محاكمة الشاعر للسلطان الجاير لصلاح أحمد إبراهيم

السلطان الجاير المقصود هو جعفر النميري


محاكمة الشاعر للسلطان الجائر

أخواني فيهم قوة فيهم نخوة فيهم راس
وفى مجلس رفاقا عزاز بساط وظراف
مازى زولكم الزهجى الظلوم الظق
خادم الباشا دقاق المساكين دق
تيلات جدو فى التركية فيه مرق
لا بحس بالكرامة ولا بهمو الحق


يشتم فى البشر أموات على أحياء
ويشتم كل مغضوب منو فى الوزراء
وحتى الماتو أذكروا كيف اليهم أساء
وعاد يبكيهم التمساح وأى وفاء


غلطانين وصدقنا
الوعود الخانا
لامن شفنا ازداد
بى ورانا تخانا
عندو أمور تحت
أسأل بهاء وسخانا
مافى معاها مادامت
أمل فى رخانا

ثروات بحرنا الأحمر
تنازل فيها
زى مويتنا ما عبود
تبرمك بيها
عجبن لى حراميها
وصبح حاميها
يقهرنا ويقول للغير
أهجموا عليها

أسرع يا سليم
ساعد أخوك عدنان
وهات الشيك
وهيك ملعون أبو السودان
خبراتنا العزيزة
الطاشة فى البلدان
طفشا بى عمايل
ما بتسر انسان

يابايع الوطن للغير
أريت لو بعتو
بالتمن النقول
يمكن يطابق نحتو
كل صاحب جنيهين
أجنبى وطمعتو
بالهوبلى خم وقال
أريتكم جعتو

ماكان العشم قط
يا الأبوك مسكين
تتكى الشعب
تدنا عليه بالسكين
باكر تفنى لكن
تبقى فينا سنين
آثار فعلتك
شوف البسامحك مين

برطعت وعتيت
شعب البلاد شحات
بددت الأمل
والمال نصيبنا فتات
وليك انت النياشين
ترقش الدهبات

سبحتو من حبال
المشنقة المرفوعة
جلابيتو من كفن
الشهيد مقطوعة
صحة عضلو
من مرض الأهالى وجوعا
الفاتورة من لبن
الرضيع مدفوعا

الرحمة بتكورك فى بلاد الغربة
والرحمة بتكورك والعمايل كعبة
فاكر رحمة الله يا أب مشانق لعبة
ولا الرب رهو منك بتدخلو رهبة

سبحان مكرو اسمو المنتقم لعبادو
واسمو شديد عقاب ويل للذين تمادو
يمهل حبلو داك سلبة وطويلن مادو
ما بهمل وقط ظلم النفوس ما واردو
يا سفاح عشان تهنأ وتعيش فرعون
يا داسى الجثث يا الفى الفجر ملعون
يا سارق الفقير مانع على الماعون
يا عارض عرض فوق البلد طاعون

قولة أضربوهم
(قالها للجامعة هنا لو تتذكروا)

قولة أضربوهم كيف يرجعا فوك
وين تلقى العدالة ودا العهدنا سلوك
أحكام ظل بلا بينة وحكم متروك
لا للمادة لكن لى مزاج صعلوك

متهمك يشر دمو وأمام القاضى
يضربو فيه بكفيهم وفخامتك راضى
كيف يتهنا جفنك ساعة بالاغماضى
من يوم يندهوك ويواجهوك بالماضى

ما تتحوى بى آيات عزل معزولة
ما تغشك سبح متسولات بى قولا
ما فيش اليقيك وكتين تجيك فى تولا
نوح نوحن كثير وأطرأ القيامة وهولا

أعزل لى دجل آية وتفادى الأخرى
قالت آخر الظلم الجحيم فى الأخرى
يا العاجباك أمارتك تنقز فخرا
ربك كيدو أكبر يوم يزنقك تخرا

خلى الدين بعيد ما تجروا توب فى دنيتك
ما قال ليك جوعو عبى فى صينيتك
ما قال ليك أسرف وسف وعلّى بنيتك
وعربد وعير وعاند وخلى انسانيتك

خلى الدين بعيد ماتزيد جرايمك سيئة
راعى وبسألوك كيفن ظلمت رعية
يا الحمل الأمانة ظلوم جهول مادية
بتجيب الخبر عند البيقرا النية

إنت المُلهِم الملهَم دوام تتوطح
ما بين مهبط الحكمة وتقوم تتفولح
وين إلهامك؟ البلد التراهو ملولح
غشك ثعلبان حاجتو إنقضت واترورح

