شعراء البادية ـــ الهداء والجرداق فى بادية الحوازمة ــــــ كردفان ابوجبيهة

ثعريف ـ الجرداق يتعلق بوصف المراة وجمالها

ـ الهداي هو الشاعر الذى ينظم الشعر في الرجال و يمجد صنائعم في الكرم او
الفروسية والحكمة وما الى ذلك.

الجرداق و الهداء - هذا النوع الادب يخص قبائل البقارة دون غيرهم.

اما بالنسبة للطمبور فهو يخص كنانة. بالرغم من ان الطمبور هناك قبائل اخري تغني الطمبور, كالجوامعة و البديرية.

من اشهر الجرداقين والهداين في ابو جبيهة
بليلة الساس وهو موجود في فريق الشيخ حارن.

عمر البنجوس كان جرداقي راقي جدا وهو من الاحامده جاء الي ابو جبيهة واستقر مع الحوازمة .

ومن اشعار٥

الغرام خليته ما خلانا ـ سافرنا البحير ركب البواخ جانا
واي طفنا الجنوب و شفنا اركانا ـ منظر حارنة ما لاقنا
يا ام خشيما ثوترن بعد الصيانة


والى لقء اخر يعقوب النو

يا ريت تواصل بدون توقف اخي يعقوب لانه منتدي تراث المدينه كتابه قله وكمان بخيلين

فارجوك لا تبخل بما عندك

وكل عام وانت بالف خير

ومنتظرين مزيد من الابداع

الحقيقة حبيت ان اثحدث عن شعر صار منسيا وشعراء ملاءوا الارض ضجيجا في ماضي الايام.

ساكتب عن عمر خير الله (البنجوس)

وهو يلقي شعر عن بنات الحوازمة




ببلش الجهل بتركه فى حلاته
امكزم الفراق بقينا في حالاته
ياللابسة شباطة من شركة باتا
اليوم يالغاليه يادور اتي من ستاته
لهيجك من حلاته بنسب غلى خالاتة
غالية بت بكان للبشرى من بناته
الزول حديثه فى صدره اخير من شتاته
ليكي عشوق من صغير تاته
ببكي للبن وشايلاتنة اخواته.

اود ان اشكر
الاخوات سهاد وناشي على هذا التشجيع واتمنى ان تجود الذاكرة ولو بالنزر اليسير مما كنت احفظة.

للشاعر الجرداقي عمر البنجوس

الشتلة ام حرسا لئيم ما بلاعب فيها
الداير الفواكه كله عانيها
ارجوك ياطير الرهو سلم لي عليها
تسلم من النار و البطن الجيباها
ان جيت ازورها لقيتهم منعوا التذاكر
من العيون ياربي يا ساتر
الرقيبه القايدى دستوري فيها نازل
جيب سلامة العقول بكومة المغازل
ياخي يابرشيرش لوتدرى بالحاصل
اهلك حاربونى وكترو المشاكل
مخروطة الضمير المحبه ليه ناسيها
ياليمونه الشالت عقلى وانا سهيت بعاين ليها

معظم اشعار البنجوس كانت في الغزل لقد انشغلنا فترة من الزمن بهذا النوع من الادب في مطلع السبعينات.

و الله هذه قمة الروعه يا ود النو و انت رجل مبدع قديم
في تجديد قل ان تجده عند مثقف مثلك!!
حفظك الله باعثا لهذا التراث الجميل و قد لامست هوي قديم في
قلبي يا محط الروعه و الابدع حفظك الله حازميا يحي تراث كنانه و غيرهم و سألون لك سند و ارفدك بمزيد من شعر الهدايين

ومن أمجدهم شعراً عمنا أبو خال أم جيدة ...

كان يأتي للسوق فيمدح مباشرة من الراس ويجود له بعض من أعمامنا بالسوق ببعض المال ... والويل كل الويل إذا طنشته .. وفي مرة من المرات أتى السوق هدى ومدح قدام دكان عمنا مصطفى الشفيع وأخونا فانامي طنشه ... فتركه وتقدم حتى أتى دكان عمنا يس منصور وهنالك أعطاه عمي يس أب قرشين... فقال مادحاً عمنا يسن وذاماً من لم يعطوه فقال:

لاقيت الراجل الزين

الهاش الباش ول سيدين

أبو منصور أداني أب قرشين

أخير من عيال الشفيع التتين

والله يا يعقوب انت بالجد مبدع ولسع حافظ الجرداق ده كلو

الله يحفظك

لاول مره اعرف ان عمر عبدالله جمعه طمبارى مشهور

شكرا يا ود النو يا راقى

منتظرين

الاخوة الاعزاء
ثحياتى ليكو جميعا مشكورين كتير على المتابعة


الجرداق له معانى كثيرة.

