ابوجبيهه


انضم إلى المنتدى ، فالأمر سريع وسهل

ابوجبيهه
ابوجبيهه
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

العجين المر

3 مشترك

اذهب الى الأسفل

العجين المر Empty العجين المر

مُساهمة من طرف عوض السيد ابراهيم 15th أغسطس 2013, 17:47

العَجِين المُر

شعر : هاشم صديق

سَكّيتى
السحابة السمرا
من قيسان
ولي قِبلة
سما أمدرمان .
...........
يوم الجمعة
صلّينا
دعينا المطرة
شان تنزل
جات المطرة
بالبمبان .

..........
اتحرّينا لي رؤية
شهر رمضان
اتفاجئنا بي رمضان
كان حاضر .
مَرّ الحول
وما فاتنا
كان واقف
وكان حارِن
تقول حردان .
............
تمام حولاً
ونحنا تملّي
ناس صايمين
وماعارفين .
ما حللنا صوم
بي تمرة
ما بلّينا بي حلومر
حلق نشفان .
............
شن الصوم
وشن الرؤية
يا ( عشمانة )
كان عزّ القِرِش
في اءلايد
واتقدّد
جِلِد جُزلان ؟!
............
لا زِرّيعه
لي الآبري
لا عجالي
لي شرموط
لا ( تيبار )
عجيناً مٌر
ولا في عصيدة
بي ملاحاً
لذيذ ويسُر
..........
لا في بليلة
في حلة
ولا تمراً كُبار
في كورة
يتبلا.
........
لا فحماً
ولا ملحاً
ولا قِرشاً
يجيب شيتاً
من الدكان .
..........
اتشققنا
لّما نشفنا
واتقلّينا
لما نجِضنا
واتفتفتنا
لما كملنا
وأسيادنا السُمان
(كيزان ) .
..........
قرصنا الجوع
مرقنا هتفنا
ضد والينا
ضد خانقنا
ضد كاتلنا
كان صوت
الوجع عالي
وكان نقحي الجروح
مسموع
ضحكوا علينا
ناس ( كاكوما )
و ( ود برهوما )
قالوا علينا
أحسن لينا
( لحس الكوع )
سبحان الخلق
أشتات
ديل ناس الشرف
ناصل
وناس أصل الخجل
مجدوع .
...........
صعاليك البلد
حاكمين
أشراف الوطن
صاغرين
يمرقوا غلابة
للبمبان
وتتكندك
سما أمدرمان
والفراجة
و (المهراجا )
بس لابدين .
...........
سمح والِينا
لما يفور
ولما يثور
علي منصة
ويهز الايد
كمان تجديد
في أصل
( العرضة )
والرقصة
يهيج فينا
وكمان يدينا
كم حصة
عشان كوركنا
من جوعنا
كسرنا الخوفة
والرصة
طلعنا هتفنا
مرقنا دفرنا
زي سيلاً نتر
دفَاق
و بقينا وصرنا
عند الوالي
متآمرين
كمان شماسة
ضد الدِين
وناس عُملا
و( شذاذ آفاق ).
...........
مسكينة يا عشمانة
قالوا تقاطعي
حسه اللحمة
كان حمرا
وكان بيضا
تحاربي طماطمة
حُمرة عين
وتبعدي من البيض
حت ءان بيضة
أو بيضتين
دحين
قبال كلامهم ده
كنتي مقاطعة
اسرائيل
أو الكفار ؟
كنتي بتاكلي
يا عشمانة
ديمة سخينة
أو كافيار ؟!
.........
مسكينة
يا عشمانة
يا حيرانه
جاتك حسه
نار كُربه .
حتي الكهربا
شوف عينيك
سماع اضنيك
جن ضَرَبا
ووقدت نار
كمان قَدَلَت
رافعة النخرة
واتنفَشَت
تقول سد مروي
ءاتْلبّش
بجن حبشي
ونازل ظار
.............
شنو الخلوهو
ما زادوهو ؟
غير نَقَص العُمر
والحيل
شنو السابوهو
ما قطعوهو
كان حتي الوطن
قصوهو
من مليون
صبح كم ميل ؟!!
.........
( وا أسفاك (1)
يا عشمانه
من ناس ديك
و ( وآ أسفاي
من ناس
ديل )
ناس ( المؤمن
الطعّان
والفاحش
واللّعان )
تقول ( القُدوة )
ما كانت
( رسول الله )
ولا المسلم
لسانو تُقَا
وحديثو نبيل .
..........
ديل يا زولة
ما قارين
صِحاف خُلفا
ولا عارفين
منو ( العُمَرين )
ولا دارين
شنو ( الأخلاق )
ووين ( موقع )
شتايم الوالي
عندالله
كان الشعب
شحادين
وكوم عُملا
و ( شذاذ آفاق )
والبهتف
في وش الوالي
كان تَشّاهو
جمر الجوع
أحسن ليهو
( لحس الكوع )
وبكون ( مدفوع )
وزول عولاق
.............
يا عشمانه
( رغم السيف )
ورغم القيد
راية العزّه
ما بتندّلا
تظل مرفوعة
زي رأس
الوقف جبار
ولمس النار
ما رمّش
ولا اتذلاّ
............
وكان ألفين
ورا الأسوار
هناك ثوار
بجيبو التار
ويقولوا ( نعم )
لكلمة ( لا ) .
............
بكره قريبه
يا عشمانه
نتماسك
نقيف في وش
لصوص الدين
ربيعنا العربي
ما مخنوق
ولا مسروق
ولا تلجين
ولا تلحين
ربيعنا العربي
من ابداع
شباب مغبون
حمم طالع
جحيم فارع
من بركان
غضب مجنون
..........
نشوف بكره
منو البلحس
عديل الكوع
ومنو الواقف
وراس مرفوع
..........
منو الشعب
الهتف طالع
ملا الآفاق
منو الخايين
منو الخايبين
ومعروفين
( شذاذ آفاق )
عوض السيد ابراهيم
عوض السيد ابراهيم
مشرف المنتدى العام
مشرف المنتدى العام


