برجك بالسوداني.....وتعال شوف !!؟

برج الكديسة:- 25\12الي 24\1



الاسبوع دا زي الزفت معاك.... يتسرق موبيالك...من تحب يفكر ان يديك شاكوش.... لكن كضاب ما بيقدر داخل في ضفورو من كبابي الشربات السقيتن ليهو...



برج العتود 25\1 الي 24 \2



البتجي من السما تحملا الواطا الحرامي يسرق هديماتك كلهن....كن واطا ... وقوي...

علي صعيد القلب احدهم يفكر في ان يحبك لكنو مستني لحدي ما الملاريا تخليهو .. اصبر وتصبر وأديهو فرصة....



برج النعجة: 25\2 الي 24\3



حسادك كتار في نعلاتك الجديدة...مشكلة في طريقها اليك سببها الباقي الذي يحاول ان يزوق بيهو كمساري الحافلة.....

القلب: من تحب عندو فتاق في الصُرة داسيهو منك ...يحتاج الي تعاطفك... كن حنون...



برج الجراده: 25\3 الي 24\4



لا تحزن بنطلونك الوحيد وعاجبك يضيع عند المكوجي...القلب بالرغم من حرصك الشديد حبيب القلب يكتشف انك بتسف صعوط... نوصيك بالتبرير إنو ضرسك موجعك...



برج الحاشي 25\4 الي 25\5



بوليص الحركة يقطعّك تلاتة ايصالات مخالافات بالرغم من انو انت ماعندك عربية كن صبور والمؤمن مبتلى....

القلب: حدد بتريد منو؟ .. امك واللا مرتك.... واللا فلانة ديك؟... راجع فلم انف وثلاثة عيون....



برج الغنماية 25\5 الي 24\6



لاتنوم تحت الحيطة الغربية من بيتكم لانها ممكن تقع في أي لحظة....

القلب..حبوبة جيرانكم المخرفة تنشبك فيك وتفتكرك زوجها .. تعامل مع الموقف بحكمة واتوكل علي الله واعقد عليها!



برج الجريو: 25\6 ال 24\7



الجاتك في مالكك سامحتك... لا تصدق لا سامحتك ولا حاجة وانت مفلس كدي....فنانك المفضل ياخد علقة في حي شعبي....

القلب زوجتك تكتشف علاقتك بست الشاي..... لتلافي الحرج ارفع شعار الشاي مضر بالصحة.....



برج ام سيسي: 25\7 الي 24\8



أبعد البستي كولا الحجم العائلي عن متناول يد جدك نفسو صغيرة وشرفان .. قد يتنفخ وربما يتلحس....

القلب علقة من أحدهم لأنك تشبه الخالق الناطق من ينافسه في الجيكس حقو..... أقبل إعتذارو و أعلم ان الدق قسمة ونصيب....



برج الضب 25\8 الي 24\9

رئيسك في العمل مكجنك وشاميك....تزيد كجنتو هذا الاسبوع...

القلب.... شكلة بينك وبين من تحب سببها صرفة الختّة..... خليك تفتيحة.....





برج التامبيرا 25\9 الي 24\10

هذا الأسبوع يتاورك الحِيبن مرة اخرى.... لا تكترث لنضم الناس امشي بالطريقة البتريحك.....

القلب كن وفيا لمن تحب لأنو ح تنقطع أضانو اليمين في حادث حركة .. وأعلم ان الحب في القلب وليس في الإضنين....



برج الجداده :- 25\10 الي 24\11

كلبتكم تلد ستة جريوات تفقدو اتنين منهن.... ركز علي جيرانكم في اليمين الخشم بابهم اخدر....

القلب : صدق حبيبك فانه سهر الليالي لانو في جندبة دخلت اضانو بالغلط .... احمد ربك انها دخلت الاضان....



برج الدباسة 25\11الي 24\12



المال تلتو ولا كتلتو..... لكن كتلتو تصيبك....استعوض ربك ....

القلب:- من تحب الحمى تطلع ليهو في راسو وينضم برا من راسو ويحكي كل البينك وبينو ... شيل شيلتك....ونوصيك ان تبقى رقيق.....

برج السحليه

ما عندو تاريخ

الرياضة .. فريقك المكجّنو بفوز بكأس الكونفدرالية

يا كمندان يا طفره.
انا غايتو وقعت فى الدباسه لكن (فأل الله ولا فألها).
تحياتى للأسره الكريمه

والسحلية زايغ منها مالك يا أبو عويض

يا ابو الزهور صدقنى رجعت للبوست تلاته مرات افتش فى برجالسحليه واخيرا فهمت اللعب.
يا سيدى الف مبروك وبالجد الهلال لعب كوره حلوه

شكرا يا حبيب وددت المشاغبة .... صادق المودة