لمحمد وحسن قادم نوية مع خالص حبي

الأخ حسن بقصيدة جمال دنيانا هيجت في شجوناً دفينة من الزمن الجميل في أبوجبيهة حينما كان للأيام فيها جمال ومعنى المهم يا أولاد نوية إليكما وإلى كل أحباب المنتدى هذه (الذكرى الجميلة)
المكان: النادي الأهلي أبوجبيهة
الزمان:عام 1960
المناسبة: حفلة للفنان إبراهيم عوض
مشرفو تنظيم الحفل الدكتور حسين أبوصالح، وضابط الأقطان محمد أيوب القدال، المرحوم الاستاذ أحمد فضل المولى، المرحوم الخال خليل حتيلة والسيد حسن غربال والمرحوم الأستاذ عمر معروف.
الدخول للطلاب عشرة قروش ( وهي سعر 4 أوقة من اللحم بالمناسبة الوقة 2.75 رطل)
استدانت لي الوالدة عشرة قروش من والدة فيصل خليل فالوالد لا يسمح بهكذا حفلات فالفنانون كانوا يعتبرون صيع أو صعاليك.
المهم دخلت الحفل حيث كان النادي محاط بالشرقانيات وكانت بشمال النادي شجرة عرديب ضخمة وهي توأم للعرديبة التي غرب النادي توجد في بيت الخالة شيخة سابقاً والعرديبة الشمالية كانت تطل على مصطبة الحفل وامتلأت من المتسلقين الذين لا يستطيعون دفع قيمة تذكرة الحفل.
بدأ الحفل بأغنية ليه تظلمني وأنا بتمنى وقلبك جافي علي ما حنَّ ..أودع شجني وأعيش في الجنة..الخ
ثم الأغنية الثانية كانت ياغايب عن عيني مع إنك في قلبي وفي قمة سكون السامعين إذا بعبدالباسط محجوب والذي كان صغيراً قصيراً وهو لابس عراقي بوبلين كاكي وهو يتمايل يمنة ويسرة ويصل حتى إبراهيم عوض الذي التقاه وحياه وهز يده معه ثم تلاه شلة من طلاب الأولية الجنوبية وتمت السيطرة عليهم وطبعاً كلهم في طابورالصباح أي واحد أخد عشرة جلدات بسبب الهز في أبراهيم عوض والأغنية مستمرة إذ فجأة يدخل ميرغني دقاقة وعمر منقة وعبدالماجد صالح وهم قمة شباب أبوجبيهة في أجمل رقص وكان يسمى التويست Twist ورقص معهم إبراهيم عوض في لوحة رائعة وجميلة.
وفي فاصل من الفواصل سقط أحد الأشخاص من العرديبة الشمالية وهو نجورات وكسر رجله وهو من أبناء كابوس كان يشتغل في طاحونة حسن سليمان وكان حفلاً لا زال محفوراً في ذاكرتي وبهذه المناسبة أهديكما يا عيال نوية الأغنية التي هيجت الحفل وهي مازالت عندي من أجمل ما سمعت من غناء.
ياغايب عن عيني - كلمات عبد الرحمن الريح

يا غايب عن عيني مع أنك في قلبي
أيه حاصل بينك وبيني غيرحسنك وغير حبي
*******
مهما الأيام طالت اذكرني وصون عهدي
أذكر حبي الصافي وأذكر أيام ودي
أيام ما كان منظور يوماً تختار بعدي
أيه الأسباب مالك مالك متباعد عن قربي
*******
يا حبيبي تعال مرة انا مغرم بيك هايم
سهران والكون كلوا في صدر الليل نايم
مابين محتال واشي وعاذل فى الحب لايم
حسدوني الناس ظلماً انا مخلص يا ربي
********
يا حبيبي ليه انت دايماً علي جاير
دايما مخليني بين الأنام حاير
الدنيا فرحانة والكون جميل ناير
وانا بالجمال مالي معذب يا ربي