قال احد الهدايين في ايام المهدية يمدح فيها الامام المهدى عليه السلام.

داعور الفقرا سليتة
كن مهدى بايعناك
وكن فحل رجال
فحولة كى تبعناك

كان فى هداى بيشكر الصعيد (ام خميرة و مناطق ليا و )

فقال لمحبوبتة
الله والله امشى صعيد الحلفا
ما تمشى صعيد الرواوقى
كن مشيتى صعيد الحلفا
العجلة كن تنية تجيكى معشرى
والجدعة تجيكى مبكرى
والبكر تجيكى متنيى
لحم الزراف تقيلى بى
وكن مشيتى الخلا
من كد الدوم تعيى
وكن مرقتى لى برا الزعف ----- بيه

كن مشيتى صعيد الواوقة
صعيد الرواقى بكبر البطن وبرقق الليدى (الايدى)
ابدقلى بقتل و اب فرار بجنكب لية

القصيدة هذه الهداى بيشكر بلدنا الصعيد(امشرموط وليا وواجة) ويبخس منطقةالرواوقة وهى كادقلى و صعيدها الحلفا هم حوازمةالمنطقة الشرقية

نسيت الكثير
ولكن الى لقاء اخر

يعقوب النو

لله درك يا ود النو

رجعتنا 30سنه لى ورا

ايام الزمن الجميل

بعدين انا بزكر اننا كنا مخرفين فى العباسيه 72او71وكان البنجوس فى عز صباهو

والناس تتحلق فى المساء فى خلوة عمنا حامد ابوشنب والبنجوس يتحف الجمهور بالجرداق

وطبعا الحاجه المتزكرها الناس بتشكروا وبتقول ليهو البنجوس العجيل المرضع الما عجيل كوس

وطبعا ازكر جرديقه كان بكررها كثير وكل الصبيان والصبايا حافظنها هى

اشتياقى كتير وكتير الناس عارفنا

يا السايق الباحات للمريود وصلنا

نازل ديس التومه حاوت الاكتاف ماشطنا

خايل قديم التومه مع الشبط لابسنا

انا ازتنى التومه الفى اللعب تتنا

انا ازتنى التومه ام لهيجن كيف طيرت الجنه

قدريشنا فى القلطه دى مسامحنا



نسيت الباقى هى جرديقه طويله


وكمان فى واحد سليمى بقولليهو البنك ده كمان جرداق رهيب بيجى فى بادية اولاد حميد فى الصيف وبجردق فى الحفلات

الجرداق واحد من الفنون المنسيه يجب المحافظه عليه


التقيت البنجوس قبل عام ووعدنى بزياره وتسجيل شريط من النوع القديم وماجد عنده من جرداق


اهلنا سليم مولعين بالجرداق انا بسعى ان شاء الله للتوثيق منهم


تحياتى با ول ابوى النو

شكرا يا ول نويه

الزاكره اضحت خربه هذه مقاطع انتزعتها نزعا بعد مجهود اعدكم اننى اسعى ان اوثق لهذا التراث الجميل

الجرداق من الادب الشعبي الجميل و هناك شاعر جميل من اهلك المسيريه بتكلم في واحده اتزوجها مغترب و سافرها بيها وقال
ام سلمه عوض الله ام خطيبا سعودي
قام بيها قومة حودي
انا شاعر موزون بتكلم فوق حدودي
ام سلمة ذاتا من نسبة اعمامي و جدودي!!
وايضا من شعر الهداي في مشكار الرجال
قال الشاعر اب بزل
بابو ولد احمد دا دابي الترا
ولد الراجل الزين الماك ول مره
ابو عناقريبا مجدعات في الضرا
بابو يوم شاف الضيفان خروفا تكا
ابو غنما بقلبن من الفلا
ولد ام هويدا ابوعينا حمرا
مات قابل ربه انا بدور رده
و الجرداق من اروع تراث الباديه و هو موجود حصريا في بوادي البقاره

الكريمة

اشكرك اخى غريق على هذه الابيات الجميلة صراحة قدمت عمل رائع انت الان فى ابو جبيهة يمكنك ان تقدملنا الكثير وتجمع لنا عدد كبير من شعر الهدايين.

