للسودانيين والسودانيين فقط

أشكرك عزيزي المفضال على هذا الألق ... في منتداك العامر .. وانشاء الله تنهض بلدنا من جديد ... بحول الله وحيل أبناءها .. تساؤلات الشاعر الكبير " الدوش - رحمه الله بالجنه " ستجد جواباً .. وقريباً إنشاء الله !!!!

حأسأل عن بلد رايح وافتش عن بلد سايح
واسأل عن امانينا اللي ما بتدينا صوت صايح
وأسأل وين مخابينا إذا جانا الزمن ..لا فح
واسأل عن بلد مجروح وعارف الجارحو ليه جارح
وابكى على بلد ممدوح وعارف المادحو ما مادح
واحلم بي حلم مسروق لا هو الليلة لا امبارح
أعلق في جناح سفري خطابات لي زمن فجري
وادخل من درب سري لكل مضاجع الأحزان
واضفِّر من شجر بلدي بروقاً مارقة من صدري
حأسأل عن بلد غاطٍ لحدِّ الليلهْ في الوجعة
أَنط فوق سرجي واتْحزَّم أقوم من وقعة لي وقعة
أخُتْ ايدي البتوجِعْني على السأم البراجِعْني
واسأل .. يا وطن يا بيتنا
ليه شوقك مواجهني ليه حبك مجهجهني
وليه تاريخ زمن خسران
موكّر لسَّه في شجني؟
حأكتب لي شجر مقطوع مسادير يمكن يتحرك
خطابات لي طفل مجدوع يقوم يجرى يقع يبرُك
رساله لكل قُمْريّة
إذا دم الشقا اتوزع على كل البيوت ما تْرِك
واسأل .. عن وطن رايِح واديكم خبر جارح
بأنو جميع جموع الناس حيفضلوا لا كراع لا راس
ونشترى في الدكاكين يوم مسابح من دموع الناس
مساحيق من هموم الناس زهج يتْعَبّا في الأكياس
ونعلن في المزاد علنا وترغي الجوقة والأجراس
"!نبيع الطفلة والكراس"
واصرَخ ! ياوطن! يا بيتنا ليه ما تبقى لينا الساس ؟؟؟؟؟
**********
واصرَخ ! ياوطن! يا بيتنا إنتا لينا الساس !!