ورد النزيف االجميل

( صدرت صحيفة سودانية في يوم من الأيام وعلي صدرها مانشيبت كبير وعريض يقول ((الغضب الساطع علي هاشم صديق

فرض عين علي كل سوداني )) لم أضحك ، ولم أبكي ، ولكني " نزفت " .. ومن ذلك النزيف الحار – ولدهشتي – طلع " ورد النزيف

الجميل " ... شكراً جزيلاً لهم ، وداموا كما كانوا )

نقول لهاشم ان الغضب الساطع انما هو غضب على كل الشعب السودانى و ان الشعب السودانى ينزف

معك دما و يموت من الألم يا هاشم.

النص نهديه الى اساتذتنا فضل و الفاتح و محمود و الى شقيقى المغتال محمد احمد خليل و نقول لك يا محمد احمد

انك بيننا و ان الجميع بخير هنا و ان الاوساخ العالقة ستزول قريبا بعون الله و ان الله فوق الجميع.


جوايا شي

زي غابه

من شوك السِدِر

كُلْ ما العُصَاَر

جواي يقوم

الشوك يخربش

في الضلوع

النار تَبَلْبِل

في القََلب

والحيل يناقِر

وما يموع .

الروح تفرفر

في الجروح

والخيْرَة تغرق

في الِسحِر .

............

من ( سنده )

في شَرْق السَدُر

يمشي القطر

- بي وهمو -

لي ليلة القدُر

لامن يصَل

جِنّ الفكِر

بي كلي اتلبّش

حوار

وادلق

علي الورق

الحِبِر.

أرتَاَح

علي رسم

الجراح

واتمطّا

في بوخ الشِعِر

ويسألني صوت

تحت اللحاف

مستني ( جودو )

ولا ( الخِضِر ) ؟!

..........

الناس تساسِق

للمطار

وأنا غابّي

في نوبْة الوطن

رقّعْت أعضاي

بالصَبُر

رقاني سيدي

نَفَر حوار .

الدنيا بتناغم

علي

من جنه

من آخْر البحر

ممدوده

لي باب الجوار

وأنا لسه

غرقان في السِبِر .

مدفور

ومعصور

في شِبِر .

ممنوع

وما داير أفِر

مطرود

وما داير أقِر .

ساكنّي

في الطين

الهوي

حفيان ومطعون

من ورا

لكني بس

لي كلُ هم

لي كُلُ غم

لي كُل يم

عندي المراكب

والدوا .

..........

تلقاني

في ءابر الصدام

أصدح وادندن

بالكلام

لا بَنْكسر

لابَنْحسِر

غامْسَ الرويس

- بي تعبو -

في شَرَف الحِبر .

............

يا قدمي

ارفعي

حيل خُطاك

وطنك

مشارطك للهلاك .

اتلموا في السكه

الصقور

من المغارب

للبكور .

كُلْ ما رفعت

هوي القلم

جَرّوني

لي جُب الألم

ورموني

في بطن الشِباكْ.

وانا كيف

أجابد يا وطن

واقْدَر أَخُت

طوبه وحَرِف

- آه يا عظيم -

في صرحك

العالي الوسيم

قبال

أتمم و أنْصَرِف

........

رضيان عليْ ؟!

رضيان عليك

وافي ومعاك ْ.

ما عِبْتَ

في نَص الدَرِب

ما طرْت

مغبَون للغَرِب

مامُتّ

من غدر الضرِب.

ما خُنت حلمك

أو هواك .

..........

جوايا شي

زي رمله

في قوز الأُفول

أعتر .. واتب

أتعّب .. وأشِب

يتلمو

غُربان البلد :

شَيخ النعيق

ولد الفجور

قرد الطلح

شفْتَه الطريق

سَقْط العسس

جوقة الهوس

طير الحريق

خايب الرجا

نَصْل الضرا

ناس المزاد

الذمه للبيع

والشرا .

...........

كُلْ يوم

أبارز في البلا

في عيوني

سَفاية وسَموم .

السيف ممسّح

بالهموم

باركت بالعِزه

الدَرَق

شتّت غُبني

علي الورق

رقّعت بالحُزُن

الهدوم .



..........

سِدر الغباين

فاض ملا

وأنا بس براي

خايض أزاي

.........

وين الرفاق ؟!

...........

عِدْم الرفاق

اسم الخلا .

انا لاني ( شارون )

لاني ( نيرون )

لاني كاتل

أو حَرَق.

أنا بس بَخُت

حق البياض

- بي صبري -

في قلب الورق

درويش يوشوش

للجمال .

أعصر مداد

كل الجروح

وأرسم وطن

صاحي وشَرَق .

...........

..........

