الرائع عوض أحمد خليفة ..شاعر الكلمة الأنيقة

مواصلة لما بدأت عن تعريف أبنائنا ببعض ممن أثروا ساحة الغناء الفني بروائع خالدة لم تغير فيها الأيام ولم يملها السامعون بل تزداد بريقاً وألقاً كل مامر عليها الزمن. تكلمت من قبل عن عبدالمنعم عبدالحي ذو الجذور الجنوبية وعمر البنا ابن أم در وخليل فرح واليوم أتى الدور على شاعر كان له أثر عظيم في عاطفة ووجدان أبناء جيله والأجيال التي تلت جيله. مثله مثل الصاغ محمود أبوبكر وعبد المنعم عبدالحي كان عسكرياً رقيقاً تغنى له الكابلي بكيف يهون يا أغلى من عينيَّ وعثمان حسين بعشرة الأيام وربيع الدنيا ويانوره وخاطرك الغالي وعبدالعزيز داؤود ب أو تذكرين صغيرتي وإبراهيم عوض بغاية الأمال وعركي ب لو كنت ناكر للهوى زيك وزيدان في بعدك ياغالي أضناني الألم وكثير من الفنانين وإليكم نبذة صغيرة عنه:
"
فالشاعر عوض أحمد خليفة هو العوض وداعة الله أحمد خليفة من مواليد ام درمان 1931م بشارع الفيل في الموردة درس الخلوة والكتاب الإبتدائية، الوسطى بأم درمان ثم الأحفاد الثانوية اجتاز شهادة كامبردج التحق بكلية غردون لمدة عام في كلية الآداب عام 1949م وفي فبراير 1950م، التحق بالكلية الحربية وفبراير 1952م تخرج فيها برتبة ملازم ثاني، خدم في القوات المسلحة الهجانة كردفان، سلاح الإشارة أم درمان، الجنوبية جوبا تدرج إلى أن وصل رتبة يوزباشي «نقيب» ثم فصل من الجيش السوداني لأسباب سياسية تتعلق بالحركة التي أعدم فيهاعبدالرحمن كبيدة وعلي حامد وعبدالبديع علي كرار، عمل ضابطاً لمدة عام بمشروع الجزيرة.. عاد للحكومة في وزارة التجارة مفتش تعاون بمصلحة التعاون وتدرج إلى أن وصل مساعد مدير مصلحة التعاون 1969م، وفي هذه الفترة التحق بجامعة القاهرة لينال درجة دبلوم الإقتصاد. أعاده النميري للخدمة برتبة عميد في عام 1969 وتقاعد كلواء معاش.نسأل الله أن يمتعه بالصحة
نماذج من أغنياته:
كيف يهون
كيف يهون عندك خصامي و ترضى من عيني تغيب
و أنت بيك أسباب سعادتي و أنت أكتر من حبيب
شفت بيك الدنيا نايرة وعشت فيك أملي الخصيب

إنت أحلى من الأماني لما تغمرني و تعربد
و أحلى من طير الخمايل لما يتمايل يغرّد
و من جميلة جديدا تم لما تتنى و تزغرد
إنت ياأحلى الحبايب ما تهون حبي و تبدد
عشرتي فاقت حناني قلبي بيك دايما معيّد
وحبي ليك يا نور عيوني كل يوم يخضر يفرهد
ورغم حبي عليك أهون

ياحنان الدنيا كلو قصدي في حبك نبيل
حبي أجمل عاطفة سامية و الله أكتر من جميل
لو وصفتك وقلت طاهر كنت في وصفك بخيل
نور جمالك يا حبيبي بادي ما داير دليل
عشت عمري أغني ليهو في انتظارك لو تميل


يا ربيع الدنيا

يا ربيع الدنيا في عينيَّ يا نور قلبي يا معنى الجمال
يا اُخت روحي يا أماني هواي عشتها في دنيا الخيال

أنا فيك عشقتَ الروعة ما أحلاها في الدل والدلال
والمعاني الراسمة نور إشراقة في عينيك ظلال
وابتسامتك لما تأسر قلبي تحكي عن المحال
تحكي عن شوقك إلي وتحكي عن بُعد الوصال

من قلبي من اجل المحبة وهبت ليك شعر الغزل
مع انو قدامي الطريق أنا عارفو يا السمحة انقفل
مافي قسمة ومافي يا نور قلبي حتى بصيص أمل
ما قدرت اقرب من ضراك وما قدرت لي فراقك اصل

يا حبيبه ليه ليه قلبك قسا وكتمتِ ما تُخفيهُ عني
أنا عشت في حبك مقيم ما عرفت نُكران أو تجني
ما عرفت غير حُبك غرام وسرحت فيهو سنين بغني
وهبته دمعاتي الغوالي وهبته عمري أنا وهبت فني

يا نورة

يا نورة يا نور القلوب يا نورة يا نور الامل
يا نورة من بعد الفراق احزاني كم ابكت مقل
يا نورة ...

