مظاهرات بشرق النيل..العليفون؛؛؛؛؛؛؛؛

مشكور الاستاذ بوعزيزي
طبعا اذا طفح الكيل وتقفلت كل ابواب الامل لابد للشعب من خيار التظاهر واعلان المطالب الشرعية والدستورية وليس من المعقول ان يتحكم نافع وكرتي ومصطفى اسماعيل وعلي عثمان وعبدالرحمن الخضر في اقتصاد السودان ويتلاعبوا في قوت الشعب
بالرغم من انني كنت دائما ما انحاز الى جانب الحكومة الا انني اقف الان الى جانب الشعب الذي انهكته الاسعار والغلاء الفاحش والفساد المالي والاداري المستشري في جسد الحكومة
نحن ضد التظاهرات من اجل التخريب والحروب من اجل السلطة وضد سياسة جوع كلبك يتبعك وضد التفلتات الامنية وفي مقابل ذلك نرى ان
على الحكومة ان تسارع في علاج الازمة قبل ان تفقد السيطرة على الاوضاع والا تسلك طريق الاسد والقذافي في العناد والمكابرة والغطرسة
والاستبداد والاستعباد
وبعد ذلك نتمنى ان ينعم الشعب السوداني بالرخاء والامن والامان تحت مظلة اي حكومة
تحياتي

الجوع كافر

الله يستر

اللحمه نزلة
والزيت كمان رخص شويه والرقيف رخيص

من الله ما خلقنا ما شفنا شعب يحتج عشان اللحمه بقت غاليه

كده شوفو لينا حاجه بتمبلع ومقنعه

الشعب السودانى كا ن بياكل البوش فطور وعشاء والغداء دائما كا ن مدغم فى العشا بتاع البوش

والسيد البوش كان بيضيفو ليه موية جبنا !!!!!

