أغاني حقيبة بليغة اللغة

قوم نادى عنان
الشاعر/خليل أفندي فرح

قوم نادى عنان واتباعه..... وقفل حوانيت البـاعه
نزلت للدنيا شفاعه......... وسعت امدرمان لرفاعه

وطن الآباء يا ام طاعه...... أجمة ومشهـوره سباعه
من دون أترابا مطاعه...... حضريه تقول فى طباعه

المجد الحاسده مداعى...... هو أساس المـا بتداعى
وسعت أسلافنا وداعه .......وصارت فى جيلنا بداعه

رفعت أعلاما رفاعه........... وشمخت بى كبارنا يفاعه
وطن السنّاب يا رباعه......... نزل العـربان فى رباعه

هنا تلقى الخلق الأعرابى....... لا خوف لا ضيم لا مرابى
ظل الشكرية الكابى............ والشرف الأصله ركابى

هنا روعة عصراً ولى ..........وروايـع جيلنـا الهلّّهّ
عصبيه تناطح الجلّه .............ومدنية منـافيه الزلّّه

إياك يا عاشق تحرق .........فى بحــور أوصافك تغرق
هى شامه فى تورنا الأبرق...... هى جنة نيلنـا الأزرق

فى ربوعا الصيد إن وقّـل........ وشافن مجنون يتعقل
كفروع البان تتنقل ............رطب القـاماتن فقـّل

الصيد الضارب الوادى....... اجّفـل نـافـر غادى
شرفن لى صوت الحادى ......حفلن ضمّاهن نـادى

العز من حاضر وبادى ......حرسن ما جاهن عادى
النور فى خدودن بادى........ وسلامة الذوق شى عادى

لا تنسى ليالى العشّه .........وفى الحله هبوب الرشّه
إتعشى عشاك واتمشى.......... هوى بيت المال ما انفشّ

اعذرنى أخوك إنغشّ ........لا اتعد هواك لا كشّ
أذكرنى ولو بى قشّه .........بيت مال وعيال يا كشّه