فى ضهرك طلع وطلعت إنت فى ضهرو
شيلنى وأشيلك السايس بغاير مُهرو
ينفخك إنت ناصر وإنت تيتو ونهرو
باكر تمشى فى غيرك يمارس عهرو

وين إلهامك؟ الفكر القفلت دروبو
ولا شقاوة الشعب النفضت جيوبو
ولا سقوط قيم فى جيل مفرهد دوبو
حسب الشايفو قدامو بيتم تدريبو

وين إلهامك؟ إلا إن كان كذب وأونطة
أمل الشعب فيك راح زى قتيلة الشنطة
مشدوه بى مواقفك نطة عكست نطة
زى قرد الطلح يوم يسألوك رطنت

صدق القالو منصور
نصرة ضد آمالنا
ضد أولادنا
ضد أحفادنا ضد عمالنا
ضد الشعب كلو القالو مالك ومالنا
حلال بلة من القيد يكون حلالنا

صدق السمّا قائد
للخراب والفرقة
للخلق الرزيل
لى بيع عرض للسرقة
لى سف التراب
للمحقة يوت للحُرقة
زى إبليس يقود
الساقطين للحَرقة

زى السامرى ما برضو قائد ملهم
شال عجل الدهب
قال موسى خائن مجرم
وزى قائد الضلال
مذموم صحائح مسلم
قائد ماشى وين؟؟
دربك ملولو ومظلم

رئيس لى عصابة
حاكم بالعضل بالبنية بالدبابة
تبت إيدو يحكم بى شريعة غابة
بالجمهورى صائل
فى تعابة غلابة

الأخ الرئيس
كل يوم يفاجىء شعبو
بى شيتن يمحن للبعيد والجمبو
مرماه الوحيد كيفن يوهط صلبو
فى كرسى الحكم والباقى شن يعملبو

تمثيلية فينا رئاسة بعد رئاسة
قايل الشعب بى قمبورو ولا دباسة
ماناقصلو غير يعمل عمل بوكاسا
سبورة بعضل متأبط الحداثة

ربنا وابتلانا عشان نخش الجنة
نزل لينا دجال ايدو ماكنة مكنا
جانا فى شكل منقذ مرفعين ضللنا
بى فروة حمل لمن أمِنا أكلنا

انظر نابو بى دم الشباب كيف دامى
وانظر جسمو بى تنميتو كيف متنامى
وانظر مخلبو الفوق المساكين رامى
واسمع عوتو جيعان ولا جنن رامي

ما مابين علي زولا عمل ارباحو
و ما بننكر علي ذي همة عالية نجاحو
لكن نحن ضد ، يبلع وطن تمساحو
و الجاهل الصغير يصبح عضم في ملاحو

العزيز الغــالي / فضل ........
أعتقد جازماً أنك تسكن داخل شاعرنا المبدع الراحل صلاح أحمد ابراهيم, أو أن روحه (الطاهرة بإذن الله) تسكنك تماماً وتتلبسك , فأصبحت تمشي بيننا صلاح أحمد ابراهيم, ما أروع هذا الشعور, جعلك تتسامى , تجولت في كل ماأوردت , لذا رأيتك صلاح
((محاكمة الشاعر للسلطان الجاير)) ,((شذرات من مسدار النسيب)) , ((شين ودشن)), ((حب صــــلاح للســـودان)) , ((بكائية حزينة لصلاح أحمد إبراهيم في رثاء رفيق عمره على المك))......الخ,
أملي في إفراد مقـــال " ولاته , نشأته , حياته و الأحداث التي مرت عليه ..الخ " لأننا لا نملك إلا أن ننهل من معينك الذي لاينضب , وخاصةً أن الكثيرين لا يعرفون عنه إلا القليل , أو أن المعلومات عنه غير مرتبه أفيدنا الله يعطيك ألف عافية,,,,,

تسلم يا رائع ويا ريت تكتب لينا باقي المحاكمة
يا كاتل الشفيع كيفن تنوم مرتاح
وراك تار الشفيع راجيك ليل وصباح

منتظرين باقي المحاكمة يا مبدع

شكراً ليك ياdawzna بإحياءك لهذا البوست
وعمو فضل يظهر شهر ويغيب شهر لظروف زطبيعة عمله

تسلم يا nashi عليك لو ظهر زكروا يكمل لينا اللوحة الشعرية
دى والله أنا بفتش ليها لي زمن
ولك حبي

أحتاج دوزنة

تحياتي