سم الجرايد

ما كَتَل

شبك المكايد

اتنصل

حبل المشانق

ما انفتل

باب المحقق

ما اتقفل

نجم الصعاليك

ما أفل

خيط الكضب

قطعو المثل .

..........

من قومتي

منحوت

من حريق

كم مرة

غنيت للفَجُر

ناشوني

ناس قَطْع الطريق.

كم مرة

ذاكرت البحر

داروني

اتحول غريق .

ما تُبت

من ريد الصباح

ما خُفت

من جيش الجراح

أردي الجحافل

بالقلم

أضحك وكت

يبكي الألم .

أرتاح

علي سن الرماح

وابصق

علي الطاغي

الظلم .

............

وانا لاني ( شارون )

لاني ( فرعون )

لاني ( هامان )

لاني ( نيرون )

لاني سكين

النزيف .

الناس

تبيع روحها

وتعيش

وأنا ما بشيل

- باللفه -

قرشين للرغيف .

الناس كتير

- بالحيلة -

تطلع فوق

تَقيف

غرقانه

في بِركَ الوَحَل

موهومه

بي بحر العسل

وانا ياني

حفيان في الحَسَك

فقران

وقادل بي مهل

لكنو بس

فقراً نضيف.

.........

كل السيوف

في وشي

موسومه وصفيح

ما لاقا سيفي

- زمن كتال-

في وشي يوم

سيفاً شريف .

.........

طيب ومشبوب

زي نسيم

لكني في الحق

موت بقيف

في الحمله متحزم

عنيف .

لا عندي قصراً

في سحاب

لا عندي عَشماً

في رهاب .

لا عندي كضباً

في كتاب.

لا عندي خوفاً

من خراب .

لا عندي مدحاً

لي غُراب

لا عندي طيناً

في تراب

لا عندي شكاً

في خراب

لا عندي تعظيم

لي جناب

لا عندي حزباً

أو نصاب .

لا عندي ريداً

جاب دُعاش

خلانا يوم قلبين

تحت سقفاً

قُراب .

حتي الهوي

مات بالقوا

مسكين صِبح

عَبْره وشَرا

طعن المشاعر

من ورا

حتي الأمان

في ضُلو خاب .

...........

..........

في الوحشه

دقّاني الغُبار .

أدي الغمام

برق الجمال

يرموني بالنار

الصغار .

من جني

اتْقَطّع واقيف

نشفان وحلمان

بالخريف .

لي حسه

قابض في العشم

ما فر

من ءايدي

ووقع

ما ناشني رمحاً

ما شَفَع

ما غنّي وجعاً

ما انْسمع

ما صابني سهماً

ما نفع .

ورد الجراح

فرهد طلع

في طيني

رويان بالنزيف .

...........

مسكون

وساكنّي الشجن

في الحضرة

لي عشق التراب

كم مره

بلقي هوايُ

رطن .

ما نفسي عاشق

كُلي للناس والمحن

درويش

ملبّش بي وطن.

............

من حالي

أمرق للملا

القي الرماد

في كلْ باب

في كلْ لسان

طعم البلا.

كان الزمن

سُتره وأمان

أصبح يباب

وحشه وخلا .

..........

حرقوا البشاير

بالهَوَس

سرقوا الكحل

من كل عين

تِقل الرويس

من ضيم

ودين

شَتَلوا الخراب

في كلِ باب

وحزن الغباين

والفلس.

الليل صِبح

سايق النهار

فجر المساكين

غاب وطار

قَطَع الصباح

اسم النَفَس .

الناس ( مجنزره )

بالهموم

اللُقمه

زي حلم العُمُر

والسُتره

ما صبحت هدوم

الجوع بَرك

فوق السدور

كَسَر الفقُر

مِرق الثبات

ناساً كُتار

حرقوا البخور .

نزح الشرف

لمس الهوان

دُخري الجِذور .

الأرضه سَرحت

في الزمن

والضيم وِلِد

طير المحن

الغم لِبس

راس الحلم

حتي الأرض

وقفت تدور .

توب الصَبُر

فينا اتملص

وعيونّا غارت

من مغص .

.........

يا حليل زمان

وآه يا هوان

سيل الغباين

لو دفر

ريح القيامه

عديل تقوم

ولو نحنا

ذاكرنا الحصص

ما ظِن يقيف

فى الوش

ظلوم

أو تلوي ءاعصارنا

العَسَس.

..........

..........

دقّانا

في الهجره

المطر

ولسعنا

في ترابنا

الخطر .

دشدش عضامنا

رمي الحُفَر

من جيبنا طار

حق الرغيف

ولسيادنا

ممدوده السُفر.

