كلمات من شكوى جدي

المطرة ... المطرة...
المطرة الكبّت فوق الحِلة الواقعة صعيد...
شَلَعت ..سييييل...
وشالت كل بيوت الفُقرا ..
القَش ... الطِين
البرِق القِبلي الضلم
الرعد...السوط
ياناس المطرة... ماتلموا العيش
الديش ..؟ خبارو الديش ..؟
ماتلموا العيش ...
المطرة بتخرب العيش ...
وتبقى الزُريعة...
الآبري يطير
رمضان دبر قُبال شهرين ..
حجاج البيت باكر جايين
ماتلموا العيش
الضيفالجاي ..مابتنفع فيهو..
الثكلي ولا الكبسيبة
المهلة ..الشفقة تطير
وتطير الجيرة أم دق
الحُقة ...أدوني التَابة نسف
ونعدل الراس الخرف..
قبل خريف العينة
الزينة .... يا بت يازينة
أبريقي الاخدر وين ؟
بدور ( أتجمر ) وألفى الخلوة...
الزينة ..المغرب فات..
وينا التبروقة ...أل الممحوقة
الجبنة يابت
... البكري.. التينة
جيب الفنجان ..جاي يتكى جدك عتمان
عتمان ياخوي ..
دقيت العيش ؟
عبيت الخيش.؟
السلم ..البنك...الدين ؟
حليت الدين؟...
بعت الكنتين ..فكيتبو بكم ..
حليتبو الدين...
أحسن ياخوي ..
لكن بكر نتونس وين...؟
الطير ؟؟
الطير ياخوي...
ياهو الدّمر أولاد الزين

بعت الكنتين ..فكيتو بكم؟حليتبو الدين؟..احسن يااخوي..
شكرا كندة

لكن يا إقبال (نقنب) وين جدنا حسين باع الكنتين للتمساح قرشين . زولا جبار كسر الكنبة ودفق الزيت في المصطبة .قال ماعيز لمة حجاج - بخربوا السوق .جدنا عثمان ,عمنامختار,حبوبةجدي وجدي حسين يتونسوا؟ وين ويضحكوا متين؟ وأنا زاتي أودي القهوة لمين؟

لكن الطيب الكف دينو نامت عينو..