يا نورة يا زينة الحسان يا باقة من احلى الزهور
يسكر شذاك العاشقين وتفرحي القلب الكسير
يا نورة ما تنسي الوداد الصنته من اعماقي نور
من قلبي دفاق الحنين لقلبك الفياض شعور
يا نورة ..

يا نورة يا امل القلوب التايهة في بحر الزمان
في لهفة تسال عن حبيب يرعاها بالحب والحنان
يا نورة إشراق السنين وغرامنا عندك امره هان
من بعد ما نورتي قلبي وبيك لقيت دنيا الامان
يا نورة ....

يا نورة لو دار الزمن لا بد تتلاشى القيود
الجايرة مابترحم حبيب مشتاق يغني حبيبه ريد
يا نورة حبات الامل في قلبي كل صباح تزيد
تكفيني ذكراك في الفؤاد لو عشت من بعدك وحيد
يا نورة...

لو كنت ناكر للهوى
لو كنت ناكر للهوى زيك كنت غفرت ليك
كل العذاب العشتو في حبك وكنت حنيت عليك
لكني عايش للهوي لكني عايش للشقا وكل يوم بترجي فيك
وريني كيف اغفر وانت شقايا سببتو بي يديك
حاولت اخدع نفسي يا ظالم واهجر حبي ليك
حاولت امنع نفسي منك وتاني ما امشي واجيك
ورحلت عنك وعن دياري وهدمت كل امل لديك
وبرضي ما قادر اسيبك لما أطراك أشتهيك
مع كل دفقاتي الحنينه
وكل دمعة شوق سجينه
تهاتي بيك روحي الحزينه
وريني كيف اغفر وانت شقاي سببته باديك
ما كنت قايل يوم بلاقي الحب ولا بعرف دروبو
ولا قلبي من شدة إباه بتقدر الاشواق تذيبو
لكن غرامك حبة حبة كاويني بي نارو ولهيبو
وسرقت قلبي يا حبيبي تاني كيف منك اجيبو
وانت يا ناكر غرامو
قلبي ما بتسمع كلامو
ودون سبب يرضيك خصامو
ولوعة العشاق تصيبو
تنساني كيف يا ظالم وقلبي معاك مفتكرك حبيبو

صغيرتي
أوتذكرينَ صَغِيرتى أو رُبَّما لا تذكرينْ
الخمسة الأعوامُ قد مرّتْ وما زال الحنينْ

الشوقُ والأحلامُ مازالتْ تؤرقُ والسنينْ
أم كان حباً ياتُرَىَ أم كان وهم الواهمينْ
هل كان حباً لاهياً أم كان شيئاً فى اليقينْ
هل كنت تعنينَ الــــذي ما تدَّعين

مازلتُ أذكر خصلة عربيدةً فوق الجبين
مازلتُ أقرأُ فى السطورِ فأستبينُ البعض أو لا أستبينْ
والعطرُ والأنسامُ يغمرني بفيضِ الياسمينْ
منديلك المنقوشُ جانبه أو تذكريه أو تذكرينْ
ما كان قَصْدِى أنْ أَبُوحَ فربما لا تذكـرين

متعك الله بالصحة والعافية..
لقد متعتنا بهذا البوح والسرد السلس ..لمعلومات غائبة عنا...
متابعة بشغف ...شديد
دم في خير عمي العزيز

إنت أحلى من الأماني لما تغمرني و تعربد
و أحلى من طير الخمايل لما يتمايل يغرّد
و من جميلة جديدا تم لما تتنى و تزغرد
إنت ياأحلى الحبايب ما بتخون حبي و تبدد
عشرتي فاقت حناني قلبي بيك دايما معيّد
وحبي ليك يا نور عيوني كل يوم يخضر يفرهد
ورغم حبي عليك أهون

كنت ياود نوية طالباً بأولى وسطى حينما تغنى الكابلي بهذه الرائعة ثم إني أعتذرللحسين الحسن وضنين الوعد لصديق مدثر حجاز..مأحلاهم وما أحلى أيامنا ديك

ابدا ما قصرتو الله يديكم العافيه