شكراً عمنا علي هذا الاهداء الجميل وكم هو رائع فنانا الكبير ابراهيم عوض ؛علي فكرة كل اسرتنا الكبيرة اسرة العمدة قادم من مدمني ابراهيم عوض وخاصة اخونا الصهيوني محمد يستمع لابراهيم بجنون وقبل وفات ابراهيم يكاد لا يفوت حفلة لابراهيم عوض في اي مناسبة
واجدد الشكر عمنا الفضل

شكراً عم الفضل علي الاهداء الجميل هذا يدل علي ذوقك الجميل والرائع بهذا الاهداء وكم هو حبي لهذا الفنان الزري واكاد ابالغ لك حافظ له كل كلمات اغنياته وكل يوم ادندن بها وكل تسجيلاته موجودة الان معي وعامل لها مكتبة خاصة مكتوب عليها خالدات ابراهيم عوض؛ وخالي العمدة يوسف حكي لي هذا الحفل الرائع وحكي برضو عندما اتي الكابلي وقالي لي عندما شدي باغنية ضنين الوعد بدون مايشعر خلع عمامته واصبح يهز بها في وجه الفنان الجميل الكابلي في موقف الجميع اشاد به وحتي الكابلي نفسه اعجب هذه الهاشمية علي قول اهلنا وكم كانت الايام جميلة ورائعة والدنيا بخيرها ياليتها تعود تلك الايام حتي نستمتع بتلك اللحظات الجميلة
وانا بدوري بهديك هذه الرائعة من درر ابراهيم عوض:
دايماً مساهرليك وعيوني باكيه عليك
ياروحي في كل يوم تشهد علي نجوم
اسهر مع الافلاك عيوني جافية النوم
حبيبي ايه نساك وايه علي قساك
لو تنسي إخلاصي انا مستحيل انساك
اشوف مثالك وين وكيف تراك العين
يا السادة يااسمر يا نائر الخدين
يا املي في دنياي ويا اعز مناي
انا هواي يرضيك كيف ترضي انتِ اذاي
اموت شهيد الحب لو ضيعتني عيون
شكرا عمنا دمت,,,,,,,,,,,,,,,,,,,,,

كم هو رائع وجميل أن تقضي وقتا ممتعا وكأنك فى حلم دون تخطيط أوسابق موعد ..

حاجة زي ما تكون محّلق فى العواصف وفجأة تهبط فى السكون..

الساعة السابعة مساء وذلك فى صيف 1974 وأغلب الظن فى شهر يوليو أو أغسطس كنت عائدا من أب روف راجلا من خلال إزقتها نحو ود نوباوي وبدون مقدمات - وخاصة الساعة ما زالت السابعة وهو وقت مبكر للحفلات ذلك الوقت - وبالقرب من منازل أسرة الخير الشفيع ( بيوت الشفايعة ) إذ بحفل عجيب وإبراهيم عوض متألقا والجيتارات تقول يا غربتي وكانت سهرة من ليالي العمر .

حدثني الأستاذ أحمد محمد الضو - كرنكه - أنهم كانو طلابا فى الفاشر الثانوية على ما أعتقد وزار الفنان الرائع الراحل إبراهيم عوض المدينة وأقام حفلا ، فجمع الطلاب مبلغ عشرون جنيها ذهب بها ناظر المدرسة لمقابلة الفنان الرائع لإقامة حفل بالمدرسة ... ثم عاد الناظر للمدرسة ومعه العشرون جنيها وتحدث للطلاب فى إجتماع عام عادة يكون لجميع طلاب المدراس الكبيرة كخورطقت وحنتوب والوادي والفاشر يوم السبت بعض الحصة الثانية وقبل الفطور- فقال لهم لقد رفض إبراهيم عوض وسكت فعلت صيحات الإستهجان من قبل الطلبة لفترة حتى خّيم الوجوم المكان فأكمل الناظر لقد رفض إبراهيم عوض المبلغ وسيقيم لكم حفلا بدون مقابل ..... فعلت الوجوه سحابة من الخجل .... ذلك الرائع الفنان الذري إبراهيم عوض عليه الرحمة.

