زوووووووووووووووول بتقولها كدا ليه

لشاعر: صلاح سيد أحمد الغول



مناسبة القصيدة:
(أنني رددت على واحد من منسوبي إحدى الدول العربية على الهاتف (بجملة : نعم يا زول )؟
فرد عليّ مستاءً : (بتقول زول ليه شايفني لافف بتاعه على دماغي..)
زول
أنا الغلطان
تقول لي زول؟!
بقول ليك زول
مالو الزول؟
و انت بتعرف إيه للزول ؟
سخيف وجهول
كمان زعلان
خلاص يا سيدي أنا غلطان
شطحت وكنت فاكرك زول
زول الماهو عاجبك ده
الله الخلقو خلقو كده
سمرة لونو من لون طينو
يبقى الفرق بينك و بينو
إنو نضيف و ابيض قلبو
عارف قدرو شاكر ربو
ساتر عرضو ماسك دينو
مخلص أمين وديع و رزين
حشيم القول بديعو رصينو
لطيف وعفيف و كاتلو حنينو
أسد في الحاره
لا بختاك و لابرجاك تجيو في عرينو
أكان بى حدره بادرتو
بيتلقاك بى عتره
وبستناك تقول الروب
قبل ما يشممك سكينو
يا بتوب يا بيوسدوك الطوب
والراجل يحمر عينو
كمان بى كلمه بتخاويهو
وبى بسمه بجيك خيرو
لا بتقدر تعيش من دونو
لا بتختاهو لى غيرو
زول الماهو عاجبك ده
بلا توجيه ولا تعليم
أديب و فهيم
هميم وكريم
و فطرة ربو من يوم خلقو
لا فتان و لا خوان
أخو أخوان
بكفي الألف و الألفين من الضيفان
و لو اضطر يرهن ولدو
و ان ما كفى
باع بيت أهلو و الجيران
زول الماهو عاجبك ده
يوم تحتاجلو بتلاقيهو
أكان ورطان وكان جيعان
و كان وجعان و كان سجمان
قبل تتأوه و تناديهو
يمين في أقل من برهه
و بين مد الألف و الها
قبل ناسك بجيك حفيان
بضمد جرحك و بداويهو
بكتل أبدرقه بى إيديهو
بطفي الواقده بى رجليهو
ما بتغباههو
لما تدورو بتلاقيو مكان حاريهو
اللافيبا راسو الزول
و متباهيبه إسمها عمة
سنة سيد الأسياد
المعصوم شفيع الأمة
و سيما الأوليا الزهاد
قلال الزاد كبار الهمة
و تاج العزة و الجبرة
و رمز الطيبة و الحكمة
و الملفوف على المبروكة
إسمو التوب
لباس العفة و الحشمة
أزيدك من فضول القول
ولا خلاص عرفت الزول
ده جمل الشيل
دخري الحوبة
فارس العتمة ساري الليل
لبيب و زكي و نجيب بلحيل
فهيم فهماً يهد الحيل
تقول لي ما فهمت عليك عيد القتو لي تاني !
واجيب فهامة عاد من وين
كلامي القتو ألماني؟
أخير ليك تمشي تختاني
وتنسى الزول و تنساني
وفوت قبال تعاديني
و اقول اللوح ده عاداني
و يكفي الزول و يكفيني
إني وانو سودااااااني



Regards

وقعت لي في جرح زي ما بقولوا
بعض الاخوة العرب يتعامل بتعالي مع الازوال
مشكورين الاثنين

لكم التحية عوض السيد والفاتح يكفي هذا الرد ؛؛؛؛؛؛؛؛؛؛؛؛؛؛؛
ونفتخر جداً بأننا سودانيين وبهذه البشرة السمراء وهذه لحكمة يعلمها الله ؛ فهؤلاء جهلا فنحن امة لديها تاريخ يمتد لآلاف السنين وحضارة عريقة والصفات الموجودة في السوداني لن تجدها في اي مستعرب 0

(لوماكنت من زى ديل...وا مأساتى وا أسفاى وا ذلى)....زول..يا سلام على الكلمة..والفاتح زادها بهاء بالتوضيح...قال (زلمه) قال...بالله العرب ديل ما حقارين...هل ل(زلمه) التى يرددوها اى مرتجع لغوى يا الفاتح؟؟؟...
لك الشكراخى عوض....والفاتح مشكورعلى ايراد معانى الكلمة

هم ديل عرب بزعمهم 000ونحن نتشرف بالزول وهم لهم الزلمه!!!
والفرق بينهم عظيم
وقالوا: هو العبد زُلْماً؛ عن اللحياني، وزُلْمَةً وزُلَمَةً وزَلْمَةً وزَلَمَةً أَي قَدُّه قَدُّ العَبد وحَذْوُهُ حَذوُهُ، وقيل: معناه كأَنه يشبه العبد حتى كأنه هو؛ عن اللحياني، قال: يقال ذلك في النكرة وكذلك في الأَمة، وفي الصحاح: أَي قُدَّ قَدَّ العبد. يقال: هذا العبد زُلْماً يا فتى أَي قَدّاً وحَذْواً، وقيل: معنى كل ذلك حَقّاً.
وعطاء مُزَلَّم: قليل.
وزَلَّمْتُ عطاءه: قللته.
والمُزَلَّم الرجل القصير. ابن الأَعرابي: المُزَلَّمُ والمُزَنَّمُ الصغير الجُثَّةِ، والمُزَلَّمُ السيِّء الغذاء.
والزَّلَمَةُ هَنَةٌ معلقة في حلق الشاة، فإذا كانت في الأُذن فهي زَنَمَةٌ، وقد زَنَّمْتُها؛ وأَنشد: بات يُقاسِيها غُلامٌ كالزَّلَمْ وقال الليث: الزَّلَمَة تكون للمِعْزى في حلوقها متعلقة كالقُرْط ولها زَلَمتان، وإذا كانت في الأُذن فهي زَنَمَةٌ، بالنون، والنعت أَزْلَمُ وأَزْنَمُ، والأُنثى زَلْماء وزَنماء، والمُزَنَّمُ: المقطوع طرف الأُذن.
والمزَلَّمُ والمُزَنَّم من الإبل: الذي تقطع أُذنه وتترك له زَلَمَةٌ أَو زَنَمَةٌ؛ قال أَبو عبيد: وإنما يفعل ذلك بالكِرامِ منها.

هذا معناها اللغوي من معجم لسان العرب لابن منظور

شكرا يا عمك....غريق
والله كفيت ووفيت وعرفتنا ب (الزلمات ) تمام...يديك العافية

مشكورين اعزائ واللة الزول دى غالية علينا وعزيزة جدا وما بنحس بقيمتنا الا لما يقول ليك يا زول ولا يا زولة...زولى هوى ضلمة ...زولى الاخضر ضلمة...كان شفت بخجل ضلمة...زولى هوى...زولى هوى...ان قالو لى ماروود ضلمة ...قل ماروود العود ضلمة...ان قالو لى مات ضلمة...بتمسح بالرماد ضلمة...زولى هوى...زولى هوى...
نعتزر للخطاء اللغوية

رايع يا سهاد 00عمر احساس ابدع