يا رزاز الدم حبابك

[color=blue]وا حلالي القبلي شال
شبال لمع برق المهيرة

قيرة قيرة يا مطيره

يا رزاز الدم حبابك

لما يبقى الجرح عرضة ولما نمشي الحزن سيرة

من دمانا الأرض شربت موية عزبة

كل ذرة رملة شربت حبة حبة

موية أحمر لونها قاني

فتقت ورد الأغاني

تهدي باسمك رمزاً للوطن كنز المحبة

قيرة قيرة يا مطيرة يا شهيد الشعب أهلاً

مش بتطلع كل يوم الشمس أجمل

و النخلة أطول جيد قامة

وياما شفتك ياما ياما

لما شفت البدر طالع فى سما الوطن ابتسامة

إنتّ فى النهر البسافر جاري طول العمر صاحي

طبعو منك يا الملامحك من ضفافو

واللي شافك مرة شافو

واسمك الختيتو فرهد عشب أخضر فى الجناين

فى الشوارع نيمة نيمة فى مصابيح المدينة

فى فوانيس الضواحي

تملا نادي الحلة سيرتك

اسمك الخلانا نقدر فى ظلام الليل نعاين

والبتسأل عنو ده الخليتو شافع

لسه دابو

يا ما حيعجبك شبابو
صوتو رن فيهو بحة

ود ملان اصرار وصحة

عندو قصة حب جميلة

جرب آلام الحراسة وحرض أولاد الدراسة

وهدّو حيل العسكرية

البنية أم طرحة كبرت

يا سلام الفنجرية

ليها راية وبى كلامها وبى اهتماماتها الجديدة

دقت أجراس القصيدة وشدت أوتار الصلابة

الكتوف اتلاحقت فى السكة يابا

واحلالي القبلي شال شبال لمع برق المهيرة

قيرة قيرة يا مطيرة يارزاز الدم حبابك

لما يبقى الجرح عرضة

ولما نمشي الحزن سيرة[/color]

شكرا ياحاج يامرهف إنتقاء رائع واحساسك دايما مرهف
احسنت الاختيار لك مودتي

لك التحية اخي وكم انا فخري وفرحتي بمعرفتك وكل اهل الحباك
انا محمد هاشم صديق بل اخ للغالي محمد قادم نوية او كما يحلو لكم ول نوية فهوصديق دراسة دفعة في جامعة السودان للعلوم والتكنلوجيا - من ولاية الجزيرة مدينة النوبة علي هذا الاساس كنيت بهذا بي الاسم وهي بلد اجدادي ومسقط راسي من قبيلة البطاحين والان اشتغل في شركة دال للسيارات الخرطوم
وانا سعيد كل السعادة بمعرفتكم وبحب الحباك واهلها الكريمين الطيبين ؛بس صحبي دا عيبو من الصهاينة وكدة متعبنا شديد ربنا يهديهو بس
وكلمني بيك ود قادم ومرة قال لي شفت الزول الشايت كولن دا من اولادنافي الجناح الغربي لجامعة السودان(مع ناس ابو ام سلمة )صح؟ طبعا كنا مزنوقين مع الامتحانات و الايام ما اسعدتنا اتعرف بيك ؛اها لمن لقيت اسمك هنا واتزكرتك سالت منك ود قادم قال لي ياهو زاتو بس
لك التحية والتقدير

البنية أم طرحة كبرت
يا سلام الفنجرية
حليلكم يا ود النوبة و الحاج.....

يا ود النوبة سلام .... مرحب بيك ذكرتني بعمنا الراحل موسى سليمان وعبدالله العبد وخالتتنا بتول وبناتهاوأولاد عم موسى دكتور محمد وبشير وربيع ودكتور كمال وأصهارهم دكتور بخيت وعبدالله محمد خير وأولادهم وأخص العزيز ضياء ..أرجوا أن تمدني بهواتفهم إن كان لديك تلفون كمال أو ضياء عبدالله محمد خير .... ولقد زرتهم كثيرا بالنوبة الجميلة

عمك وأخوك أزهري

شكرا الحاج على هذا الألق الجميل البخلي الكلمة تسافر جوه عقلي وتغلي في حلمي وتفرقع فى الصحارى ويا رزاز الدم حبابك !!