو لينا الطريق ده
يلا نتلاقى هناك

غايتو يا سهاد كان الزلط تم ننسق نمشي سوا ونعزم معانا بت العمده سومه ونضبح تور في المدرسة الابتدائية "أ" بنات ونعزم ناس البلد كوووولهم وهاك يا ونسه وضحك وتسمعي القرقراب من بيتكم.......
الله يحقق الاحلام وبلدنا تبقي تمام

حمدا لله ميسر الامور هى نعمة من الله علينا ا ن سخر لنا هذا الجزءالذى سيخفف عنا كثيرا من معانتنا ويقرب لنا الشقة و يحفظ لنا ارواح مرضنا بعد الله فكم من مريض مات من طول السفر ووعثاءه نساله تعالى ان يمن علينا بتكملة بقية الطريق الدائرى الذى يمثل جزء كبير من احلام انسان تلك المنطقة الغنية وما ابسط احلامنا لو قستها بمواردنا شكرا لك اخى ياسر على هذه البشارة ويا ود عشمان توزع فى خرفانك شرق وغرب كدا اضبح لينا خاروف دا يوم الضبايح خلى اخواتنا ديل يقومن يولعن الكوانين دايرين لينا شية جمر

احلى خبر والله
والله يكفينا شر السرعة والتهور زى ما قال الفاتح وعقبال رشاد وكل الطريق الدائرى حتى كادقلى وطريق امبرمبيطة .