مطلوب البحث عن ... ود عشمان السباري المخضرم

الاخوة الاعضاء
اين الاستاذ ود عشمان؟
ليس من عاداته المعهوده ان يكون ساكت بدون ان يعمل مشاكل ويختلق مناوشات المرجو منكم البحث عنه. صراحة انا خايف يختفي ويجينا بمصيبة كبيرة..
الف تحية

تسلم أخي محمود ... لقد هاتفني ود عشمان أمس السبت حوالي الساعة3:20م بالضبط من ( لنضدن) . وقلت ليه الجماعة بسألوا عنك ...خاصة في عمود إبنتي ناهد ...ضحك بضحكته الظريفة الصافية البريئة ...وقال لي والله مشغوليات ( بزنس ) يعني الرجل بخير وبسلم عليكم كثير ...كتير ...وتقبلوا جميعاً تحياته ....والسعاااال أين : أسامة عثمان باشا ؟؟؟
وشكراً أخي محمود لتفقدك للناس وهذا من شيمتك الحسني ، وأعرف أن طبعك الرضي ...وتسلم لنا أيها الحبيب .... محبتي

الف شكر الاستاذ عثمان شاويش
انت دائما كبير و عالي الهمة
الله يخليك لاولادك ويطول عمرك
الف شكر لقد طمانتنا على الولد الشقي

الحمدلله ودعشمان جيتا انهدى من البلبصة...وقلتو لي داير يسجل في جمعيةالرفق بالقوارير....

الاعزاء ..

محمود منصور صاحب الزوق الرفيع

الاخ شاويش الرجل الضكران

الاخت صباح الحنونه

الاخت اقبال بت اهلي

متعكم الله بالصحة و العافيه و انشاءالله تسأل عنكم السعاده ..

والله يا اخوانا بقر ابوي المراح بصمتو سرقو ما باقي الا العجال المصاليب ( العجال المصاليب ) دي اتمني اخونا محمود يفهمها و لو ما فهمها يا اخوانا الحقوه بالترجمه ..

علي كل حال اسبوع تمام من البار سرقوهن و الناس كلها فزعت ياتوه بتجري و بتنجم .. انا الان لملم حرابي و مركوبي و عصايتي المضببه ماشي لاحقه الناس ..

دعواتكم لينا يا اهلنا الله يجمعهن لانو انا البقر ديل تعب فوقن حار سرحي بيهن الليل و النهار لمن مركوبي اتقطع .. و بالمناسبه جدي اسماعيل امبارح سرقو منه 17 بقره حلوب .. الله يجمعهن ..

السنه الخريف مبشر الا ناس الحركه الشعبيه ما خلونا كل يوم نسمع دا ضربو .. دا قتلو .. الان اهلنا في مدينة امبرمبيطه جارة الوادي راقدين ربيطه لانو ناس الحركه بقولوا من المتوقع يضربوها في تحت اي لحظه .. اولادنا الصبيان كلهم من الخرطوم وصلوا امبرمبيطه و ملحزمين .. الله يكضب الشينه ..

نسأل الله ان يحفظ اهل الولايه جميعا يا رب .. لكن الولايه وضعها ماساوي للغايه الجوع قرب يقتل الناس ..

اقبال جمعيتك بتاعك القوارير دي دايرين ندربها دفاع شعبي عشان تقيف مع ناس الولايه رايك شنو ؟؟ فصحاتكم في الرجال دي نكمل حدها و لا شنو يا محمود و نخليك انت تكون مشرف للتدريب عشان ما يزوغن ..

شكرا اعزائي لكم التقدير

العزيز محمود

والله ضحكتني .. قلت لي خايف اجيكم بمصيبه كمان ..
ههههههه هههههه ههههههه

جاهزين ومدربين وعندنا دبابات بدل دبابين...ناس الخرطوم فزعو ات قاعد تسوي شنو؟

ود عشمان
الف شكر ....لقد اطمانينا عليك
المهم جمعية الرفق بالقوارير جاهزة عدة وعتاد... بنات واولاد ... شيبا وشباب ...للدفاع عن كل جنوب كردفان بما فيها امبرمبيطة والزود عنها بالغالي والنفيس ... مركوبك وحرابك ديل خليهم في الفريق ..الموضوع بق صواريخ وطائرات انتينوف وميج وميراج واسلحة بعيدة المدى...نحن ما ماشين دواس او صراع ما تحرجنا مع ناس الحركة الشعبية ساكت.. بعدين ياوعشمان انت قايل اخوك محمود من وين؟؟؟ انا من حلة فطاطات يعني فاهم كل كلامك..
الف تحية

العزيز ود عشمان ..
عليك بقول يا( يا جامع الناس لى يوماً لا ريب فيه اجمع بينى وبين ضالتى)
وانشاء الله ربنا يجمعكم بيهم ..
نسأل الله العظيم رب العرش العظيم ان يحفظ اهلنا فى امبرميطة والحباك وكردفان اجمعين امييييين

احترامى

الاخ فيصل انا اليوم اتكلمت معاك في التلفون ما عندي كلام كتير بقولو معاك ..

هاي محمد ول ابوي عبدالله قادم

ماك طيب قرمان ليك حار .. والله كتر خيرك ما بتقصر و دي المحريه فيكم لكن العيال كلهم اللايمو من ابوكرجولا و رضينا و الرحيمه و خور الدليب جو امبرمبيطه و راقدين ربيطه انا زاتي قل بركب بجيهم لكن قرعوني قالوا لي اتا اقعد تيراب ..

اخي صحبي محمد نويه دا ما تخلو يمرق ساي اربطو

شكرا اخي الكريم لك التقدير..

الاخ العزيز خالد ول ابوي عثمان ( الفقير )

قرمان ليك حار اخي مشاء الله جلابيتك و عمتك سمحات حار لكن العمه بشيفك طاويها انصاريه هههههه

والله كتر خيرك السر الانطتني ليه دا بمسك فوقا قوي و الله يجمع يا رب و املنا في الله كبير
اخي امباكر كن الله حيانا من الموت انشاء الله بكتب ليك جواب تابع الخاص بتاعك

مع خالص تقديري ..