ولا مو هيك يا اهلنا مش كان ده حالنا

اللحمه قال تقوم ليها مظاهرات

انتو عارفين فى الفيس بك فى مجموعه تسمى نفسها الجبهه السودانيه للتغيير

دعت لى مظاهرات من اهم مناطق التجمعات فورتى ون

وده اشهر محل اسكريم فى العمارات شارع 41

وعلى كده قس

الله يكون في العون

التغير سنة الحياة ومافى حاكم مخلد فى الحكم لكن السؤال المهم

منو العاوز يحكم فى ظل الازمات دى

ياسر عرمان مثلا

ولا نجرب الانتخابات تانى

وانا خايف الانتخابات الدور ده تجيب لينا بارجقل لا عندو ام ولا ابو

القدام غريق

زهير سلام

الناس بيقولو الجن الموالفو ولا الجن التوالفو

ابوعزيزى

انحنا خايفين نورط زى ورطت المصريين والليبين والتوانسه

لا نلم فى الجمل ولا الجمالى

كده خلونا بى غلات لحمنا دى

و الصابرات روابح

تحياتى والله ينصر الهلال يا فيصل

قول امين

هناك اشياء قدرية حتمية..
وقد ذكرها الله قطعا..((ينزع الملك ممن يشاء)) يعنى قلع من كان يظن يوما ..شاب تونسيا مجهول طفح به الكيل وفيموت حرقا ..وحرقة..
فاشعل الثورات لم ينطفأ حريقها ووهجها..زى نار ابو الكليكة..او نيران استراليا واعصار اكلاهوما..وعنفوان خور الضكير زمان..
قامت ثورة اكتوبر ..عشان طالب سال دمه بطلقة طائشة صار رمزا للشهيد..وتغير النظام..كم من دماء سالت ولم يتغير النظام كم ضابط قتل فى الشهر الحرام
ولم يتغير النظام..
فالشعب السودانى اول من قتل حاكما عسكريا انجليزى((غردون))..وابيى اضرم النار فى تركى متغطرس..
شعبا اول من غير النظام بعصيان مدنى..ثم اكدها فى رجب ..ابريل ..
فهو الاسد الجريح شرب الطمى..وبات الكوى..وصبر وصام وفطر العدم..صبر عم عبدالرحيم وصبرت حاجة آمنة..ولم يحين وقت النزع....
وكيف تحلق الصقور وتبيض الحمائم وقد حطموا اعشاشها؟ اين ميدان الامم المتحدة اين ميدان ابو جنزير وزنك الخضار اين زنك اللحمة ..اين البركس اين نقابات السكة حديد والسكة حديد اين نقابات مشروع الجزيرة والجزيرة..اين المدن الثائرة عطبرة ومدنى هذه هى الاعشاش ((قد فرزعت مبكرا))..قسموا الاحزاب ..وقسموا الوطن ..مزقوا الإرادة..وشرذموا الناس بمثلث حمدى..
ولكن لم يحين وقت النزع بعد..
والثورة متوقعة كحاملة الحى لا يدرون متى تلد؟
يأتى النزع ..كحالة طفل ..بين الخوف والامل فى اسقاط اسنان اللبن..يصبح الصبح وقد تخلص من اسنانة اللبنية ..فيحمل حفنات الذرة واسنانه مخاطبا شمس الحرية ويقول هاك سن الحمار و ادنى سن الغزال؟؟
المرور الكرام ..ابو الزهور الزعيم لقد شاركت فى نشيد ملحمة اكتوبر فى مسرح ابوجبيهه الوسطى..اخوتى محمود ومحمود الاصفياء..عزيزى فيصل وابن استاذى زهير وعفوا ايها الشفيف غريق ..هذه،،،،
هرطقات رجل من ضحايا الخصخصة .. والله قد بعنا ملابسنا القديمة فى سوق الاخد لنفتات ..وكان خلفنا زغب الحواصل..
نقول ارفعوا الاكف الله يولى من يصلح..ويوحد البلاد ويصلح العباد

محمود اخوى شنو انت قلبت مره واحدة كده

ما الريال السعودى بقى ب 1250 ج

االزعيم غريق نحن شفنا العيشه زمان والان البوش التقولو دا ب 5 جنيه

بعدين نا 41 ديل خليهم يبدو بس ماهم عندهم الفيس بوك

بعدين الغبش بظهروا لو تحركو نا سوق 6 مايو والحاج يوسف والكلاكلة والسوق العربى

ضحوه واحده تانى الا اوكامبو يجى يستلم ناسو ال55 ده كان ما عندو زيادة

والله حالنا لايسر والخوف من الجاي ونقول ربك يستر ما نبقى زي الصومال

ابو هريره ده فيه غبينه بايته

بعدين الجماعه ديل عارفين الشقله بتمشى كيف

اها الدولار نزل واللحمه دقت الدلجه

وحات الرسول الجداده الكويتيه القدر الضربه ب14جنيح بس

وكيلو اللحم بقى بى15 بس
ويا جماعه صحج الفول مو بوش بجنيح واحد وكيس العيش (فوقو5رقيفايه|)

بى جنيح واحد

الناس ديل المظاهرين ليها شنو

الوضع اسع اتبدل ما زى زمان الصالح العام اسع بقى محرم والناس ممكن تشتكى على القديم والجديد

ويا اخوى عثمان المقص راقد انا المحسوب على النظام ده شالونى للصالح العام سنة 93 وانا كنت بقاتل فى جبهات الجنوب

وللاسف شالونى بطلب من واحد من اولاد ابوجبيهه ونقلونى الى الدلنج وبعد 15 يوم وقفونى عن العمل وبعد 15 اخرى عملو مجلس محاسبه غيابى وبعد 15 يوم تم فصلى وانا تلقيت الخبر وانا نازل من الطياره قادم من واو فى مطار الابيض

فيا عزيزى امر الصالح العام اوكل الى ناس عديمى الاخلاق وقام فى القالب الاعم على تصفيت حسابات شخصيه

انا اعرف العشرات من الكفاءات النادره تم تشريدهم بهذه الطريقه

فيا حبيبى كلنا شربنا من هذا الحوض وزرنا زنازين عاطف عثمان فى الاستراحه بتاعة الحباك