ارجو ثجمع لينا قصص من العم الداهية بريقع والد الاخ البشارى ادم بريقع لانة كنت ارى فيه الراوية الماهر. وادينى اخبار العم محمد المدنى.

و شكرا

اشكرك يا اخى خدور امبشق على مشاركة الشاعر ابو خال ام جيدة

اذكر كان بيشكروا بيقولوا لية -- (ابو خال ام جييدة التبع الصبق الجيزة)

هو حقيقة حدث مهم

اشكر الاخت سهاد على هذه المتابعة لى بوست الجرداق
و كل عام و انتم بخير و سلامى للاسرة

ول نوية سلامات ومشكور على الفروج. ارجوك شوف لينا فريريج من اهلك الحمر لان الهدايين كتر عندهم. كان المرحوم الجد حامد صالح يحفظ الكتير عن اشعر الهداين

اذكر كنت امارض جدى حامد فذكر لى اشعار من ايام يحيى شكلة الفارس المشهور.
وعندما قتل رثاة ول بريرة. وكانت مرثية جميلة جدا عن هذا الفارس.

صراحة لم اسجلها منه.

اخى ادم محمد ادم سراقة.
تحية و احترام

والله كنت احفظ الكثير عن تراث اهلى كنانة طبعا فى جبرونا كنا ساكنين جوار بعض وعارفين الكثير عن ادب هذه القبيلة

ومن الدلالين الكث
وردى مشتولا يوم الجمعة زيارة مقبولة
يوم الجمعة جنى لى احلام
يوم الجمع لقيت غزال الشام
الزول الجننى شليخو من قدام
يوم الجمعة جان لى خبير
الزول الننى شليخو درب الطير

صراح كنانة رايعين


ود النو

ادم حامد هو من الرحمانية ويلغب ب (التيلفون).
كان الناس فى الزراعة العمل مضنى فحاول التيلفون
ان يفرفش الناس

فقام بنظم ابياتمن الشعر

كن لى محمد ول هاشم دا التور الاغر
ام دورى مرتة هزت فوقة وقلت لية
القش السنة دى نوروا الشر

وكن لى ادم ولد الدابولة
دا تغل و لقى لية حميض

وكن لى حامد ول حمودة
هنا ما حش حقتا غبينه

وكن لى ابو مريم انعل ابو القطن و موازينه
( ابو مريم هو عمنا التيلفون)

القصيدة طويلة لكن نسيتها

هناك مرة جات زعلانه
ات ابثشكر الناس دول كلهم مالك ما اب تكرن

فقال فيها

فوق الباقات اتى دى الجركس
و فوق الجداد اتى دى الجدادة ام دنكس
و فوق الحراب اتى دى حربة ابو رقيبة ام كبس

ابونا التيلفون لا تحلى الجلسات الا بوجوده فهو من ظرفاء الرحمانية
ود النو
ارجو من محمد النو الاضافة اذا عندو معلومة

و الله يا ود النو رجل رايع ولو حضروك الجرداقين لملأو الدنيا
مدحا فيك و يالجد قل ما نجد شباب يهتمون بهذا التراث الداعي
الي الكرم و الشجاعه و ذكر محاسن المرأه و حسن الخلق
فأنت بدوي اصيل اخذتك المدينه خلسة علي حين غرة من فرقان الحوازمه حفظك الله بدويا مجددا لتراث الاهل !!

شكرا يا يعقوب

عمك ادم بريقع انتقل الى الرفيق الاعلى قبل خمس سنوات

الاخ سراقه انت رائع وزكرت كلمت حودى كده ورونا معنى حودى ده شنو

اديكم واحده من جرداق اهلنا سليم

يا مسافر بعيد بتين تعود للوطن راجع

انا البقيت مريض تانى مانى نافع

لتيبت الفيض المتمم شرابا عاجبه المزارع

واحده من جرداق اهلنا سليم

مالك يا غرام بعد قلبى ما اقتنع

مجروح فؤادى زاد على الوجع

وين النيه الفى المشى تتفدع

دارسه العمود سايرين معاه بتترنع

حنبجير الجاهله الفاج المساير يرنع

وشك يا جاهله قمر السبعات الطلع

خشيم الجاهله برنجيه فى القطن فقع

عده وفات انا زمانى ياريت تانى يرجع

بعد الفراق انا دمعى سال ما انقرع


جسم الجاهله كيف الطفل البرضع

بنادى بفضل الاه للشمل يجمع

وين الجديه الضاربه الخلا بتجدع

شاف الانيس من الزوال نجع

حودى ــ هو الاعصار او العصار
وعندما قال-- قام بيها قومة حودى ـ يعنى انها سافرت معه بالطيارة الى خارج السودان. طبعا فى الفريق عندما يجى العصار على الفريق النسوان بشيلن السكاكين و بيقولن حودى ما تقشانا النبى معانا
هذا تشبيه جميل لان الطئرة و الاعصار كلاهما يتجهان الى السماء