الرجوع الى أعلى الصفحة اذهب الى الأسفل

العجين المر Empty رد: العجين المر

مُساهمة من طرف خدورة أم بشق 26th أغسطس 2013, 13:26

قصيدة في قمة الروعة وزاد روعتها صدقها الذي يعكس واقع السودان الذي أتيت منه بالأمس

خدورة أم بشق
مشرف منتدى الشعر
مشرف منتدى الشعر


الرجوع الى أعلى الصفحة اذهب الى الأسفل

العجين المر Empty رد: العجين المر

مُساهمة من طرف الفاتح محمد التوم 29th أغسطس 2013, 18:13

بالأمس القريب على قناة النيل الأزرق ......أطل على الشاشة دكتور ودبادي وقد كان محبوب الشباب قبل انتفاضة  رجب/ابريل , كانت اشعاره تملأ الإتحادات والروابط الطلابية وقهوة النشاط .......قرأ قصيدته عودة الدراويش ... تحكي الأنّة والآهــــة ....


حال هذا البلد بكانى ما سكتنى
ريدتن فيهو كيف مالكانى كيف ملكتنى
نارن فيهو كيف ماكلانى كيف لهبتنى
الاّ ترانى فى العرضة انحسب برانى
والناس البتعرض جوه مما سمعتنى
الاّ ترانى انبح زيي زى إخوانى
والخيل بى عجاجة عمتنى
توبى قصير وما غطانى
والزيف ام برد شقتنى
قلت اباصر امرق بره من احزانى
وين قبلتا سفكت دمى وإتعدتنى
ولا زينوبة آخرت إيدى فى الدنيا أم بناين هش
من شافتنى جفلت منى خنست فى نوايا القش
مرادى سلاما يغسل حزنى
الاّ سلاما زاد احزانى زادنى عطش
لحقتها فى الفريق اتناسا وانشد حالا
طلبتها شاى وقست مداسا
قصرت عينى فوق خلخالا
لفحت توبا لحقت ناسا
وقفت غادى عدلت حالا
غزت كوعه هزت راسا
لفت جيدا قالت لا لا
قالت لى شن معناك وشن كسب الرجاك ورجاك
وشنو الراجنو من تالاك
زمنك كلو تاكل باردة ماضق شر
زمنك كلو نحن نعوم وانت تغنى ماسك البر
وزمنك كلو فوق الفارغة فوق ريح المدن منجر
الخير إن مرق من دارنا لا انحسيت ولا نحاس القبيلة نقر
ولينا سنين خلانا سموم وما شربت حفايرو مطر
منيحه الشافع الاماتو راحن فى شموس الحر
صقور الباشا نهشن من ضروعا وفوقنا طارن فر
كلاب الباشا فطرن فيها وما لقن البيقول لها جر
والباشا الغشيم فى ذاتو قعقع ومن كبادا فطر
لا ولدن يقولو انتر ولا مهيرتن تقولو فشر
ويا الباشا الغشيم قول لى جدادك كر