ولم تشفع لنا انو كيزان

وقد صادروا منا دسكى وبابور ماسى عينك يا تاجر وكان بزرع بيهم عبد الوهاب ادروب واخرين فى مشاريع عريض

يا عزيزى ويا ابوعزيزى المرارات تملا مجلدات لكن ده كلو احتسبناه فى سبيل الله


تحياتى

لقد واستنى اخوى غريق المغوار..وضمدت بعض الجراحات..ولكن لا خير فينا إن لم نقولها..فيصل عمك فى البلد الغربة البطالة..
هل تعلم اخى غريق ..الرئيس من الشخصيات السودانية المحبوبة كسودانى..ولا يعفينا من قول الحق..اذا لم ينتبهوا لمثلث حمدى الديار تتقسم..

اخوتي الاعزاء جميعا نقاشكم بهذه الحراره يدل علي حرصكم علي الوطن العزيز الذي باتت تتخطفه قوي البغي من كل جانب
تعلمون اخي الحصار المضروب علي البلد و الاستهداف غير المبرر
بالاضافه الي الازمه التي ضربت الاقتصاد الغربي في عمقه و الغلاء العالمي كل هذه الاشياء تلقي بظلالها علي اقتصادنا المحلي و اتفق معكم في الغلاء الفاحش و لكن الشعب السوداني من شعوب العالم الثالث التي لا تحافظ علي الحق العام و اذا قامت المظاهرات سيفقد الشعب كل ممتلكاته و ما احداث الاثنين الاسود عنكم ببعيد حتي ابوجبيهه قك احتسبت احد ابناءها شهيدا في تلك الاحداث ولا نريد لهذه التجارب ان تتكرر
و لكن يمكن للشعب ان يغير النظام عبر صناديق الاختراع
و حقو تعرف يا ابوهريره انو اوكامبو لا يستطيع ان ياخذ شعره من البشر و لو اجتمعت قوي البغي سيقاوم البشير و يمت عزيزا كما مات اسد الفرات ابو عدي زعيم العرب صدام حسين و مازال العراق يبكي علي صدام !!
احسن نحكم العقل يا اخوانا

يا جماعه هووووووى

تعالو نتحاسب

الغلاء ده انا فى راى موزون مع السوق
التور الرباع مليون ونص

الخروف المتوسط خمسميه

اردب العيش 200جنيه

قنطار السمسم 300جنيه

قنطار الصمغ 250 جنيه
طن زهرة الشمس4مليون
كيف الزيد يبقى رخيص

واللحمه بجيبوها من وين والجمل ابو رقبه ده بى 5مليون

السلام عليكم

يا جماعه هووووووى

تعالو نتحاسب

الغلاء ده انا فى راى موزون مع السوق
التور الرباع مليون ونص

الخروف المتوسط خمسميه

اردب العيش 200جنيه

قنطار السمسم 300جنيه

قنطار الصمغ 250 جنيه
طن زهرة الشمس4مليون
كيف الزيد يبقى رخيص

واللحمه بجيبوها من وين والجمل ابو رقبه ده بى 5مليون

وليه وانحنا سلة غذاء العالم .. ولية ونحنا نعتبر من اغنى البلاد من حيث الثروة الحيوانية والاراضي الخصبة والزراعية .. ولية وانحنا عندنا اطول نيل في العالم يعني ثروة مائية .. بالاضافة لي ثروة نفطية وذهب ونحاس . يعني عندنا بهايم وعندنا مرعى وعندنا موية طيب تبقى المشكلة وين ؟؟؟
برضو دولار ..!! افتونا

ا
سوسوقالت





وليه وانحنا سلة غذاء العالم .. ولية ونحنا نعتبر من اغنى البلاد من حيث
الثروة الحيوانية والاراضي الخصبة والزراعية .. ولية وانحنا عندنا اطول نيل
في العالم يعني ثروة مائية .. بالاضافة لي ثروة نفطية وذهب ونحاس . يعني
عندنا بهايم وعندنا مرعى وعندنا موية طيب تبقى المشكلة وين ؟؟؟
برضو دولار ..!! افتونا