التومة قصيدة
للشاعر ولد الكبراى ـ هو من اصحاب الادب الراقى
ولكنة قتل ولم يعرف قاتلة. انا لم احضرة ولكن كنت اسمع الالقاء من الوالد النو حامد والخال حسن البشير عندما يتحدوثوا عن ايامهم الخوالى.

يالتومة يالتومة يالتومااااا
دبوقة التومة بالشعر مردومة
مشيت التومة الخواجة نكولا
نفيس التومة فتيل مايقوما
كلمة التومه موزونة تماما
سنون التومة حبوب مفهومة
عيون التومة براق الليل بضوى بين نجومة
كلام التومة بدخل للزول بينة وبين هدومة
البسالم التومة كن مات ما حسفان على يومة

يالتوم يالتومة يالتومااااا

هذه القصيدة تعتبر من الادب الخالد للحوازمة
وهى منذ ايام الاستعمار الانجليزى

لقد بخرت من الذاكرة. ولكن معكم القليل لتتمعنو فيه وشكرا

يعقوب النو

اخى غريق
رحم اللة العم بريقع رحمة واسعة و ادخلة فسيح جنات معى الصديقين والشهداء. ارجو ان تبلغ التعازى للاخ البشارى

اللخوان سراقة وغريق بصراحة قدمتو عمل رائع جدا
ان حميت ليكو النقارة ارحو منكو تطلعوا المخزون

ود النو

شكرا يا ولد النو

من جرداق سليم

ست ريد البنات بحبك بقتنع

بنده ليكى الوصوفى الحج زار البيت ورجم الشيطان

وطلع عرفات وطاف بين الصفا والمروى

تامه الصفات جميله مضمره

بنده ليكى الصوفى الزاهد عابد ربه بقيم الليل بركع

الماثور انا من الفراق متلوع

التحيه ليك يا سراقه والله ابداع

الهدايى فن رفيع اشتهر فى غرب السودان

عمك ابو قطاطى فى ابوجبيهه من اشهر الهدايين

تشكر اخي العزيز غريق يا محط الروعه و الزوق
ولد النو دا راجل فارس الا نقطع فوقا غنيي لانو جدد لينا فن نادر في طريقه للانقراض
عندنا طمباري من اهلك الكواهله في كلوقي اسمه حجازي ود ابشنب قال
اخواني المعاي قالو لي مجنون
و ما عارفني قاعد فوق جمر كانون
العيون سهم و الحواجب نون
خلاص قطعني بي فوق لي عمل ليمون
و قال بشكر في واحده اسمها حليمه ام رسن
امك تقول حلايم
و ابوكي بقول حلايم
و اخوكي بقول حلايم
البطن الجابتك فيها القرنفل قايم
ريقك عسل جابوه فطور للصايم

سراقه

يا للروعه
انت عارف الجرداق والهدى والتطمبر ديل فيهن ادب راقى ومنسى وزى ما قلت فى طريقه الى الانقراض

انا كنت زمان مولع بالفنون الشعبيه الزى دى لكن والله اسع يا اخوى ادم الزاكره مع السكرى ده بقت راكوبه فى الخريف

ماقاعد ازكر اى حاجه لكن اعدكم انا راجع ابوجبيهه فى الايام دى احاول الملم ليكم كم قصيده من الجماعه

البوست دا يستحق التثبيت

اخي الراجل الزين غريق ولد العمده
تشكر و نأمل انك تمشي و تجينا و الربك مليان و مفضل
طبعا زمان الناس بخافو من الهداي و الجرداقي و الطمباري لان معيارهم تعيس حار في واحد عير واحده قال ليها
انت بتحبي ليكي واحد تمباكي
يوم الخميس شفتا واقف معاكي
و دخل ايدا في جيبا و طلع قروش اداكي
و دردم سفتا حتي الكلم معاكي
الله شالكي و ختاكي
في اللابسين الابرولات و الكاكي

