بيوتنا زمااااان ... وعفشنا زماااان ...

البيت كان زمان بسيط جداً وخاصه في اثاثه ...معظم البيوت كانت بداخلها العناقريب ... والعنقريب كان مجلد بالجلد( السيور ) او بالحبل سواء أكان حبل سعف او تبلدي ... ودائماً يفرش للضيف أجمل شئ ويتم تكريمه بالترحاب به والإسراع بفرش البرش ... تعبيراً لمعزته وتقديره ... ودائماً إذا حضر واحد من المدينةللقرية تفرش له الأرض ورود ..رقم الإمكانيات البسيطه ...وكرم من نوع خاص خمس نجوم ...العنقريب السمح ... والكورة السمحة ... وبراد الشاي السمح والأكل السمح وغالباً ... ما يطارد الأبناء الصغار ديكاً لكي يذبح للضيف العزيز الغالي ... وتجد كل الناس في بشاشة كاملة مجتمعين ومتلمين حول الضيف وقد يكون جلوسهم أرضاً إحتراماً وإحتفاءاً بهذا الضيف ... ولكن بكل اسف حينما يأتي ضيف من القرية للمديتة ينظر له نظرة إستهجان وإستحقار ... وقد لا تفتح له البيوت وتوصد الابواب في وجهه..وقد يقابل مقابلة بكل إستخفاف وسخف ...لماذا كده ايها الأحباب ؟؟؟؟ وكان الأثاث بداخل البيوت إما تربيزة خشب او اربعة شعبة ... وتعرش بالطين اللبن في شكل تربيزة كبيرة كي توضع بها الأواني والسبب قلة الإمكانيات...ومن أثاث البيت: المشلعيب والروشان ...والمشلعيب حبال منظومة في شكل برواز جميل يمكن من وضع الإناء كالكورة او الحلة بداخله وحتي لاتصله يد الصغار ... وايضاً خوفاًمن الكلاب والقطط ...وغالباً ما يعلق بسياج البيت العلوي من الداخل ( ويسميه بعض الناس دواء كلب واعتقد اهلنا بغرب السودان). والروشان : مجموعة من الحطب الشقيق تجمع في ضفيرة (في شكل ضفيرةالجبيرة مثلاً) وتوضع فوق كارة المنزل لوضع الأواني كالحلل او العجين او اي شئ من هذا القبيل ... وحينما تطور الحال ..تم تصنيع السحارة ... وهي صندوق خشبي منقوش بصورة جميلة لوضع الأواني بداخله ...وقد لا أبالغ احياناً الملابس ... ولو ان هنالك مكان مخصص للملابس ربط حبل طوله مترين تقريباً لوضع الملابس عليه يربط فوق مستوي الراس أو وضع قناة ( قناية ) طويلة داخل البيت لوضع الملابس عليهاأيضاً ... لا توجد دواليب في ذلك الزمان ... وحينما تطور الحال ... تم تصنيع شنطة الحديد ... باشكالها المختلفة بعد التطور طبعاً... وسؤالي هل توجد ببعض منازلنا حتي الآن السحارة والروشان أوالمشلعيب ؟؟؟... والبرش العريق الجميل ؟؟؟...وصدقوني السباته لعبت دوراً كبيراً في حياتنا ...وقد لا نستبدلها في زمانها بأغلي وأجمل انواع الموكيت ...كنا نفرشها للجلوس الجماعي ، غداء ، وجبات مختلفة ..رحلات ... أو للتلاوة ، اوللمناسبات ، أفراح ... حفلات ومعاها الرتينة طبعاً ....وذلك هو الزمن الجميل وياليته يعود .... محبتي ...

عشت يا ابو علياء يا عثمان ابو ماضى (دى على وزن ايليا ابو ماضى).
أشكرك على الروعه والتوثيق الجميل لحاجات زمان يا ود يا (روشان)..... ولد دا

ابو علياء عاوز يرجع البلد
الروشان ودوى كلب موجود حتى الان في ريفنا
وحتى البروش موجودة
وحفاظا على هذه الاشيا قام اخونا عبدالرحمن كمبال
بجمع العديد منها في منزلة مثل القدح والرش الدرة والطبق (غير الطبق المعروف للغطا) طبق تقدم فيه الحبوب مثل السمسم والفول
و العطفة والمندولة (انا من السعف) والخمام
زينة فتيات الرحل
واشياء في طريقها الى الندثار

