الشهادة السودانية وقصصص وحكايات!!!!

لفت نظري المانشيت الكبير عن اعلان جدول الشهادة السودانية!!!
وقلت لنفسي كانت لنا ايام وحقيقي لن تعود ولا اظن ان الزمان سيجود بمثلها ابدا وافشيكم سراَ كنت طيلة ايام الامتحانات ادندن باغنية احرف كلماتها ولا احرف اللحن
هي ...بكرة يا قلبي الحزيييييييييييييييين تلقي الشهادة !!! وطبعا وامسح الدمع البسيل ويملا الوسادة !!!!
كانت الشهادة المحترمة امراً عصيا يحتاج مجهوداً خرافيا!!!
وان نسيت لا انسي مساعدة الكل لكي احصل علي المبتغي ...من المساعدات خارج اطار العائلة الحبيبة ...مساعدة لم استطيع نسيانها ابدا وهي من عماد الباقر حيث التقي الوالد حاملاً (باغة مليئة بالبنزين) بعيَد صلاة المغرب وطبعا الكهرباء كانت بتقطع بدري والله والله لم يسأله لا انا ولا الوالد لوحده قرر المساعدة وكان لابد من ذكر هذه المعلومه وهذا فقط لاظهار جانب الخير في اهل ابوجبيهه .. ربما يكون نسي الامر ولكني لم ولن انساه ما حييت واطلب من الجميع الدعاء له بالخير....امين
اها العايز يحكي زكرياته مع الشهاده منووو؟؟؟؟

من الأصوات الجميلة الرائعة صوت الفنان المرحوم : خليل إسماعيل ....ومن اغانيه الجميله .... طبعاً كما ذكرت كانت ولازالت ومابرحت وما فتئت أن لي امجاد وموجوده الآن بمنزلي بامدرمان ... هذه الأمجاد عرفتني مع شخصيات كثيرة ... كنت راجع من مشوار من الحتــــانه واجد امامي على الطريق الفنان العملاق خليل إسماعيل ... وقد اشار لي ... ووقفت وسلم على وركب وسلمت عليه ... وبدأنا في الكلام ... وقلت له من أجمل الأغاني لديك بالنسبة لي ...اغنية بسحروك ...في بنات الجيل بشوف حسنك فريد... وبدأ يدندن ويتمايل في عفوية صادقة ... حتي وصل المقطع ..... العجيب كل البنات منك تغير..... شافن الجسم اللطيف زي الحرير .... والغزال حاسدك عشان فيكي الضميـــر ...والهلال من نور جبينك يستعير... بسحروك الناس عشان مابشبهوك....وجد إستمتعت بالأغنية .... ولم آخذ معاه حد من الطريق رغم الحوجه للمواصلات عصراً .... وحينما اوصلته الشهداء اخرج لي الف فقط .... تعجبت ... وقال لي ممكن توصلني دار الفنانين وبديك 5 الف سوداني ... برضو يا النقر والله العظيم (5 الف ) وقد كان ... الله يرحمه يارب ... عماد الباقر الإنسان بالجد شعوره نبيل نبيل وهذه سماحة اهل ابوحبيهه الطيبين ... ولعماد التحية وسؤالي ايـن صلاح الباقر؟؟؟!!! .... محبتي .....

اهدي أغنية بسحروك لكل محبي العملاق الراحل خليل إسماعيل :


بــــــســحــروك

في بنات الجيل بشوف حسنك فريد .
فيك قوام زي الغصن وكتين يميد

والجمال الفاتن الفات الحدود
ربنا يغطيه من عين الحسود

والله خايف في مشيتك يسحروك
بسحروك يالسمحة لو شافو الخدود
ولا شافو الأعين المكحولة سود

خوفي بس ياسمحة ما تصيبك عيون
بسحروك في البسمة لو شافو السنون

السمار الباقي ليك يا حلوة لون
والدلال والروقة والنغمة الحنون
ياشبيهة الحور بخاف ما يسحروك

بسحروك يالسمحة لو شافو الخدود
ولا شافو الأعين المكحولة سود

العجيب كل البنات منك تغير
شافن الجسم اللطيف زي الحرير
والغزال حاسدك عشان فيكي الضمير
والهلال من نور جبينك يستعير

بسحروك الناس عشان مابشبهوك
بسحروك يالسمحة لو شافو الخدود
ولا شافو الأعين المكحولة سود .

خليل إنسان بمعنى الكلمة .. سأل فى برنامج ليالي النغم عن أبوعركي ... وعركي إنسان نبيل ونظيره قليل ، كان صديقا لخليل إسماعيل يسأل عنه ويجلب له الدواء........ تلعثم خليل فى الإجابة ثم قال : لا أجيد الحديث عن نفسي ......... ما أبلغ تلك العبارة ، عركي وخليل مثال للإنسانية وسودان زمان.