المشكله فينا يا اخيه

نحن عطاله نحن نعتمد فى معاشنا على زول واحد

نحن كل الاسره تعتمد على الوالد فقط هو الراعى والاولاد ينومون للضحى

نحن شعب كسول غير منتج

نحن نستنكر الاعمال اليدويه على ابنائنا

نحن جميعا عاوزين نكون موظفين ودكاتره

نحن فى السودان شعب امره غريب من منا ذهب واستثمر فى الاشياء المنتجه من منا ذهب وفلح الارض بغرض ان يزيد انتاجهه

نحن عاوزين الحكومه تعمل لنا كل شيى

المزارع يريد ان توفر له الحكومه الارض والماء والتمويل ومصاريف وليداتو فى الخريف

يا ناس عندما يقول المتعافى عاوز يستورد مصريين لفلاحت مشروع الجزيره احسن نقول وبصدق معه حق


تحياتى

اخى غريق

غبينة بايته وبس

انت قبال كدة ما قلت فى المنتدى دا رغيف الجنيح الشافع بقرضو

لما بالنسبة للحساب ما قلت لينا الاستاذ مرتبه كم ولا العسكرى بصرف كم او الموظف ماهتو كم ومتوسط الصرف اليومى لاسرة فى الحباك كم

ولا نخلى البلد دى زى ما قال الخضر ونمشى نربى لينا تيان ونطق صمغ ونحش فى ظل انعدام الامن

والزراعة يا زعيم انت سيد العارفين كيف اضحى مزارعى الحباك وقس على ذلك

اخى سراقة

اوكامبو دة سخره الله لهؤلاء الظلمة وبورقته هذة اتى كل هذا الانبطاح وانت تعلم ذلك واوكامبو هو الذى جعلك تفرط فى الوطن وانت تلهث وراء امريكا وارضائها والنطبيع معها ولو اوكامبو ما على حق دع من وجه اليهم الاتهام يذهبو لتقديم دفوعهم ان كانو ابرياء بحق

وياريت لو ماتو لوحدهم بدل مايقتلو معهم شعب كامل

عدوك يا سيدي يا سودان
جميع الحملوهو أمانة .. قام خرم الأمانة وخان
فسخنا .. شيحك في الشمس .. نام إتباهى بالعمران
نفوساً شان تشوف الدم يقطر من حشا الشريان
تنتف بالسنون عصفور .. تشق العامرة بين إخوان
وإيداً تنفحك بالقمحة .. شان ما تنقح الوديان
عدوك الأجرة ما كفت .. عدوك السخرة والسدان
جلداً مردغك في الجهل .. في المرض البطالة عشان
يقري جناهو .. يصح معناهو .. يخارج العندو .. ينقدل .. تباري مدان
يشغلك إنت بالفارغة .. ويطول تريان
وياخد من ثراك الخير .. حصادك سوس من التمرة .. ومن الأقطان
نصيبك في الورق ما بتقرا .. بيقرأ الأرزقي التلفان
يا مقري البيقرأ عليك .. وحقك في القماش أكفان
يا حايم دواء ويكفيك .. وكلٌ من عليها فان
عدوك واضح وضوح البروة والنار الدم القيزان
عدوك وماهو خابي عليك .. عدوك فاشية الجرذان
وهنا الشرعية كيلتنا .. عدوك ما خرب الميزان

صاحبنا قعد ضيف



عدوك الأجرة ما كفت .. عدوك السخرة والسدان
جلداً مردغك في الجهل .. في المرض البطالة عشان
يقري جناهو .. يصح معناهو .. يخارج العندو .. ينقدل .. تباري مدان
يشغلك إنت بالفارغة .. ويطول تريان
وياخد من ثراك الخير .. حصادك سوس من التمرة .. ومن الأقطان
نصيبك في الورق ما بتقرا .. بيقرأ الأرزقي التلفان




الشيخ جبل اللقمة يا رائع وين انت تظهر وتزوغ

السلام عليكم

الاستاذ غريق لك التحية والتقدير

المشكله فينا يا اخيه

نحن عطاله نحن نعتمد فى معاشنا على زول واحد

ولية نحن عطالة بقى في زول جاهل ، ماكل الشعب بقى خريج جامعات

دا لو ماكان الغالبية اصحاب شهادات عليا وبرضو عطالة ..