خنقوا الِخزَن

بحرام دهور

ما دَقّ جوع

باب الصقور

الخير مستّف

في القصور

وناساً تمد ايدها

وتنوح

عشمانه

في حق الفطور.

..........

- آه يا عليم

- رزاق كريم

.........

ياربي هم

أهل البلد

واحنا باقامه

وفي الجحيم

ولاّ الغباش

طاش بالنظر

وعَصَرنا كف

لفّ ( الزهايمر )

والكدَر ؟!

...........

ممنوع جَرِحْنا

من الصُراخ

ممنوع حِلِمنَا

من الَسَفَر.

ممنوع قلمنا

من الصَرَاح

ممنوع زرعنا

من المطر.

ممنوع دوانا

من الجراح

ممنوع غُنانا

من الوتر .

ممنوع فضانا

من الرياح

ممنوع ثمرنا

من الشجر .

ممنوع دَرِبْنَا

من البراح

ممنوع سمانا

من القمر .

ممنوع هتافنا

من الصياح

ممنوع مشينا

من الفتر .

ممنوع صدامنا

من السلاح

ممنوع ضَهَرْنا

من الخَدَر .

ممنوع زرعنا

من الفلاح

ممنوع سؤالنا

من الخبر.

ممنوع ءاذنا

من السماح

ممنوع سمرنا

من السهر

ممنوع ضِحِكنا

من المرح

ممنوع وجعنا

من الخدر .

ممنوع نظرنا

من الصباح

ممنوع شراعنا

من البحر .

........

وسدر الغباين

فاض ملا

كل يوم نبارز

في البلا

حتي الصعاليك

والمطاليق

دايرين

يطالعوك الخلا.

نصبوا المكايد

والمصايد

والحبال

دفروا المتعايس

والمهابيش

والمقاشيش

والعيال

ما عرفو شرفاً

لي حَرب

ماكسبو صفراً

في ضرب

ما درسوا

كيف فن النزال.

ياربي وين

شرف الحرف ؟

ياربي وين

صدقْ الرجال ؟!

...........

سَقْط الجرايد

بس مثل

سم المتعايس

ما كتل

شبك المصايد

اتنصل

حبل المشانق

ما انفتل

باب المحقق

ما انقفل .

معني الرسايل

بان .. وصل

ءالا الألم

ديمه الألم

معني الألم

باب الأمل .

...........

جوايا شي

زي عبرة

بتنادي المطر .

رعداً يكاتل

في خطر

برقاً حرق

ليل السفر

صراخ

يبشّر بي خبر

حرفاً

يونّس في وتر .

..........

وأنا لاني

شارون

لاني نيرون

لاني هامان

لاني كاتل

أو سرق .

أنا بس بَخُت

حق البيَاض

- بي حبري -

في قلب الورق

درويش

يوشوش للجمال

اعصر مداد

كل الجروح

وأرسم وطن

صاحي وشَرَق .

الاستاذ البديع الوديع الاصيل فيصل
بالله عليك لا تحفر في قلوبنا الجراح بعد ان تندمل
محمد احمد ليس بمغتال!!!!
محمد احمد هو مختار اختاره الله الى جواره الطيب الوثير الفسيح فنعم من اختار.
محمد احمد يرقد في جنات الخلود مع الصديقين والشهداء يطوف حوله ولدان مخلدون اذا رايتهم حسبتهم لؤلؤا منثورا. ما اسعدك يا محمد احمد ... وما اتعسنا نحن ما زلنا ننتظر ان نلحق بك الى جوار الحكم العدل الفرد الصمد ولا ندري هل يا ترى ستطول رحلة الانتظار بما فيها من معاصي وذنوب ومصائب وكروب ؟؟.. ام نكون مثلك في سرعة البرق نرحل الى الدار الباقية؟؟ محمد احمد ود الحاجة مدينة ابو زلازل سليلة الاولياء والصالحين حفيدة الاتقياء العابدين الراكعين والساجدين . ودعناك بحرقة وانت لم تزل بيننا في قلوبنا تسكن وفي وجداننا تقيم وستظل بيننا الى ان يرث الله الارض ومن عليها
الف شكر لك يا اخي فيصل..

اخى فيصل
نعم لم ولن ننساه ابدا
نعم لم ولن انساك يا تؤم عزيزى على عبدالغفار.
ولكن اخى الدعوات الصالحات هى المطلوبه منا
وانشاءالله تكون اخر الاحزان .
اللهم ارحم اخى محمد احمد
واغفر له واغسله بالماء والثلج والبرد ونقه من الخطايا كما ينقى الثوب الابيض من الدنس وابدله دار خيرا من داره واهلا خيرا من اهله وزوجا خيرا من زوجه وادخله الجنه واعذه من عذاب القبر ومن عذاب النار يا ارحم الراحمين