ألى مصطفى-- القدال.

مهداة الى ول نوية


يا سيد جمال الكون
عاقل انا ومنون
للقبرو واشنطون ...
يا حاج نوينا
بحق كل مغبون
صبحت ديارنا
مفضوحة وفاضحة
ونهبوها وقعدوا
بالسرقة الواضحة
وفساد الزمة
مفضوحة وفاضحة
بالبنك الدولى
بنوكاً شاطحة
وقالولنا نموا
سعة الاباطحة
وبلادنا واسعة
عايزة الكادحة
والفقرا جنوا
عقولهم سارحة
فيها الحرامى
الكان للبارحة
وكفتيرة شاهى
كبايتاً نافحة
وسارح فى سوقو
ما عندو الكاتحة
لاحق العيشة
ولا حق المشرحة
اليوم فى بنز(مرسيدس)
عمارة ناطحة
ولا تشيلو الفاتحة
فى الجتة الناتحة
خلوها مشتحة
عقبال تتفتحة
****
صليت بالستة
لإمامنا والماموم
رئيس الجماعة
حاكم بلاد الروم
رئيس القضيا
قرقوشا فى الخرطوم
وحبيب الشعب
والمجلس المختوم
فى فمو طبلة
فوق راسو طيرة تحوم
والقائد الاعلى
وخطيب الامة
كلماتو ما ام دلدوم
وحكيم افريقيا
لى حد بلاد باطوم
ولى الكل راعى
بالعدل هو المحكوم
الفارس الاول
حامى الحمى المحروم
فى الجمعة الجامعة
للعافى والمحموم
طيارة جاتنا تحوم
شايلة البشاتن كوم
كتلت حمار كلتوم
للقبرو واشنطون
ياحاج نوينا
*****
واتنيت بى شعبى
ما لاحت بارقة
واتنيت بى شعبى
احوالو الخارقة
فى يوم الملتقى
واتنيت بى شعبى
وعدد البكـبن
فى السيل الدالقة
وما حن قمرى
ماغنت وارقة
ما بلت نسمة
ما مالت مورقة
وعاد قولة لالا
الناس المارقة
وعدد البعرفو
للطقمة السارقة
وكلاب الامن
هتيفة منافقة
وعاد كضب الرادى
والبمشى مسارقة
فى الصفحة الاولى
والنشرة العابقة
بالخبر العدس
الحجوة السابقة
وما انّ جائع
فى البلد الحادقة
وارضين التبرى
انهارها الدافقة
وعدد البكبن
فى السيل الدالقة
وما خش فارس
فى سجونو الحارقة
بكلاب الامن
هتيفة منافقة
للكلمة الفالتة
للصمت مصفقة
للجن الكلكى
لى حبل المشنقة
وسودانا الملكى
دبورتو مرنقة
وسودانا المصرى
اتنيت بى شعبى
احوالو الخارقة
عدد البكبن
فى السيل الدالقة
وما خش فارس
فى سجونو الحارقة
وما شمت اماً
لى ريح الفارقها
وعدد الكبداتن
فى ولادن طابقة
وعدد الاحبابن
فى قيودة مزنقة
وعدد الحسراتن
هامن فى الما تلقى
وعدد الدهماء
الوالى فى الشقا
وبغاث الارض
الميت والبقى
باكر يوم السقا
وباكر يوم السقا
ندخل فى المحرقة
نمرق متل النقا
وفى ايدنا المطرقة

يا حاج نوينا

فنان ياخال فيصل وفعلاً الجماعة ماخلو في البلد حاجة. لكن صدقني انت انسان مسالم وروحك جد رياضية .لان بعد السوي فينا اخونا ده كلو وتهديهو هذه الابيات المعبرة. الراجل ماقصر فينا كتب ماكتب ورسم كاركتير والف شعر لكن قول ليهو الايام بتمر وذيسكو تاني بمر
دمت...............

يا حسون حمداا لله على سلامتك
خالك فيصل روحو ما روح هلالابي ما بجدع الملعب بالحجار وبحترم ضيفو كان بقي خصمو
لكن اخوك زي فريخ امبط( فريخ امط بشبه الوزين لكن صغير ومسلط ما بتمسك خالص)

ههههههههههههههه والله يااخوي طارق الليلة كتلتوني بالضحك مع محمد اخوي جاب لينا الكاركتير وانت تميتها لي بي فريخ ام بط صدقني اليوم الضحك مابخليني انو
عشت

عشت حبيبنا حسون
اخوك ده بي مهانته لينا دي وبشتنه لي دي ما بنقدر من غيره و بلباصي جدا تقول من السبعة الحرقو البنبر والتلاتة الاكلو ديك ولد المهدي

نعم هو بلباصي شديد وبشتغل اي زول والدنيا كلها بعرفا ليك .طبعاً الجماعة في السودان بقولو ليهو العمدة غزال ده كان في مثلثل مصري والناس كلها بتعرفو وصدقني فرق معي والكل والله لمن نتزكرو نزرف الدمع وهسي الحاجة راجياهو قالت لينا كان شفتو بي عيني ده اربطو في قعر زيري ده تاني مابخليهو يمشي السعودية دي ربنا يرد غربتو بالسلامة.
دائما أطيب خاطرك الغالى واسامحك لو نسيت
ودعت من يهواك وقلبه بقربك مهما نئيت ....
كم مرة كم حاول يفرق بينا حاسدا او عزول ..........
كم مره قالوا جنيت عليه بدلت ضوء ايامه ليل
لكنى يا نور العذراى انا ما بضيع حبى قول ..
تلقانى دايما في رجاك وغناى في حبك رسول
اسال عليك الليل ونجمه وحتى انوار الصباح
وكل طائر في سماه اسال مشاعر عن هوانا
وليه حنانك لى راح .......
تلقانى في غاية الألم آمالى تزروها الرياح
حيران اسال نفسى ايه كان السبب واصل الخصام
يمكن اكون في حقك اتلومت في ساعة مـــــلام
لكن ما معقول يكون انا قلبى ليك حفظ الفراق
ما اظنه من يعرف الهوى يعرف عدوه مع السلام

اخونا طارق حياك الله ولله( بلباص) دي زكرتني اخونا واحد كده من ناس كادوقلي لكن داك مابلباص داك (بليبيص).لكن فريخ امبط دي مزبوطه يعني زي ود المويه,تحياتي لول نويه وقول ليه الازرق فوق ولسع صامد.

اشكركما ايها الحسنين على مروركما ونسال الله ان يرد غربة اخواننا كلهم

شكراً خالنا فيصل علي الهدية وانا عارفك انت انسان طيب وقلبك حنين؛ وانت ماشبه هذه المآسي التي سببها لكم اسامة التعاون واصحابو ؛ارجعو لصوابكم وخلوهم
لماذالا نقول لك :
طال ليلي والأزاهير نيام
ونسيم الصبح قد ساد الأنام
وعيوني لم تزل تهفو لهم
تندب الدهر الذي أبعدهم
فهي تدري أنني من بعدهم
ضاع عمري بين أنات وهم
واصطلى قلبي بنيران الحنين
الحبايب يوم فراقم واعدوا
أنهم مهما نووا وابتعدوا
يحفظوا الحب ويرعوا ودهم
فاصبري حتى يصونوا عهدهم
فإذا ما أخلفوك وعدهم
ونسوا بعد الأماني حبهم
فاندبي .. وأبكي على مر السنين

كدا كلكم روعه بدون اى رتوش