بعد حكت العليها اتوهدت برزن بروق عينيها
كست خلاصى بين إيديها ما لقيت البلفقوا ليها
وقعت دمعة من ود عينى قلت اخفيها
وقعت عينى ذاتها عليها
حسبت المسافة البينا قلت امشيها
كفتنى الصقور بي جيها والبلد اترمت بي جيها
حكموا كتافى عقدوا لسانى ضاروا وشيها
غنوا اتهنوا تربوا وشربوا من بكريها
مصرو ثديها شربوا سلاف معتق من لذيذ شفتيها
عينى تشوف لسانا وصرختا وثكليها
عبلة تنادى فى الولد البشق التيه
عبلة تنادى فى الولد البعرف الجيها
عبلة تنادى فى الولد البعدلو وشيها
عبلة تنادى واقفة قصادى مصروا ثديها
عينى تشوف لسانا وصرختها وثكليها



هيا ريح الصلاح هبى
وامرقى من متاريسك
من طرف البلد شدى
وسوى البرجى داك ميسك
بارده علينا تنكبى
ودمنا زيت فوانيسك
هو لا شرقى ولا غربى
بينزف من دراويشك



والليلة يا ريح الصلاح الهابا فيك راحه وجع
والليلة الشجر الكبار وحشاه ناقرو السوس بقع
والليلة حق الناس ببين والليلة بنشوف البدع
والليلة وين البرقى من تالاك يبين
والبرق من تالاك سنين
يبرق كذا سيوف الصحابه الساجدين
والعاديات المؤريات خرشه جنات فى الارض جات
والخلوق الضايقة لا قوها اجمعين
عرب البوادى المن شرق والامه دى المصلوبه
فوق حبل الصبر لما اتمدت والكادحين
والصالحين والساجدين والعابدين والزاهدين
ونفضنا من زمن الجدود صقر السنين
وسرجنا خيل مسروجة من زمن الحسين
وعرضنا زين
وجمعنا غطا المشرقين والمغربين
واميرنا صاح الرايه وين
والجمع صاح الرايه وين
ومشينا بالتاريخ ركبنا على البساط الأحمدى
كايسين محل وقعت سوارى الرايه
وانقطعت تواريخ النعوش
ولقينا باقى الرايه فوق قبر الخليفة الراشدى
مليانه دماً كيف ندى
وساريها فوق الفتنة دايخ ومنتكى
وغسلنا بى دمع الندم قميص عثمان من الدم الزكى
وعقدنا حبل الدين على طرف القميص المكملى
والراية زادت من الملى ورفرف قماشا المخملى
وحرسوها زى سبعين ولى
ما جلهم حراس الهنا ما جل حراس الأمانة وديدنا
يات من حوار ختم الكتاب ختم السند والعنعنا
يات من ولى ودرويش غرق فى الهمهمات والدندنا
آن الاوان والخير دنا
اتحزموا السبح الطوال واللوح برق
ارجونا فوق طرف الجبل مشهادنا نفزع مجدنا
ايد فى لجام الخيل تقل والتانية فى لجام النفوس
المادحه فى درك الزمن
يا امه كسلى ونائمة فى تياب الكسل
وهواها ماشى مع الأضل
الخيل مصوبر فى محل والخيل تجقلب فى محل
بعد العدل والريح صلاح والظلم راح والصاح قدل
بعد الشروق يا امة وسطا بتشهد فى الخلوق
بعد الشروق نجمك أفل نعشك غشانا على عجل
يا امة وافاها الاجل وماتت على سوء الختام
واخر الكلام فى لسانا كان هبلاً .. هبل
هبلاً .. هبل
وسقط هبل .

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

العجين المر Empty رد: العجين المر

مُساهمة من طرف خدورة أم بشق 30th أغسطس 2013, 06:16

ياليته كان بدل عبلة قال عزة .... فعلاً يالفاتح بعد (أحدٌ أحد) صارت هبلاً هبل

خدورة أم بشق
مشرف منتدى الشعر
مشرف منتدى الشعر


الرجوع الى أعلى الصفحة اذهب الى الأسفل

العجين المر Empty رد: العجين المر

مُساهمة من طرف الفاتح محمد التوم 1st سبتمبر 2013, 18:23

نعم استاذي ........... صارت  كذلك لأن " السنة انعدمت بين الناس " كما  في قصيدته " ياسادات القصر العالي "

وهي في نفس الحقبة..... منها

*****
يا سكان القصر العالى سلام
يا ناسات البرج العالى سلام
اااانويسات البلد البلد الغادى سلام
ادونى سلام وان جيتكم تانى ملام
تبقى مصيبة ان كان السنة انعدمت بين الناس
تبقى مصيبة ان كان القرش اللحمر
قسم الخلق اجناس اجناس........

الفاتح محمد التوم
مشرف المنتدى السياسى
مشرف المنتدى السياسى


الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى