الاغتراب نار ونور

الأخ العزيز الغالي محمد عيسى كم شدني الشوق اليكم .. ونفسي تتوق للمشاركة في قصة الاغتراب وحكاوي الاغتراب لأن نار الاغتراب أكلتني كثيرا وتذكرت شعر عمر البنجوس وجرداقه في الليالي المقمرة والمناسبات العامرة تحت ايقاع النقارة والتنبل فقد حكى عن الغربة بقوله : الغربة حارة ما قبلان بيها ... يا أم ديسا تلّف حوت كتافيها
السماح نسب ليها شركة شل المداين ضاويها ... أنا عشقت لي وردة ما عرفت ليها
بالليل بتجسس ليها وبالنهار بقصقص ليها ... لما أهلها اكتشفوا القصة أنا احتليت معانيها
الغربة يا اخوتي نارها أكلت شبابنا أكات أجمل وأروع أيام عمرنا وهي حارة البنجوس قال ما قبلان بيها . ولكن بريقها ساحر خاطف زي أضواء شركة شل تشع في كل المداين وتغري الشباب المغامر وتداعب خياله بأحلام الثراء وجلب المال الوفير وعندما تحتويك المدن البعيدة تبقى عودتك للبلد زي حكاوي الاغتراب تتطاول بك السنين تعيش على أعصابك وانت تقاوم العمر العدى وفات وتقاسي جبار الليالي وتصبح عودتك للبلد والمال المسكوب في صحاري الخليج ودول البترول بلا طائل . تلقى الناس كبرت وأنت صغير تلقي الحياة تبدلت عشرات المرات وأنت في أحلامك القرن العشرين فات ودخل القرن الواحد والعشرين وتبدلت الدنيا كلها وأنت قاعد في مكانك . أنا اكتويت بنيران الغربة كثير وأقلها تأخر زواجي حتى 11 / 12/ 2009 م . بالله عليكم في غربة أقسى من كده خبروني يا أحباب أبوجبيهة . من طرف حبيبكم المشتاق لأهل الحبّاك / الجيلي حمودة صالح / المحامي . وسوف أواصل معكم في نور الغربة في الجلسة القادمة ثم متاهات الاغتراب الداخلي في وطنك . ومن شقاوة الغربة عرفت أن صديقنا العمدة الحاج حسين بابكر سوف يتزوج الجمعة القادمة وده كلو من تطاول الاغتراب وعذاباته أتمنى له زواجا سعيدا مباركا وانشاء الله بيت مال وعيال .

رائع يا استاذ الجيلى.
أتوقع ان تكون اضافه حقيقيه للمنتدى همتك...ننتظرك