تبقى المشكلة وين ..؟ برضو فينا

نحن شعب كسول غير منتج

نحن نستنكر الاعمال اليدويه على ابنائنا

نحن جميعا عاوزين نكون موظفين ودكاتره

لوكان دا صحيح ماكان في حاجة اسمها مشروع الجزيرة

ولا كان اشتهرنا بالصمغ العربي والقطن

واسي دا كلوا مشى وين

برضوا المشكلة فينا ..؟
نحن فى السودان شعب امره غريب من منا ذهب واستثمر فى الاشياء المنتجه من منا ذهب وفلح الارض بغرض ان يزيد انتاجهه

نحن عاوزين الحكومه تعمل لنا كل شيى

لية .. هي اصلا قاعدة تعمل شي عشان ماأصلا الزول يأمل فيها

المزارع يريد ان توفر له الحكومه الارض والماء والتمويل ومصاريف وليداتو فى الخريف

يا ناس عندما يقول المتعافى عاوز يستورد مصريين لفلاحت مشروع الجزيره احسن نقول وبصدق معه حق

مشروع الجزيرة مامحتاج مشروع الجزيرة بي اهلو

بس خلي الحكومة تخلي كل زول في حالو شوف الناس دي تصل وين

تحياتى
[/color][/quote]

نعاكم حق

يلا نظاهر

عشان بكره نبقى مشردين

ونستجدى المعونات

ونزل

انا افتكر كده افضل

شوفو ناس اليمن وليبيا ومصر وسوريا وحتى تونس بوعزيزى حالها لا يسروالفوضى بها ضاربه اطنابها

ابو هريرة ماتغبن حار
وماتنسى عواس السم بضوقو

(البر لا يبلى والذنب لا ينسى والديان لا يموت فكن كما شئت فكما تدين تدان) ؟

اقبال اختى انا غبينتى ديك هينة لكن الغبينة الحاليه دى هى السبب

عليك الله شوفى الوضع كيف

الزعيم غريق

قصة مافى زول دى كلام ساى يعنى هم الماسكين ديل بروفسيرات ولا دكاترة

حتى الدكاترة ياهم ناس كمال عبيد

الواحد يسوى دكتوراه فى الوضو او التيمم ويكونو ادوها ليه فى مكتب

ياخى ديل فى السياسة شغالين رزق اليوم باليوم

حسى انت ولا فيصل خليل او حتى نجيب محمود منصور من السعودية ما بمسكو البلد دى

شوارعك لي دويها علي اذ ما اخر العلاج الكي

شوارعك لي دويها علي اذ ما اخر العلاج الكي

حمد فتح الرحمن - القولد:

خرجت اليوم مظاهر حاشد بمنقطة القولد سارت حتي المقر الذي كان من المفترض ان يجتمع فيه وزراء ولائيين احتجاجا على غلاء الاسعار و الرسوم الشهرية المفروضة على الموظفين لدعم المؤتمر الوطني و دعم الجهاد و الحرب في النيل الازرق و الاستقطاعات الباهظة المفروضة على المواطنين لمدة 3 سنوات متواصلة كاقساط تكاليف ادخال لكهرباء علما بان المواطنين كانوا قد اوفوا بنصيبهم المفروض و الباقي تتكفل به الحكومة الا ان حكومة الولاية السابقة لم تلتزم بنصيبها. و الأدهى والأمر انها تصرفت في الدعم الحكومي و تركت المواطنين يواصلون دفع التكاليف وحدهم .
و بدلا من خروج الوزراء المجتمعين الي الاهالي و الاستماع لشكاويهم اثروا الفرار من مواجهتهم و تركهم

نقلا عن صححيفة الراكوبة