لا رفضا للبشير............ ولكن!!!!!!!!!! (منقول)

حقك تحرسو ولابجيك..حقك تبارى وتقلعو
تعالو كدى نقعد فى الواطة ونعاين للمشكلة من جميع النواحى ومن الاعماق ..اولا بتقولو البشير عمل الكبارى وعمل سدمروى ..حقيقى عمل كبرى رفاعة وعمل سدمروى وحاليا بعمل فى كبرى الحلفاية الحتانة وعلى وشك الانتهاء يعنى نهاية شهر 2او شهر 3 بيتسلم القصة ماكبارى ..طيب لى ماراودتنا الاسئلة انو اشمعنا عمل الحاجات دى اسى ماهو من زمااااااان قاعد ؟؟؟؟ولاعشان الناس لما تجى الانتخابات يقولو عمل لينا وعمل لينا نفوزو؟؟؟؟مانعاين للشارع السودانى البقى كلو اطفال مشردين ودا نتيجة لى امو اهلهم ماقادرين يدفعو ليهم مصاريف المدرسة وين دور الحكومة فى مجانية التعليم؟؟حتى المدارس الحكومية بقت قروش خيالية ..نجى تانى نلقى كل الشباب محطمين شغل مافى الابواسطة كم وكم خريج وخريجة قاعدين من غير شغل يعنى عندك ضهر بتشتغل ماعندك الله معاك ..ولانمشى بعيد للسودان الواسع دا نعاين بس على مستوى المنتدى كم مغترب ومغتربة هاجرو من السودان عشان مايقدرو يوفرو لاولادهم واهلم سبل الراحة ويقدر الواحد يحوش ليه انشاءالله غرفة لاهله وامن مستقبل اولادو ..وهنا الوظائف والقروش محتكرة عن طبقة معينة من الناس (......)تقدر تقول اسى لا قدر الله اسى دول الخارج رفضت السودانين وين حايمشو المغتربين والفى السودان مالاقين ياكلو حيعملو شنو مثلا حيبقو سواقين ركشات كلهم ولا حيجيبو هايسات عشان ماتجى ماشى من الخرطوم للكاملين مثلا يوقفوك ناس المرور يقولو ليك الهايس ماممكن تسافر تمشى دائرة المرور تطلع تصديق ب70جنيه تجى تورى ليهم يسمحو ليك بالمرور ياربى التصديق دا فيه زيادة لساتك بتخلى الهايس دى تمشى ؟؟وبعد دا بتقولو مافى احسن منو يعنى حيجى زول يعمل اكعب من كدا؟؟؟وبتقولو الناس ديل شبعو بعد كدا بعاينو لينا احسن من اجى زول ياداب جيعان .لو منتظرين يقولو ليكم نحن شبعنا هاكم يبقى بالجد (سجم خشمنا)...مانعاين لدارفور فيهاكم قرية اتحرقت فيها ؟كم جيعان؟فيها كم نساء اختصبو؟؟
بالجد لازم نصحصح شوية ونوعى بحقوقنا الماقادرين نتكلم بيها عشان لو طلعت الشارع وقلت الكلام دا على مستوى الشارع السودانى كم من امنجى بقيف فى وشى وكم من ناس دخلو معتقلات واتسجنو عشان حرية الراى الشخصى ...
نحن مارافضين البشير ولكن مراعاة لحقوقنا ....واذا اتوفرت كل الاشياء مثلا الشغل,مجانية التعليم,مراعاة حقوق المراة,وجود وطن خالى من المتشردين فالف مرحب بالبشير.......