يا سلام علي السرد الاكثر من رائع! ويا سلام علي المعلومات المرتبة والمموسقة والجميلة!
"كم كان السودان جميل وناسه طيبين"
الحاجات ديل فيهن حاجات شفناهن وفي حاجات حجونا بيهن حبوباتنا الله يرحمن ويحسن اليهن يا رب
وتعرف الواحد لمن كان صغيييييييييييييييييروني كان مستمتع بالحياة اكثر من لمن كبر
والحياة البسيطة احلي واكثر متعة والله00
في امان الله وحفظه

ما براى يا ابو علياء كتار غيرى ما بعرفو الروشان وما أدراك ما المشلعيب...... وهذه هى بنيتك الدكتوره تعترف كما أعترفت لك أنا على الهواء مباشرة

شكراً عم شاويش لهذا الابداع والحياة كانت رغم بساطتها تظل اجمل واحلي لا يوجد بها تكلف
التحية لك

الخال شاويش
متعك الله بالصحه والعافيه
اسلوبك جميل فيما يتعلق بالتراث واللذى تقهقر امام المد المدينى

اخي عثمان لك التحية يا رائع وحقيقة اتحفتنا بهذا الكلام الجميل عن الزمن الجميل
(وصدقوني السباته لعبت دوراً كبيراً في حياتنا) طبعا كانت برقصوا فيها العروس وغني ليها الفنان عبدالرحمن عبدالله ود بارا والله يابخت السباتة الظاهر شاعر الاغنية ماخد شاكوش من النوع ابوكديس
شكرا علي ابداعاتك

طبعا لابد من عودة لهذا البوست الجميل


بعض الذي ذكرته اصبح موجود فقط في المعارض التراثية لبعض الروابط الجامعية


والله يعينا علي اظهار الجميل الذي اندثر

نحاول نجمعه صورة وصوت انشاء الله
شكرا يادكتورة على رفع هذا البوست

صدقوني كلكم ذوووق ... إحياء هذا البوست يدل على صفاءكم ونقاءكم الداخلي ... في محيط الواقعية التي تعيشون بها في دواخلكم الصادقة ... محبتي ...

ابو علياء مشتاقين

ابو علياء ليك وحشة والله
وانشاءلله عافية

تسلموا على الشعور النبيل ... أحكي لكم نكته : بجهز نفسي عشان السفر للسودان .....وهذا هو السبب ... طااااارق حضر حالك لزيارتي ... بإذن الله ...( كما يقول جورج قرداحي طبعاً ) ...يا استاذ: صورتك الخايف عليها ؟؟!! ونحنا ما خايف علينا؟؟؟وفيها إيه إنسان بعزك لو يحمل ليك صورة ؟؟؟؟ولا زلت انتظر يا استاذ عوض ؟؟!! .... محبتي لكم .

لم تتأخر الصوره الا بسبب الكياشه وعدم معرفة انزالها لكن المحاولات جاريه

بخت السودان وناس السودان يا الماشين السودان





--------------------------------------
المنتدي حيكون حزين

بصراحة أنتي زهرة المنتدي اليانعة ... وأنتي روح هذا المنتدي بنيتي الغالية ... وفي إحدي مدخلاتك وسوق الناقة ..لقد اضحكتيني كثيرا ...قلتي للجماعة لو مشيتوا خليتوني ما عافيه ليكم ...ما هذه الدعابه الظريفة اللطيفة ... بس ربنا يخليك لينا ويسكنك الجنينة ...محبتي

تعاملك الراقي يخجلني ....
بس صدقني تعاملك منتاز .....

محبتي ....

ود الشاويش نازل البلد....خبر هام ..وهلا بيك ابوعفان والله البلد منوره ..لكن ياتو بلد ياخوى؟ انتو باقى المغتربين ديل مرات من (الخرتوم) بترسلو الحاجات للجماعة فى (ابجبيهى) وتعملو كاسين لورا..
بعدين ياخى انت تقول للدكتوره (الله يخليكى لينا ويسكنك الجنينة؟) الجنينة ما فى دار فور وحارة خلاص ..عشان كدا نحولها جنينة محمد احمد مختار فى الحباك...
دكتورة:
انى خيرتك فاختارى
مابين السكنة فى (دارفورى)
او قرب جنينة محمد احمد (مختارى)
اختارى
جبن ان لا تختارى
ان لم تختارى
سوف يزعل (فلس) (الانتحارى)

هذه هى الحقيقه عمو شاويش جد زمنكم كان اجمل واروع من الزمن دا الناس كانت بسيطه جدا وعايشه مبسوطه بس الحمدلله شكراُ عمنا عثمان.