شكرا سراقه

التمباكى ده الهداى ما جننو جن

يسلام يا سراقة انت يادوب نزلت بى تقلك
هذه القصيدة صراحة ادب راقى

اخواني لو مت بسبب العرضيه

اعفوني ما تشيلو تار و ما تشيلو ديه



فوق بنات المسيرية

كن فوق الفلايته سروريه

و كن فوق العجايره عمرانيه

العرضيه عيونا هلال الضحيه عيونا فناجيل جوه الفضيه

كن فوق الرزيقات من الماهريه

العرضيه فوق البقر بحب السليميه

الوزينه ام درقات الماكي كنجيه

بالنسبة لى صراحة يا سراقة فتحت شهيتى لاسمع منك الكثير
وشكرا لك
يعقوب النو

اردت ان أن اعدل فى بعض البيوت لان هناك اخطاء كتيرة


بعض الالغاء للشاعر عمر البنجوس
عن بنات الحوازمة

ببلش الجهل بتركه فى حالاته
امكزم الفراق بقينا في حالاته
يا اللابسه شباطة من شركة باتا
اليوم يالغاليه يادور اتي من ستاته
لهيجك من حلاته بنسب على خالاته
غالية بت بكان للبشرى من بناته
ليكي عشوق من صغير تاته
ببكي للبن وشايلاتنة اخواته

اخي و د النو العرب قالو الاذن تعشق قبل العين احيانا
لقد جذبني اهتمامك بفن الباديه و اصبحت اتابع كتاباتك
حتي الثماله
و انا حاديك المزيد من شعر اهلك عيال عطيه
اب زيد الهلالي يوم ضرب المثل
قال اخر الزمن بكتل الشدر و بقل المطر
الكلام دا في بلدنا حصل
ما خلاص الكلام دا وصل
الفساد فوق البلد ظهر
النفوس اتكابرت الناس بقت تمسك الزعل
اخوك كن غلط عليك و جات اعتزر
بتقول الراجل دا فصل
اعوذ بالله من عيشة الجهل
الكلاب ذاتن خلن الشكل
الطيبه الجماعيه معاها الناس تتواصل
انا عندي شباب خطر بضرب بيا المثل
فوقهم انور ابشر ابوجودا بلمح المطر

و في مشكار الرجال الهداي قال
الناس قالو فضيل انا قل ليا ولد العرب الاصيل
انت يا الصقر ابابيل
كن لدم بصدره بخنفره بشيل
فضيل الحازمي الاصيل
الدبيب الدافن المرق يوم اللين
انت السمع الصاري البشرب المصارين
تور ام سقادو الهجم الغافلين
اخي ياقوب النو في مفردات تحتاج لشرح زي
السمع : حيوان مفترس جمعه سموعه
تور ام سقادو: هي كنيه للفيل الكبير
انت طبعا لسان العرب و امريكا لم تغير فيك شيئ
و الله كنت مفتكرك سايرمع الضعاين

اخي ول نويه هو فيا بكان احلي من الخلا و لا فيا شغل احلي من الضعاين ؟!
ود النو رجل اصيل امريكا بكل بهارجها و امكانياتها لم تتمكن
من انتزاع حب الباديه من داخله فله التحيه و لك انت كذلك
لانكم نماذح قويه لاهل الباديه في زمن قل فيه التمسك بالعادات
الله يحفظكو في بلد الغربه بركات ابوحوه تور الصعيد!!

قيلتو طيبين يا جماعه

سراقه انت مبدع وول حبوبات بالجد

عيال النو سلام جاكو من الحباك الناس طيبين ولامين وتامين

الا كلام الحركه التعيس ده 00الدواس راقد معاهم الله يستر

بوست جميل يستاهل يثبت

الله شالكي و ختاكي
في اللابسين الابرولات و الكاكي

الراجل دا معيارا حار

الله شالكي و ختاكي
في اللابسين الابرولات و الكاكي
اختي اقبال نعتزر لك نيابة عن هذا العربي القح ترددت
كثيرا قبل كتابة هذا البيت و لكني وجدت ان الامر لا يكتمل
روعة دون ذكر هذا البيت مع العلم اني قد حذفت منها الكثير
فلك العتبي و لكل اللابسين الابرولات و الكاكي و زوجاتهم

الهداي يا يعقوب النو شكر واحده اسمها حنان جمعه قال
حنان جمعه جاتنا لابسه توبا الاصفر
اسم زول شاف حنان كبر
و كل شماشي صفر
حنان لا تسلم علي زول بسف و لا زول بسكر
كل الشباب فوقا امل
الفقير اب سبحه حمر ليها دما عيونا جمن
اتذكر شيبته استغفر