وتظل هاتان الدرتان الأجمل لحناً وكلمات من بين أغاني إبراهيم عوض بالنسبة لي.....

* ألم الفراق :ـــــــــــ

يوم الحبيب ودعني راح
ضاعف علي الم الجراح
كان لي أمل أجد انشراح
واجد مع المحبوب صراح
أحكي الم الفراق واشكي
لي مين أنا احكي
يا روحي ما هذا الصدود
وأنا دمعي جاري على الخدود
لو كان قليل خليك ودود
فرط الدلال فات الحدود
أنا يا جميل عاشق أسير
أعتز بيك وأهواك كتير
لو قلت لي غيرك سمير
مولانا عارف الفي الضمير
أنا يا حبيب الروح محال
أنساك ولو هجراني طال
لو أبعدك عني الدلال
لابد من يوم الوصال

****
****

* عزيز دنياي :ــــــــ

كنت معاك سعيد الليله
في بعدك ما اضناني
بصبر يمكن يفيد صبري
ويمكن نرجع تاني
وخايف الناس تغريك
تنسى دموعي وتنسى حناني
وأفضل مخلص ليك
لو حتى سعادتك في حرماني
أضحي بزهرة عمري
علشان ما تعيش طول عمرك هاني
وإستشهد بي الحاني
واوري حقيقة أمري
عرفت الحب من قبلك مره
وإنت الحب العاش في كياني
بهرب منك لرضاك
وبحاول من أجلك أنساك
أمهد ليك تتخلص مني
ألقى خطاي تجمعني معاك
ولو تعرف عايش على عطفك
وكل حياتي من املاكك
تعرف يوم في دنيا غيابك
يساوي سنين في دنيا هناك
يا اعز عزيز في دنياي
أنا طامع ابقى عزيز دنياك

لك التحية الفضل وماشاء الله ذاكرة حديد وزمن جميل وذوق الناس كان رفيع والفنانيين كبار ومتواضيعن وكانت لهم رسالة فنان في حجم ابراهيم عوض يقطع كل هذه المسافات في ذلك الزمن الصعب طرق وعرة وظروف صعبة لكنهم كانوا يجولون كل انحاء السودان للتواصل مع معجبيهم
اما فنانين هذا الزمن العجيب حدث ولاحرج
في ايام العيد التلفزيون اجري لقاء مع الفنان محمود عبدالعزيز سأله مقدم البرنامج: من هو فنانك المفضل؟ طبعا اكيد فنان سوداني يرد محمود عبالعزيز: فناني سلطان الطرب جورج وسوف:؟
مقدم البرنامج: يسأله ثانية لا اقصد من الفنانين بتاعننا هنا ؟يرد محمود عبدالعزيز طبعا الفنان معتز صباحي؟؟
وصمت الجميع في زهول يعني ياحضرة محمود عبدالعزيز طالع ونازل تغني اغاني العظام من الفنانيين السودانيين وفنانك المفضل جورج وسوف والله الاختشو ماتوا.

يا سلام علي الطلة الجميلة ويا سلام علي عزيز دنياي ؛ وتعرفو كم انتم عزيزين في دنيتي . وقصتي مع عزيز دنياي طويلة ياول وبشري هل تصدق طيلة دراستي في الجامعة ماحصل يوم الا وغشيت عمنا بشير صاحب كافتريا المقصورات في جامعة السودان وهو من سكان حي العرب ذاك الحي الولود بالفنانين والشعراء الا واطربني بعزيز دنياي وكباية شاي من النوع ابو كديس في الصباح وانا بحييه من هنا وربنا يمعته بالصحة والعافية
دمتم