يا قلب...انا كنت قايلك تبت من تعب السفر

الشاعر الروائي والقاص المرحوم محمود محمد مدني من جيل السبعينات بدا الكتابه في الستينات عندما كان طالبا بجامعة الخرطوم وهو من اوائل الاعلاميين بوكالة الانباء السودانيه عمل بالخليج وعاد الي ارض الوطن في التسعينيات له من الروايات (جابر الطوربيد) و(الدم في نخاع الورده).
تغني له فنان السودان الذي اذا تغني يطرب نفسه اولا ثم جمهوره الراقي الذواق للفن, الفنان الراقي ابوعركي البخيت,اغنيه رسخت في اذهان المستمع السوداني الذواق وارتبطت به واصبحت مكونا اساسيا لذوقه الغنائي.
ياقلب... من من المفردات والالحان النادره التي تغني بها ابوعركي البخيت.

يا قلب...انا كنت قايلك تبت من
تعب السفر.....
ومن مخاواة القماري
ومن شراب موية المطر
تاريك كامن لي بشيتا كتر
مازمان انا وانت لفينا الموانئ
بالقطارات والمطارات والسفن
دقينا اجراس الجديد...
وعدنا ترتيب المعانئ
الليله راجع لي تبق بق
بتنتل الاهه و ترقرق...
زي تقول ياداب عرفت الاندهاش
ياقليب ما لك علئ...
ما انت عارف نقطة الضعف القديمه
وزي ضايق الارتعاش...
يا قليب يا ما سرحنا
مره جينا والف رحنا
ومره شاي عصريه في طرف الغمامه
ومره دوبيت للمحنه...
ومره حاجاتا جميله
وانحناءت للحمامه...
جاي تسالني الدباره
ياقليب مافيش دباره...
لا المراكب قادره تكسح في النزيف
ولا نحنا شايفين الفناره......

أغنية جميلة وهكذا كان عركى دوما

ابو محمد/لك الود
قصيدة حلوة رجعتنا للزمن الجميل*(وحقيقة الواحد هسع يتمنى يخاوى القمارى ويشرب موية المطر ومن البطحاء كمان*اخيرا اقول ليك ياابو عركى عندنا مليون دبارة)كتر لينا ياابو محمد من العينة دى