ليل الظنون ...

هذه المساحة اليومية مخصصة للكلمة الرصينة والحرف البهي ...
وهى نافذه للإطلاع على كل ماتيسر من الشعر والبوح عودة طيبه بالقصيدة إلى موطنها الأول وجسرا" من المحبه والتواصل والإحترام .. بعد الغياب :

أسامة تاج السر

وكتين عيون الزهر نامت

والشمس

لبست وشاح الإصفرارْ

عزفت جداول الروض غنا

وشقشق على الغصن الهزارْ

والكون لبس طعم الأصيل

واتشعشع الليل بالنهار

ونَّست عصفور بيتنا بيك

صدحت حبيبتو على الغصون

غافلني طارْ

قت ليهو يا عصفور خبارك

لسة ما كِمل الحوارْ

نقرش على الوتر الجميل

ذوَّب سكون الكون غنا

فرا الجناح

ضد الرياح

في عشو ضماه الجنى

وكان كل همو مع الصباح حبة قمح

في جوفو تنزل بالهنا

لا خاف من الصياد يصيد

لا فت في عزمو الضنا

قتليهو يا طير الفرحْ

وريني شين طعم اللحون

وادعني في غمرة ظنوني

وغنى يا ليل الظنون:

كحل رموش القمرا بي مرود بهاك

واكسيها من توبك جفون

خليك ملاذ المتعبين

بالرقة

بالحضن الحنون

وزع كما ضي النهار نبع الفرح

بدد عن الناس الشجون

وأنا في أساي

رددت في ليل الظنون:

ليه يا قدر

تحرمني من فرحي الجميل

كل ما نبت ريش الفرح

ألقاك تقص مني الجناح

كل ما ألِم قش الفرح

تفجعني بي صوت الرياح

وانا كل مناي

لو أبقى ذي عصفور طليق

أهدي للناس السماحْ

أنا كنت سابقت الرياح

وشتلت خاطر الناس فرح

أنا كنت لملمت الشعاع

ونسجت قوسين من قزح

ونسجت من ضو النهار منديل حرير

لو مرة زولاً انجرح

وفتحت منفذ للحون

لو مرة طير الحب صدح

وكنت علمت النحل

من بسمة الطفل الغرير

كيف يقدر يقتات الرحيق

وكنت لاطفت النجوم

في ظلمة الليل البهيم

تمنح عيون الكون بريق

وكنت رشَّحت الجمال في الكون ملِك

يحكم على الناس بالأمان ..!