شعر العامية عند صلاح أحمد إبراهيم ..ياقلبي دق لكن بشيش

ياقلبي دق لكن بشيش
صلاح أحمد إبراهيم


من ديم مدينة ... وديم عرب ... وديم اب حشيش

للمينا ... لي رامونا ... او من اربعات لتراب هدل

ومن انقوياي ميل جاي وشيل عند الاصيل لمصفى شل

بالله هل ...

شفت الورد في باقة ماشي وفي شفافيو بيندي طل

او لمحة من شباك اطل

شباكو شيش

ياقلبي دق لكن بشيش

لا ينفضح للناس هواك

قول ليه ناشدك من هناك

شايلني ليك براق شلع عبادي

شققني الاراك

دوخ شذاه الفجري من الاتبراوي

لحد جبيت

وقفني فوق جبل اركويت

قال لي دير عينيك تحت

شوف السما النزلت

وعامت في البحر

خذ ليك نفس املأ

شعاب رئتيك بشر

واسجد وطوف من بيت لبيت

تلقى الامل بالفرحة قوم ليهو ريش

اهدي الجواهر والحرير

بنت الامير

شقيانة في الحر لابسة خيش

نقرش قليبك بس بشيش

كم فيهو قاطع ليك وتر

قل للملاك وقتين سفر

سيد مهجتي الما ساد سواك

جاييك اموت مرتاح حداك

سميهو حب، سميهو جن ، سميهو طيش

اموت وتسلم لينا يا غالي وتعيش

اموت لبسمة تضوي في الثغر الجميل

زي نيل تبهرج بالقمر

الرملة والقيف والشدر

ليلك طويل بالغربة جاريها السهر

مانسيت مواثيقنا القبيل

اصدح بفرحتنا القلوب تصدح معاك

واموت وفي شفتي غناك

قرقورة لاصقة على الحجر

عصفورة ضاميها الوكر

مطمورة فضت ليها عيش

شبورة نازلة على الاراك

شبورة نازلة على الحشيش

وياقلبي دق لكن بشيش