انت دائماً رائع يا دكتور بصفاءك ونقاءك وطيبة قلبك ، بالجد إنت إنسان نحن نضعك في حدقات العيون وبنداري عليك لأنك عملة نادره في هذا الزمان ...وربنا يخليك لينا ويسكنك الجنينة ...يا دكتور الجنينة اصبحت عمله صعبه صدقني ..وجواز سفر دارفوري يكلف الأولوفات ... وتكون لاجئ معزز مكرم في اي دولة عالمية وخاصة الأوربية أوالأمريكية ... وبالجد ابدعت في القصيدة ...ما شاء الله الظاهر كان جنبك الباتيل زي ما يقول ولدي الظريف جداً ول نويه ... وصدقني وبإذن الله سوف اصلك بصيدليتك العامره بوجودك ...والجماعة بالجد شوقونا لشخصك الطيب العفيف ...وقد ضحكت كثيراً في كلمة الخرتوم ..شكراً لذوقك ...أما عن بناتي مروة وأختها بنات أخي كمال عبدالكريم ... إنضمامكم للمنتدي ومن ابوجبيهة يعتبر وسام شرف في صدورنا ايتها العزيزات ... تناضلون وتكافحون من أجل التواصل مع اسرة المنتدي وهذا بالجد شئ رائع تماماً...وصدقوني هذا الشعور زادكم رفعةو سمواً في نظري ...وربنا يخليكم لينا ويسكنكم الجنينة ...محبتي

دكتورة:
انى خيرتك فاختارى
مابين السكنة فى (دارفورى)
او قرب جنينة محمد احمد (مختارى)
اختارى
جبن ان لا تختارى
ان لم تختارى
سوف يزعل (فلس) (الانتحارى)
---------------------------------------------------------------------
اخترت بيت عمتي بت جدي الدقي شنو ليك

لك تحياتي وخالص ودي أخي عثمان على الموضوع الرائع وأهديك هذه المقاطع علها توصف وتضيف إلى ما تفضلت به ... ولك خالص تحياتي وتقديري



هادي البيوت مطمِّنا
ودايماً قريبِِة من البعيد
ذي مو غريبِِة على الدَنا
ماها المريبِِة
وماب تكيد
مفتوحه طيبِة و محاننة
زولاً يجيها في كل فجر
ولاَّ إن يتم كمين سنة
تتلقَّى ذي أم الجَنا

**********

البيت دا بيتك يا حبيب
أدخًل مخيَّر
وماك غريب
اتمدا في أقرب
عنْقِريب مبهول في حوضو
الهمبْريب
النيمة يا العنابة ضُل
أغشى التُكُل
خرْمان في شاي
جيعان أُكل
وداك التمُر
والزِير قريب
بايت من البارح ملآن
راقد في صدر الهمبريب
دُر تقرا ديك كتب الولاد
قلَّقت
أو طال الرِجِي
كُورِكْ
نقولَّك … هُويْ ..
بُعـــــــــــــــــاد
رسِّل لنا المرسال
نجي

ياسلام على القصيدة ...وهي من واقع حياتنا البسيطة الغير معقدة ... عيشه طبيعية ميه بالميه ...لا كيماويات ولا اشياء غريبة عن البيئة ...عنقريب وهمبريب وزير طبيعي ...هواء طبيعي نقي ...نعم هذه هي الحياة الطبيعية البسيطة من غير تكلف ...تسلم على مجداخلتك الرائعة ... محبتي

يديكم العافية ويا ود الشاويش الله يخليك لينا
الدكتورة...ذكاءك خارق واقرب بيت قريبة ليك جنب جنينة (محمد احمد مختارى) هو بيت عمتك بت جدك الدقى..(جواب صاح..صارو مية ريال)

أخي عثمان ... صحي مسافر ( صحبتكم الســلامة )
وآفر التحايا الى كل من يسأل وتحايانا للجميع, ونحن سائلين منهم
يا قلـــــبى يا مكتول كمد
اعصــــر دمــــــــــوع
هات غنوه لى سيد البلد
يا حليله .. " قام ماشي البلد "
بس بالله نظرة على السحارة ودولاب الخشب وجيب معاك مبخر طين

ذكرتني قصيده زمااااان ...أيام الزمن الجميل :

صحي مسافر ...
صحي مسافر وتمشي تسيبنا في أحزان بدون آخر ...إلي آخر القصيدة ...
((وقالوا العاوز عصيدة يكتب ليه قصيدة ... طلب رخيص يا غالي ...وإنشاء الله لو مشيت وجيت بالسلامة بجيب ليك طلبك وبإذن الله ...مبخر طين بس دي ساهله تب ... وربنا يحفظك يا غالي ... محبتي

.....

أنت بحر ... ثر المعلومات ...متفتح الأفق ..متواضع كثيراً ..كنز مخبأ ... تحت دهب ابوجبيهة ...صدقني انت درة غالية ثمينة ...وربنا يحفظك لنا ايها الشامخ ... محبتي